Karejar Ilo Tiljek Ñan Christ King Eo

“Im ear bõk maroñ im utiej im kajur an iroij, bwe ri ailiñ otemjej im bwij ko otemjej im kajin ko kajjojo ren jerbal ñõne.”​—DANIEL 7:14.

1, 2. Ewi wãwen ad jelã bwe Christ ear jab bõk aolepen maroñ in iroij ilo Ailiñ eo ilo 33 C.E.?

 IROIJ et eo emaroñ mij kin ri karejar ro an inem bar mour im iroij einwõt king? King et eo emaroñ mour ion lal, bwe en kamakit ri karejar ro an ñan air liki im kwalok air tiljek ñan e, inem iroij jen lañ? Armij eo wõt me emaroñ kõmmane men in—im men ko jet bareinwõt—ej Jesus Christ. (Luk 1:32, 33) Ilo Pentecost 33 C.E., elikin an kar Christ mij, jerkakbiji, im wanliñlok ñan lañ, Anij “e ar lelok E bõran ion men otemjej ñõn eklisia.” (Dri Epesõs 1:20-22; Jerbal 2:32-36) Ilo wãwen in Christ ear jino iroij ak ilo juõn wãwen ewõr joñan. Ro ri karejaran jinoin rar Christian ri kabit ro, me rar ejaake Israel eo ilo jitõb, “Israel an Anij.”​—Dri Galetia 6:16; Dri Kolosse 1:13.

² Enañin 30 yiõ ko elikin Pentecost eo ilo 33 C.E., ri jilek Paul ear kamol bwe Christ ejañin kar bõk aolepen kajur in iroij eo an ilo Ailiñ eo, ak ear “jijõt i anbijmaroñõn Anij; Im jen ien in Ej kõtar ien kõmõn ro dri kijirãte eran neen.” (Dri Hibru 10:12, 13) Inem, ilo tu-jemlokinlok ebeben eo kein kajuõn C.E., ri jilek John eo eritto ear lo ilo juõn vision Iroij Kajur Bõtata eo, Jehovah, ej kairoij Christ Jesus einwõt king ilo Ailiñ eo ej kab jutak ilañ. (Reveles̃õn 11:15; 12:1-5) Jen ijo jej bed ie ilo bwebwenato in armij, jemaroñ etale aolep kein kamol ko bwe Christ ear jino an iroij einwõt King in Messiah eo ilañ ilo 1914. *

3. (a) News eo emõn kin Ailiñ eo ear koba ta wãwen eo ekãl jen 1914? (b) Ta kajitõk ko jen kajitõkin kij make kaki?

³ Aet, jen 1914 news eo emõn kin Ailiñ eo ear koba juõn wãwen ekãl. Christ ear jino an iroij einwõt King ilo Ailiñ in Anij ilañ, meñe ekar “ilo bwiljin ro dri kijirãt [e].” (Sam Ko 110:1, 2; Matu 24:14; Reveles̃õn 12:7-12) Bareinwõt, ibelakin lal, ri karejar ro an retiljek rar emmakit ilo kijejeto ñan maroñ eo an ilo air bõk kunair ilo jerbal in katakin Bible eo ibelakin lal ilo juõn joñan ejañin kar wõr ilo bwebwenato in armij. (Daniel 7:13, 14; Matu 28:18) Christian ri kabit ro, “ro nejin ailiñ in lõñ,” rej jerbal einwõt “dri keañ kin Kraist.” Juõn jar elap in ‘sheep ro jet’ an Christ, me rej jerbal einwõt ri jilek ro kin Ailiñ in Anij, rej jurake ir ilo tiljek. (Matu 13:38; 2 Dri Korint 5:20; Jon 10:16) Meñe eindein, kij kajjojo jej aikwij etale elañe jej kile maroñ eo an Christ. Jej lukkun tiljek ke ñan e? Ewi wãwen jemaroñ kwalok ad tiljek ñan juõn King eo ej iroij jen lañ? Ak, jen bwebwenato mokta kin un et ko unin jemaroñ tiljek ñan Christ.

