Nan eo an Jehovah Ej Mour Wõt

Katak ko Relap Jen Book eo Kein Kalalemen in Sam Ko

RO REMWEIE remaroñ ba: “Ñe ro nejim man re naj einwõt jul ko elap air edrekliñlok ke re jab kanuij ridto: Im ro nejim kõra einwõt dreka ko in dremõn im, emwij jekjeki ilo wãwen dreka in imõn iroij. Ñe mo ko imõn kijem ren obrõk, . . . sip ko am ren keutak tausan ko im joñoul tausan ko.” Bareinwõt, ro remweie remaroñ lamõj im ba: “Emõnõnõ ro dri ailiñ eo, ñe einwõt in ibeir!” Bõtab, oktan menin ri jeje sam ej ba: “Emõnõnõ ro dri ailiñ ñe air Anij Jeova!” (Sam Ko 144:12-15) Armij ro an Jehovah remõnõnõ. Jehovah ej Anij emõnõnõ, im mõnõnõ ej ãjinkij eo an ro rej kabuñ ñan e. (1 Timote 1:11) Mol in emwij kalikar ilo mõttan eo eliktata in al ko emwij kakõrmoli, ko im rej bed ilo Sam Ko 107 ñan 150.

Book Lalem in Sam Ko rej bareinwõt kalikar kadkad ko relap kadkadin Jehovah, ekoba yokwe im joij eo an, mol, im emõn bõtata. Ilo an laplok ad jelã kin kadkadin Anij, men in ej kõmman bwe en laplok ad kõnan yokwe im mijak e. Inem, ej bõktok elap lañliñ ñan kij. Ej juõn ennan ejej uan jej lo ilo Book Lalem in Sam Ko!—Dri Hibru 4:12.

MÕNÕNÕ KIN JOIJ IM YOKWE EO AN JEHOVAH

(Sam Ko 107:1–119:176)

“O  armij ren nebar Jeova kin An joij, im kin jerbal in bwilõñ ko An ñõn ro nejin armij,” Ri Jew ro rej jeblak jen air kar kamakoko ilo Babylon rej al. (Sam Ko 107:8, 15, 21, 31) Ilo an nebar Anij, David ej al: “Bwe Am tiriamo elap eutiej jen lõñ ko.” (Sam Ko 108:4) Ilo al in tok juõn, ej jar: “Kwon jibõñ iõ O Jeova aõ Anij, O Kwon lomoriõ kin Am tiriamokake.” (Sam Ko 109:18, 19, 26) Sam 110 ej kanan kin iroij eo an Messiah eo. “Mijõk Jeova jinoin meletlet,” Sam 111:10 ej ba. Ekkar ñan sam eo tok elikin, “emõnõnõ armij eo ej mijõk Jeova.”​—Sam Ko 112:1.

Sam Ko 113 ñan 118 kar naetair Sam Ko in Hallel, kinke ekkã air kajerbal nan in “Hallelujah,” ak “Nebar Jah!” Ekkar ñan Mishnah—juõn jerbal in jeje kar kõmmane ilo ebeben eo kein kajilu kin nan im manit ko mokta ej ba—al kein kar al kaki ilo ien kwojkwoj in Kijone eo im ilo ien kwojkwoj ko jilu an Ri Jew ro. Sam 119 ej kaibujuij nan eo emwij kalikare an Jehovah, ak ennan eo, im ej sam eo eaetoktata ian sam ko im chapter eo eaetoktata ilo Bible eo.

Emwij Uaki Kajitõk ko Rej Bedbed ion Bible:

109:23—Ta melelen an kar David ba: “Ña I joko einwõt anen ke eriklok”? David ear ba ilo jabõn kennan in an bwe ej eñjake bwe ien mij eo an elukkun ebak.—Sam Ko 102:11.

110:1, 2—Ta eo “Iroij [an David],” Jesus Christ, ear kõmmane ilo ien eo ear jijet anbwijmaroñin Anij? Elikin jerkakbiji eo an, Jesus ear wanliñlok im kõttar ilo pein anbwijmaroñin Anij mae 1914 ñan an jino iroij einwõt King. Iumin ien in ear kõttar, Jesus ear iroij ion ri kabit ro an, tel ir ilo jerbal in kwalok im kõmman ri kalor ro im bareinwõt keboj ir ñan air iroij ibben ilo Ailiñ eo an.—Matu 24:14; 28:18-20; Luk 22:28-30.

 110:4—Ta eo Jehovah ear ‘kanõjnij im E jamin ukwelok’? Nan in kallimur in ej bujen eo me Jehovah ear kõmmane ibben Jesus Christ ñan an jerbal einwõt King im Priest Eutiej.​—Luk 22:29.

