Komin Beran

“Komin beran! Kiõ komij bar roñ ejja nan ko wõt ri kanan ro rar konono.”​—ZECHARIAH 8:⁠9.

1, 2. Etke eaorõk ñan ad etale book in Haggai im Zechariah?

 KANAN ko an Haggai im Zechariah kar jeje 2,500 yiõ ko remotlok, ak elap meleleir ñan mour eo am. Bwebwenato ko an Bible im rej bed ilo book kein rejjab baj bwebwenato bajjek. Rej mõttan “jabrewõt men ko ar jeje mokta . . . ken katakin kij.” (Dri Rom 15:⁠4) Enañin aolep nan ko jej konono kake ilo book kein rej kõmman bwe jen lemnak kin wãwen ko im rar walok jen ien eo ke Ailiñ eo ear jutak lañ ilo 1914.

² Ilo an jitõñlok ñan men ko rar walok im wãwen ko armij ro an Anij rar jelmae ilo ien ko etto, ri jilek Paul ear ba: “A men kein r’ar walok ibeir ñõn joñok; im emwij je ir nan in kowe kij, kijeo ien ko eliktata r’ar itok ioer.” (1 Dri Korint 10:​11) Inem bõlen kwo maroñ kajitõk, ‘Ewi tokjen book in Haggai im Zechariah ñan ran kein ad?’

3. Ta eo ear lap an Haggai im Zechariah konono kake?

³ Einwõt an kar katak eo lok iman kwalok kake, kanan ko ilo Haggai im Zechariah rej kitibuj ien eo ke Ri Jew ro rar jeblak ñan ene eo Anij ear lelok ñan ir elikin air kar rõlok jen kamakoko ilo Babylon. Ri kanan rein ruo rar konono kin ien eo rar bar kalek temple eo. Ri Jew ro rar likit loñtak ko an temple eo ilo yiõ eo 536 B.C.E. Meñe jet ian Ri Jew ro reritto rar lemnak kin ien ko remotlok, ak ear lap “lamij in lõñliñ.” Ilo mol, juõn men elaplok emwij an walok ilo ran kein ad. Ewi wãwen?​—Ezra 3:​3-13.

4. Ta eo ear walok elikin wõt Bata eo an Lal in Kein Kajuõn?

⁴ Elikin wõt Bata eo an Lal Kein Kajuõn, ri kabit ro an Jehovah rar anemkwoj jen air ri kamakoko ñan Babylon Elap. Men in ej juõn menin kamol kin jibañ eo an Jehovah. Ilo ien ko lok iman ear einwõt ñe ri tel in kabuñ ro im ri kien ro mõttair rar kabõjrak jerbal in kwalok im katakin eo an Ri Katak Bible ro. (Ezra 4:​8, 13, 21-24) Bõtab, Jehovah Anij ear jolok aolep men ko rej kabañ jerbal in kwalok im kõmman ri kalor ro. Iloan yiõ ko jen yiõ eo 1919, jerbal eo an Ailiñ eo ear laplok wõt im ejelok jabdewõt men ear maroñ kabõjrak wõnmanlok eo an.

5, 6. Ta tõbrak eo elap Zechariah 4:7 ear jitõñlok ñane?

⁵ Jemaroñ liki im kõtmene bwe jerbal in kwalok im katakin eo an ro ri karejaran Jehovah enaj wõnmanlok wõt ikijen jibañ eo an. Ilo Zechariah 4:​7, jej konono: “Kwoj likiti drekã eo eliktata na ijo jikin, armij ro renaj lamõj im ba, ‘Elab wõt an aibuijuij!’” Ta tõbrak eo elaptata ilo ran kein ad men in ej jitõñlok ñan e?

⁶ Zechariah 4:7 ej jitõñlok ñan ien eo ñe kabuñ eo emol ñan Iroij Bõtata eo enaj likieo ilo lal iman temple eo an ilo jitõb. Temple in ej karõk eo an Jehovah kin wãwen ad kebake ilo kabuñ eo ej bedbed ion men in katok eo an Christ Jesus. Emol, temple eo elap ilo jitõb ear bed jen ebeben eo kein kajuõn C.E. Bõtab, kabuñ eo emol ijin ion lal naj aikwij likieo. Kiõ elõñ million ri kabuñ ro rej jerbal ijin ion lal iman temple eo ilo jitõb. Rein im elõñ ro im naj kajerkakbijeik ir renaj bõk mour wãppen iloan Juõn Thousand Yiõ in Iroij eo an Jesus Christ. Ilo jemlokin juõn thousand yiõ kein, ri kabuñ ro remol an Anij wõt naj bed ilo lal eo erreo.

