‘Komin Ilok Im Kõmõn Dri Kalora, Baptais Ir’
‘Komin Ilok Im Kõmõn Dri Kalora, Baptais Ir’
“Komin ilok, im kõmõn dri ailiñ ko otemjej bwe ren dri kalora, im baptais ir . . . , Im katakin ir bwe ren bokake nan ko otemjej I ar jiroñ kom: im lo, Ij ber ibemi ien otemjej ñõn jemlokõn lõl.”—MATU 28:19, 20.
1. Ta bebe eo ailiñ in Israel ear kõmmane itulalin Tol Sinai?
ENAÑIN 3,500 yiõ ko remotlok, armij ro otemjej ilo juõn ailiñ rar kõmman juõn kallimur ñan Anij. Ri Israel ro rar bed itulalin Tol Sinai im kamol iman mejen armij ro otemjej: “Men otemjej Jeova e ar konono, kim naj kõmõni.” Jen ien eo manlok, Israel ear erom armij ro emwij air wujleplok ñan Anij, ‘mweiuk eo an e aorõk.’ (Exodus 19:5, 8; 24:3) Rar kijoror in bõk kejbãrok eo an im mour manlok ilo juõn ene “e bwijliplip kin milk im hõnni.”—Livitikõs 20:24.
2. Kõtan et eo armij ro rainin remaroñ lañliñ kake ibben Anij?
2 Bõtab, einwõt an kar ri jeje sam eo Asaph ba, Ri Israel ro “r’ar jab kejbãrok bujen eo an Anij, im abwin in etal ilo kien eo An.” (Sam Ko 78:10) Rar likjap in kajejjet kallimur eo ro jimmair rar kõmmane ñan Jehovah. Tokelik, ailiñ eo ear luji kõtan eo air ejejuan ibben Anij. (Ekklisiastis 5:4; Matu 23:37, 38) Kin men in, Anij ear “ilok mokta ñõn iben dri ailiñ ko, bwe En bõk armij jen ir kin etan.” (Jerbal 15:14) Im ilo ran kein eliktata, ej aintok juõn “jar elap, eo ejelok armij ej maroñ in bwinir, jen ailiñ otemjej, im ian bwij otemjej, im driloabjen otemjej, im konono otemjej,” im ilo lañliñ rej ba: “Lomor ñõn amuij Anij eo Ej jijõt ion tron, im ñõn Lam.”—Reveles̃õn 7:9, 10.
3. Ta buñten nee ko juõn armij ej aikwij kõmmani elañe ekõnan bed ilo juõn kõtan emõn ibben Anij?
3 Elañe juõn armij ekõnan bwe en juõn ian ro rej lañliñ in bed ilo juõn kõtan eaorõk ibben Anij, ej aikwij wujleplok mour eo an ñan Jehovah im kamole ilo an baptais iman mejen armij. Ej kõmman men in ilo an bokake nan in kaiñi ko an Jesus ñan ri kalor ro an: “Komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar; im katakin ir bwe ren bokake nan ko otemjej I ar jiroñ kom: im lo, Ij ber ibemi ien otemjej ñõn jemlokõn lõl.” (Matu 28:19, 20) Ri Israel ro rar roñjake ke rar konono jen “buk in bujen eo.” (Exodus 24:3, 7, 8) Inem rar melele kin eddo ko air ñan Jehovah. Eindein ilo ran kein, bõk jelãlokjen eo ejejjet im jimwe kin ankil an Anij me jemaroñ loi ilo Nan eo an, Bible eo, ej juõn men in aikwij mokta jen an juõn armij maroñ baptais.
4. Ta eo juõn armij ej aikwij kõmmane ñan an baptais? (Kakobaik box eo itulõñ.)
4 Alikar, Jesus ear kõnan bwe tõmak eo an ri kalor ro an en wõr juõn bedbed ebin mokta jen air baptais. Ear jiroñ ri kalor ro an bwe ren jab baj ilok im kõmman ri kalor ro wõt ak ear bareinwõt rejañ ir ñan katakin ir ‘ñan bokake men ko otemjej ear jiroñ ir.’ (Matu 7:24, 25; Dri Epesõs 3:17-19) Kin men in, ro rej tellokin air baptais ekkã air kar katak Bible eo iumin elõñ alliñ ko ak juõn ak ruo yiõ ko lok iman, bwe ren jab kõmman juõn bebe ilo jidimkij ak jaje kake. Ilo ien baptais eo, ro rebojak in baptais rej aikwij uak aet ñan ruo kajitõk ko raorõk. Kinke Jesus ear kalikar bwe ‘ad ba Aet en melelen Aet, ad ba Jab, en melelen Jab,’ enaj emõn elañe jej lukkun etale ewi aorõkin kajitõk kein ruo ñan baptais.—Matu 5:37.
