Kwo Bojak Ke In Bõk Lomor?

“Kwe im nukõm otemjej komin itok ñõn loan wa eo bwe I ar lo am wãnik iman meja ilo ebeben in.”​—JENESIS 7:1.

1. Ta karõk eo Jehovah ear kõmmane ñan an armij bõk lomor ilo ran ko an Noah?

 JEHOVAH ear “bõktok lañ eo ion lõl an ro dri nana” ilo ran ko an Noah, ak Ear bareinwõt kõmman karõk bwe ren bõk lomor. (2 Piter 2:5) Anij eo emol ear lelok ñan armij eo ewãnik Noah nan in jiroñ ko ralikar kin ewi wãwen en kalek wa eo ñan an bõk lomor ilo ibwijleplep eo. (Jenesis 6:14-16) Einwõt jemaroñ kõtmene jen juõn ri karejar eniknik an Jehovah, “Ein drein Noa e ar kõmõn; einwõt men otemjej Anij ej jiroñ e.” Emol bwe, “ein drein e ar kõmõne.” Kinke Noah ear bokake, eñin unin jej mour rainin.​—Jenesis 6:22.

2, 3. (a) Ewi wãwen armij ro ilo ran ko an Noah rar emmakit ñan jerbal eo an Noah? (b) Kin liki et eo Noah ear deloñ iloan wa eo?

² Ear jab juõn jerbal ebidodo ñan kalek wa eo. Alikar, elõñ armij rar bwilõñ kin ta eo Noah im family eo an rar kõtõbrake. Ak, men in ear jab bwe ñan kamol ñan armij ro ilo ran ko an Noah bwe lomor eo ear wawa ion air deloñ ilo wa eo. Eliktata, meanwõd eo an Anij kin lal in enana ear jemlok.​—Jenesis 6:3; 1 Piter 3:20.

³ Elikin an Noah im family eo an kate ir im jerbal iumin elõñ yiõ ko, Jehovah ear jiroñ Noah: “Kwe im nukõm otemjej komin itok ñõn loan wa eo: bwe I ar lo am wãnik iman meja ilo ebeben in.” Kin tõmak im liki ilo nan eo an Jehovah, “Noa e ar dreloñ, im lõmaro nejin, im lio belen, im limaro belen ro nejin na iben.” Jehovah ear kiili kejam eo ñan an kejbãrok ri kabuñ ro an. Ke ear itok ibwijleplep eo ion lal, wa eo ear juõn men in letok emõn jen Anij ñan bõk lomor.—Jenesis 7:1, 7, 10, 16.

 Wãwen ko Ilo Ran Kein Rej Einwõt Ilo Ran ko an Noah

4, 5. (a) Jesus ear keidi ien bed eo an ñan ta? (b) Ta wãwen ko eierlok wõt rar walok ilo ran ko an Noah im ilo ran kein ad?

⁴ “Im einwõt ran ko an Noa, e naj ein drein an Nejin armij itok.” (Matu 24:37) Ikijen nan kein, Jesus ear kalikar bwe ilo ien bed eo an eo ejjab alikar ñan mejen armij, enaj einwõt ilo ran ko an Noah, im men in elukkun mol. Elaptata jen 1919, juõn ennan in kakkõl einlok wõt eo Noah ear kwaloke rar keañ kake ñan armij ro jen ailiñ ko otemjej. Rar emmakit ilo ejja wãwen eo wõt armij ro rar kõmmane ilo ran ko an Noah.

