Kwon Bed Etolok Jen Kabuñ Wan!
Kwon Bed Etolok Jen Kabuñ Wan!
“Kin men in komin drioijtok jen iolapir, im kamõkelok iami, Iroij ej ba, im jab uñir jabrewõt men eo e jab erreo.”—2 DRI KORINT 6:17.
1. Ta eo elõñ ro emol burueir rej aikwij jelã kake?
ELÕÑ armij rejañin jelã mol eo kin Anij im ilju im jeklaj eo an armij. Kinke rejañin lo uak ko ñan kajitõk ko air kin inebata ko relap kin men ko lor jitõb, rej bwok wõt im jab jelã kin ta eo enaj walok ilo ran ko rej bedotok. Elõñ million armij ro rej lorak ilo mantin kajitõbtõb, makitkit ko an kabuñ, im kwojkwoj ko me rej kaillu Ri Kõmanman eo ad. Bõlen ro ri turõm im ro nukõm rej tõmak ilo juõn jikin kijeek eo ebwiltõñtõñ, jilu Anij ilo juõn, aan armij eo eban mij, ak katak ko jet rewan.
2. Ta eo ri tel ro an kabuñ ko rar kõmmane, im ta eo ear walok kin men in?
2 Ta unin an walok marok in ejededlok ilo jitõb? Elaptata dolul in kabuñ ko im ri tel ro air me rej kowõnmanlok lemnak ko nae lemnak ko an Anij. (Mark 7:7, 8) Kin men in, elõñ armij rej tõmak bwe rej kabuñ ñan Anij eo emol, ak ilo mol rej kaillu e. Kabuñ wan ej lukkun un eo unin air bed im wãwen in ekaburomõj.
3. Wõn eo elaptata ej kowõnmanlok kabuñ wan, im ewi wãwen an Bible eo kamelele kin e?
3 Ewõr juõn men emour im jejjab maroñ loe ej bed ilikin kabuñ wan. Ri jilek Paul ear ba kin e: “Ilo ir anij in lõl in e ar kabilo lemnok an ro re jab tõmak, bwe maram in gospel in aibujuij an Kraist, eo wãwen Anij, en jab rome ir.” (2 Dri Korint 4:4) “Anij in lõl in” ej Satan Devil eo. E eo elaptata an kowõnmanlok kabuñ wan. “Setan ej mõke kõmõne enjel in maram,” ri jilek Paul ear ba. “Inem e jab lap elañe ro an dri jerbal rej bareinwõt mõke kõmõn ir einwõt dri jerbale wãnik.” (2 Dri Korint 11:14, 15) Satan ej kõmman bwe men ko renana ren einwõt ñe remõn im ej mone armij ro bwe ren tõmak nan in riap ko.
4. Ta eo Kien ko an Anij ñan Israel eo etto rar ba kin ri kanan ro rewan?
4 Kin men in ealikar kin etke Bible eo ej kaliaik kabuñ wan! Ñan wanjoñok, ilo tibdikin Kien ko an Moses ear kakkõl armij ro Anij ear kãlet ir bwe ren jumae ri kanan ro rewan. Jabdewõt armij ej kowõnmanlok katak ko reriap im kabuñ ñan anij ko rewan ‘en mij, bwe e ar konono kabata nae Jehovah air Anij.’ Ri Israel ro rar bõk nan in kaiñi eo ñan ‘jolok nana jen lo bwiljiir.’ (Duteronomi 13:1-5) Alikar, Jehovah ej watõk kabuñ ko rewan einwõt juõn men elukkun nana.—Ezekiel 13:3.
