Jimwe Eo ñan Bõk Juõn Ãt

AOLEP armij ewõr air jimwe ñan an wõr juõn etair. Ilo Tahiti, meñe juõn niñniñ eo ej kab lotak im rejjab jelã wõn jinen im jemen kinke rar joloke, rej kõmman etan. Ilo office in jikin kõmman peba in lotak eo rej kõmman ãt ko etan.

Ak, ewõr juõn armij eo im jemaroñ ba bwe kar kajekdon e jen an bõk jimwe in ñan bõk juõn ãt, jimwe eo kar lelok ñan enañin aolep armij. Ilo elap bwilõñ, e ej “Jemer, jen Eo nukin otemjej i lõñ im i lõl emwij naetair”! (Dri Epesõs 3:​14, 15) Einwõt am loe, elõñ armij rej makoko in kajerbal ãt eo etan Ri Kõmanman eo einwõt an walok ilo Bible eo. Rej kãlet ñan bõk jikin ãt eo etan im likit title ko einwõt “Anij,” “Iroij,” ak “Eo Ej Indio.” Inem, ta ãt eo etan? Sam ko ej uak kajitõk in: “Bwe ren jela bwe Kwe wõt, im etõm Jeova, Kwo eo eutiejtata ion aolepen lõlin.”​—Sam Ko 83:⁠18.

Ilo yiõ ko jinoin ebeben eo kein ka 19 ke missionary ro jen London Missionary Society rar tõkeãklok ilo Tahiti, armij ro jen Polynesia rar kabuñ ñan elõñ anij ko. Kajjojo iair ear wõr ãt ko etair make, anij ko reutiejtata rej Oro im Taaroa. Ñan kajenolok Anij eo an Bible eo jen anij ro jet, missionary ro rar jab jook in kajerbal ãt eo ekwojarjar, rej jibeele Iehova ilo kajin Tahiti.

Ãt in ear oktak im erom juõn ãt ebuñbuñ im ekkã air kajerbale ilo bwebwenato ko jen ran ñan ran im letter ko. King Pomare II jen Tahiti, eo ear iroij ilo jinoin ebeben eo kein ka 19, ekkã an kajerbal ãt eo etan Anij ilo bwebwenato ak ennan ko ej jei ilo letter ko. Juõn menin kamol kin menin ear walok ilo juõn ian letter ko an, eo kar je ilo kajin English, im ej bed ilo Museum of Tahiti and Its Islands, im rej kwalok e ijo. Menin ej kalikar bwe armij ro rar mõnõnõ in kajerbal ãt eo ekwojarjar ilo ien ko. Elaplok jen menin, ãt eo etan Anij ear walok thousand alen ilo Bible eo jinoin an Ri Tahiti, eo ear dedelok je ilo 1835.

[Pija eo ilo peij 32]

King Pomare II

[Etan eo ear kõmman pija ilo peij 32]

King im letter: Collection du Musée de Tahiti et de ses Îles, Punaauia, Tahiti