7. Ta ijo kunan Jesus ikijen kabuñ eo emol ñan an likieo im wãppen ilo ran kein ad, im etke ej juõn menin rejañ ñan kij?

 ⁷ Governor eo Zerubbabel im Priest eo Eutiej Joshua rar bed im lo an dedelok temple eo ilo yiõ eo 515 B.C.E. Zechariah 6:​12, 13 ear kanan kin jerbal eo einlok wõt an Jesus ñan an bõktok kabuñ eo emol ñan wãppen in. “Eñin men eo Iroij Ekajur Bõtata ej ba: ‘Armij eo naetan Ra Eo enaj iuwa na ijo ej bed ie, im enaj bar kalek Temple eo an Iroij. Im . . . renaj nebare einwõt juõn king, im enaj iroij ion armij ro an, juõn priest enaj jutak iturin tron eo an.’” Im ilo ad jelã bwe Jesus, eo ej bed ilañ im ej kõmman bwe jul eo jen lain in king eo an David, ej bed ilikin im jibañ jerbal eo an Ailiñ eo ilo temple eo ilo jitõb, kwoj lemnak ke bwe ewõr juõn emaroñ kabõjrak an wõnmanlok? Ilo mol ejelok juõn emaroñ! Men in en kar rejañ kij ñan ad kate im wõnmanlok ilo jerbal in kwalok nan eo ad im jab mad kin inebata ko an mour in.

Men ko Raorõk Moktata

8. Etke jej aikwij likit jerbal eo ilo temple eo ilo jitõb bwe en men eo moktata ilo ad mour?

⁸ Ñan ad maroñ bõk jibañ im kajerammõn eo an Jehovah, jej aikwij kejbãrok bwe jerbal eo ilo temple eo ilo jitõb en men eo moktata ilo mour ko ad. Jab einwõt Ri Jew ro rar ba, “ejjañin jejjet ien,” jej aikwij kememej bwe jej mour ilo “ran ko eliktata.” (Haggai 1:2; 2 Timote 3:⁠1) Jesus ear kanan bwe ri kalor ro an retiljek renaj kwalok kin news eo emõn kin Ailiñ eo im kõmman ri kalor ro. Jej aikwij kejbãrok bwe jen jab jerwane jerammõn in jerbal in kwalok nan eo ad. Jerbal in kwalok im katakin eo me ear bõjrak jidik ien kin matõrtõr eo an lal in ej bed iumin kajur eo an Satan ak ear bar jino ilo 1919 im ejañin dedelok. Ak kwo maroñ liki im tõmak bwe, enaj mwij im dedelok!

9, 10. Ta eo kajerammõn eo an Jehovah ej wawa ion, im ta melelen ñan kij?

⁹ Ilo ad kate kij wõnmanlok wõt im jerbal, jenaj bõk jerammõn​—einwõt juõn jar in armij ak kajjojo. Ad kememej kallimur eo an Jehovah emaroñ jibañ kij. Ilo ien eo ke Ri Jew ro rar jeblak im kabuñ kin juõn buru eyu im jino kate ir ilo air kalek bedbed eo an temple eo, Jehovah ear ba: “Jen kiõ im ilok inaj kejerammõn kom.” (Haggai 2:​19) Renaj bõk tokjen jen buñburu eo an. Kiõ jen etale jerammõn  ko rej walok ilo kallimur eo an Anij: “Renaj katõk ine ko nejier ilo ainemmõn, wijki grape ko nejier renaj jebar leir, im lõl enaj kaddrek keinikan ko, im enaj kanuij lab an wut, im enaj eindrein aõ kejerammõn ro otemjej rej mour wõt ilo ailiñ eo aõ.”​—Zechariah 8:​9-13.

¹⁰ Einwõt an kar kajerammõn Ri Jew ro ilo jitõb im kanniek, enaj bareinwõt nawõnãd ilo ad niknik, im kin juõn buru emõnõnõ, kõmmane jerbal eo ear letok bwe jen kõmmane. Kajerammõn kein ekitibuj ainemõn, jokane, jerammõn, im eddeklok ilo jitõb. Ak, kwo maroñ liki bwe ñan an Anij wõnmanlok wõt im kajerammõn kij ej wawa ion ad kõmmane jerbal eo ilo temple eo ilo jitõb ilo wãwen eo Jehovah kõnan.