Ukwelok im Wujleplok
5. Ta buñten nee ko ruo raorõk kajitõk eo kein kajuõn kin baptais ej kalikar kake?
5 Kajitõk eo kein kajuõn kin baptais ej kajitõkin armij eo ebojak in baptais elañe ear ukwelok jen ial in mour eo an mokta im wujleplok mour eo an ñan Jehovah ñan kõmanman ankil an. Kajitõk in ej kalikar ruo buñten nee ko raorõk ej aikwij kõmmane mokta jen an maroñ baptais, ukwelok im wujleplok mour eo an.
6, 7. (a) Etke ukwelok ej juõn men in aikwij ñan aolep ro rej bojak in baptais? (b) Ta oktak ko jej aikwij kõmmani elikin ukwelok?
6 Etke juõn armij ej aikwij ukwelok mokta jen an maroñ baptais? Ri jilek Paul ej kamelele: “Kij otemjej kin ber im mour ilo mõm ko an kõniek.” (Dri Epesõs 2:3) Mokta jen ad katak im bõk jelãlokjen eo ejejjet kin ankil an Anij, jaar mour ekkar ñan wãwen lal in, ekkar ñan kien ko an im men ko ej kaorõki. Jaar bed iumin kajur eo an anij eo an jukjuk im bed in, Satan. (2 Dri Korint 4:4) Bõtab, elikin ad jelã kin ta ankil an Anij, jej beek ñan “jab ber im mour ilo mõm ko an armij rõn, a ñõn ankil an Anij.”—1 Piter 4:2.
7 Wãwen mour in ekãl ej bõktok elõñ ãjinkij ko. Ilõñin men otemjej, ej kabellok ial eo ñan bõk juõn kõtan eaorõk ibben Jehovah, eo me David ear keidi ibben ñan juõn nan in kir eo ñan deloñ ilo “imõn kaber eo” an Anij im “tol ekwojarjar”—emol ej juõn jerammõn elap. (Sam Ko 15:1) Ealikar bwe, Jehovah ejamin kir baj jabdewõt armij ak ej kir ro wõt im ‘ejime [air] etetal, im kõmõn wãnik, im konono mol ilo burueir.’ (Sam Ko 15:2) Kinke eoktak wãwen ko ibbed kajjojo mokta jen ad katak kin mol eo, ñan ad mour ekkar ñan wãwen kein emaroñ aikwij ad kõmman oktak ko ilo ad mour—ilo mwilid im kadkadid. (1 Dri Korint 6:9-11; Dri Kolosse 3:5-10) Unin oktak kein ej ukwelok—juõn eñjake in buromõj kin wãwen mour eo ad mokta im juõn bebe ebin ñan kabuñburuen Jehovah. Men in ej tellok ñan juõn oktak—illok jen juõn wãwen mour ekibbon im wõnmanlok ñan jibadõk juõn ial ñan kabuñburuen Anij.—Jerbal 3:19.
8. Ewi wãwen ad wujleplok mour eo ad, im ewi wãwen an ekkejel ibben baptais?
8 Mõttan eo kein karuo ilo kajitõk eo kein kajuõn ej kajitõkin ro rej bojak in baptais elañe rar wujleplok air mour ñan Jehovah ñan kõmanman ankil an. Wujleplok mour ej juõn buñten nee eaorõk mokta jen baptais. Jej kõmman men in ilo jar, ñe jej kalikar kõnan eo ad ñan lelok mour eo ad ñan Jehovah ikijen Christ. (Dri Rom 14:7, 8; 2 Dri Korint 5:15) Inem Jehovah ej erom Master eo ad im jej An, im einwõt Jesus jej mõnõnõ in kõmanman ankil an Anij. (Sam Ko 40:8; Dri Epesõs 6:6) Jej kõmmane kallimur in eaorõk juõn wõt alen ñan Jehovah. Bõtab, kinke jej kõmman kallimur in ilo ittino, ran eo jej baptais ilo den iman mejen armij ro men in ej kamol ñan ir otemjej bwe ededelok ad wujleplok mour eo ad ñan Jemed ilañ.—Dri Rom 10:10.