5. Ta nan in kakkõl ko jej aikwij bokake rainin?
5 Jesus Christ im ri jilek ro an rar kalikar eñjake ko rekajur an Jehovah kin kabuñ ko rewan. Jesus ear kakkõl ri kalor ro an: “Komin kejbãrok kom jen dri kanan riõp, ro rej itok ñõn ibemi kin wãwen s̃ip, a ilo burueir einwõt wulp ko relej.” (Matu 7:15; Mark 13:22, 23) Paul ear jeje bwe “Illu an Anij e walok jen lõñ nae jerawiwi otemjej im nana an armij, ro rej drebij mol ilo nana.” (Dri Rom 1:18) Elap an aorõk bwe Ri Christian ro remol ren bokake nan in kakkõl kein im bed etolok jen jabdewõt armij ekõnan noje mol in Nan in Anij ak kajededlok katak ko reriap!—1 Jon 4:1.
Ko Jen “Babilõn Elap”
6. Ewi wãwen an Bible eo kwalok kin “Babilõn Elap”?
6 Lemnak kin ewi wãwen Bible book in Reveles̃õn ej kamelele kin kabuñ ko rewan. Ej kõkkar kake einwõt juõn kõrã ekijoñ eo ej kadõk im ej iroij ion elõñ ailiñ ko im armij ro air. Kõrã in kõkkar in ej lũñ ibben king ro im ej kadõk kin bõtõktõkin ri kabuñ ro remol an Anij. (Reveles̃õn 17:1, 2, 6, 18) Ewõr juõn etan im emwij jei ion deman im ej ekkar ñan mwil etton im ekajõjõ mwilin. Ãt in ej “Babilõn Elap, jinen kõra rekijoñ im men in jõjõik ko an lõl.”—Reveles̃õn 17:5.
7, 8. Ewi wãwen kabuñ ko rewan rar emmakit einwõt juõn kõrã ekijoñ, im ta eo ear walok kin men in?
7 Wãwen an Bible kamelele kin Babylon eo Elap ej jejjet ñan aolep kabuñ ko rewan. Meñe aolep thousand kabuñ ko rejjab burukuk einwõt juõn wõt dolul in kabuñ ibelakin lal, rej juõn wõt ilo karõk im kõmman. Einwõt kõrã ekijoñ eo Reveles̃õn ear kõkkar kake, kabuñ ko rewan ewõr kilair ion kien ko an lal. Einwõt juõn kõrã ejjab tiljek ñan kallimur in belele eo an, eindein kabuñ ko rewan rej kõmman einwõt juõn kõrã ekijoñ ej kobalok ibben elõñ ailiñ ko an politic. “Kom dri lũñ, kom jab jela ke bwe an lõl yokwe ej kijirãte Anij?” ri kalor eo Jemes ej ba. “Inem jabrewõt e kõnan bwe en jeran lõl ej dri kijirãte Anij.”—Jemes 4:4.
8 Ke kabuñ ko rewan rar kobalok ibben kien ko an lal, men in ear bõktok elap eñtan ñan armij ro. Ri etale makitkit ko an kien ko Dr. Xolela Mangcu ear lo bwe “bwebwenato ko an lal robrak kin wanjoñok ko kin torlok bõtõktõkin armij ro kin an kabuñ ko koba ibben kien ko.” Juõn news ear ba: “Iakwelel ko rekauwatata im elap air katorlok bõtõktõk rainin . . . rej waloktok jen kabuñ.” Elõñ million armij ro rar mij ilo tarinae ko me kabuñ ko rar jurake. Babylon eo Elap ear matõrtõre im mõn ri karejar ro remol an Anij, einwõt ba ilo nan in kõkkar, ej kadõk kin bõtõktõkiir.—Reveles̃õn 18:24.
9. Ewi wãwen Jehovah ear kwalok bwe ear kijirãte kabuñ ko rewan ilo book in Reveles̃õn?
9 Jehovah elukkun dike kabuñ wan im men in ej alikar ilo ta eo enaj walok ñan Babylon eo Elap. Reveles̃õn 17:16 ej ba: “Im drun ko joñoul kw’ar loi, im kiru eo, re naj kijirãte kõra ekijoñ eo, im re naj kõmõn bwe en mõke ian im kelwan, im re naj kõñ kõniekin, im naj kanuij tile ilo kijeek.” Mokta, juõn kidu awia elap ej mõn kõrã eo mae ien emij im ej kañ kanniekin. Inem, bwen kanniekin rej tile ilo kijeek. Ilo wãwen dein, mõttan jidik kien ko an lal renaj kõmman eindein nae aolep kabuñ ko rewan. Anij eo enaj kõmman bwe men in en walok. (Reveles̃õn 17:17) Babylon eo Elap, dolul in kabuñ ko rewan ibelakin lal, enaj jako. “Re jamin bar lo e.”—Reveles̃õn 18:21.
