Jehovah Ej Kamineneik Shepherd Ro Ñan Bwij Eo An

“Bwe Jeova ej letok meletlet; jen loñin ej itok jela im lolokjen.”​—JABÕN KENNAN KO 2:6.

1, 2. Etke maan ro emwij air baptais rej kalaplok jerbal ko air ilo congregation eo?

 “IAR lukkun mõnõnõ ke rar jitõñ iõ einwõt juõn elder,” Nick, eo ear juõn elder iumin jiljilimjuõn yiõ, ear ba. “Iar watõk jerammõn in einwõt juõn wãwen ñan kalaplok jerbal eo aõ ñan Jehovah. Ear kanuij lap aõ kamolol e kin aolep men ko ear kõmmani ñan iõ. Bareinwõt iar kõnan jibañ ro uan congregation eo joñan wõt aõ maroñ, ilo ejja wãwen eo wõt elder ro jet rar jibañ iõ.” Bõtab, ijellokin lañliñ eo an, ear wõr jet inebata ko an. “Ke ear 20 jima wõt aõ yiõ rar jitõñ iõ,” Nick ej wõnmanlok, “iar inebata bwe enaj kar wõr aõ likjap in jerbale kadkad ko remõn einwõt​—lolokjen im meletlet—​ñan shepherde congregation eo ilo bolemen.”

² Elõñ un ko rej kamõnõnõik ro me Jehovah ej kãlet ir ñan lale bwij eo an. Ri jilek Paul ear kakememej elder ro ilo Ephesus kin juõn ian un kein ke ear kwalok nan ko an Jesus, im ba: “Mõnõnõ in lelok elap jen bõk.” (Jerbal 20:35) Jerbal einwõt juõn ministerial servant ak juõn elder ej lelok ñan maan ro emwij air baptais wãwen ko jet remaroñ lelok ñan Jehovah im congregation eo. Ñan wanjoñok, ministerial servant ro rej jerbal ibben elder ro. Ri jerbal rein rej lale elõñ jerbal ko rej bõk elap ien ñan kõmmani ak elap tokjeir. Yokwe kin Anij im ro ri turiir ej kamakit lõmarein ñan air bõk jerbal in elap an aorõk.​—Mark 12:30, 31.

3. Etke jet maan ro rej jenliklik jen air jibadõk jerbal in ministerial servant ak elder ilo congregation eo?

³ Ta kin juõn emaan emwij an baptais einwõt juõn Ri Christian ak ej jenliklik jen an jibadõk jerbal in ministerial servant ak elder kinke ewõr an eñjake bwe ejabwe an maroñ? Einwõt Nick, emaroñ lemnak bwe ejjab bwe kabel ko an ñan an jerbal einwõt juõn shepherd ebolemen. Einwõt juõn emaan emwij an baptais, ej eindein ke an wõr eñjake rot in ibbam? Eokwe, ewõr bedbed in am bõk lemnak rot in. Shepherd ro rej aikwij uak ñan Jehovah kin wãwen eo rej jerbal ibben bwij eo. Jesus ear ba: “A eo e ar jaje, im e ar kõmõn men ko ekar ñõn dreñloke, naj eiet alen an dreñloke. Im jabrewõt eo emwij lelok elõñ ñõn e, naj bukot elõñ jen e.”​—Luk 12:48.

4. Ewi wãwen Jehovah ej jibañ ro ej kãlet ir ñan air lale sheep ro an?

⁴ Jehovah ej kõtmene ke bwe ministerial servant im elder ro ren make inek aolep eddo ko? Jaab, ej lelok men in jibañ ko rekeie bwe en kamaroñ ir jab ñan air kijenmij wõt ak bwe ren lo tõbrak ilo jerbal ko air. Einwõt kar bwebwenato kake ilo katak eo lok iman, Jehovah ej letok jitõb kwojarjar eo an, eo ej jibañ ir ñan lale sheep ro an Anij ilo yokwe. (Jerbal 20:28; Dri Galetia 5:22, 23) Bareinwõt, Jehovah ej lelok ñan ir meletlet, jelãlokjen, im lolokjen. (Jabõn Kennan Ko 2:6) Ewi wãwen ej kõmmane men in? Jen bwebwenato kin jilu wãwen ko Jehovah ej katakin armij ro ej kãlet ir ñan lale sheep ro an.

