Lañliñ Ko Rej Walok Jen Ad Etetal Ilo Jimwe

“Kejerammõn jen Jeova, ej namweien armij, im E jab kobaik buromõj na iben.”—JABÕN KENNAN KO 10:22.

1, 2. Etke jej aikwij kejbãrok kij jen ad lemnak le jen joñan kin ran ko renaj itok?

 “ÑE ELE jen joñan ad mad kin ran ko renaj itok . . . men in ej bõprae kij jen ad lañliñ kin ta eo ewõr ibbed kiõ,” juõn ri meletlet ilo America ear kile. Men in emol ibben ajiri ro me elap air lemnak kin ta ko renaj kõmmani ñe reritto im rejjab kile tokjen ko kin ien air ajiri mae ien reritto.

² Jet ien lemnak rot in emaroñ jelet ri kabuñ ro an Jehovah bareinwõt. Lemnak kin ta eo emaroñ walok. Jej kijoror kin jejjet in kitien kallimur eo an Anij ñan an kõmman bwe lal in en juõn paradise. Jej kijerjer im kõttar juõn wãwen mour me enaj ejelok nañinmij, ritto, metak, im eñtan. Meñe ekkar ad kõtmene kin men rot kein, ak ta elañe elap ad lemnak kin jerammõn ko ilo kanniek jenaj bõki ilo ran ko renaj itok im jejjab kile jerammõn ko ad ilo jitõb me ewõr ibbed kiõ? Enaj lap an kaburomõjmõj! Ebidodo ad maroñ bõk jitõb in ebwer im eñjake bwe ‘buruõd e nañinmij kinke kõtmene e rumijtok’ jen ke jaar kejatdikdik kake. (Jabõn Kennan Ko 13:12) Abañ ko im melejoñ ko rebin ilo mour remaroñ kõmman bwe jen lorak ilo aujid eo kin buromõj ak ele jen joñan ad lemnak kin kij make. Jen ad kijenmij kin melejoñ ko renana, jemaroñ bõk juõn lemnak in ellotan ak abõnõnõ. Jemaroñ bõprae aolep wãwen kein ilo ad kalmenlokjen ilo kamolol kin jerammõn ko ad kiõ.

3. Ta eo jenaj etale ilo katak in?

³ “Kejerammõn jen Jeova, ej namweien armij; im E jab kobaik buromõj na iben,” Jabõn Kennan Ko 10:22 ej ba. Wãwen mweie ilo men ko lor jitõb ejjab ke juõn jerammõn ri karejar  ro an Jehovah ilo ran kein remaroñ lañliñ kaki? Jen etale jet wãwen ko kin mweie ilo jitõb im lale ta eo men in ej melelen ñan kij. Ilo ad bõk ien ñan kalmenlokjen kin aolep jerammõn ko Jehovah ear lelok ñan “dru wãnik eo ej etetal ilo an jime” men in enaj mol an kakajurlok bebe eo ñan ad wõnmanlok in karejar ñan Jemed ilañ ilo lañliñ.—Jabõn Kennan Ko 20:7.

‘Jerammõn Ko Me Rej Kalañliñ Kij Kiõ’

4, 5. Katak et eo ilo Bible elap am kamolol kake, im etke?

⁴ Ewõr ibbed jelãlokjen eo ejimwe kin katak ko ilo Bible. Kabuñ ko rewan me rej ba rej lor Christ ekkã air ba bwe rej tõmak ilo Bible. Bõtab, rejjab errã ibben don kin ta eo ej katakin kake. Ro uan ejja kumi in kabuñ eo wõt ekkã an oktak lemnak ko air kin ta eo Bible eo ej katakin. Elap an oktak wãwen eo air jen ri karejar ro an Jehovah! Jekdon ta ailiñ eo, manit ko, ak kil ko ad, jej kabuñ ñan Anij eo jej jelã kajjen kin etan. Ejjab juõn anij ittino me ej jilu ilo juõn. (Duteronomi 6:4; Sam Ko 83:18; Mark 12:29) Jej bareinwõt jelã bwe aitwerõk eo elaptata kin iroij bõtata eo an Anij ebojak in kamadmõde im ilo ad kejbãrok ad tiljek ñan e, kij kajjojo ewõr kunad ilo aitwerõk in. Jej jelã mol eo kin ro remij im ejelok ibbed juõn mijak ejõkkar kin juõn Anij me rej ba ej kaeñtan armij ilo kijeek in hell ak ilo jikin ko jet.—Ekklisiastis 9:5, 10.