⁵ Ikijen Ibwijleplep eo, Jehovah ear emmakit nae juõn lal “e obrõk kin koaroñ.” (Jenesis 6:13) Ear alikar ñan aolep ro rar lo ir bwe Noah im family eo an rar jab bõk kunair ilo kowadoñ ak ilo ainemõn rar kõmmane jerbal eo ñan kalek wa eo. Ilo wãwen in bareinwõt, jej lo juõn wãwen einlok wõt ilo ran kein. Armij ro emol burueir remaroñ “lo ta eo enaj walok ñõn ro ri wãnik, ro rej jerbal ñõn iõ, im ta eo enaj walok ñõn ro ri nana, ro rejjab jerbal ñõn iõ.” (Malachi 3:18) Armij ro ejelok kalijeklok ibbeir rej nebar Ri Kennan ro an Jehovah kin air kwalok mol, joij, ainemõn, im tiljek, im kadkad kein rej kajenolok armij ro an Anij jen ro ilo lal in. Ri Kennan ro an Jehovah rej karmijeteik jabdewõt wãwen mõn don im rej kõtlok bwe jitõb an Jehovah en tel ir. Eñin unin ewõr ainemõn ibbeir im unin rej jibadõk juõn ial ewãnik.​—Aiseia 60:17.

6, 7. (a) Ta eo armij ro ilo ran ko an Noah rar jab kile, im ewi wãwen an eindein rainin? (b) Ta wanjoñok ko rej kwalok bwe Ri Kennan ro an Jehovah ekkã air kile ir bwe reoktak?

⁶ Armij ro rar mour ilo ran ko an Noah rar jab kile bwe ear lor wõt nan in tel eo an Anij im bwe Anij ear rejetake. Inem rar jab tõmak ke ear kwalok nan ñan ir im rar jab emmakit ñan nan in kakkõl eo an. Ta kin rainin? Meñe elõñ rej bwilõñ kin jerbal eo im mwilin Ri Kennan ro an Jehovah, ak elõñ iair rejjab tõmak kin news eo emõn im nan in kakkõl ko ilo Bible. Ro ri turiir, boss ro ilo jikin jerbal ko, ak ro nukiir rej nebar Ri Christian ro remol kin kadkad ko remõn kadkadiir ak rej ba, “Men eo wõt enana ej bwe rej Ri Kennan ro an Jehovah!” Men eo armij rein rejjab kile ej bwe Ri Kennan ro rej kwalok kadkad kein einwõt yokwe, ainemõn, joij, lejokmen, inemõn, im jatõr kinke jitõb kwojarjar eo an Anij ej tel ir. (Dri Galetia 5:22-25) Men in en kar kõmman bwe armij ren tõmak ennan eo rej kwalok kake.

 ⁷ Ñan wanjoñok, ilo Russia, Ri Kennan ro an Jehovah rar kalek juõn Kingdom Hall. Juõn emaan eo ear bõjrak ñan an bwebwenato ibben juõn ian ri jerbal ro ear ba: “Jikin ekkal in elukkun oktak—ejelok juõn ej kõbatat, ejelok kanejnej, im aolep rejjab kadõk! Kwoj juõn ian Ri Kennan ro an Jehovah ke?” Ri jerbal eo ear kajitõk ibben leo, “Elañe ij ba jaab, kwonaj kar tõmak iõ ke?” Leo ear uak ilo mõkaj, “Jaab.” Ilo bar juõn jikin kwelok ilo Russia, mayor eo ear lukkun bwilõñ ke ear lo an Ri Kennan ro an Jehovah kalek Kingdom Hall eo air ekãl. Ear ba bwe meñe ear lemnak mokta bwe aolep kumi in kabuñ ko rej einwõt juõn, elikin an lo jitõb in jab kibbon eo an Ri Kennan ro an Jehovah, ear oktak an lemnak. Wanjoñok kein rej baj ruo wõt me rej kwalok bwe armij ro an Jehovah rej oktak jen ro rejjab bokake kien ko ilo Bible eo.

8. Ad bõk lomor jen jemlokin lal in enana ej wawa ion ta?

⁸ Ilo tu-jemlokin ien eo eliktata an ‘lõl eo mokta’ me ear jako ilo Ibwijleplep eo, Noah ear juõn “dri kwalok ekwojarjar” im etiljek. (2 Piter 2:5) Ilo ran kein eliktata an jukjuk im bed in, armij ro an Jehovah rej kwalok kin kien ko rewãnik an Anij im kin news eo emõn bwe ren maroñ ellã im mour ilo lal eo ekãl. (2 Piter 3:9-13) Einwõt an kar Noah im family eo an rej mijak Anij bõk kejbãrok ilo wa eo, lomor eo an armij ro kajjojo rainin ej wawa ion tõmak eo air im air tiljek in koba ibben dolul eo an Jehovah ion lal.