Shepherd Ro Ewõr Air Iminene Rej Katakin Armij

5. Etke Peter im John rar bolemen ilo air jerbal in shepherd?

⁵ Ke ri jilek Peter im John rar jutak ilo jikin ekajet in Sanhedrin, ri ekajet ro remeletlet an lal ilo imõn ekajet eo rar watõk maan rein  einwõt ro “re dri jab katak im dri jab meletlet.” Emol, rar jelã konono im jeje, ak rejañin kar katak ilo jabdewõt school in Bible an Ri Jew. Meñe eindein, Peter im John im ri kalor ro jet rar kamol ir einwõt ri katakin ro rebolemen, im rar kareel elõñ ro rar roñjake ir bwe ren ri tõmak. Ewi wãwen lõmarein bajjek rar erom ri katakin ro rekabel? Elikin air roñjake Peter im John, ri ekajet ro rar “jela kajeir bwe re kar ber iben Jisõs.” (Jerbal 4:1-4, 13) Emol, rar bõk jitõb kwojarjar eo. (Jerbal 1:8) Ak ear alikar—elaptata ñan ri ekajet rein rebilo ilo jitõb—bwe Jesus ear katakin ir. Ke ear bed ibbeir ion lal, Jesus ear katakin ri jilek ro bwe ren jab aintok ro rej einwõt sheep wõt ak bareinwõt kin ewi wãwen rar aikwij shepherd ir elikin air kobalok ibbeir.​—Matu 11:29; 20:24-28; 1 Piter 5:4.

6. Ta joñok eo Jesus im Paul rar likiti ke rar katakin ro jet?

⁶ Elikin an kar Jesus jerkakbiji, ear wõnmanlok im katakin ro rar kãlet ir einwõt shepherd. (Reveles̃õn 1:1; 2:1–3:22) Ñan wanjoñok, ear make kãlet Paul im lale karõk ko bwe en katak kin men ko ear aikwij kõmmani. (Jerbal 22:6-10) Ear wõr an Paul kamolol kin katak ko ear bõki im ear lilok men ko ear katak kaki ñan elder ro jet. (Jerbal 20:17-35) Ñan wanjoñok, ear lelok elap ien im kajur ñan an katakin Timothy bwe en juõn “dri jerbal” ilo jerbal eo an Anij, eo “e jamin jok im ejimewõt an katakin kin nan in mol.” (2 Timote 2:15) Lõmarein rar ejaak juõn kõtan ebake don. Moktalok, Paul ear jeje kin Timothy: “Bwe einwõt ajiri iben jemen, ein drein e ar jerbal iba ilo driõklok gospel.” (Dri Pilippai 2:22) Paul ear jab kõmman bwe Timothy ak jabdewõt armij en ri kaloran. Jen men in, ear rejañ ri tõmak ro mõttan bwe ren ‘dri kajeoñwe e, einwõt ear dri kajeoñwe Kraist.’​—1 Dri Korint 11:1.

7, 8. (a) Ta bwebwenato eo ej kwalok bwe ewõr tokjen ko remõn rej walok ñe rej kajeoñe Jesus im Paul? (b) Ñããt eo elder ro ren jino kibel ro remõn ded bwe ren erom ministerial servant im elder ro?

⁷ Ilo air kajeoñe Jesus im Paul, shepherd ro rekabel rej bõk eddo eo ñan katakin maan ro jeiir im jatiir emwij air baptais ñan air kõtõbrak jerbal in. Lemnak kin bwebwenato eo an Chad. Ear rittolok ilo juõn family ekajju kabuñ ko air jen don ak ej kab jutak einwõt juõn elder. Ej ba: “Ilo yiõ ko rej kab motlok, elõñ elder ro rekabel rar jibañ iõ ñan wõnmanlok ilo jitõb. Kinke jema ear jab juõn ri tõmak, elder ro rar lukkun itoklimo kin ña im erom ro jema ilo jitõb. Rar bõk ien ñan katakin iõ ilo jerbal in kwalok nan, im tokelik, juõn elder ear katakin iõ kilen kajejjet jerbal ko air rej bõki ilo congregation eo.”