11. Ewi wãwen jemaroñ etale kin ta ko raorõk im moktata ilo mour eo ad?

¹¹ Kiõ ej ien eo ñan ‘lemnak kin men kein rej walok ñõn kom.’ (Haggai 1:​5, 7) Kij kajjojo jej aikwij bõk ien ñan ad etale ta ko raorõk im rej moktata ilo mour eo ad. Kajerammõn eo an Jehovah ion armij ro an rainin ej wawa ion joñan eo jej kaibujuij ãt eo etan im wõnmanlok ilo jerbal eo ad ilo temple eo an ilo jitõb. Kwo maroñ kajitõkin yuk make: ‘Men ko raorõk ibba re oktak ke? Ewi wãwen kijejeto eo aõ kin Jehovah, mol eo an, im jerbal eo an ñe keidi ibben kijejeto eo aõ ilo ien eo iar baptais? Itoklimo eo aõ ñan wõnmanlok im mweie ilo mour in ej jelet ke ien eo ij lelok ñan Jehovah im ailiñ eo an? Mijak armij​—inebata kin ta eo ro jet renaj lemnak​—ej debij ke ña jen aõ kaibujuij ãt eo etan Jehovah im wõnmanlok wõt im jerbal ilo temple eo ilo jitõb?’​—Reveles̃õn 2:​2-4.

12. Ta wãwen eo ear walok ibwiljin Ri Jew ro me Haggai 1:​6, 9 ej kalikar?

¹² Jejjab kõnan bwe Anij en debij kajerammõn eo an elap jen kij kinke jej jerwane jerbal in kaibujuij im kautiej etan. Kwoj kememej ke Ri Jew ro me rar jeblak ñan kabijukneir, ilo jinoin ke rar jino bar kalek temple eo rar lukkun kate ir im niknik ak ‘ir otemjej rar boub in kõmmõni moko imwiir,’ einwõt an Haggai 1:9 kwalok. Rar oktak im boub im mad kin aikwij ko air kajjojo ran im kin wãwen mour eo air make. Tokjen men in, ‘jidrik wõt men eo rar madmide,’ ear jab bwe mõñã ko remõn, den, im nuknuk ko remãnãn. (Haggai 1:⁠6) Jehovah ear bõk kajerammõn eo an. Ta eo jemaroñ katak jen menin?

13, 14. Ewi wãwen jemaroñ jerbale katak eo ej itok jen Haggai 1:​6, 9, im etke menin eaorõk?

¹³ Kwo jab errã ke bwe ñan ad maroñ wõnmanlok wõt im bõk kajerammõn eo an Anij, jej aikwij kejbãrok bwe jen jab bukõt men ko ñan kij make im jerwane kabuñ eo an Jehovah? Jej aikwij kate kij jumae makitkit ak itoklimo ko remaroñ kamad kij einwõt jibadbad  eo ñan mweie, wãwen ko ñan bõk mweie ilo mõkaj, kõtõbar ko ñan bõk jelãlokjen eo eutiej lok ñan ad bõk juõn jerbal emõn ilo jukjuk im bed in, ak program ko ñan kõtõbar jibadbad ko ad make.

¹⁴ Men kein rejjab kanuij nana. Bõtab, elañe kwoj lemnak kin mour indio, men kein rejjab ke “kõmõn ko remij”? (Dri Hibru 9:​14) Ilo wãwen et men kein rej “kõmõn ko remij”? Rej mij ilo jitõb, men bata, ejelok tokjeir. Elañe, juõn ej kate im wõnmanlok ilo men kein, jerbal kein remaroñ tellok e ñan an luji kõtan eo an ibben Anij. Men in ear walok ñan jet ian ri kabit Ri Christian ro ilo ran ko an ri jilek ro. (Pilippai 3:​17-19) Ear walok ñan jet ilo ien kein ad. Bõlen kwo jelã kajjen jet ro im jidik kin jidik rar mad jen jerbal ko an Christian im jen congregation eo, kiõ rejjab kõnan bar jeblak tok ñan jerbal eo an Jehovah. Jej kejatdikdik bwe rein renaj bar jeblaktok ñan Jehovah, ak mol eo in bwe jibadõk “kõmõn ko remij” emaroñ kõmman bwe jen luji buñburu im kajerammõn eo an Jehovah. Menin ej juõn men ekaburomõjmõj. Enaj melelen luji mõnõnõ im ainemõn eo me jitõb eo an Anij ej letok. Im baj lemnak mõk ñe jenaj luji jimjãn jimjatin eo emãnãn an Christian!​—Galetia 1:6; 5:​7, 13, 22-24.