⁵ Bareinwõt, jej lañliñ in jelã bwe jaar jab walok jen menin mour ko! Jen an eindein, Anij ear kõmanman kij ilo wãwen wõt e. (Jenesis 1:26; Malachi 2:10) “I naj kamolol Yuk, bwe Am kõmõnmõn iõ men in lelñoñ im bwilõñ,” ri jeje sam ear al ñan Anij. “Jerbal ko Am men in bwilõñ: im men in, aõ e kanuij jela kake.”​—Sam Ko 139:14.

6, 7. Ta oktak ko ilo mour eo am ak ilo mour eo an ro jet ear walok ilo juõn jerammõn?

⁶ Jej bõprae manit im iminene ko rekauwatata. Elõñ nan in kakkõl ko kin an kauwatata kõbatat, le jen joñan idak den in kadõk, im mour in lũñ rej walok ilo news. Ekkã an armij ro jab eoroñ nan in kakkõl kein. Ak, ta eo ej walok ñe juõn armij emol buruen ej katak bwe Anij eo emol ej kananaik manit kein im ro rej kõmmani rej kaburomõj e? Eokwe, men in ej kamakit armij in ñan an jolok manit kein jen mour eo an! (Aiseia 63:10; 1 Dri Korint 6:9, 10; 2 Dri Korint 7:1; Dri Epesõs 4:30) Ke ej kõmman men in elaptata ñan an kabuñburuen Jehovah Anij, ej bareinwõt bõk tokjen ko jet—juõn mour emõnlok im ainemõn ilo lemnak.

⁷ Ñan elõñ armij elap an bin air jolok manit ko renana. Ak, kajjojo yiõ elõñ thousand armij rej kõmmane. Rej wujleplok mour ko air ñan Jehovah im baptais iumin den, im ilo wãwen in kalikar ilobwilij bwe rar jolok manit ko Anij ejjab buñburuen kaki jen mour ko air. Men in elap an kõketak kij! Bebe eo ad ñan ad mejal jen kamakoko ñan mwil ko rejerawiwi im nana ej kajurlok.

8. Ta nan in kakabilek ko ilo Bible rej jibañ kij kalek juõn mour in family elemõnõnõ?

⁸ Juõn mour in family elemõnõnõ. Ilo elõñ ailiñ ko mour in family ej jorrãnlok wõt. Elõñ ri belele ro rej jebel, im ekkã an kokkure eñjake eo an ro nejiir. Ilo jet ailiñ ko ilo Europe, enañin 20 percent rej family ko me jemeir ak jineir ejelok rejetair. Ewi wãwen an kar Jehovah jibañ kij etetal ilo jimwe ikijen men in? Joij im konono Dri Epesõs 5:22–6:4, im  lale nan in kakabilek ko remõn Nan in Anij ej lelok ñan lõmaro ri belele, limaro ri belele, im ajiri ro. Ilo air jerbale ta eo ej ba ijin im ilo eon ko jet ilo Bible emol an naj kakajur lukluk in belele eo, jibañ ro jemen im jinen bwe en jimwe wãwen air katakin ro nejiir, im ej jibañ ir kalek juõn mour in family elemõnõnõ. Ejjab juõn jerammõn elap jemaroñ lañliñ kake ke.

9, 10. Ewi wãwen kejatdikdik eo ad kin ilju im jeklaj eoktak jen eo an lal in?