Jej Aikwij Tõmak ñan Ad Bõk Lomor

9, 10. Etke eaorõk tõmak elañe jekõnan ellã im mour jen jemlokin jukjuk im bed in an Satan?

⁹ Ta eo juõn armij ej aikwij kõmmane ñan an ellã im mour jen jorrãn eo ebojak in walok ñan lal in ej bedwõt ilo ri nana eo? (1 Jon 5:19) Mokta, ej aikwij kile aikwij eo ñan an bõk kejbãrok. Inem ej aikwij kortokjen kejbãrok in. Armij ro ilo ran ko an Noah rar wõnmanlok ilo mour eo air jen ran ñan ran im rar jab lo aorõkin air bõk kejbãrok jen jorrãn eo ear bojak in walok. Bar juõn men ear ejelok ibbeir​—tõmak ilo Anij.

¹⁰ Ilo oktan, Noah im family eo an rar kile aikwij eo ñan air bõk kejbãrok im lomor. Rar bareinwõt jerbale tõmak ilo Iroij Bõtata eo ijoko otemjej, Jehovah Anij. “Elañe ejelok tõmak, armij re ban kabuñburuen [Jehovah],” ri jilek Paul ear je, “bwe eo ej itok ñõn Anij, emõn en tõmak kin an Anij ber, im kin An lelok jinekjij ñõn ro rej kabukot E.” Paul ear bareinwõt ba: “Kin tõmak Noa, emwij an Anij kowe e kin men ko re jañin walok, ilo an mijõk Anij e ar kapojõk wa eo ñõn lomoren e im ro nukin; kin eo e ar liakelok lõl, im jolit kwojarjar eo ekar ñõn tõmak.”​—Dri Hibru 11:6, 7.

11. Ta eo jemaroñ katak jen wãwen eo Jehovah ear lelok kejbãrok ilo ien ko remotlok?

¹¹ Ñan ellã im mour jen jemlokin jukjuk im bed in enana, elaplok ad aikwij kõmman jen baj tõmak wõt bwe enaj itok jemlokin. Jej aikwij jerbale tõmak, im kortokjen aolep men in letok ko jen Anij ñan bõk lomor. Emol, jej aikwij jerbale tõmak eo ad ilo katok in binmour eo an Nejin Anij, Jesus  Christ. (Jon 3:16, 36) Bõtab, jej aikwij kememej bwe ro wõt im rar bed iloan wa eo wan Noah rar deor jen Ibwijleplep eo. Eindein, jikin kwelok in kone ko ilo Israel eo etto rar lelok kejbãrok ñan ri kalanwõtwõt eo elañe ej ko ñan juõn ian jikin kwelok kein im bedwõt iloan mae ien emij priest eo elap. (Bwinbwin 35:11-32) Ilo men in kaeñtan eo kein kajoñoul ilo Egypt ilo ran ko an Moses, manje ro nejin Ri Egypt ro rar mij, ak ro nejin Ri Israel ro rar mour. Etke? Jehovah ear jiroñ Moses: “Im ren bõk jen bõtõktõkin, im likit e ion jur ko ruo in kejem, im ion alal eo ilõñin kejem, ilo moko ijo re naj kõñe. . . . im ejelok juõn iami en drioijlok jen kejem in mweo imõn mae jiboñ.” (Exodus 12:7, 22) Manje et eo ibwiljin Ri Israel ro renaj kar kajekdon nan in jiroñ rot in jen Anij ilo an dioj nabõj in juõn em eo emwij kakõlleiki kin bõtõktõk ion jur ko ruo im alal eo ilõñin kejam eo?

