Tõbar Men In Aikwij Ko Ñan Baptais Eo An Christian

“Ta ej bõprae iõ bwe in jab baptais?”​—JERBAL 8:⁠36.

1, 2. Ewi wãwen an kar Philip jino bwebwenato eo an ibben Ri Ethiopia ri utiej eo, im ta eo ear kamol bwe lein ear itoklimo kin kabuñ eo emol?

 JUÕN ak ruo yiõ ko elikin mij eo an Jesus, juõn ri utiej ilo kien ear itoitak rõkeañlok jen Jerusalem ñan Gaza. Ej juõn ial ekamõkmõk ilo an uwe ion chariot eo an iumin juõn thousand mile ko. Lein ekajur ilo tõmak ear itoitak jen Ethiopia ñan Jerusalem bwe en kabuñ ñan Jehovah. Ilo ien in ear jeblaklok ñan kabijuknen, im ear kajerbal ien in emõn ilo jimwe ilo an konono Nan in Anij​—joñan an lein tõmak ilo Anij. Jehovah ear lo emaan in ettã buruen, im ikijen juõn enjel, Ear tel Philip bwe en kwalok nan ibben.​—Jerbal 8:​26-28.

² Ear bidodo an Philip jino an bwebwenato ibben lein, kinke Ri Ethiopia ri utiej in ear konono ilo juõn ainikien elaj, ekkar ñan manit eo ilo ran ko etto. Kin men in, Philip ear maroñ roñ an konono jen booklemlem in Aiseia. Juõn wõt kajitõk elamwan jen Philip ear kaitoklimoen leo: “Kwoj melele ke men eo kwoj konono kake?” Men in ear kabellok juõn ien ñan bwebwenato kin Aiseia 53: 7, 8. Elikin an kamelele kin Aiseia, Philip ear “kwalok Jisõs ñõn e.”​—Jerbal 8:​29-35.

3, 4. (a) Etke Philip ear mõkaj an baptaisi Ri Ethiopia eo? (b) Ta kajitõk ko jenaj uaki kiõ?

³ Iumin juõn ien ekadu, Ri Ethiopia eo ear melele kin ta jerbal eo an Jesus ekkar ñan karõk eo an Anij, ekoba aikwij eo ñan an baptais einwõt juõn ian ri kalor ro an Christ. Elikin an lo juõn den elap, ear kajitõk ibben Philip: “Ta ej bõprae iõ bwe in jab baptais?” Ilo mol,  men kein rar walok rar einjuõn. Emaan in ear lukkun tõmak ilo Anij eo an Ri Jew meñe ear jab juõn Ri Jew. Bõlen etto an kar aikwij kõttar mae enaj walok bar juõn ien emõn ñan an baptais. Men eo eaorõklok jen men in, ej bwe emaan in ear melele kin ta eo Anij ear kõnan bwe en kõmmane, im ear kõnan uak kin aolepen buruen. Philip ear mõnõnõ in jibañ e, im elikin an kar Ri Ethiopia eo baptais, ear “lõñliñ im ilok ilo ial eo an.” Ejelok bere bwe ear erom juõn ri kwalok ekijejeto kin news eo emõn ilo kabijuknen eo an.​—Jerbal 8:​36-39.

⁴ Meñe jejjab kõnan wujleplok mour eo ad im baptais ilo mõkaj ak watõk buñten nee kein einwõt rejjab kanuij aorõk, wanjoñok eo kin Ri Ethiopia eo ej kwalok bwe ear wõr jet ien ko ke armij ro rar baptais ejjabto elikin air roñ kin mol eo kin Nan in Anij. * Inem, ej juõn men ekkar bwe jen kalmenlokjen kin kajitõk ko tok ilal: Ta eo jej aikwij kõmmane mokta lok iman jen ien baptais? Ñããt eo jej aikwij lemnak kin dettan armij eo ekõnan baptais? Kain men rot ko ilo jitõb rej kamol an juõn armij wõnmanlok wõt ilo jitõb jej aikwij loi mokta jen an maroñ baptais? Ilõñin men otemjej, etke Jehovah ekõnan bwe ro ri karejaran ren baptais?

Juõn Kallimur Eaorõk

5, 6. (a) Ewi wãwen ro don Anij ilo ien etto rar uak ñan yokwe eo an Jehovah? (b) Elikin baptais jemaroñ bõk kain kõtan rot ibben Anij?

