Jab Najikin Devil Eo

“Komin jab najikin devil eo.”—DRI EPESÕS 4:27.

1. Etke elõñ rar bere kin bed eo an Devil eo?

 IUMIN elõñ ebeben ko, elõñ armij rar lemnak bwe jekjekin Devil eo kar eñin ear wõr don ion deman, neen kar einwõt neen cow, ebũrõrõ im ear jibwe juõn made ñan jolallok armij ro renana ilo jikin kijeek eo. Bible eo ejjab errã ibben lemnak in. Ejelok bere, bwe lemnak kein rebwid rar kamakit elõñ million armij ro bwe ren bere kin bed eo an Devil eo ak ñan lemnak bwe ej baj juõn wãwen nana wõt.

2. Ta jen ian katak ko remol kin Devil eo?

² Bible eo ej kamol ilo alikar bwe Devil eo ej lukkun mour. Jesus Christ ear loe ilañ im konono ibben ion lal. (Job 1:6; Matu 4:4-11) Meñe jeje ko ilo Bible eo rejjab kwalok lukkun ãt eo moktata etan jitõb in, rej naetan Devil (melelen “Ri Ruruwe”) kinke ear ruruwe nae Anij. Ear bareinwõt bõk ãt in Satan (melelen “Ri Jumae”), kinke ej jumae Jehovah. Satan Devil eo kar naetan “serpent e ridto,” kinke ear kajerbal juõn serpent ñan mone Eve. (Reveles̃õn 12:9; 1 Timote 2:14) Bareinwõt kar naetan “eo enana.”​—Matu 6:13. *

3. Ta kajitõk eo jenaj uake?

³ Einwõt ri karejar ro an Jehovah, jejjab kõnan kajeoñe Satan, ri kijirãt eo elap an Anij eo emol. Jej aikwij bokake nan in kakabilek eo an ri jilek Paul: “Im komin jab najikin devil eo.” (Dri Epesõs 4:27) Ta jet ian kadkad ko kadkadin Satan jejjab kõnan kajeoñe?

Jab Kajeoñe Ri Ruruwe eo Elap

4. Ewi wãwen “eo enana” ear ruruwe Anij?

⁴ “Eo enana” ej tellokin bõk ãt in Devil, kinke ej juõn ri ruruwe. Ruruwe ej juõn nan in riap, ñan katton etan juõn armij. Anij ear kaiñi Adam: “A kin wijki in jela emõn im nana, kwon jab mõña jen e: bwe ilo ran eo kwoj mõña jen e, kwo naj mij otem mij.” (Jenesis 2:17) Eve ear jelã kin men in, ak ikijen juõn serpent, Devil eo ear jiroñ e: “Kom jamin mij otem mij: a Anij E jela, bwe ilo ran eo komij mõña jen e, inem mejemiro re naj bellok, im kom naj einwõt anij rõn kin ami jela emõn im nana.” (Jenesis 3:4, 5) Ruruwe in ear lukkun lap nae Jehovah Anij!

5. Etke rar ekajete Diotrepis kin an ruruwe?

⁵ Ri Israel ro rar bõk nan in kaiñi in: “Kwon jab itoitõk einwõt juõn dri ñiremij iolapen armij ro am.” (Livitikõs 19:16) Ri  jilek John ear ba ikijen juõn ri ruruwe ilo ran ko an: “I ar jeje jet nan ñõn eklisia ne: a Diotrepis, eo ej kõnan bwe en iroij ioir, e jab bõk kim. Kin men in, elañe ij iwij, I naj kememej jerbal ko ej kõmõnmõni, ke ej konono nae kim nan ko renana.” (3 Jon 9, 10) Diotrepis ear ruruwe John im tellokin bwe en bõk ekajet. Ejelok juõn Ri Christian etiljek ekõnan einwõt Diotrepis im kajeoñe Satan, Ri Ruruwe eo elap.

6, 7. Etke jejjab kõnan ruruwe jabdewõt armij?