12. Ta kajitõk eo kij kajjojo jej aikwij kajitõkin kij make kake, im etke?

¹² Kin men in jej aikwij lukkun lemnak kin wãwen ko ibbed make. Jej bed ke iloan karõk eo an Jehovah ñan bõk kejbãrok ilo jitõb? Ñe ej walok eñtan eo elap, den in kemjalal ko kin lañliñ im kamolol renaj toor lallok jen mejen ro rar bukõt kejbãrok rot in. Ikijen ro jet, renaj jañ im buromõj im ajlok wõt ak enaj ejelok tokjen.

Oktak ko Rej Keboj Kij ñan Bõk Lomor

13. (a) Oktak ko ilo dolul eo ear kõtõbrak mejenkajjik et eo? (b) Kamelele kin jet ian oktak kein.

¹³ Jehovah ear wõnmanlok im kõmman oktak ko ilo dolul eo an ion lal. Men kein rar jerbal ñan kaibujuij, kabin, im kakajur karõk eo an kin kejbãrok eo ad ilo jitõb. Jen yiõ ko ilo 1870 ñan 1932, ro uan congregation eo rar kãlet elder ro im deacon ro. Ilo 1932 rar bõjrak jen air vote im kãlet elder ro ñan lale congregation eo ak rar jino kãlet juõn kumi in maan ro reritto ilo jitõb rej naetan service committee eo ñan jibañ juõn service director me kar jitõñ e ñan jerbal eo an. Ilo 1938, dolul eo an Jehovah ear karõk bwe renaj jitõñ aolep ri tel ro ilo congregation eo ekkar ñan nan in kakabilek ko ilo Bible. Iumin tel eo an Governing Body eo an Ri Kennan ro an Jehovah, jen 1972, congregation ko rej jilkinlok etan armij ro rej lemnak in kajerbal ir im tokelik rej bõk letter ko me rej kowãppen overseer ro im ministerial servant ro ekkar ñan kien ko an Anij. Tokelik, jerbal eo an Governing Body eo ear laplok im rar aikwij kõmman oktak ko ñan kabidodolok jerbal eo.

14. Ta program in katakin eo ear jino ilo 1959?

¹⁴ Ilo 1950, ke rar lukkun etale Sam Ko 45:16 men in ear tellok ñan juõn program in katakin. Eon eo ej ba: “Ro nejõm man re naj binej jenkwõn ro jemõm, ro kwo naj likit ir iroij i aolepen lõl.” Elder ro rej tel ilo congregation eo rej bõk kaminene bwe ren maroñ kõmmane jerbal ko Anij ej litoki ñan ien kein im elikin Armageddon. (Reveles̃õn 16:14, 16). Kingdom Ministry School eo ear jinoe ilo 1959. Ilo ien eo, congregation servant ro, einwõt kar naetan presiding  overseer ro mokta, rar bõk juõn ien katakin iumin juõn alliñ. School in kiõ emwij kalaplok ñan katakin aolep overseer ro im ministerial servant ro. Inem, brother rein rej tel ilo katakin Ri Kennan ro kajjojo an Jehovah ilo congregation ko air. Ilo wãwen in, aolep rej bõk jibañ kin men ko ilo jitõb im ñan kalaplok air bolemen ilo jerbal in kwalok nan eo air einwõt ri keañ ro kin news eo emõn kin Ailiñ eo.​—Mark 13:10.

15. Ilo wãwen et ko ruo rej kejbãrok erreo ilo congregation in Christian?

¹⁵ Armij ro me rekõnan erom mõttan congregation in Christian rej aikwij kajejjet jet men in aikwij ko. Alikar, ri kajirere ro ilo ran kein ejjab tellokin air erom mõttan congregation eo, einwõt an armij ro eier wõt jab maroñ deloñ ilo wa an Noah. (2 Piter 3:3-7) Elaptata jen 1952, Ri Kennan ro an Jehovah rar kalaplok air jurake juõn karõk ñan kejbãrok congregation eo, eñin, ilo air bukwelok ri jerawiwi ro rej makoko in ukwelok. Emol, ro me emol air ukwelok remaroñ bõk jibañ ñan ‘kõmanman ial ko rejimwe ñan neiir.’​—Dri Hibru 12:12, 13; Jabõn Kennan Ko 28:13; Dri Galetia 6:1.