⁵ Elikin an kanemkwoj Ri Israel ro jen Egypt, Jehovah ear bõk ir einwõt an “mweiuk e aurõk,” ñan an yokwe im kejbãrok ir im watõk ir einwõt juõn “ailiñ e kwojarjar.” Bõtab, ñan air bõk jerammõn kein, rar aikwij emmakit ilo juõn wãwen elukkun jimwe im alikar ñan yokwe eo an Anij. Rar kõmmane men in ilo air errã ñan kõmman ‘men otemjej Jehovah ear jiroñ ir bwe ren kõmmani’ im deloñ ilo juõn bujen ibben. (Exodus 19:​4-9) Ilo ebeben eo kein kajuõn, Jesus ear kaiñi ri kalor ro an bwe ren kõmman bwe ri ailiñ ko otemjej ren ri kaloran, im ro rar bõk katak ko an rar baptais. Juõn kõtan emõn ibben Anij ear wawa ion air tõmak ilo Jesus Christ im baptais tokelik.​—Matu 28:​19, 20; Jerbal 2:​38, 41.

⁶ Bwebwenato kein ilo Bible rej kwalok bwe Jehovah ej kajerammõn ro me rej kajejjet kallimur eo eaorõk ñan air karejar ñan e. Ñan Ri Christian ro, wujleplok im baptais rej buñten nee ko raorõk me rej tellok ñan bõk kajerammõn jen Jehovah. Jaar beek ilo buruõd ñan lor kien ko an im bukõt tel eo an. (Sam Ko 48:​14) Inem, ilo kõkkar, Jehovah enaj jibwe peid im tel kij ilo wãwen eo jej aikwij etetal ie.​—Sam Ko 73:23; Aiseia 30:21; 41:​10, 13.

7. Etke wujleplok im baptais rej bebe ko juõn armij make ej aikwij kõmmane?

⁷ Unin ad kõnan wujleplok im baptais ej kinke jej yokwe Jehovah im jekõnan karejar ñan e. Ejelok juõn armij en baptais kinke juõn armij ej ba bwe toan wõt an katak ebwe ñan an baptais ak kinke ro jeran renaj baptais. Alikar bwe, ro jemen im jinen im Ri Christian ro reritto ilo jitõb remaroñ rejañ juõn armij ñan an lemnak kin wujleplok im baptais. Ri jilek Peter ear rejañ ro me rar roñjake e ilo ran in Pentecost eo bwe ren “baptais.” (Jerbal 2:​38) Mekarta, wujleplok eo ad ej bebe eo ad make, im ejelok bar juõn armij emaroñ kõmmane ñan kij. Bebe eo ñan kõmanman ankil an Anij ej ad make.​—Sam Ko 40:⁠8.

En Emõn Joñan Kebojak ñan Baptais

8, 9. (a) Etke baptaise niñniñ ro ejjab ekkar ñan Jeje ko ilo Bible? (b) Ta ko jodikdik ro rar aikwij kõmmani ñan kalikar air wõnmanlok ilo jitõb mokta jen air baptais?

⁸ Ajiri ro remaroñ ke kõmman juõn bebe emeletlet im wujleplok mour eo air? Jeje ko ilo Bible rejjab kwalok kin ewi joñan dettan juõn armij eo ekõnan baptais. Emol bwe niñniñ ro rejjab maroñ oktak im erom ri tõmak,  kõmman bebe ko rej bedbed ion tõmak, ak wujleplok air mour ñan Anij. (Jerbal 8:​12) Ikijen Ri Christian ro ilo ebeben eo kein kajuõn, ri etale bwebwenato eo Augustus Neander ear ba ilo book eo an General History of the Christian Religion and Church (Bwebwenato eo kin Kabuñ im Dolul eo an Christian): “Ilo jinoin ritto ro wõt rar baptais kinke armij ro rar kile bwe baptais ear ekkejel wõt ñan tõmak.”