⁶ Ekkã an walok ruruwe im nan in kinaak ko rejjab mol nae ri karejar ro an Jehovah. “Im pris ro relap im skraib ro rej jutõk im elap air kinaklok E [Jesus].” (Luk 23:10) Priest eo Eutiej Ananias im ro jet rar kinaak Paul. (Jerbal 24:1-8) Im Bible eo ej konono kin Satan einwõt “dri kinaklok ro jeim im jãtim, eo ej kinaklok ir iman am Anij ran im boñ.” (Reveles̃õn 12:10) Armij rein rar kinaake ir rej Christian ri kabit ro ion lal ilo ran kein eliktata.

⁷ Ejelok juõn Ri Christian ekõnan ruruwe jabdewõt armij ak riap nae e. Ak, men in emaroñ walok elañe jej naruõn juõn armij mokta jen ad jelã kin aolep nan ko remol nae e. Iumin Kien eo an Moses, kwalok nan ko reriap nae bar juõn armij ej tellokin bwe en mij ri kinaak eo. (Exodus 20:16; Duteronomi 19:15-19) Bareinwõt, men ko rekajõjõ ibben Jehovah rej koba “juõn dri kennan wan ej konono nan in riõp.” (Jabõn Kennan Ko 6:16-19) Emol bwe jekõnan kejbãrok kij jen ad kajeoñe ri ruruwe eo elap im ri kinaak eo ewan.

Karmijeteik Wãwen ko an Ri Uror Eo

8. Ilo wãwen et eo Devil eo ear “juõn dri uror jen jinoin”?

⁸ Devil eo ej juõn ri uror. Jesus ear ba bwe ear juõn, “dri uror jen jinoin.” (Jon 8:44) Jen jerawiwi eo moktata ke ear ukõt buruen Adam im Eve jen Anij, Satan ear erom juõn ri uror. Ear bõktok mij ion armij ro ruo moktata im ro nejiir. (Dri Rom 5:12) Alikar bwe juõn armij ak jitõb ear aikwij kõmmane men in, im jab juõn eñjake enana wõt.

9. Einwõt an 1 Jon 3:15 kwalok, ewi wãwen ad maroñ erom ri uror ro?

⁹ Juõn ian Kien ko Joñoul me ailiñ in Israel eo ear bõke ear ba, “Kwon jab uror.” (Duteronomi 5:17) Ke ear jejelok ñan Ri Christian ro ri jilek Peter ear ba: “A enjelok iami en iñtan kin an dr’urõt.” (1 Piter 4:15) Inem einwõt ri karejar ro an Jehovah, jejjab uror. Ak, enaj wõr ruõd elañe jej kijirãte Ri Christian ro mõttad im kejatdikdik bwe ren mij. Ri jilek John ear je: “Jabrewõt eo ej kijirãte jein im jãtin ej dri uror, im kom jela bwe mour in drio e jab berwõt ilo jabrewõt dr’uror.” (1 Jon 3:15) Ri Israel ro rar bõk nan in kaiñi in: “Kwon jab kitõtõkake dri turum.” (Livitikõs 19:17) Jen mõkaj in kamadmõde jabdewõt abañ ko ikõtad im ri tõmak ro mõttad, bwe ri uror eo Satan en jab kokkure burukuk in Christian eo ad.—Luk 17:3, 4.

Jutak Bin Nae Ri Riap eo Elap

10, 11. Ta eo jej aikwij kõmmane ñan jutak bin nae ri riap eo elap, Satan?

¹⁰ Devil eo ej juõn ri riap. Jesus ear ba, “ke ej konono riõp, ej konono jen men ko an; bwe e dri riõp, im jemen riõp.” (Jon 8:44) Satan ear riap ñan Eve, ak Jesus ear itok ñan lal bwe en kennan kin mol eo. (Jon 18:37) Elañe jej jutak bin nae Devil eo einwõt ri kalor ro an Christ, jejjab kõnan riap im mone armij. Jej aikwij “konono mol.” (Zechariah 8:16; Dri Epesõs 4:25) “Jeova, . . . Anij in mol” ej kajerammõn wõt Ri Kennan ro an remol. Ejjab kamaroñ ri nana ro ñan kwalok nan kin e.—Sam Ko 31:5; 50:16; Aiseia 43:10.