⁹ Jemaroñ liki bwe mõttan wõt jidik naj kamadmõde abañ ko an lal. Meñe ewõr kabel im jelãlokjen ko kin science im kin jibadbad ko remol an jet ri tel ro, abañ ko relap kin mour ilo ran kein rej bed wõt. Klaus Schwab, eo ear kajutak dolul eo World Economic Forum, ear lo bwe “oran abañ ko me lal in ej jelmaiki ej laplok wõt im ien eo ñan kamadmõd abañ kein ej diklok wõt.” Ear konono kin “kauwatata ko me rej jelet aolep ailiñ ko, einwõt terrorism, kokkure kin men ko ibelakid einwõt mejatoto, eneo, lojet, im men ko eierlok wõt im abañ ko kin money.” Schwab ear kajemlok ilo an ba: “Kiõ, elaplok jen mokta, armij rej aikwij jerbal ibben don im kõmman bebe ko relap ilo mõkaj bwe ren maroñ kamadmõdi abañ ko me lal in ej jelmaiki.” Ke ebeben eo kein ka 21 ej emmakit manlok, kejatdikdik eo kin ilju im jeklaj an armij ej marok wõt.

¹⁰ Elap an kajuburu ñan jelã bwe Jehovah ear kajutak juõn karõk me emaroñ kamadmõd aolep abañ ko an armij—Ailiñ in Messiah eo an Anij! Ikijen e, Anij eo emol enaj ‘kajemlok tarinae ko’ im bõktok ‘elõñ ainemõn.’ (Sam Ko 46:9; 72:7) King eo kar jitõñe, Jesus Christ, ‘enaj lomoren ro ri jeramel im ro ri aikwij jen matõrtõr im kokkure.’ (Sam Ko 72:12-14) Iumin iroij eo an Ailiñ eo, enaj ejelok ñitta. (Sam Ko 72:16) Jehovah “E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.” (Reveles̃õn 21:4) Emwij an kar kajutak Ailiñ eo ilañ im mõttan jidik enaj emmakit ñan kamadmõde aolep abañ ko ion lal.—Daniel 2:44; Reveles̃õn 11:15.

11, 12. (a) Jibadõk men in kamõnõnõ ko ej bõktok ke mõnõnõ eo ej indio? Kamelele. (b) Ta eo ej bõktok mõnõnõ eo emol?

¹¹ Jej jelã ta eo enaj bõktok mõnõnõ eo emol. Ta eo ej bõktok mõnõnõ eo emol? Juõn ri meletlet ear ba bwe ewõr jilu wãwen mõnõnõ—men in kamõnõnõ ko, bõk kunam ilo makitkit ko einwõt jerbal im family, im jibadõk juõn mejenkajjik me enaj wõr tokjen ñan ro jet. Ian men kein jilu, ear kõlajrak men in kamõnõnõ ko einwõt eo ediktata an aorõk im ear kile: “Men in ej kabwilõñlõñ kinke elõñ armij rej kalek mour ko air ibelakin air jibadõk men in kamõnõnõ ko.” Ta lemnak eo an Bible ikijen men in?

¹² King Solomon ilo ien ko etto ear ba: “I ar ba ilo buruõ, Kwon lale kiõ, I naj melejoñ yuk kin men in tõñkake; inem kwon mõnõnõ wõt: im lo, men in bareinwõt men bata. I ar ba kin tõñ, Ej uriekak; im kin lea, Ej it?” (Ekklisiastis 2:1, 2) Ekkar ñan Bible eo, jabdewõt mõnõnõ ej itok jen men in kamõnõnõ ko rej ñan jidik wõt ien. Ta kin ad bõk kunad ilo jerbal? Ewõr ibbed jerbal eo elaptata an wõr tokjen​—jerbal in kwalok nan kin Ailiñ  eo im kõmman ri kalor ro. (Matu 24:14; 28:19, 20) Ilo ad jaketo-jaketak ennan in lomor eo einwõt Bible eo ej kamelele kake, jej bõk kunad ilo juõn jerbal me emaroñ walok ilo lomor eo ad make im bareinwõt eo an ro rej roñjake kij. (1 Timote 4:16) Einwõt “dri jerbal ibben Anij,” jej lo “elaplok mõnõnõ ilo lelok jen bõk.” (1 Dri Korint 3:9; Jerbal 20:35) Jerbal in ej letok juõn tokjen emõn ñan mour eo ad im ej lelok ñan Ri Kõmanman eo juõn uak ñan eo ej kinaaklok e, Satan Devil eo. (Jabõn Kennan Ko 27:11) Emol, Jehovah ear kwalok ñan kij bwe tiljek ñan Anij ej bõktok mõnõnõ eo emol im ej indio.​—1 Timote 4:8.