9, 10. (a) Kõmanman ankil an Anij ej kitibuj ta? (b) Ewi wãwen an ri utiej in Ri Nazi ri ro kile aorõkin ad wujleplok mour eo ad?
9 Ad lor joñok eo an Jesus ñan kõmanman ankil an Anij ej kitibuj ta? Jesus ear ba ñan ri kalor ro an: “Elañe jabrewõt armij e kõnan lor Iõ, en mõke karmijete, im bõk drebail eo an, im lor Iõ.” (Matu 16:24) Ijin ear kwalok kin jilu men ko jej aikwij kõmmani. Mokta, jej aikwij “karmijete” kij make. Ej melelen bwe, jej ba jab ñan kõnan ko ad rekibbon im aet ñan nan in kakabilek im nan in jiroñ ko an Anij. Kein karuo, jej ‘bõk alal in eñtan eo ad.’ Ilo ran ko an Jesus, juõn alal in eñtan ear kõkkar kin jook im eñtan. Einwõt Ri Christian ro, jej bojak in eñtan kin news eo emõn. (2 Timote 1:8) Meñe lal in emaroñ kajirere ak kananaik kij, einwõt Christ jej ‘kajekdon jook,’ im jej mõnõnõ in jelã bwe jej kabuñburuen Anij. (Dri Hibru 12:2) Eliktata, jej “lor” wõt Jesus.—Sam Ko 73:26; 119:44; 145:2.
10 Ekaitoktoklimo bwe jet ri jumae ro bareinwõt rej kile bwe Ri Kennan ro an Jehovah rej lukkun mour einwõt ro emwij air wujleplok air mour ñan karejar ñan Anij wõt. Ñan wanjoñok, ilo jikin kalbuj eo ilo Germany etan Buchenwald, Ri Kennan ro me rar makoko in karmijeteik tõmak eo air rar aikwij likit eltan peiir ak jei etair ion juõn peba me ej ba: “Ij juõn Ri Katak Bible ebin ilo tõmak im inaj kajejjet kallimur eo aõ ñan Jehovah.” Emol bwe nan kein rej kalikar lemnak eo an aolep ri karejar ro rej tiljek im emwij air wujleplok air mour ñan Anij!—Jerbal 5:32.
Kalikar bwe Jej Juõn ian Ri Kennan ro an Jehovah
11. Ta jerammõn eo, eo ej baptais ej bõke?
11 Kajitõk eo kein karuo ej kajitõkin eo ej bojak in baptais, moktata, elañe ej melele bwe baptais eo an ej kalikar iman mejen armij otemjej bwe ej juõn ian Ri Kennan ro an Jehovah. Elikin an baptais, enaj erom juõn uan ri jerbal ro rej jutak kin etan Jehovah. Jerbal in ej juõn jerammõn elap im juõn eddo eaorõk. Ej bareinwõt kamaroñ eo emwij an baptais bwe en bed ilo ial eo ej tellok ñan mour indio, elañe ej tiljek wõt ñan Jehovah.—Matu 24:13.
12. Ta eddo eo ej itok ibben jerammõn in kwalok kin etan Jehovah?
12 Emol, ej juõn jerammõn ejejuan ñan jutak ilo etan Anij eo ekajur bõtata, Jehovah. Ri kanan Micah ear ba: “Kajjojo ailiñ ej kabuñ ñõn anij eo an im bokake e, ak kij jenaj kabuñ ñõn Iroij, ad Anij, im bokake e indrio im indrio.” (Micah 4:5) Mekarta, juõn eddo ej itok ibben jerammõn in. Jej aikwij kate kij ñan mour ilo juõn wãwen ej kautiej etan eo jej ineke. Einwõt an kar Paul kakememej Ri Christian ro ilo Rome, elañe juõn ejjab jerbale katak eo ej katakin armij kake, ej “blaspim,” etan Anij, ak kattone.—Dri Rom 2:21-24.