⁹ Ikijen jodikdik ro, jet iair remaroñ melele kin katak ko relap kin Anij im karõk eo an im rekõnan jerbal ekkar ñan ta eo Anij ekõnan bwe ren kõmmane meñe rej dik wõt, ak ibben ro jet rej aikwij rittolok jidik mokta jen air melele kin katak kein. Bõtab, mokta jen an baptais, juõn jodikdik ej aikwij ejaake juõn kõtan emõn ibben Jehovah, bõk juõn melele ejimwe kin katak ko relap ilo Bible eo, im juõn melele ealikar kin ta melelen wujleplok, einlok wõt men ko ritto ro rej aikwij melele kaki.

10. Ta buñten nee ko jej aikwij kõmmani lok iman mokta jen ad wujleplok mour eo ad im baptais?

¹⁰ Jesus ear jiroñ ri kalor ro an bwe ren katakin ro rekãl nan ko otemjej ear jiroñ ir. (Matu 28:​20) Moktata, ro rekãl rej aikwij bõk jelãlokjen eo ejejjet kin mol eo, im men in enaj kamaroñ ir bwe ren kaddek tõmak eo air ilo Jehovah im Nan eo an. (Dri Rom 10:17; 1 Timote 2:4; Dri Hibru 11:⁠6) Inem, ñe mol eo jen Bible ej tõbar buruen juõn armij, ej kamakit e ñan ukwelok im oktaklok jen mour eo an mokta. (Jerbal 3:​19) Eliktata, armij eo ej tõbar ien eo me ekõnan wujleplok mour eo an ñan Jehovah im baptais, einwõt Jesus ear kakien.

11. Etke ej aorõk bwe jen keini ad kwalok nan mokta jen ad baptais?

¹¹ Bar juõn buñten nee eaorõk ñan ad wõnmanlok im baptais ej bwe jen bõk kunad ilo jerbal in kwalok nan kin news eo emõn kin Ailiñ eo. Eñin jerbal eo elap me Jehovah ear lelok ñan ro don ilo ran kein eliktata. (Matu 24:​14) Ri kwalok ro rejañin baptais remaroñ lo lañliñ ñe rej kwalok nan kin men ko rej tõmak kaki ibben ro jet. Ñe rej bõk kunair ilo jerbal in ej keboj ir ñan air keini in kwalok nan ilo kijejeto elikin air baptais.​—Dri Rom 10:​9, 10, 14, 15.

Ewõr ke Jabdewõt Men Ej Bõpraik Yuk Jen Am Baptais?

12. Ta un ko unin an jet armij jab kõnan baptais?

¹² Jet armij remaroñ jenliklik jen air baptais kinke rejjab kõnan bõk eddo ko renaj itok ioir. Rej jelã bwe elañe rekõnan mour ekkar ñan kien ko an Jehovah, rej aikwij kõmman oktak ko relap ilo mour ko air. Ak rej mijak kinke remaroñ lo bwe ebin air mour ekkar ñan kien ko an Anij elikin air baptais. Jet remaroñ ba, “Bõlen juõn ran tokelik inaj kõmman juõn bwid im renaj bukwelok iõ jen congregation eo.”

13. Ilo ran ko an Jesus, ta eo ear bõprae jet jen air erom ri kalor ro an Jesus?

¹³ Ilo ran ko an Jesus, jet armij rar kõtlok bwe kõnan ko air make im kõtan eo air ibben family eo air ren bõpraik ir jen air erom ri kalor ro an. Juõn scribe ear ba bwe ear bojak in etal ibben Jesus ilo jabdewõt jikin Enaj kar etal ie. Ak Jesus ear kalikar bwe elõñ alen, ear ejelok jikin an kiki ilo boñ. Ke Jesus ear kir bar juõn bwe en an ri kalor, emaan in ear ba bwe ej aikwij “kalibwin” jemen mokta. Bõlen, jen an kõnan lor Jesus, ear kõnan bedwõt ilo mweo imõn im kõttar mae ien jemen ear mij im lolorjake eddo eo an ñan kalbwin  jemen. Eliktata, armij eo kein kajilu ear ba bwe mokta jen an lor Jesus, ear aikwij “yokyokwe” ro ilo mweo imõn. Jesus ear kalikar bwe aibedbed rot in ear einwõt ñe rej ‘oktaklik.’ Kin men in, ej alikar bwe ro me rekõnan aibedbed renaj kõmman jekben ien otemjej im jenliklik jen eddo eo air einwõt juõn Christian eo air.​—Luk 9:​57-62.