15. Ewi wãwen Haggai 2:14 ej kwalok kin aorõk in ad kabuñ?

¹⁵ Menin elap an aorõk. Jen Haggai 2:14 lale kin ewi wãwen Jehovah ear watõk Ri Jew ro me rar boub in kakõmõnmõnlok im kaibujuij moko imwiir ak rar jerwane imõn kabuñ eo an. “‘IROIJ ej ba bwe ejja einwõt ñõn armij in ailiñ in im jabdrewõt men ko rej kõmmõni; innem men otemjej rej katok kaki ion lokatok rejjab erreo bareinwõt.’” Im toan wõt an kar Ri Jew ro jerwane kabuñ eo emol, jabdewõt menin jortak ko rar katok kaki ilo lokatok eo ilo Jerusalem kar jab menin buñburu.​—Ezra 3:⁠3.

Jibañ Jen Anij

16. Ekkar ñan vision ko Zechariah ear loi, ta eo Ri Jew ro remaroñ liki kake?

¹⁶ Ri Jew ro rar bokake me rar jerbal ñan air bar kalek temple eo an Anij rar liki bwe renaj bõk jibañ jen Anij, einwõt Anij ear kalikar ilo vision ko rualitõk ear lelok ñan Zechariah. Vision eo kein kajuõn ear kamol kin dedelok eo an temple eo im kajerammõn ñan Jerusalem im Judah elañe Ri Jew ro ilo bokake naj bõk manlok wõt jerbal eo. (Zechariah 1:​8-17) Vision eo kein karuo ear kallimur kin jemlok eo ñan aolep kien ko rej jumae kabuñ eo emol. (Zechariah 1:​18-21) Vision ko jet rar kabin kallimur eo an Anij ñan kejbãrok jerbal in ekkal eo, ibweptok eo an armij ro jen elõñ ailiñ ko ñan imõn kabuñ eo an Jehovah ededelok, ainemõn im jokane eo emol, an naj jolok aolep men in kabañbañ ko ñan jerbal eo ear letok, jolok nana, im lolorjake im kejbãrok eo jen enjel ro. (Zechariah 2:​5, 11; 3:10; 4:7; 5:​6-11; 6:​1-8) Kwo maroñ melele etke kin jibañ jen Anij, ro im rej bokake rar kõmman oktak ilo wãwen air mour im bedbed e mour eo air ion jerbal eo Anij ear lelok bwe ren kõmmane.

17. Ikijen jerammõn ko emwij kallimur ñan kij kaki, ta eo jej aikwij kajitõkin kij make kake?

¹⁷ Kij bareinwõt, liki eo ebed ibbed kin anjo eo an kabuñ eo emol ej aikwij kamakit kij im buruõd ñan ad jerbal im lukkun lemnak kin imõn kabuñ eo an Jehovah. Kajitõkin  kwe make: ‘Elañe ij tõmak bwe ej ien kiõ ñan kõmmane jerbal in kwalok kin news eo emõn kin Ailiñ eo im kõmman ri kalor, mejenkajjik ko im wãwen aõ mour rej errã ke ibben men eo ij lukkun tõmak kake? Ebwe ke ien ij bõk ñan aõ katak Nan in kanan eo an Anij, im ej men eo ij lukkun lemnak kake, im bwebwenato kake ibben Ri Christian ro mõttan, bareinwõt ibben ro jet ij ion ir?’