¹¹ Elañe jej kaorõk anemkwoj eo ad ilo jitõb jen nan in riap ko an Satan, jenaj eddeb  ñan kabuñ eo an Christian, “ial in mol.” (2 Piter 2:2; Jon 8:32) Aolep katak ko an Christian rej “mol in gospel.” (Dri Galetia 2:5, 14) Lomor eo ad ej wawa ion ad “etetal ilo mol”—eddeb ñan e im jutak bin nae “jemen riõp” eo.—3 Jon 3, 4, 8.

Jumae Eo Elaptata Ear Illok im Jumae Anij

12, 13. En ewi wãwen lemnak eo ad kin ro rej illok im jumae Anij?

¹² Enjel eo me ear erom Devil, ekar wõr juõn ien ear bed ilo mol eo. Ak “e jab jutõk ilo mol,” Jesus ear ba, “bwe ejelok mol ilo e.” (Jon 8:44) Eo elaptata ear illok jen Anij ej kate wõt in jumae “Anij in mol.” Jet Ri Christian ro ilo ebeben eo kein kajuõn rar lorak ilo “aujir an devil,” kinke ear mone ir im rar illok jen mol eo. Inem Paul ear rejañ ri jerbal eo mõttan Timothy bwe en kakabilek ir ilo joij bwe ren kajurlok ilo jitõb im ko jen aujiir eo an Satan. (2 Timote 2:23-26) Emol, elap an emõn jutak bin ilo mol eo im jab lorak ilo lemnak ko an ro rej illok im jumae Anij.

¹³ Kin an armij ro ruo moktata roñjake Devil eo im jab karmijeteik nan in riap ko an, rar illok im jumae Anij. Inem, emõn ke ad roñjake armij rein rej illok im jumae Anij, readi book ko air, ak etale bwebwenato ko air ilo Internet eo? Elañe jej yokwe Anij im mol eo, jejamin kõmman eindein. Jen jab kõtlok bwe ri nana rein ren deloñ ilo moko imõd ak yokyokwe ir, bwe wãwen kein rej kalikar bwe ewõr kunad ilo ‘jerbal ko air renana.’ (2 Jon 9-11) Jen jab lelok kij make ñan etao ko an Devil eo ilo ad illok jen “ial in mol” eo an Christian im lor ri katakin ro rewan me rej “kadreloñwoj ilo etino katak ko re bwir” im kajeoñ in etaouk kij kin ‘nan in etao ko.’—2 Piter 2:1-3.

14, 15. Ta nan in kakkõl ko Paul ear lelok ñan elder ro ilo Ephesus im ri jerbal eo mõttan Timothy?

¹⁴ Paul ear jiroñ Christian elder ro ilo Ephesus: “Inem komin kejbãrok kom im lale aolepen bwij eo Jitõb Kwojarjar e ar likit kom dri kaki ilo e, bwe komin najirik eklisia an Iroij, eo E ar wiaik kin bõtõktõk eo An. I jela bwe elikin aõ ilok kiru wulf ko re kanuij lej, re naj dreloñ ibemi, im jab tiriamokake bwijin. Bar einwõt jet iami re naj jutõk, im konono men ko r’ankeke, bwe ren karel ro dri kalor ilokair.” (Jerbal 20:28-30) Tokelik, rein rar illok im jumae Anij rar walok im “konono men ko r’ankeke.”

¹⁵ Ilo 65 C.E., ri jilek eo ear rejañ Timothy bwe en ‘kajerbal nan in mol ilo jimwe.’ Paul ear je, “A kwon kejbãrok yuk jen konono wan ko: bwe re naj etallok ñõn nana elaplok, Im nan ko air re naj einwõt bõkke ko rej mõñañi: ruo iair Haimeniõs im Pailitõs; armij r’ar bwir kake mol im ba, bwe emwij an armij jerkakbiji, im rej ukoji tõmak an jet.” Ien illok im jumae Anij ear ijjino! Paul ej wõnmanlok im ba, “Ijoke  e jutõk wõt foundes̃õn ebin an Anij.”—2 Timote 2:15-19.