113:3—Ilo wãwen et ren nebar etan Jehovah “jen tak al ñõn tulok eo an”? Menin ej kitibuj elaplok jen juõn kumi in armij ro kajjojo rej kabuñ ñan Anij ran otemjej. Jen tak in al i rear ñan tulok in irilik, meram in al ej rome aolepen lal. Ilo ejja wãwen in wõt, ren nebar Jehovah iaolepen lal. Menin ejamin tõbrak elañe ejelok karõk. Einwõt Ri Kennan ro an Jehovah, ebed ibbed jerammõn eo ejej uan ñan ad nebar Anij im bõk kunad ilo kijejeto ilo jerbal in kwalok kin Ailiñ eo.

116:15—Ewi joñan an ‘aurõk iman mejen Jeova, mij an ro remõn An’? Joñan an Jehovah kaorõk ri kabuñ ro an, ej watõk mij eo air einwõt juõn kumi einwõt juõn wõnãn elap jen an maroñ kõtloke. Elañe Jehovah ear kõtlok bwe menin en walok, enaj kar einwõt ñe ri kijirãte ro an elaplok air kajur jen e. Bareinwõt, enaj ejelok juõn armij enaj bed ion lal einwõt juõn bedbed ñan lal eo ekãl.

119:71—Ta tokjen eo emõn kin bõk jorrãn? Jorrãn ko remaroñ katakin kij ñan ad kalaplok ad atartar ion Jehovah, ñan ad kalaplok ad jar ñan e, im ñan ad kalaplok ad niknik ilo ad katak Bible eo im jerbale ta eo ej ba. Bareinwõt, wãwen ad emmakit ñan abañ eo emaroñ kalikar likjap ko ad jej aikwij kajimwe. Eñtan ejamin kõmman bwe jen meo elañe jej kõtlok bwe en eik kij.

119:96—Ta melelen an kar ba ‘jemlokõn wãppen otemjej’? Ri jeje sam ej konono kin wãppen ekkar ñan wãwen an armij lemnak. Bõlen ear bed ilo lemnak eo an bwe melele eo an armij kin wãppen ewõr joñan. Ilo oktan, kien eo an Anij ejelok joñan. Nan in tel eo an ej jerbal ñan wãwen otemjej ilo mour. “Ñan wãppen otemjej ij lo ewõr joñan,” Bible eo etan New International Version ej ba, “ak kien ko am ejelok jemlokair.”

119:164—Ta eo eaorõk kin nebar Anij “jiljilimjuõn alen ilo ran”? Jiljilimjuõn ekkã an jutak kin juõn men eyu. Kin menin, ri jeje sam ej kwalok bwe Jehovah ej tellokin ñan an bõk nebar otemjej.

Tokjen Katak ko ñan Kij:

107:27-31. Meletlet in lal in enaj ‘jako’ ñe Armageddon ej itok. (Reveles̃õn 16:14, 16) Ejamin lomoren jabdewõt jen kokkure. Ro wõt me rej reilok ñan Jehovah kin lomor renaj mour ñan “nebar [e] kin An joij.”

109:30, 31; 110:5. Pein tu-anbwijmaroñin juõn ri tarinae eo ej jibwe jãje eo ekkã an ejelok kejbãrok jen kein tõrak eo, eo ej bed ilo tu-anmiñin. Ilo kõkkar, Jehovah ej bed ‘i anbijmaroñõn’ ro ri karejaran, ñan an ire kin ir. Aet ej lelok kejbãrok im jibañ—juõn un emõn ñan ad “kanuij kamolol” e!

113:4-9. Jehovah elap an utiej inem ej aikwij kõttãik e meñe ñan an ‘lo lõñ.’ Meñe eindein, ej tiriamokake ro rettã, ri jeramel ro, im kõrã ewar. Iroij Bõtata eo Jehovah ej ettã buruen im ekõnan bwe ri kabuñ ro an bareinwõt ren einwõt e.—Jemes 4:6.

114:3-7. Katak kin jerbal ko relap me Jehovah ear kõmmani ikijen armij ro an ilo Lomalo  Ekilmir, ilo River Jordan, im ilo Tol Sinai ej aikwij jelet kij ilo juõn wãwen emũlal. “Lõl,” eo ej jutak ikijen armij, aikwij mijak—ilo nan in kõkkar “wurirrir”—kin Iroij.

119:97-101. Bõk meletlet, lolokjen, im melele jen Nan eo an Anij ej kejbãrok kij jen jorrãn ko ilo jitõb.