18. Ta eo enaj walok ilo ran ko rebed iman, ekkar ñan Zechariah chapter 14?

¹⁸ Zechariah ear jitõñlok ñan jeebeplok eo an Babylon Elap im elikin tok tarinae in Armageddon. Jej konono: “Enaj meram wõt, aet, bareinwõt ilo boñ. Iroij wõt ejelã ñãt eo enaj walok men in.” Aet, ran eo an Jehovah emol enaj marok, juõn ran emarok ñan ri kijirãt ro an ijin ion lal! Ak enaj melelen meram im buñburu eo ejamin jemlok ñan ri kabuñ ro retiljek an Jehovah. Zechariah ear bareinwõt kwalok kin wãwen men ko otemjej ilo lal eo ekãl renaj kwalok kin kwojarjar eo an Jehovah. Kabuñ emol ilo temple eo elap ilo jitõb an Anij enaj wãwen kabuñ eo wõt ion lal. (Zechariah 14:​7, 16-19) Ej juõn men ekanuij kabwilõñlõñ! Jenaj lo jejjet in kitien ta eo kar kanan kake im naj lo anjo in utiej bõtata eo an Jehovah. Enaj juõn ran ejej uan im ej an Jehovah!

Jerammõn Ko Rej Ñan Indio

19, 20. Etke Zechariah 14:​8, 9 ej menin kõketak ñan yuk?

¹⁹ Elikin wõt ien in elap im ekabwilõñlõñ an Jehovah, naj jolok Satan im demon ro an ilo abyss eo im rejamin makitkit. (Reveles̃õn 20:​1-3, 7) Inem kajerammõn ko renaj tortok iloan Juõn Thousand Yiõ in Iroij eo an Christ. Zechariah 14:​8, 9 ej ba: “Ñe ran eo enaj itok, drennin wut wõt enaj torlok jen Jerusalem, jimõttan ñõn Lomalo in Mij, im jimõttan ñõn Lomalo Mediterranean. Enaj tor ien otemjej, ilo ien dret im bareinwõt ilo ien wut. Innem IROIJ enaj king in aolepen lõl, im armij otemjej renaj kabuñ ñõne einwõt ke e ej Anij. Im renaj ãñiñin e kin juõn wõt ãt.”

²⁰ “Den in mour,” ak “river in dren in mour,” ej pijaik men in letok ko an Jehovah kin mour, enaj wõnmanlok wõt im tortok jen jea eo an Ailiñ in Messiah eo. (Reveles̃õn 22:​1, 2) Juõn jar elap in ri kabuñ ro an Jehovah, ro rar ellã im mour jen Armageddon, renaj bõk tokjen jen air naj rõlok jen mij eo ear itok ikijen Adam. Meñe ro rar mij renaj bõk tokjen jen jerkakbiji. Inem men in enaj jino mõttan eo ekãl in ien iroij eo an Jehovah ejej uan ion aolepen lal. Armij ro otemjej ion lal renaj kile Jehovah einwõt Iroij Bõtata Eo ijoko otemjej, eo im ej tellokin ñan an armij otemjej kabuñ ñan e wõt.

21. Ta tõmak eo ebin ej aikwij wõr ibbed?

²¹ Ikijen aolep men ko Haggai im Zechariah rar kanan kaki im aolep kanan ko emwij air jejjet kitieir, ebed ibbed un eo ebin ñan ad emmakit manlok ilo jerbal eo Anij ear letok ñan kij bwe jen kõmmane ijin ion lal eo ej melaj in temple eo an ilo jitõb. Mae ien eo kabuñ eo emol enaj likieo, kij aolep aikwij kate kij likit men ko an Ailiñ eo bwe ren men ko moktata ilo mour eo ad. Zechariah 8:9 ej rejañ kij: “Komin beran! Kiõ komij bar roñ ejja nan ko wõt ri kanan ro rar konono.”

Kwoj Kememej Ke?

• Ta wãwen ko rar walok ilo ien ko etto im rej einlok wõt wãwen ko rej walok ilo ran kein me rej kalikar bwe elap tokjen Haggai im Zechariah ñan ran kein?

• Ta katak eo book in Haggai im Zechariah rej letok ñan kij kin men ko raorõk im rej aikwij moktata ilo mour eo ad?

• Etke ad etale Haggai im Zechariah ej letok ñan kij un eo ñan ad liki kin ilju im jeklaj?

[Kajitõk ko ñan katak]

[Pija eo ilo peij 28]

Haggai im Zechariah rar rejañ Ri Jew ro ñan air jerbal kin aolepen burueir im bõk jerammõn

[Pija ko ilo peij 29]

Kwoj ‘boub in kõmmane mweo imõm’ ke?

[Pija eo ilo peij 30]

Jehovah ear kallimur kin juõn jerammõn, im emwij an letok