16. Meñe elõñ etao ko an ri jumae eo elaptata, etke jej tiljek wõt ñan Anij im Nan eo an?

¹⁶ Ekkã an Satan kajerbal armij ro rar illok im jumae Anij ñan katton kabuñ eo emol—ak ear jab lo tõbrak. Ilo yiõ eo 1868, Charles Taze Russell ear etale ilo tibdikin katak ko me kabuñ ko an Christendom rar watõki raorõk im lo bwid ko ilo wãwen air ukõt Jeje ko rekwojarjar. Russell im jejjo armij ro rej bukõt mol eo rar ejaake juõn kumi in ri katak Bible ilo Pittsburgh, Pennsylvania, U.S.A. Ilo enañin 140 yiõ ko liktak, ri karejar ro an Jehovah rar kalaplok air jelã im yokwe ilo Anij im Nan eo an. Meñe elõñ etao ko an ri jumae eo elaptata, ak ri karejar eo etiljek im meletlet ej ekkõl wõt ilo jitõb ear jibañ Christian ri kabuñ ro remol bwe ren tiljek ñan Jehovah im Nan eo An.—Matu 24:45.

Jab Kõtlok bwe Iroij in Lal in En Kajur Iom

17-19. Ta lal eo ej bed iumin kajur eo an Devil eo, im etke jejjab kõnan yokwe e?

¹⁷ Bar juõn wãwen Satan ej kajeoñ in kalorak kij ej ilo an kabo kij ñan yokwe lal in—jukjuk im bed in armij ro rejjab wãnik rej jenolok jen Anij. Jesus ear naetan Devil eo “iroij in lõl in” im ear ba: “Ejelok men eo an ilo Ña.” (Jon 14:30) Jen jab kõtlok bwe Satan en kajur iod! Emol, jej jelã bwe “aolepen lõl ej berwõt ilo dri nana eo.” (1 Jon 5:19) Inem Devil eo ear maroñ tilmake “ailiñ in lõl otemjej” ñan Jesus elañe ear kabuñ ñan e—juõn men me Nejin Anij ear lukkun dike. (Matu 4:8-10) Lal eo iumin tel eo an Satan ej kijirãte ri kalor ro an Christ. (Jon 15:18-21) Ejelok bwilõñ bwe ri jilek John ear kakkõl kij bwe jen jab yokwe lal!

¹⁸ John ear je: “Komin jab yokwe lõl ak men ko ilo lõl. Elañe jabrewõt armij ej yokwe lõl, yokwe Jemer e jab ilo e. Bwe men ko otemjej ilo lõl, mõm an kõniek, mõm an  mej ko, im wuj wan an mour in, re jab an Jemer a rej an lõl. Im lõl e jokolok im mõm ko an: a eo ej kõmõnmõn ankil an Anij ej berwõt in drio.” (1 Jon 2:15-17) Jen jab yokwe lal, kinke wãwen mour eo an ej kareelel kin mõm an kanniek ejerawiwi im ej jumae kien ko an Jehovah Anij.

¹⁹ Ta elañe yokwe kin lal in ej bed ilo buruõm? Inem jen jar ñan bõk jibañ jen Anij bwe jen anjo ion yokwe rot in im mõm in kanniek ko an. (Dri Galetia 5:16-21) Emol bwe jenaj kate kij bwe jen “jab lipjinjin kin lõl in” elañe jej kememej bwe “jaran jitõb renana” rej “ro iroij in marok i lõl” me jejjab maroñ loi im rej iroij ion aolep armij ro rekiblia.—Jemes 1:27; Dri Epesõs 6:11, 12; 2 Dri Korint 4:4.