⁸ Einwõt bwebwenato eo an Chad ej kwalok, shepherd ro me ewõr air lolokjen rej jino kibel ak kaminene ro remõn ded me remaroñ bõk jerbal in ministerial servant im elder elõñ yiõ ko mokta jen air tellokin bõk jerammõn kein. Etke rej kõmman eindein? Kinke Bible eo ej kakien bwe ministerial servant im elder ro ren jerbale kien mour erreo im kien ko ilo jitõb mokta jen air maroñ bõk jerbal kein. Armij rein rej aikwij “melejoñ ir mokta.”​—1 Timote 3:1-10.

9. Ta eddo eo an shepherd ro reritto ilo jitõb, im etke?

⁹ Elañe maan ro emwij air baptais rej aikwij bõk melejoñ, ekkar bwe ren kamineneik ir mokta kin jerbal kein. Ñan wanjoñok: Elañe juõn ri school ear aikwij bõk juõn test ebin ak ri kaki eo an ear jab katakin e kake lok iman, emaroñ ke lo tõbrak? Alikar, enaj bũlañ (flunk ak likjap). Kin men in, ear aikwij kamineneik e. Bõtab, ri kaki ro reniknik rej katakin ri school ro bwe ren jab pass e test eo wõt ak rej bareinwõt katakin ir kilen kajerbal jelãlokjen eo rar bõke. Ilo ejja wãwen dein, elder ro rekijejeto rej jibañ lõmaro emwij air baptais bwe ren kaddek kadkad ko me juõn emaan eo ej tellokin bõk jerbal in ej aikwij in jerbali ilo air kamineneik e ilo wãwen eo ejejjet im jimwe. Rej kõmman men in ejjab ñan jibañ lõmarein ilo tõmak bwe ren jutak einwõt ministerial servant im elder ro wõt, ak rej  bareinwõt jibañ ir ñan lale bwij eo an Anij ilo jimwe. (2 Timote 2:2) Emol bwe, lõmaro emwij air baptais rej aikwij kõmmane ijo kunair im kate wõt ñan tõbar men in aikwij ko me ro rej bõk jerbal in ministerial servant ak elder rej aikwij jerbale. (Taitõs 1:5-9) Mekarta, ilo air mõnõnõ in katakin ro rej jibadõk jerbal kein ilo congregation eo, shepherd ro rekabel remaroñ jibañ ir ñan kamõkajlok air wõnmanlok ilo jitõb.

10, 11. Ewi wãwen shepherd ro remaroñ katakin ro jet bwe ren jibadõk jerbal ko jet ilo congregation eo?

¹⁰ Ilo tibdikdik, ewi wãwen shepherd ro rekabel remaroñ katakin ro jet bwe ren bõk jerbal ko an congregation eo? Mokta, rej aikwij kwalok air itoklimo kin ro jeiir im jatiir ilo congregation eo—ekkeini air jerbal ibbeir ilo jerbal in kwalok nan im jibañ ir ñan kakõmõnmõnlok maroñ eo air bwe ‘en jimwe wõt air katakin kin nan in mol.’ (2 Timote 2:15) Shepherd ro reritto ilo jitõb rej bwebwenato ibben ro jeiir im jatiir kin lañliñ ko rej bõki jen air karejar ñan ro jet im juburu eo rej make bõke kin air likit im jibadõk mejenkajjik ko ilo jitõb. Bareinwõt ilo joij rej lelok nan in rejañ ko rejejjet kin ewi wãwen juõn brother emaroñ kakõmõnmõnlok e make bwe en juõn ‘joñok ñan bwij eo.’​—1 Piter 5:3, 5.

¹¹ Elikin an juõn emaan ri tõmak bõk jerbal in ministerial servant, shepherd ro remeletlet rej wõnmanlok im kamineneik e kin jerbal eo an. Bruce, eo ear jerbal einwõt elder iumin elõñ yiõ ko, ej ba: “Ikõnan jijet ibben juõn ministerial servant ekãl im elij ibben nan in tel ko me ri karejar eo etiljek im meletlet ear jeje. Bareinwõt, kimij konono kin jabdewõt nan in tel ko rejejjet ñan jerbal eo an, inem ij mõnõnõ in jerbal ibben mae ien ej iminene kin jerbal ko an.” Ñe juõn ministerial ej kalaplok an iminene kin jerbal eo an, emaroñ katak kin kilen jerbal in shepherd bareinwõt. “Ñe ij bõk juõn ministerial servant ibba im kimij jimor lolok juõn mõttam ri tõmak,” Bruce ej wõnmanlok, “ij jibañ e ñan kãlet eon ko ilo Bible me renaj kõketak im kamakit juõn ri tõmak ak family eo kimij loloke. Katak kin kilen kajerbal Jeje ko rekwojarjar ilo wãwen eo ej kamakit buruen ej men eo eaorõk elañe juõn ri jerbal enaj shepherde congregation eo ilo juõn wãwen ebolemen.”​—Dri Hibru 4:12; 5:14.