10. En ta lemnak eo ad kin kabuñ ko rewan?
10 En ta lemnak eo an ri kabuñ ro remol kin Babylon eo Elap? Ilo alikar, Bible eo ej kaiñi kij: “Komin drioijtok jen e, armij ro Aõ, bwe komin jab bõk mõtõn jerawiwi ko an, im bwe komin jab bõk jen men in kaiñtan ko an.” (Reveles̃õn 18:4) Ro rekõnan bõk lomor rej aikwij diojtok jen kabuñ ko rewan ilo mõkaj. Ke ear bed ion lal, Jesus Christ ear kanan bwe ilo ran ko eliktata, elõñ renaj baj ba wõt bwe rej lore. (Matu 24:3-5) Ñan ir, ej ba: “I ar jaje kom: komin ilok jen Iõ, kom rej kõmõn nana.” (Matu 7:23) Eo ej King kiõ, Jesus Christ, ear karmijeteik kabuñ ko rewan.
Bed Etolok—Ewi Wãwen?
11. Ta eo jej aikwij kõmmane ñan bed etolok jen kabuñ ko rewan?
11 Ri Christian ro remol ren bed etolok jen kabuñ ko rewan, im karmijeteik katak ko reriap. Melelen men in bwe jen jab aluij ak roñjake program in kabuñ ko ilo TV im ilo radio eo im bareinwõt jab bõk book im magazine ko air me rej kajededlok riap ko kin Anij im Nan ko an. (Sam Ko 119:37) Bareinwõt ilo meletlet jej kejbãrok kij jen ad bõk kunad ilo kwojkwoj im ikkure ko me kabuñ ko rewan rej karõki. Bareinwõt, jejjab jurake kabuñ wan ilo jabdewõt wãwen. (1 Dri Korint 10:21) Ñe jej kõmman men kein enaj kejbãrok kij jen juõn eo ekõnan “rakimi [kij] kin katak in meletlet eo an ak kin an mon bata, ekar ñõn bwebwenato mokta an armij rõn, im ñõn irinekatak ko an lõl, im jab ñõn Kraist.”—Dri Kolosse 2:8.
12. Ewi wãwen juõn armij emaroñ bõjrak jen an einwõt juõn uan kabuñ ko rewan?
12 Ta elañe juõn armij ekõnan erom juõn ian Ri Kennan ro an Jehovah ak ej juõn ian ro uan juõn kabuñ wan? Enañin aolep ien ej aikwij jeje juõn letter im kejelãik ir bwe ejjab kõnan wõnmanlok einwõt juõn uan kabuñ wan. Ej juõn men elap an aorõk bwe en beek ñan an karreoik e jen jabdewõt men etton ilo jitõb jen kabuñ wan. Makitkit ko an juõn eo ekõnan erom juõn ian Ri Kennan ro an Jehovah ej aikwij lukkun kalikar ñan ri utiej ro ilo dolul in kabuñ eo an im ñan armij ro jet bwe ear bõjrak jen an einwõt juõn uan kabuñ eo air.