Juõn King Eo Ej Kamakit Ro Jet Bwe Ren Tiljek ñan E

4. Ta men ko Jesus ear kõtõbraki ilo jerbal in kwalok nan eo an ion lal einwõt King eo kar kãlete?

⁴ Tiljek eo ad ñan Christ ej bedbed ion kamolol eo ad kin ta eo ear kõmmane im kin kadkad ko remõn kadkadin. (1 Piter 1:8) Ke ear bed ion lal, Jesus einwõt King eo kar kãlete, ear kwalok ilo juõn wãwen edik kin ta eo  enaj kõmmane ñe ej iroij einwõt King ibelakin lal ilo ien eo Anij ear karõke. Ear najidik ro rekwuli. Ear kemour ro renañinmij, rebilo, ejorrãn enbwiniir, rejaroñroñ, im reban konono. Ear bareinwõt kajerkakbijeik jet ro rar mij. (Matu 15:30, 31; Luk 7:11-16; Jon 6:5-13) Bareinwõt, ilo ad jelã kin mour eo an Jesus ion lal men in enaj kamaroñ kij ñan ad jelã kin kadkad ko kadkadin einwõt Iroij eo an lal ilo ran ko renaj itok—elaptata yokwe eo an eo ej mõnõnõ in karmijete kõnan ko an make. (Mark 1:40-45) Ikijen men in, Napoléon Bonaparte ear ba, “Alexander, Caesar, Charlemagne, im ña make kim ar kajutak elõñ ailiñ ko, ak ion bedbed et eo kim ar kõtõbrak jerbal kein relap? Ikijen ijjibed ko. Jesus Christ make ear kajutak ailiñ eo an ion yokwe, im ñan kiõ elõñ million armij rej mõnõnõ in mij kin e.”

5. Etke kadkad ko kadkadin Jesus ear lap an kareel armij?

⁵ Kinke Jesus ear inemõn im ettã buru, ro rej jerbal im ban kin air inek ijjibed im eddo ko rar lo kakije jen katak ko an rekõketak im kadkad ko rejoij kadkadin. (Matu 11:28-30) Ajiri ro bareinwõt rar mõnõnõ in bed ibben. Maan ro ettã burueir im ewõr lolokjen ibbeir rar mõnõnõ in erom ri kalor ro an. (Matu 4:18-22; Mark 10:13-16) Wãwen eo an ejoij im ewõr kautiej ie ear kamakit elõñ kõrã ro rej tõmak ilo Anij ñan air tiljek ñan e, im elõñ iair rar mõnõnõ in lelok ien, jibadbad ko air, im men ko mweieir ñan air kabwe aikwij ko an ke ear kõmmane jerbal in kwalok nan eo an.​—Luk 8:1-3.

6. Ta eñjake ko rejoij Jesus ear kwaloki ke ear mij Lazarus?

⁶ Christ ear kwalok eñjake ko an rejoij ke ear mij Lazarus jeran. Buromõj eo an Mary im Martha ear lukkun jelet e im ear jab maroñ debij an limõ ilo an, im buromõj, im “e jõñ.” Ear “buromõj”​—kin an eddo buruen—meñe ear jelã bwe ejjabto enaj kar kajerkakbijeik Lazarus. Inem, yokwe eo an Jesus ear kamakit e bwe en jerbale maroñ eo Anij ear lelok ñan e im ear kajerkakbijeik Lazarus.—Jon 11:11-15, 33-35, 38-44.

7. Etke Jesus ej tellokin ñan ad tiljek ñan e? (Lale bareinwõt box eo ilo page 17.)

⁷ Ewõr ad kautiej Jesus kin yokwe eo an ekajur kin men ko rejimwe im kin an kijirãte jelã mon im nana. Ruo alen ear beran in kadiojlok ri wia ro rekibbon jen temple eo. (Matu 21:12, 13; Jon 2:14-17) Bareinwõt, ke ear juõn armij ion lal, ear iion elõñ kain abañ ko, inem ej melele kin ijjibed im abañ ko jej jelmaiki. (Dri Hibru 5:7-9) Jesus ear bareinwõt jelã kin eñjake ko an juõn eo ear jorrãn kin kijirãt im jab ekajet jimwe. (Jon 5:15-18; 11:53, 54; 18:38–19:16) Eliktata, ear beran in iion juõn mij elej ñan an kõtõbrak ankil an Jemen im lelok kejatdikdik eo kin mour indio ñan ro ri karejaran. (Jon 3:16) Kadkad kein an Christ rejjab kamakit yuk ke ñan am karejar ñan e ilo tiljek? (Dri Hibru 13:8; Reveles̃õn 5:6-10) Ak ta eo jej aikwij kõmmane bwe jen juõn ri karejaran Christ King eo?