12. Ewi wãwen shepherd ro rej katakin elder ro rekãl?

¹² Shepherd ro rekãl bareinwõt remaroñ bõk tokjen jen air kalaplok air iminene kin jerbal eo air. Nick, eo ear bed ilo bwebwenato eo lok iman, ej ba: “Jibañ eo iar bõk jen overseer ro ruo reritto ñan kamineneik iõ ear lukkun jibañ iõ. Overseer rein ekkã air melele kin kilen kõmmane jet men ko. Aolep ien rar roñjake iõ ilo meanwõd im lukkun lemnak kin lemnak ko aõ​—meñe rar jab errã kaki. Iar lukkun katak jen aõ lale wãwen air kwalok ettã buru im kautiej ñan ro jeid im jatid ilo congregation eo. Elder rein rar kalikar ñan ña bwe in kajerbal Bible eo ilo jimwe ñe ij kamadmõde abañ ko ak lelok nan in kõketak ko.”

Katak jen Nan in Anij

13. (a) Ta eo juõn emaan ri tõmak ej aikwiji bwe en juõn shepherd ebolemen? (b) Etke Jesus ear ba: “Nan in katak eo Aõ, e jab Aõ”?

¹³ Emol, Nan in Anij, Bible eo, ewõr kien ko, nan in kaiñi ko, im wanjoñok ko juõn shepherd ej aikwiji bwe “en wãppen im emwij kõkõmõnmõn e ñõn jerbal emõn otemjej.” (2 Timote 3:16, 17) Juõn emaan ri tõmak emaroñ  meletlet kin jelãlokjen eo an lal, ak men eo enaj jibañ juõn shepherd bwe en bolemen ej jelãlokjen eo ilo Bible im ewi wãwen ej kajerbale. Lemnak kin joñok eo an Jesus. Ear shepherd eo ilo jitõb emeletlet tata, im elaptata ilo jelãlokjen im lolokjen ion lal; ak, ear jab atartar ion meletlet eo an make ke ear katakin sheep ro an Jehovah. Ear ba: “Nan in katak eo Aõ, e jab Aõ, a an Eo e ar jilkintok Iõ.” Etke Jesus ear nebar Jemen ilañ? Ear kamelele: “Eo ej konono jen e mõke ej kabukot an aibujuij.”​—Jon 7:16, 18.

14. Ewi wãwen shepherd ro rej kejbãrok ir jen air kabukõt aibujuij eo air make?

¹⁴ Shepherd ro retiljek rejjab kabukõt aibujuij eo air make. Nan in kakabilek im kõketak ko air rejjab wawa ion meletlet eo air make, ak ion Nan in Anij. Rej melele bwe jerbal eo an shepherd eo ej ñan jibañ sheep ro bwe ren bõk “lolãtãt eo an Kraist,” jab lemnak eo an elder ro. (1 Dri Korint 2:14-16) Ñan wanjoñok, ta elañe juõn elder ear lelok nan in kakabilek ko rar wawa ion iminene ko an make im jab ion kien ko an Bible im melele ko jen “dri korijer e tiljek im meletlet” ñan jibañ juõn leo im lio ri belele ñan kamadmõd abañ ko kin mour in mare eo air? (Matu 24:45) Nan in kakabilek eo an emaroñ bedbed ion manit ko ilo jukjuk im bed eo an im jelãlokjen eo an ewõr joñan. Emol, jet manit ko rejjab kanuij nana, im elder eo emaroñ iminene kin mour. Ak ro rej einwõt sheep rej bõk elaplok tokjen ñe shepherd ro rej rejañ ir ñan roñjake ainikien Jesus im nan ko an Jehovah jen air roñjake lemnak ko an armij ak lor manit ko an lal.​—Sam Ko 12:6; Jabõn Kennan Ko 3:5, 6.

“Dri Korijer E Tiljek im Meletlet” Ej Katakin Kij

15. Ta jerbal eo Jesus ear lelok ñan “dri korijer e tiljek im meletlet,” im ta juõn ian un ko unin an kumi in ri karejar eo lo tõbrak kin jerbal in?