13. Ta nan in kakabilek eo Bible eo ej letok kin aikwij eo bwe jen bed etolok jen kabuñ wan?
13 “Ren jab kadrebijik kom ilo jakkar iben ro re jab tõmak,” ri jilek Paul ear je. “Bwe yokwe õt iben wãnik im jabwãnik? ak kõmao õt an maram iben marok? Ak eorke an Kraist bõk ñõn buruen Bilial? ak mõtõn õt an dri tõmak iben dri jab tõmak? Ak ta eo einwõt juõn iben tempel an Anij im ekjõp ko? . . . Kin men in komin drioijtok jen iolapir, im kamõkelok iami, Iroij ej ba, im jab uñir jabrewõt men eo e jab erreo; im I naj bõk kom.” (2 Dri Korint 6:14-17) Jej bokake nan kein ilo ad bed etolok jen kabuñ ko rewan. Nan in kakabilek eo an Paul ej melelen ke bwe jen bed etolok jen ri kabuñ ro rewan?
“Komin Etetal Im Meletlet”
14. Jej aikwij ke bed etolok jen ro rej bed ilo kabuñ wan? Kamelele.
14 Ri Kabuñ ro remol rej aikwij ke bed etolok jen armij otemjej rej bed ilo kabuñ wan? Jej aikwij ke kajenolok kij jen ro eoktak tõmak ko air? Uak eo ej jaab. Kien eo kein karuo ian kien ko ruo relaptata ej ba: “Kwon yokwe dri turõm im einwõt kwe.” (Matu 22:39) Emol bwe jej kwalok yokwe ñan ro ri turid ñe jej kwalok nan kin news eo emõn kin Ailiñ eo. Bareinwõt jej kwalok yokwe ñan ir ñe jej katak Bible ibbeir im jibañ ir bwe ren kile aikwij eo ñan air bed etolok jen kabuñ wan.
15. Ta melelen bwe jen “jab jen lõl”?
15 Meñe jej kwalok nan kin news eo emõn ñan ro ri turid, einwõt ri kalor ro an Jesus jejjab “jen lõl.” (Jon 15:19) Nan eo “lõl” ej jitõñlok ñan armij ro rej kamakelok iair jen Anij. (Dri Epesõs 4:17-19; 1 Jon 5:19) Jej kwalok bwe jej jenolok jen lal in ñe jej karmijeteik lemnak ko, konono ko, im mwil ko Jehovah ej kijirãti. (1 Jon 2:15-17) Bareinwõt, ñan kwalok bwe jej errã ibben kien eo bwe “kõmao ko renana rej kakõt mõnit ko remõn,” jejjab jimjeraik ro rejjab mour ekkar ñan kien ko an Christian. (1 Dri Korint 15:33) Ñan kõmman bwe jen jab jen lal ej melelen bwe jen “jab lipjinjin kin lõl in.” (Jemes 1:27) Kin men in, ñan kajenolok kij jen lal in ejjab melelen bwe jen jab bed ibben armij ro otemjej ñan jidik.—Jon 17:15, 16; 1 Dri Korint 5:9, 10.
16, 17. Ewi wãwen Ri Christian ro rej jerbal ibben ro rejjab kanuij jelã kin mol eo an Bible?
16 Inem, ewi wãwen ad naj jerbal ibben ro rejañin lukkun jelã kin mol ko ilo Bible? Paul ear jejelok ñan congregation eo ilo Colossae im ba: “Komin etetal im meletlet ñõn ro ilikin, im kejbãrok ien. Ami konono, en ien otemjej ilo joij, im en emwij kejãtok e kin salt, bwe komin jela kijkan emõn ami uak armij otemjej.” (Dri Kolosse 4:5, 6) Ri jilek Peter ear jei: “A komin kokwojarjar Kraist einwõt Iroij ilo buruemi: im komin pojõk ien otemjej bwe komin uak ñõn jabrewõt armij ej kajitõk ibemi kin unin kejatrikrik eo ej iloami, a kin inimõn im mijõk.” (1 Piter 3:15) Paul ear kakabilek Ri Christian ro bwe “ren jab konono nana kin jabrewõt armij, im jab dri akwail, a ren joij wõt, im kwalok inemõn otemjej ñõn armij otemjej.”—Taitõs 3:2.