16. Armij ro an Jehovah rej bed ilo wãwen et eo ilo jitõb?

¹⁶ Jerammõn im wãwen eo emõn ilo jitõb an armij ro an Jehovah ejjab juõn men in bwilõñ im ejjab juõn men ear jirullok im walok. Ikijen ri kanan Aiseia, Jehovah ear ba: “Lo, ro dri korijera re naj mõña, a kom naj kwuli; lo, ro dri korijera re naj irak, a kom naj maro; lo, ro dri korijera re naj lõñliñ, a kom naj jok; lo, ro dri korijera re naj al kin lõñliñ an buru, a kom naj jõñ kin buromõj an buru, im limõ kin an droaj buruemi.” (Aiseia 65:13, 14) Jehovah ej wõnmanlok im kabwe juõn buñ pãlok in ekan ko lor jitõb rekkar ñan ran kein me rej kõmman bwe jen kajur ilo jitõb.​—Matu 24:45.

Kwon Bojak ñan Bõk Lomor

17. Ta eo enaj jibañ im keboj kij ñan bõk lomor?

¹⁷ Einwõt ejañin kar walok jen mokta, kiõ ej ien ñan ad “lale dron, im kõkãtok dron ñõn yokwe im jerbal ko remõn; im jen jab likit ar kwelok im jar, einwõt mõnit an jet, a jen kowe dron.” (Dri Hibru 10:23-25) Ilo ad bed ebake im kijejeto wõt ilo ibben juõn ian 98,000 congregation ko an Ri Kennan ro an Jehovah, men in enaj jibañ im keboj kij ñan bõk lomor. Ri tõmak ro mõttad renaj jibañ kij ñe jej kate kin aolepen buruõd ñan “kõnõk armij ekãl” im ñan jibañ ro jet katak kin karõk eo an Jehovah ñan bõk lomor.​—Dri Epesõs 4:22-24; Dri Kolosse 3:9, 10; 1 Timote 4:16.

18. Etke kwar beek ilo buruõm ñan am bed ebak ñan congregation in Christian eo?

¹⁸ Satan im lal eo an enana rekõnan kabo kij bwe jen illok jen congregation in Christian. Bõtab, jemaroñ bedwõt ilo congregation eo im deor jen jemlokin jukjuk im bed in enana. Yokwe Jehovah im kamolol kin karõk ko re yokwe renaj kamakit kij ñan ad beek ilo buruõd bwe jen bõprae jibadbad ko an Satan. Ñe jej kalmenlokjen kin jerammõn ko ad ilo ran kein men in enaj kakajurlok bebe eo ad. Jenaj bwebwenato kaki jet ian jerammõn kein ilo katak in tok juõn.

Ta Uak ko Am?

• Ewi wãwen ran ko ad rej eierlok wõt ran ko an Noah?

• Kadkad et eo eaorõk ñan ad bõk lomor?

• Ta oktak ko ñan wõnmanlok ilo jitõb rar kakajurlok karõk eo an Jehovah ñan kejbãrok kij?

• Ewi wãwen jemaroñ keboj kij make ñan bõk lomor?

[Kajitõk ko ñan katak]

[Pija eo ilo peij 18]

Ro rar mour ilo ran ko an Noah rar jab kaorõk nan in kakkõl ko an

[Pija eo ilo peij 19]

Ewõr tokjen ñan ad eoroñ nan in kakkõl ko an Anij

[Pija eo ilo peij 20]

Kingdom Ministry School eo ej jerbal kin karõk et eo?

[Pija eo ilo peij 21]

Kiõ ej ien eo ñan ad bed ebak ñan congregation in Christian eo