13. Etke eddo eo ñan kwalok nan kin Anij ej bed ibben ri karejar ro emwij air wujleplok mour eo air ñan Jehovah?
13 Ñe juõn armij ej erom juõn ian Ri Kennan ro an Jehovah, ej bareinwõt bõk eddo eo ñan kwalok nan kin Anij eo an. Jehovah ear kir ailiñ in Israel eo emwij an wujleplok bwe ren ri kennan ro an ñan air kamol bwe ej Anij ñan indio. (Aiseia 43:10-12, 21) Ak ailiñ eo ear jab kajejjet kitien jerbal in, im tokelik ear luji buñburu eo an Jehovah. Rainin, Ri Christian ro remol rej loudiñdiñ kin an wõr juõn jerammõn ibbeir ñan air kwalok nan kin Jehovah. Rej kõmman men in kinke rej yokwe e im kijoror in lo ien eo enaj kokwojarjar etan. Ekijkan ad maroñ ikõñ wõt ñe jej jelã mol eo kin Jemed ilañ im karõk eo an? Eñjake eo ad ej einwõt eo an ri jilek Paul ke ear ba: “Bwe men in e relel ilo buruõ, bwe Wo ñõn iõ elañe I jab kwalok gospel.”—1 Dri Korint 9:16.
14, 15. (a) Ta eo dolul eo an Jehovah ej kõmmane ñan jibañ kij bwe jen rittolok ilo jitõb? (b) Ta men in letok ko jemaroñ bõk ñan jibañ kij ilo men ko lor jitõb?
14 Bareinwõt kajitõk eo kein karuo ej kakememej eo ebojak in baptais kin eddo eo an ñan an jerbal ibben dolul eo me jitõb eo an Jehovah ej tel. Jejjab make lok iad ilo ad karejar ñan Anij, im jej aikwij bõk jibañ, rejetak, im rejañ eo an “jimjãn jimjãten.” (1 Piter 2:17; 1 Dri Korint 12:12, 13) Dolul eo an Anij elap an wõr kunan ñan ad rittolok wõt ilo jitõb. Ej letok elõñ book ko rej bedbed ion Bible ñan jibañ kij kalaplok ad bõk jelãlokjen eo emol, jerbal ilo meletlet ñe jej jelmae abañ ko, im ñan kaddek juõn kõtan ebak ibben Anij. Einwõt juõn jinen eo ej kejbãrok ajiri eo nejin bwe en mat kin mõñã im emõn an mour, “dri korijer e tiljek im meletlet” ej letok juõn buñ pãlok in ekan ko lor jitõb bwe jen kõmman wõnmanlok ilo jitõb.—Matu 24:45-47; 1 Dri Tessalonika 2:7, 8.
15 Ilo kwelok ko week otemjej, ro don Jehovah rej bõk katak ko im nan in rejañ ko rej aikwiji bwe ren maroñ debij air tiljek einwõt Ri Kennan ro an Jehovah. (Dri Hibru 10:24, 25) Kwelok in Theocratic Ministry School ej katakin kij ñan konono iman mejen armij, im kwelok in Service Meeting eo ej katakin kij ñan kwalok ennan eo ad ilo bolemen. Ilo ien ad bed ilo kwelok ko im ñe jej katak ibbed make jen book ko rej bedbed ion Bible, jemaroñ lo wãwen an jitõb eo an Jehovah jerbal, im tel dolul eo an. Ilo an keini in letok men in jibañ kein, Anij ej kakkõl kij kin men ko rekauwatata, ej katakin kij bwe jen kwalok nan ilo bolemen, im jibañ kij bwe jen ekkõl wõt ilo jitõb.—Sam Ko 19:7, 8, 11; 1 Dri Tessalonika 5:6, 11; 1 Timote 4:13.