17 Einwõt Ri Kennan ro an Jehovah, jejjab lej ak utiej buru ñan armij ro jet. Jejjab kajerbal nan in kajirere ko ñan kwalok kin armij ro jen kabuñ ko jet. Jen men in, jej joij wõt, meñe juõn ri mweo, ri turid, ak ri jerbal eo mõttad ejjab joij ak elej ñan kij.—Dri Kolosse 4:6; 2 Timote 2:24.
“Kwon Kanuij Drebij Wãwen Nan Ko Remol”
18. Ta wãwen eo enana ilo jitõb ro rar jeblaklok ñan kabuñ wan rar loe?
18 Elikin ad katak kin mol eo ilo Bible, enaj juõn men ekaburomõjmõj elañe juõn ear rol ñan kabuñ wan! Bible eo ej kamelele kin wãwen in ekaburomõjmõj ñe ej ba: “Bwe elañe, elikin air ko jen etton ko an lõl, ilo jela Iroij im Dri Lomor Jisõs Kraist, rej bar lorõk kaki im emwij bãttõk ir, inem air ber im mour elik enana jen eo mokta. . . . Im e ar walok ñõn ir ekar ñõn jabõn kennan emol, Kiru rorror e ar oktõk ñõn mwõj eo mõjen, im pig kokõra, emwij kwole, ñõn birikõt im drabilbil.”—2 Piter 2:20-22.
19. Etke eaorõk bwe jen ekkõl wõt kin jabdewõt men emaroñ kajorrãn mour in jitõb eo ad?
19 Jej aikwij ekkõl wõt kin jabdewõt men emaroñ kajorrãn mour in jitõb eo ad. Emol bwe ewõr men ko rekauwatata! Paul ear kakkõl: “A e alikar an Jitõb ba, bwe ilo ien ko elik, jet re naj buñ jen tõmak, im eoroñ jitõb ro rej mon ir, im katak ko an dimõn rõn.” (1 Timote 4:1) Jej bed ilo “ien ko elik.” Armij ro rejjab bed etolok jen kabuñ wan remaroñ “jibliklik einwõt no ko, im makõtkit kin jabrewõt kõto in katak, ilo jela mon an armij, ilo etao eo ej tellok ñõn keien bwir.”—Dri Epesõs 4:13, 14.
20 Ewi wãwen ad maroñ kejbãrok kij jen kilan kabuñ wan ko rekauwatata? Lemnak kin aolep men ko Jehovah ear litoki. Ewõr ibbed Nan in Anij, Bible eo. (2 Timote 3:16, 17) Jehovah ej bareinwõt letok elõñ ekan ko ilo jitõb ikijen “dri korijer e tiljek im meletlet.” (Matu 24:45) Ñe jej wõnmanlok ilo mol eo, jej aikwij kaddeklok juõn kõnan kin ‘ekõn ko rebin ekar ñõn ro re ridto’ im ñan koba ibben don ilo kwelok ko an Christian ijo jej katak mol ko ilo jitõb. (Dri Hibru 5:13, 14; Sam Ko 26:8) Jen beek ñan kortokjen aolep men in letok ko an Jehovah bwe jen maroñ “drebij wãwen nan ko remol” jaar roñjake. (2 Timote 1:13) Inem jenaj maroñ bed etolok jen kabuñ wan.
Ta Eo Kwar Katak Kake?
• Ta in “Babilon Elap”?
• Ta eo jej aikwij kõmmane ñan bed etolok jen kabuñ wan?
• Ta men ko rekauwatata ñan mour in jitõb eo ad jej aikwij bõpraiki?
[Kajitõk ko ñan katak]
20. Ewi wãwen ad maroñ kejbãrok kij jen kilan kabuñ wan ko rekauwatata?
[Pija eo ilo peij 4]
Kwoj jelã ke etke rej kwalok kin “Babilon Elap”einwõt juõn kõrã ekijoñ?
[Pija eo ilo peij 5]
“Babilon Elap” enaj jako
[Pija eo ilo peij 7]
Jej kwalok “inemõn im mijõk” ñan aolep ro rejañin errã ibben katak ko jej tõmaki