119:105. Nan in Anij ej juõn lamp ñan need ilo wãwen in emaroñ jibañ kij kamadmõde abañ ko jej jelmae kiõ. Ej bareinwõt ilo nan in kõkkar kameramlok ial eo ad, kinke ej kanan kin karõk eo an Anij kin ilju im jeklaj.

LAÑLIÑ MEÑE ELÕÑ JORRÃN KO

(Sam Ko 120:1–145:21)

Ewi wãwen jemaroñ jelmae wãwen ko rebin im kijenmij iumin jorrãn ko? Sam Ko 120 ñan 134 rej letok uak eo ealikar ñan kajitõk in. Jej kijenmij iumin ien ko rebin im debij wõt lañliñ eo ad ilo ad reilok ñan Jehovah kin jibañ. Sam kein, naetair Al in Wanliñlok Ko, bõlen Ri Israel ro rar al kaki ke rar wanliñlok ñan Jerusalem ñan air lale im kememej ien kwojkwoj ko air kajjojo yiõ.

Sam Ko 135 im 136 rej kwalok kin Jehovah einwõt eo ej Ri Kõmman jabdewõt men eo ej kamõnõnõik e, eñin oktak eo elap ikõtan im ekjap ko ejelok maroñ ibbeir. Sam 136 kar jeje einwõt al in uak, mõttan eo ilokan eon kein kajjojo kar al ñan uak nan ko ilo jinoin eon kein. Sam eo elikin ej kalikar kin buromõj eo an Ri Jew ro ilo Babylon, ro im rar kõnan kabuñ ñan Jehovah ilo Zion. Sam Ko 138 ñan 145 rej an David. Ej kõnan ‘nebar Jehovah kin aolepen buruen.’ Etke? “Am kõmõnmõn iõ men in lelñoñ im bwilõñ” ej ba. (Sam Ko 138:1; 139:14) Ilo sam kein tok ilal, David ej jar kin bõk kejbãrok jen armij ro renana, kin kaje eo ejimwe, ñan bõk lomor jen ro rej matõrtõr e, im kin nan in jiroñ kin mwil emõn. Ear kalikar lañliñ eo an armij ro an Jehovah. (Sam Ko 144:15) Elikin an bar eliji kin kajur im emõn eo an Anij, David ej ba: “Loñiõ e naj konono im nebar Jeova; im kõniek otemjej en kamõnõnõik etan ekwojarjar ñõn in drio im in drio.”—Sam Ko 145:21.

Emwij Uaki Kajitõk ko Rej Bedbed ion Bible:

122:3—Ewi wãwen an kar Jerusalem juõn jikin kwelok “mõkon re kut”? Einwõt ekkã an ein dein ilo jikin kwelok ko ilo ien ko etto, moko ilo Jerusalem rar lukkun ikut ibben don ke rar kaleki. Moko ilo jikin kwelok eo rar ikutkut ibben don inem ear bidodo air kejbãroke jen ri kijirãte ro air. Bareinwõt, kin an ebak im ikut moko ñan don menin ear kõmman bwe ro rej jokwe ilo jikin kwelok eo ren atartar ion don ñan bõk jibañ im kejbãrok. Men in ej kwalok burukuk eo ilo jitõb an bwij ko 12 bwijin Israel ñe rej koba ibben don ñan kabuñ.

123:2—Ta point eo kin wanjoñok eo kin mejen ri karejar ro? Ri karejar maan im kõrã ro rej reilok ñan pein iroij ak leroij eo air kin ruo un ko: ñan air jelã ta eo ekõnan bwe ren kõmmane im ñan air bõk kejbãrok im men in aikwij ko kin mour. Ilo ejja wãwen in wõt, jej reilok ñan Jehovah ñan ad jelã ta ankilan im ñan bõk buñburu eo an.

131:1-3—Ewi wãwen David ear ‘tõt im kõkajeklokjen an, einwõt niñniñ e likitit ibben jinen’? Einwõt an juõn ajiri eo ej likitit katak ñan an lo kainemõn im juburu ilo pein jinen, David ear katak ñan kakejeklokjen im kainemõn aan “einwõt niñniñ e likitit ibben jinen.” Ekijkan? Ilo an jab utiej buru im utiej ilo mejen im ilo an jab bukõt men ko relap ñan e. Jen an bukõt utiej, David ekkã an kile joñan maroñ ko an im kwalok ettã buru. Ej menin meletlet ñan kij ñan ad anõk lemnak eo an, elaptata elañe jej jibadõk ñan ad bõk maroñ ko remõn ilo congregation eo.