13. (a) Ilo wãwen et eo Theocratic Ministry School eo ej juõn jerammõn jemaroñ lañliñ kake? (b) Ewi wãwen am kar bõk tokjen jen Theocratic Ministry School eo?

¹³ Ewõr ibbed juõn program in katakin eaorõk im bolemen. Gerhard ej jerbal einwõt juõn elder ilo juõn congregation an Ri Kennan ro an Jehovah. Ilo an kememej ien eo ear dik, ear ba: “Ke iar dik, ear wõr abañ ko relap ibba ikijen konono. Ke iar bed iumin ijjibed ko, ebin aõ maroñ konono ilo alikar im ej jino allo aõ kennan. Iar eñjake an ejelok tokja im elap aõ buromõj. Jema im jinõ rar karõk bwe in deloñ ilo juõn program eo ej katakin kin konono, ak jibadbad ko air rar jab jibañ. Abañ eo aõ ear itok jen lemnak eo aõ, jab enbwiniõ. Ak, ear wõr juõn karõk emõn jen Jehovah—Theocratic Ministry School eo. Ke iar deloñ ilo school in ear kaberanlok iõ. Iar kate iõ ñan jerbale men eo iar katak kake. Im ear wõr tõbrak! Iar maroñ konono ilo alikar, ejako eñjake in ejelok tokja, im iar beranlok ilo jerbal in kwalok nan. Kiõ I maroñ bareinwõt kwalok katak ko iman ak public talk ko. Elap aõ kamolol Jehovah, eo ear kakõmõnmõnlok wãwen aõ mour ikijen school in.” Wãwen an Jehovah katakin kij ñan kõmman jerbal eo an ejjab juõn un emõn ñan ad lañliñ ke?

14, 15. Ilo ien jorrãn ko, jibañ et eo ebellok ñan kij? Kwalok juõn wanjoñok.

¹⁴ Jej bõk juõn kõtan ebak ibben Jehovah im rejetak jen dolul in jimjãn jimjatin eo eburukuk ibelakin lal. Katrin, eo ej jokwe ilo Germany, ear lap an buromõj ke ear roñ kin makitkit lal im tsunami (no eo elap) eo ear walok ilo turõk turear in Asia. Jiroñ eo nejin ear lolok Thailand ke jorrãn in ear walok. Iumin 32 awa ko Katrin ear jaje elañe lio nejin ear mour ak ear bed ibwiljin oran eo elaplok wõt in armij ro rar jorrãn ak mij. Elap an kar mõnõnõ ke rar telephone e ñan kejelãik e bwe lio nejin ear mour!

¹⁵ Ta eo ear jibañ Katrin ilo awa ko in an inebata? Ear je: “Enañin aolepen ien in iar kajerbale ñan aõ jar ñan Jehovah. Elõñ alen iar lo bwe jar elap an kar kakajur im kainemõn iõ. Bareinwõt, lõmaro jeiõ im jatiõ ilo tõmak rar lotok im kõketak iõ.” (Dri Pilippai 4:6, 7) Wãwen eo enaj kar laplok an nana elañe ear ejelok jibañ jen jar ñan Jehovah im kainemõn jen juõn dolul in jimjãn jimjatin  ej yokwe ilo awa ko in an inebata! Kõtan eo ad ebak ñan Jehovah im Nejin im bareinwõt dolul in Christian jimjãn jimjatin eo ej juõn jerammõn ejejuan, im elap an aorõk ñan ad kajettokjen.