14. (a) Ewi wãwen Peter, Andrew, James, im John rar uak ke Jesus ear kir ir bwe ren ri eñwõd armij? (b) Etke jen jab ãliklik in bõk ine eo an Jesus?

¹⁴ Wanjoñok eo an Peter, Andrew, James, im John ear lukkun einjuõn. Ke Jesus ear kir ir ñan air lor e im erom ri eñwõd armij, Bible eo ej ba: “Emõkõj air ilok jen ok ko air im lor E.” (Matu 4:​19-22) Ilo air kõmman ekkar ñan bebe eo air ilo mõkaj, rar lo kin mejeir men eo Jesus ear jiroñ ir tokelik: “Komin bõk Aõ ine im likite i aerami, im katak iba; bwe Ij inemõn im etã buruõ: im kom naj lo an ami kakije. Bwe Aõ ine ej emõn, im men eo Ij inek e emera.” (Matu 11:​29, 30) Meñe baptais ej melelen ad aikwij in inek juõn eddo, Jesus ear kallimur bwe ej juõn eddo ejoij im emera im enaj lap an kaemololo kij.

15. Ewi wãwen joñok ko an Moses im Jeremiah rej kwalok bwe jemaroñ atartar ion Anij ñan bõk jibañ jen e?

¹⁵ Ilo mol, ej biktokin armij bwe jet ien rej bõk eñjake in bwe ejabwe maroñ ibbeir. Ilo jinoin Moses im Jeremiah rar jimor eñjake bwe rar jab maroñ bõk jerbal eo Jehovah ear lelok ñan ir. (Exodus 3:11; Jeremiah 1:⁠6) Ewi wãwen Anij ear kakajur ir? “Emol I naj ber ibõm,” ear jiroñ Moses. “Inaj bed ibbam im kejbarok yuk,” ear kallimuri Jeremiah. (Exodus 3:12; Jeremiah 1:⁠8) Kij bareinwõt jemaroñ liki bwe jenaj bõk jibañ jen Anij. Elañe jej yokwe im liki Anij, men in emaroñ jibañ kij ñan jolok jabdewõt bere ewõr ibbed bwe jenaj maroñ mour ekkar ñan wujleplok eo ad. “Ejelok lelñoñ ilo yokwe,” ri jilek John ear je, “a yokwe e wãppen ej jolok lelñoñ.” (1 Jon 4:​18) Juõn ladik emaroñ mijak in make ian ñe ej etetal, ak ej beran ñe ej jibwe pein jemen im etetal. Eindein, elañe jej liki Jehovah kin aolepen buruõd, ej kallimur bwe enaj ‘bakajen ial eo ad’ ñe jej etetal ibben.​—Jabõn Kennan Ko 3:​5, 6.

Juõn Ien Tellokin Bõk Nebar

16. Etke aolepen enbwinin juõn armij ej aikwij tulok ilo den ñe ej baptais?

¹⁶ Mokta jen ien baptais eo, ekkã an walok juõn katak ej kamelele kin aorõkin baptais einwõt juõn Ri Christian me ej bedbed ion Bible. Ilo tujemlokin katak eo, aolep ro rej bojak in baptais rej aikwij kalikar tõmak eo air iman mejen armij ilo air uake ruo kajitõk ko  kin baptais. (Dri Rom 10:10; lale box eo ilo page 13.) Inem ro ej tellokin air baptais rej katulok ir iumin den, ilo air kajeoñe Jesus. Bible eo ej kwalok bwe elikin an kar baptais, Jesus ear “ato jen dren.” (Matu 3:16; Mark 1:​10) Alikar bwe, Jon Ri Baptais ear katulok aolepen enbwinin Jesus ilo den. * Ñe aolepen enbwinin juõn armij ej tulok ilo den ej kõkkar kin juõn oktak elap jej kõmmane ilo mour eo ad​—jej mij ilo juõn wãwen kõkkar ñan mour eo ad mokta im jej jino juõn wãwen mour ekãl ilo jerbal eo an Anij.