20. Etke jemaroñ ba bwe jejjab mõttan “lõl” in?

²⁰ Ikijen ri kalor ro an, Jesus ear ba: “Re jab jen lõl, einwõt Ña I jab jen lõl.” (Jon 17:16) Christian ri kabit ro im ri jerbal ro mõttair me emwij air wujleplok air mour im baptais rej kate ir ñan kejbãrok air erreo ilo mour im jitõb, im rej kajenolok ir jen lal in. (Jon 15:19; 17:14; Jemes 4:4) Lal in enana ej kijirãte kij kinke jej kajenolok kij jen e im jej ‘kwalok nan kin men ko rewãnik.’ (2 Piter 2:5) Emol, jej mour ibwiljin armij ro an lal, ekoba ro ri lejen, ri lũñ, ri kwot, ri kabuñ ñan ekjap, ri riap, im ri kadõk. (1 Dri Korint 5:9-11; 6:9-11; Reveles̃õn 21:8) Ak jejjab menonoik “jitõb õn lõl,” kinke kajur eo an ejerawiwi ejjab e eo ej kamakit kij.—1 Dri Korint 2:12.

Jab Najikin Devil Eo

21, 22. Ewi wãwen am maroñ jerbale nan in kakabilek eo an Paul ilo Dri Epesõs 4:26, 27?

²¹ Jen an “jitõb õn lõl” kamakit kij, jitõb eo an Anij ej tel kij, im ej jebar ilo kij kadkad ko einwõt yokwe im jatõr. (Dri Galetia 5:22, 23) Kadkad kein rej jibañ kij ñan kijenmij iumin melejoñ ko me Devil eo ej kajerbali ñan melejoñe tõmak eo ad. Ekõnan bwe jen “jab aliñõrñõr in kõmõn nana wõt.” Ak jitõbõn Anij ej jibañ kij bwe “en jokwõr [ad] illu, im kwon illok jen e.” (Sam Ko 37:8) Emol, jet ien ewõr unin ad illu, ak Paul ej kakabilek kij: “Komin illu im jab jerawiwi: al en jab tulok ion ami illu; Im komin jab najikin devil eo.”—Dri Epesõs 4:26, 27.

²² Illu eo ad emaroñ jemlok ilo jerawiwi elañe jej bedwõt im illu. Lemnak in emaroñ kabellok ialin an Devil eo kõmman bwe en wõr akwel ilo congregation eo ak kamakit kij bwe jen kõmman men ko renana. Kin men in, jej aikwij kamadmõde abañ ko ilo mõkaj ibben ro jet ilo juõn wãwen ekwojarjar. (Livitikõs 19:17, 18; Matu 5:23, 24; 18:15, 16) Inem, jen kõtlok bwe jitõbõn Anij en tel kij ñan jerbale jatõr, im meñe ewõr unin ad illu jab kõtlok bwe en oktak im juõn eñjake emeo, lej, im kijirãte armij ro.

23. Ta kajitõk ko jenaj uaki ilo katak eo tok ilal?

²³ Emwij ad bwebwenato kin jet ian kadkad ko kadkadin Devil eo me jejjab kõnan kajeoñe. Ak jet ri konono ro remaroñ lemnak: Jej aikwij mijak ke Devil eo? Etke ej kamakit armij ñan matõrtõre Ri Christian ro? Im ewi wãwen ad maroñ kejbãrok kij jen wãwen ko an Devil eo?

[Kamelele eo itulal]

Ta Uak Eo Am?

• Etke jejjab kõnan kananaik jabdewõt armij?

• Ekkar ñan 1 Jon 3:15, ewi wãwen ad maroñ kejbãrok kij jen ad erom ri uror ro?

• En ewi lemnak eo ad kin ro rej illok im jumae Anij, im etke?

• Etke jen jab yokwe lal?

[Kajitõk ko ñan katak]

[Pija eo ilo peij 5]

Jejamin najikin Devil eo bwe en kokkure burukuk in Christian eo ad

[Pija ko ilo peij 6]

Etke John ear rejañ kij bwe jen jab yokwe lal in?