16. Kwalok juõn wanjoñok me ej kalikar kin aorõkin kejatdikdik eo kin jerkakbiji.

¹⁶ Ewõr ibbed kejatdikdik eo ñan ad bar lo ro rejitenburu ibbed remij. (Jon 5:28, 29) Juõn likao etan Matthias ear rittolok einwõt juõn ian Ri Kennan ro an Jehovah. Bõtab, ilo an jab kile jerammõn ko an ear illok jen congregation in Christian ke ear juõn jodikdik. Kiõ ej jeje: “Bwebwenato ko amro jema rar jab kanuij mũlal. Iumin elõñ yiõ ko, ear lõñ men ko kim ar akwel kaki. Ak, ien otemjej jema ear kõnan men eo emõntata ñan ña. Elap an kar yokwe iõ, men eo iar jab kile ilo ien eo. Ilo 1996, ke iar jijet iturin jikin babu eo an, iar jibwe pein im jañ, iar jolok aõ bwid ibben kin aolep men ko renana iar kõmmani im ba bwe elap aõ yokwe e. Ak kin an ñaklokjen ear jab maroñ roñ ta eo iar ba. Elikin an kar nañinmij iumin jidik ien, ear mij. Elañe ij mour im lo jema ilo jerkakbiji eo, kim naj kajimwe men ko rar walok ilo ien ko remotlok. Im enaj mõnõnõ in roñ bwe kiõ ij jerbal einwõt juõn elder im bwe kimro lio ibba kimij jerbal einwõt pioneer ro.” Kejatdikdik kin jerkakbiji eo emol an juõn jerammõn elap ñan kim!

“Ejjab Kobaiklok Buromõj Na Iben”

17. Ñe jej kalmenlokjen kin jerammõn ko Jehovah ej letok ñan kij, ewi wãwen an men in jibañ kij?

¹⁷ Ikijen Jemen ilañ, Jesus Christ ear ba: “Ej kõtak al ion ro renana im ion ro remõn, im kowut ion ro rewãnik im ion ro re jab wãnik.” (Matu 5:45) Elañe Jehovah ej lelok jerammõn ko ñan ro renana im ro rejjab wãnik, elaplok an naj kajerammõn ro rej etetal ilo ial in tiljek! Jehovah “E naj drebij ejelok men eo emõn jen ro rej etal ilo wãnik,” Sam Ko 84:11 ej ba. Ñe jej kalmenlokjen kin kea eo elap im itoklimo eo emol ear kwaloke ñan ro rej yokwe e, buruõd enaj obrak kin kamolol in lañliñ!

18. (a) Ilo wãwen et eo Jehovah ejjab kobaik eñtan ak buromõj ibben kajerammõn ko an? (b) Etke elõñ ian ro retiljek an Anij rej eñtan?

¹⁸ “Kejerammõn jen Jeova”—eñin men eo ear kõmman bwe armij ro an ren mweie kin men ko ilo jitõb. Im “ejjab kobaiklok buromõj na iben.” (Jabõn Kennan Ko 10:22) Inem, etke elõñ ian ro retiljek an Anij rej iion abañ im melejoñ ko, me rej kõmetak im kaeñtan ir? Abañ im eñtan ko rej walok kin jilu un ko relap. (1) Jab wãppen eo ad. (Jenesis 6:5; 8:21; Jemes 1:14, 15) (2) Satan im demon ro an. (Dri Epesõs 6:11, 12) (3) Lal in enana. (Jon 15:19) Meñe Jehovah ej kõtlok bwe men ko renana ren walok ñan kij, ejjab kõmmane bwe ren walok. Ilo mol, “men in letok emõn im wãppen otemjelok re jen lõñ, im wõnlõltak jen Jemen maram ko.” (Jemes 1:17) Kajerammõn ko jen Jehovah rejjab kaeñtan ak kaburomõj kij.

19. Ta jerammõn ko rej bed iman ro rej wõnmanlok im etetal ilo jimwe?

¹⁹ Ñe jej iion ad mweie kin men ko ilo jitõb ien otemjej ej karuaklok kij ñan Anij. Ñe jej kaddek juõn kõtan ebak ibben, jej ‘kamweiukiuk kij kin foundes̃on emõn mae ien ej itok, bwe jen bõk mour eo emol’​—mour indio. (1 Timote 6:12, 17-19) Ilo lal eo ekãl an Anij ilo ran ko renaj itok, mweie ko ad ilo jitõb renaj koba jerammõn ko ilo kanniek. Aolep armij ro rej “eoroñ ainiken Jeova” renaj bõk mour eo emol. (Duteronomi 28:2) Kin bebe eo ekajurlok, ilo lañliñ jen wõnmanlok im etetal ilo jimwe.

Ta Eo Kwar Katak Kake?

• Etke ejjab men in meletlet elañe elap ad mad kin ran ko renaj itok?

• Ta jerammõn ko jej lañliñ kaki kiõ?

• Etke ri karejar ro retiljek an Anij rej eñtan?

[Kajitõk ko ñan katak]