Men in Aikwij ko Bwe Jen juõn Ri Karejaran Christ

8. Ta eo ej men in aikwij ñan ro ri karejaran Christ?

⁸ Lemnak kin wanjoñok in: Ñe kwo kõnan erom juõn armij in bar juõn ailiñ ekkã an kitibuj am kajejjet jet men in aikwij ko. Bõlen ej aikwij emõn mwilim im emõn ejmour eo am. Eindein, ro karejaran Christ rej aikwij kejbãrok air mour erreo im ejmour emõn ilo jitõb.​—1 Dri Korint 6:9-11; Dri Galetia 5:19-23.

9. Ewi wãwen jemaroñ kwalok ad tiljek ñan Christ?

⁹ Jesus Christ ej bareinwõt aikwiji bwe ro rej erom ri karejaran ren tiljek ñan e im ñan Ailiñ eo an. Rej kwalok air tiljek ilo air mour ekkar ñan men ko King eo kar kãlete ear katakin kaki ke ear bed ion lal. Ñan wanjoñok, rej likit bwe men ko an Ailiñ eo im air kõmanman ankil an Anij ren mokta jen air jibadõk men ko lor kanniek. (Matu 6:31-34) Rej bareinwõt kate ir ñan kwalok kadkadin Christ,  meñe rar iion wãwen ko rebin. (1 Piter 2:21-23) Bareinwõt, ro karejaran Christ rej anõk joñok eo an ilo air kõmman emõn ñan ro jet.​—Matu 7:12; Jon 13:3-17.

10. Ewi wãwen jemaroñ kwalok ad tiljek ñan Christ ilo (a) mour in family eo im (b) ilo congregation eo?

¹⁰ Ro ri kaloran Jesus rej bareinwõt kwalok air tiljek ñan e ilo air kwalok kadkad ko kadkadin ilo mour in family eo. Ñan wanjoñok, lõmaro ri belele rej kwalok air tiljek ñan King eo air ilañ ilo air anõk kadkad ko kadkadin Christ ilo wãwen eo rej jerbal ibben limaro beleir im ro nejiir. (Dri Epesõs 5:25, 28-30; 6:4; 1 Piter 3:7) Limaro ri belele rej kwalok air tiljek ñan Christ ikijen mwiliir erreo im ilo air kwalok “jitõb e inimõn im joij wõt.” (1 Piter 3:1-4; Dri Epesõs 5:22-24) Ajiri ro rej kwalok air tiljek ñan Christ ñe rej lor joñok in bokake eo an. Ke ear juõn jodikdik, Jesus ear kõttãik wõt e ñan jemen im jinen, meñe rar jab wãppen. (Luk 2:51, 52; Dri Epesõs 6:1) Ro karejaran Christ rej kate ir ñan air kajeoñe e ilo air “tiriamokake dron, komin yokwe einwõt jimjãn jimjãten” im ñe rej “keni” don. Rej kate ir bwe ren einwõt Christ ñe rej, “etã buruemi: Komin jab lelok nana kin nana, ak kajirere kin kajirere.”​—1 Piter 3:8, 9; 1 Dri Korint 11:1.

Ri Karejar Ro Rej Bokake Kien

11. Kien et ko ro karejaran Christ rej kõttãik ir ñani?

¹¹ Einwõt ro me rekõnan erom armij ro an bar juõn ailiñ rej aikwij bokake kien ko an ailiñ eo air ekãl, ro karejaran Christ rej kõttãik ir ñan “kien Kraist” ilo air mour ekkar ñan ta eo Jesus ear katakin im kakien ir kake. (Dri Galetia 6:2) Elaptata, rej tiljek in mour ekkar ñan “kien elap” kin yokwe. (Jemes 2:8) Ta ko kien kein rej kitibuji?

12, 13. Ewi wãwen jej kõttãik kij ilo tiljek ñan “kien Kraist”?

¹² Ro karejaran Christ rejjab anemkwoj jen jab wãppen im likjap ko. (Dri Rom 3:23) Kin men in, rej aikwij kaddeklok “yokwe jimjãn jimjãten e jaje mon” bwe ren maroñ “yokwe dron kin [burueir].” (1 Piter 1:22) “Elañe iben jabrewõt iami eor ruõn iben bar juõn,” Ri Christian ro retiljek ilo air jerbale kien Christ rej “meaniwõr ñõn dron, im jeorilok nana jen dron.” Ilo air bokake kien in ej jibañ ir ñan air kajekdon jab wãppen ko im ñan bukõt un ko ñan air kwalok yokwe don. Elap ad kamolol in bed ibben ro me ilo air tiljek in kõttãik ir ñan King eo ad e yokwe rej kõnak yokwe, “eo kein lukwõj ej kowãppemi.”​—Dri Kolosse 3:13, 14.