¹⁵ Shepherd ro einwõt ri jilek Peter, John, im Paul rar ro uan kumi eo me Jesus ear naetair “dri korijer e tiljek im meletlet.” Ro jatin Jesus me jitõb kwojarjar eo ear kãlet ir jen lal rej mõttan kumi in, im kejatdikdik eo air ej ñan iroij ibben Christ ilañ. (Reveles̃õn 5:9, 10) Ilo ran kein eliktata an jukjuk im bed in, oran bwen ro jatin Christ rej mour ion lal relukkun iet jen mokta. Bõtab, jerbal eo me Jesus ear lelok ñan ir bwe ren kõmmane​—jerbal in kwalok news eo emõn kin Ailiñ eo mokta jen an itok jemlokin lal—elaplok jen mokta. Meñe eindein, kumi in ri karejar eo ear lap wõt air lo tõbrak! Etke? Kinke rar katakin ro uan sheep ro jet ñan jibañ ir ilo jerbal in kwalok nan im katakin armij. (Jon 10:16; Matu 24:14; 25:40) Rainin, kumi in etiljek ej kõmmane enañin aolepen jerbal in.

16. Ewi wãwen kumi in ri karejar eo ej katakin maan ro emwij jitõñ ir?

 ¹⁶ Ewi wãwen kumi in ri karejar eo ej katakin armij? Ilo ebeben eo kein kajuõn, kumi in ri karejar eo ear jitõñ jet uair ñan katakin im kãlet overseer ro ilo congregation ko, im tokelik, overseer rein rar katakin ro rej einwõt sheep. (1 Dri Korint 4:17) Ej eindein ilo ran kein. Kumi in Governing Body eo—kumi eo edik in ri kabit elder ro rej jerbal ilo etan kumi in ri karejar eo etiljek im meletlet—ej kamaroñ ri jerbal ro an ñan air katakin im kãlet servant ro im elder ro ilo elõñ thousand congregation ko ibelakin lal. Bareinwõt, kumi in Governing Body eo ej kajutak school ko ñan katakin ro uan Committee ko rej tel Ra ko, overseer ro rej itoitak im lolok congregation ko, elder ro, im ministerial servant ro kin ta wãwen eo emõntata ñan lale ro rej einwõt sheep. Rej bõk nan in jiroñ ko jet jen letter ko, katak ko ilo magazine in Imõniaroñroñ, im jen book ko jet einwõt Organized to Do Jehovah’s Will (Bojak ñan Kõmanman Ankil an Jehovah). *

17. (a) Ewi wãwen Jesus ear kalikar liki eo an ilo kumi in ri karejar eo? (b) Ewi wãwen shepherd ro ilo jitõb remaroñ kwalok bwe rej liki kumi in ri karejar eo?

¹⁷ Joñan an Jesus liki ri karejar eo etiljek im meletlet ear jitõñ e bwe en iroij ion “men ko [an] otemjelok”​—ak, aolep men ko an ilo jitõb ion lal. (Matu 24:47) Shepherd ro emwij kãlet ir rar kamol air liki kumi in ri karejar eo bareinwõt ilo air jerbali aolep nan in jiroñ ko rej bõki jen kumi in Governing Body eo. Aet, ñe shepherd ro rej katakin ro jet, ñe rej kõtlok bwe Nan in Anij en katakin ir, im ñe rej jerbale men ko rar katak kaki jen kumi in ri karejar eo, rej kowõnmanlok burukuk ibwiljin bwij eo. Elap ad kamolol bwe Jehovah ear katakin maan ro me elap air kea kin kajjojo ian ro uan congregation in Christian!

[Kamelele eo itulal]

Ewi Wãwen Kwonaj Uak?

• Ewi wãwen shepherd ro reritto ilo jitõb rej katakin ro jet?

• Etke shepherd ro rejjab katakin kin lemnak ko air make ñan ro jet?

• Ewi wãwen im etke shepherd ro rej kwalok air liki kumi in ri karejar eo?

[Kajitõk ko ñan katak]

[Pija ko ilo peij 11]

Christian elder ro rej katakin maan ro remõn ded ilo congregation eo

[Pija ko ilo peij 12]

“Dri korijer e tiljek im meletlet” elap air katakin elder ro