17. Ewi wãwen ro rebojak in baptais im ro rej bed im aluij rej kautiej ien baptais eo?

¹⁷ Baptais ej juõn ien eaorõk im ekalañliñ. Bible eo ej kalikar bwe Jesus ear jar ke John ear baptaisi ilo River Jordan. (Luk 3:​21, 22) Ekkar ñan joñok eo an Jesus, ro rebojak in baptais ilo ran kein ren kwalok mwil ko remõn ekkar ñan Christian. Im kinke Bible eo ej rejañ kij ñan kõnak nuknuk ko ekkar ñan ro ettã burueir ran otemjej, elaplok ad aikwij lor nan in kakabilek in ilo ran in baptais eo ad! (1 Timote 2:⁠9) Ro rej bed im aluije baptais eo ren kautiej ien eo ilo air liñõre katak eo kin baptais im lale ilo juõn wãwen ekkar im ilo lajrak.​—1 Dri Korint 14:⁠40.

Jerammõn Ko Me Ri Kalor ro Emwij Air Baptais Rej Bõki

18, 19. Ta jerammõn ko baptais ej bõktok?

¹⁸ Elikin ad wujleplok mour eo ad ñan Anij im baptais, jenaj juõn ian ro uan juõn family ejejuan. Moktata, Jehovah enaj Jemed im Jerad. Mokta jen ad baptais, Anij ear jenolok jen kij, ak kiõ ej bed ebak ñan e. (2 Dri Korint 5:19; Dri Kolosse 1:​20) Ikijen katok eo an Christ, jaar ruaklok ñan Anij im ear ruaktok ñan kij. (Jemes 4:⁠8) Ri kanan Malachi ej kwalok kin ewi wãwen Jehovah ej lale im roñjake ro rej kajerbal im jutak kin etan, im ej kobaiklok etair ilo book in kememej eo an. “Renaj ro droõ,” Anij ej ba im, “Inaj tiriamokake ir einwõt an juõn jemen tiriamokake eo nejin ej jerbal ñõne.”​—Malachi 3:​16-18.

¹⁹ Baptais ej kamaroñ kij bareinwõt ñan erom juõn uan dolul in jimjãn jimjatin eo ibelakin lal. Ke ri jilek Peter ear kajitõk kin ta jerammõn ko ri kalor ro an Christ renaj bõki kin air karmijeteik kõnan ko air, Jesus ear kallimur: “Im ir otemjej r’ar ilok jen mo ko, ak jeir im jãtir man ak kõra, ak jemeir, ak jineir, ak ro nejir, ak ene ko, kin eta, re naj bõk jibuki alen, im re naj jolit mour in drio.” (Matu 19:​29) Elõñ yiõ ko tokelik, Peter ear jeje kin “jimjãn jimjãten” rar orlok “i lõl.” Peter ear lo kin mejen wãwen an kar ro jein im jatin ibelakin lal jurake im kajerammõn e, im jemaroñ iion men in bareinwõt.​—1 Piter 2:17; 5:⁠9.

20. Ta jerammõn eo baptais ej bõktok?

²⁰ Bareinwõt, Jesus ear kalikar bwe ro rej lor e renaj “jolit mour in drio.” Aet, wujleplok im baptais rej bõktok kejatdikdik eo ñan bõk “mour eo emol”​—mour indio ilo lal eo ekãl an Anij. (1 Timote 6:​19) Ejelok bar juõn bedbed emõnlok jemaroñ kalek ilju im jeklaj eo ñan kij make im ñan family ko ad. Kejatdikdik in enaj kamaroñ kij ñan “kabuñ ñõn Iroij, ad Anij, im bokake e indrio im indrio.”​—Micah 4:⁠5.

[Kamelele ko itulal]

Kwomaroñ Ke Kamelele?

• Ewi wãwen im etke jej aikwij emmakit ñan yokwe eo an Jehovah?

• Ta wõnmanlok ko ilo jitõb jej aikwij kõmmani mokta jen ad baptais?

• Etke jen jab kõtlok bwe mijak eo bwe jenaj likjap in kajejjet kitien kallimur ro ad ak makoko eo ñan inek eddo ko kin baptais en bõpraik kij jen ad baptais?

• Ta jerammõn ko ejejuair ri kalor ro an Jesus Christ emwij air baptais remaroñ bõki?

[Kajitõk ko ñan katak]

[Pija eo ilo peij 17]

“Ta ej bõprae iõ bwe in jab baptais?”

[Pija keo ilo peij 20]

Baptais ej juõn ien eaorõk im kalañliñ