 ¹³ Bareinwõt, Jesus ear kamelele bwe yokwe eo ear kwaloke ear laplok jen yokwe eo ekkã an armij kwaloke ñan don. (Jon 13:34, 35) Elañe jej yokwe ro rej yokwe kij, ejjab ‘lap ad kõmman jen ro jet.’ Inem yokwe eo ad enaj wõr likjap. Jesus ear rejañ kij ñan kajeoñe yokwe eo an Jemen ilo ad kwalok yokwe ñan ro rej kijirãt im matõrtõre kij. (Matu 5:46-48) Yokwe in ej bareinwõt kamakit ro karejaran Ailiñ eo bwe ren kijenmij ilo tiljek ñan jerbal eo air elap. Ta jerbal eo air elap?

Tiljek eo an Ro Karejaran Christ Ej Bõk Melejoñ

14. Etke jerbal in kwalok nan elap an aorõk?

¹⁴ Ro karejaran Ailiñ in Anij ewõr ibbeir jerbal eo elap ñan “kennanek ir kin ailiñ in Anij.” (Jerbal 28:23) Ad kõmmane men in eaorõk kinke Ailiñ in Messiah eo enaj kamole jimwe in iroij bõtata eo ijoko otemjej an Jehovah. (1 Dri Korint 15:24-28) Ñe jej kwalok kin news eo emõn, ebellok ñan ro rej roñjake ien eo emõn ñan air erom ri karejar ro an Ailiñ in Anij. Bareinwõt, wãwen an armij ro uak ñan ennan in ej letok juõn kein joñjoñ, eo Christ King eo emaroñ ekajete armij ikijen. (Matu 24:14; 2 Dri Tessalonika 1:6-10) Kin men in, wãwen eo elaptata jemaroñ kwalok ad tiljek ñan Christ ej ikijen ad bokake kien eo an ñan jiroñ ro jet kin Ailiñ eo.​—Matu 28:18-20.

15. Etke tiljek eo an Ri Christian ro rej bed iumin melejoñ?

¹⁵ Emol, Satan ej jumae jerbal in kwalok nan eo ilo jabdewõt wãwen emaroñ, im iroij ro ion lal rejjab kile maroñ eo an Christ me Anij ear lelok ñan e. (Sam Ko 2:1-3, 6-8) Kin men in, Jesus ear kakkõl ri kalor ro an: “Dri korijer e jab utiej jen iroij eo an. Elañe r’ar matõrtõr Iõ, re naj bareinwõt matõrtõre kom.” (Jon 15:20) Inem, ri kalor ro an Christ rej bed ilo juõn tarinae ilo jitõb me ej melejoñe tiljek eo air.​—2 Dri Korint 10:3-5; Dri Epesõs 6:10-12.

16. Ewi wãwen ro ri karejaran Ailiñ eo rej lelok “ñõn Anij men ko an Anij”?

¹⁶ Mekarta, ro ri karejaran Ailiñ in Anij rej kejbãrok air tiljek ñan King eo air jejjab loe ak ilo ejja ien eo wõt rej kwalok air kautiej ñan ri utiej ro ion lal. (Taitõs 3:1, 2) Jesus ear ba: “Komin lelok ñõn Sizar men ko an Sizar, im ñõn Anij men ko an Anij.” (Mark 12:13-17) Kin men in, ro ri karejaran Christ rej bokake kien ko me rejjab idaptõk ibben kien ko an Anij. (Dri Rom 13:1-7) Bõtab, ke mõn ekajet eo eutiej an Ri Jew ro ear kajekdon kien ko an Anij ilo an jiroñ ro ri kaloran Jesus ñan air kabõjrak jen air kwalok nan, ilo wãwen kwalok kautiej rar uak ilo beran im ba bwe rar aikwij “bokake Anij elap jen armij.”​—Jerbal 1:8; 5:27-32.