Tokjen Katak ko ñan Kij:

120:1, 2, 6, 7. Konono nae ko rejjab mol im nan ko relej remaroñ bõktok elap eñtan im jorrãn ion ro jet. Debij loõd ej juõn wãwen jej kwalok bwe jej “kõnake ainemõn.”

 120:3, 4. Ñe jej jelmae juõn eo ibben “lo in etaõ,” jemaroñ ainemõn wõt ilo ad jelã bwe Jehovah enaj kajimwe men otemjej ilo ien eo emwij an karõke. Ri konono mõn ro renaj bõk kokkure ilo pein “dri kajur.” Renaj ri bõk mõttan ekajet eo ebwil an Jehovah eo ej kõkkar kake einwõt “melle in wijki juniper.”

127:1, 2. Ilo kõtõbar im kate ko ad otemjej, jej aikwij reilok ñan Jehovah kin tel.

133:1-3. Burukuk eo an armij ro an Jehovah ej kainemõn, kejmour, im kaemololo. Jej jab aikwij kokkure ilo ad lo bwid ko an ro jet, akwel, im lotan ko.

137:1, 5, 6. Ri kabuñ ro an Jehovah me rar jibokwe rar oñkake Zion—kar mõttan dolul eo an Anij ijin ion lal ilo kar ien eo. Ta kin kij? Jej eddeb ke im tiljek ñan dolul eo me Jehovah ej kajerbale ilo rainin?

138:2. Jehovah ej ‘kalaplok An in nan jen aolepen etan’ ilo wãwen in bwe en jejjet aolep men ko ear kallimur kaki ilo etan ko renaj ellã jen joñan jaar kõtmene kake. Emol, jerammõn ko relap rej bed imad.

139:1-6, 15, 16. Jehovah ejelã jerbal ko ad, lemnak ko ad, im nan ko ad mokta jen jej konono. Ejelã kin kij jen ien eo jaar jino ejaak, mokta jen an mõttan ko kajjojo ilo enbwinid alikar. Jelãlokjen eo an Anij kin kij kajjojo e menin “bwilõñ” ñan ad melele. Elap an juõn menin kainemõn ñan ad jelã bwe Jehovah ejjab baj lo wõt wãwen eo ebin jej jelmae ak ej bareinwõt melele kin wãwen ej jelet kij!

139:7-12. Ejelok juõn jikin jemaroñ etal ñan e etolok ñan an Anij kakajur kij.

139:17, 18. Jelãlokjen kin Jehovah emwij ke an erom juõn men e kamõnõnõ ñan kij? (Jabõn Kennan Ko 2:10) Elañe aet, eokwe emwij ad lo jikin den in lañliñ eo ejelok jemlokin. Lemnak ko an Jehovah “oran elõñ jen oran bok ko.” Ekanuij lõñ men ko jenaj katak kin e.

139:23, 24. Jej aikwij kõtlok bwe Jehovah en etale lemnak ko ad ñan an bukõt ‘ial enana’​—lemnak ko rejõkkar, mõm ko, kõnan ko—ñan an jibañ kij jolok men kein.

143:4-7. Ewi wãwen jemaroñ kijenmij meñe iumin eñtan ko relap? Ri jeje sam ej letok ñan kij key eo: Kalmenlokjen kin jerbal eo an Jehovah, lemnak kin kõmman ko an, im jar ñan e kin jibañ.

“Komin Nebar Jeova!”

Kajjojo ian mõttan ko emen mokta in sam ko rej kajemlok kin nan in nebar ñan Jehovah. (Sam Ko 41:13; 72:19, 20; 89:52; 106:48) Mõttan eo eliktata ej bareinwõt kajemlok kin ejja nan kein wõt. Sam Ko150: 6 ej ba: “Men otemjej eor air menono—ren nebar Jeova. Komin nebar Jeova!” Men in enaj lukkun mol im jejjet ilo lal eo ekãl an Anij.

Ke jej reimanlok ñan ien in ekamõnõnõ, ewõr ibbed juõn un elap ñan ad kaibujuij Anij eo emol im nebar etan. Ñe jej lemnak kin lañliñ eo jej lo kinke jej jelã Jehovah im ewõr juõn kõtan emõn ibben, men in ejjab kamakit kij ke ñan ad nebar e kin juõn buru in kamolol?

[Pija eo ilo peij 29]

Jerbal ko an Jehovah re menin kabwilõñlõñ

[Pija eo ilo peij 31]

Lemnak ko an Jehovah “oran elõñ jen oran bok ko”