Unin An Juõn Emmakit in Kõmman Bebe Eo
16. Ta eo ej kamakit kij ñan wujleplok mour eo ad ñan Jehovah?
16 Inem kajitõk ko ruo kin baptais rej kakememej ro rebojak in baptais kin aorõkin baptais ilo den im kin eddo ko rej itok ibben. Ta eo en kamakit ir bwe ren baptais? Jejjab baptais kinke juõn armij ej jibed kij bwe jen baptais, ak ej kinke Jehovah ear “ibertok” kij. (Jon 6:44) Kinke “Anij yokwe,” wãwen an iroij ijoko otemjej ilañ im ion lal ej bedbed ion yokwe, ejjab ion an jibed armij. (1 Jon 4:8) Jej ruaktok ñan Jehovah kinke jej lo kadkad ko kadkadin rejoij im wãwen an lale im kejbãrok kij. Jehovah ear lelok manjen Nejin kin kij im letok ñan kij ilju im jeklaj eo emõntata. (Jon 3:16) Kin men in, jej mõnõnõ in lelok mour eo ad ñan e.—Jabõn Kennan Ko 3:9; 2 Dri Korint 5:14, 15.
17. Ñan ta eo jaar jab wujleplok mour eo ad ñan e?
17 Jej wujleplok mour eo ad ñan Jehovah make, im jab ñan juõn men armij ro rej kõtõbrake ak ñan juõn jerbal. Jerbal eo Anij ej lelok ñan armij ro an enaj oktak, ak wujleplok eo air enaj juõn wõt. Ñan wanjoñok, men eo ear jiroñ Abraham bwe en kõmmane ear oktak jen eo ear jiroñ Jeremiah bwe en kõmmane. (Jenesis 13:17, 18; Jeremiah 1:6, 7) Ak, erro jimor rar kajejjet jerbal ko rekajju jen don Anij ear lelok ñan ir kinke rar yokwe Anij im kõnan kõmanman ankil an ilo tiljek. Ilo ran kein eliktata, aolep ri kalor ro an Christ me emwij air baptais rej kate ir ñan kajejjet kitien kien eo an Christ bwe ren kwalok nan kin Ailiñ eo im kõmman ri kalor ro. (Matu 24:14; 28:19, 20) Ñe jej kõmmane jerbal in kin aolepen buruõd, men in ej juõn wãwen emõn ñan kwalok bwe jej yokwe Jemed ilañ im elukkun mol ad wujleplok mour eo ad ñan e.—1 Jon 5:3.
18, 19. (a) Ta eo jej kalikar iman mejen armij ñe jej baptais? (b) Ta eo jenaj katak kake ilo katak eo tok ilal?
18 Ejelok bere bwe, ien baptais eo ej kabellok ial eo ñan elõñ jerammõn ko, ak ej juõn buñten nee jej aikwij lukkun lemnak kake mokta. (Luk 14:26-33) Ej kwalok kin juõn bebe me ej aorõklok jen jabdewõt eddo ko jet. (Luk 9:62) Ñe jej baptais, emol bwe jej ba iman mejen armij: “Bwe Anij in E amuij Anij ñõn in drio: E naj amuij dri tel ñõn ien mij.”—Sam Ko 48:14.
19 Katak eo tok ilal enaj uake kajitõk ko jet kin baptais ilo den. Ewõr ke un ko unin an juõn armij aikwij kõttar mokta jen an baptais? Dettan juõn armij en jelet ke kõnan eo an ñan baptais? Ewi wãwen aolep armij remaroñ kautiej ien baptais eo?
Kwomaroñ Ke Kamelele?
• Etke Ri Christian ro kajjojo rej aikwij ukwelok mokta jen air baptais?
• Wujleplok mour eo ad ñan Anij ej kitibuj ta?
• Ta eddo ko ro rej jutak ilo etan Jehovah rej aikwij bõki?
• Ta eo en kamakit kij bwe jen baptais?
[Kajitõk ko ñan katak]
[Bo̦o̦k/Pija eo ilo peij 13]
Ruo Kajitõk Ko Kin Baptais
Kin am tõmak ilo katok eo an Jesus Christ, emwij ke am ukwelok jen jerawiwi ko am im wujleplok mour eo am ñan Jehovah ñan kõmanman ankil an?
Kwoj melele ke bwe wujleplok im baptais eo am ej kalikar bwe kwoj juõn ian Ri Kennan ro an Jehovah me rej mõttan dolul eo jitõbõn Anij ej tel ie?
[Pija eo ilo peij 14]
Wujleplok ej juõn kallimur kwoj kõmmane ibben Jehovah ilo jar
[Pija eo ilo peij 16]
Jerbal in kwalok nan eo ad ej kalikar bwe emwij ad wujleplok mour eo ad ñan Anij