17. Etke jemaroñ beran in jelmae melejoñ ko kin tiljek eo ad?

¹⁷ Emol, ro karejaran Christ rej aikwij beran bwe ren tiljek wõt ñan King eo air meñe rej jelmae jumae. Mekarta, Jesus ear ba: “Emõnõnõ kom ñe armij re naj kajirere kake kom, im matõrtõr kom, im naj ba nan ko renana otemjej nae kom, riõp wõt, kin Ña. Komin lõñliñ, im kanuij buñburuemi; bwe elap jinekjij ñõn kom i lõñ.” (Matu 5:11, 12) Ro ri kaloran Christ ilo jinoin rar iion mol in nan kein. Meñe kar deñloke ir kin air wõnmanlok im kwalok nan kin Ailiñ eo, rar lañliñ kinke “emwij likit ir im tellokõn kin air iñtan kin Ãt eo. Im ran otemjej iloan tempel, im ilo jikir e jab mwij air katakin im kwalok Jisõs bwe E dri Kraist.” (Jerbal 5:41, 42) Ej tellokõmi bõk nebar, ke komij kwalok ejja jitõb in wõt kin tiljek ke kom ar kijenmij kin abañ ko, nañinmij, buromõj kin an mij juõn eo ejitenburu  ibbam, ak jumae.​—Dri Rom 5:3-5; Dri Hibru 13:6.

18. Ta eo nan ko an Jesus ñan Pontius Pilate rej kalikar?

¹⁸ Ke ear King eo kar kãlete, Jesus ear kameleleik Governor eo ilo Rome Pontius Pilate: “Ailiñ eo Aõ e jab jen lõl in; elañe Aõ ailiñ jen lõl in, inem ro korijera ren iri, bwe en jab ketõk Iõ ñõn dri Ju ro: a kiõ Aõ ailiñ e jab jen ijin.” (Jon 18:36) Kin men in, ro karejaran Ailiñ in lañ rejjab ire ak koba ibben jabdewõt armij ilo tarinae ko ion lal. Ilo air tiljek ñan “Iroij in Ainemõn” eo, rej bed iolaplap ilo makitkit ko rej kõmman jebel ilo lal in.​—Aiseia 2:2-4; 9:6, 7.

Jerammõn ko Indio ñan Ro Ri Karejaran Retiljek

19. Etke ro ri karejaran Christ remaroñ reimanlok ñan ilju im jeklaj kin liki?

¹⁹ Ro retiljek karejaran Christ, “Kiñ in Kiñ ro,” rej reimanlok ñan ilju im jeklaj kin liki. Rej kijoror ñan an kwalok kajur eo an elap. (Reveles̃õn 19:11–20:3; Matu 24:30) Bwen ri kabit ro retiljek “nejin ailiñ in lõñ” rej reimanlok ñan men in jolet eo air eaorõk ñe renaj king ibben Christ ilañ. (Matu 13:38; Luk 12:32) ‘Sheep ro jet’ retiljek an Christ rej kõttar an ba ilo buñburu: “Komin itok kom dri mõnõnõ an Jema, komin jolit ailiñ eo e ar pojõk ñõn kom jen jinoin lõl.” (Jon 10:16; Matu 25:34) Ilo ekkar, aolep ro ri karejaran Ailiñ eo rej aikwij beek ilo burueir bwe ren tiljek ilo air karejar ñan Christ King eo.

[Kamelele eo itulal]

Kwomaroñ Ke Kamelele?

• Etke ej tellokin Christ bwe jen tiljek ñan e?

• Ewi wãwen ro ri karejaran Christ rej kwalok air tiljek ñan e?

• Etke jekõnan bwe jen tiljek ñan Christ King eo?

[Kajitõk ko ñan katak]

[Bo̦o̦k eo ilo peij 17]

KADKAD KO JET RELAP KADKADIN CHRIST

Ejelok kalijekiok—Jon 4:7-30.

Tiriamokake—Matu 9:35-38; 12:18-21; Mark 6:30-34.

Yokwe eo ej karmi jeteik kõnan ko an make—Jon 13:1; 15:12-15.

Tiljek—Matu 4:1-11; 28:20; Mark 11:15-18.

Jelã eñjake ko an ro jet—Mark 7:32-35; Luk 7:11-15; Dri Hibru 4:15, 16.

Kõmmanwa—Matu 15:21-28.

[Pija eo ilo peij 15]

Ilo ad kwalok ad yokwe don, jej kõttãik kij ilo tiljek ñan “kien Kraist”

[Pija ko ilo peij 17]

Kadkad ko kadkadin Christ rej kamakit yuk ke ñan am karejar ñan e ilo tiljek?