Shepherd Ro Me Rej “Joñok Ñõn Bwij Eo”

“Komin s̃eperd bwijin Anij ej ber ibemi, im lale e . . . kin ami kõnan . . . , kin ami yokwe . . . , komin mõke joñok ñõn bwij eo.”​—1 PITER 5:2, 3.

1, 2. (a) Ta jerammõn eo Jesus ear lelok ñan Peter, im etke jemaroñ ba bwe ear wõr unin an Jesus liki e? (b) Kar ewi wãwen lemnak eo an Jehovah kin shepherd rein me ear jitõñ ir?

 MOKTA jen Pentecost 33 C.E., Peter im jiljino ri kalor ro jet rar mõñã in jibboñ men eo Jesus ear keboje lok iman ilo barijet eo iturin Lomalo in Galilee. Ebar wõr juõn ien moktalok Peter ear lo Jesus elikin an jerkakbiji. Ejelok bere bwe ear mõnõnõ in jelã bwe Jesus ear mour. Ak Peter ear maroñ mijak bareinwõt. Kinke jejjo ran ko lok iman, ear karmijeteik Jesus. (Luk 22:55-60; 24:34; Jon 18:25-27; 21:1-14) Jesus ear kauweik ke Peter kin an bere? Jaab. Jen men in, ear lelok ñan Peter jerammõn eo bwe en najidik im shepherde “s̃ip” ro redik an Jesus. (Jon 21:15-17) Einwõt an bwebwenato in Bible eo kin armij ro ilo congregation eo an Christian ilo ebeben eo kein kajuõn kwalok, ekar wõr unin an Jesus liki Peter. Ibben ri jilek ro jet im maan ro reritto ilo jitõb ilo Jerusalem, Peter ear shepherde congregation eo an Christian ilo ien melejoñ ko relap im ilo ien an congregation eo orlok ilo mõkaj.​—Jerbal 1:15-26; 2:14; 15:6-9.

² Rainin, Jehovah ikijen Jesus Christ ear jitõñ maan ro reritto ilo jitõb bwe ren jerbal einwõt shepherd ro rej tel sheep ro An ilo men ko ilo jitõb ilo ien kein renana ilo bwebwenato in armij. (Dri Epesõs 4:11, 12; 2 Timote 3:1) Ewõr ke un eo emõn unin an Jehovah liki maan rein? Dolul in Christian jimjãn jimjatin eo ej walok ibelakin lal ej kamole men in. Emol bwe, shepherd rein rejjab wãppen, einwõt kar Peter. (Dri Galetia 2:11-14; Jemes 3:2) Meñe eindein, Jehovah ej liki ir ñan lale sheep ro “e ar wiaik kin bõtõktõk eo [an Nejin].” (Jerbal 20:28) Jehovah elap an yokwe maan rein, im ej watõk ir einwõt ro ej tellokiir bõk “koutiej” eo ekanuij lap.​—1 Timote 5:17.

3. Ewi wãwen ri tel ro einwõt shepherd rej debij juõn eñjake emõnõnõ im kijejeto?

³ Ewi wãwen shepherd ro ilo jitõb rej debij juõn eñjake emõnõnõ im kijejeto, im ilo wãwen in rej likit juõn joñok emõn ñan bwij eo? Einwõt Peter im ri tel ro rej shepherde congregation eo ilo ebeben eo kein kajuõn, rej atartar ion jitõb kwojarjar eo an Anij, eo ej kakajur ir ñan inek eddo eo air. (2 Dri Korint 4:7) Bareinwõt jitõb kwojarjar eo ej jebar leen ko an ilo ir—yokwe, lañliñ, ainemõn, meanwõd, joij, lejokmen, tiljek, inemõn, im jatõr. (Dri Galetia 5:22, 23) Jen lale jet wãwen ko rejejjet me ri tel ro einwõt shepherd remaroñ juõn joñok ilo air kwalok leen jitõb ñe rej shepherde bwij eo bwijin Anij iumin wõnake eo air.

Yokwe Bwij eo im Kajjojo Uan Congregation Rej Einwõt Sheep

4, 5. (a) Ewi wãwen Jehovah im Jesus rej kwalok air yokwe ñan bwij eo? (b) Ta jet ian wãwen ko shepherd ro ilo jitõb rej kwalok air yokwe bwij eo?

⁴ Kadkad eo elaptata jitõbõn Anij ej jebar ej yokwe. Jehovah ej kwalok yokwe eo an ilo an kõmman bwe bwij eo an einwõt juõn dolul en buñ-pãlok kin ekan ko ilo jitõb.  (Aiseia 65:13, 14; Matu 24:45-47) Ak, elaplok an kõmmane jen an najidik wõt bwij eo bwijin. Ewõr an itoklimo kin kajjojo ro uan rej einwõt sheep. (1 Piter 5:6, 7) Jesus ej yokwe bwij eo bareinwõt. Ear lelok mour eo an kin e, im ejelã ãt ko kajjojo “etair.”​—Jon 10:3, 14-16.

⁵ Shepherd ro ilo jitõb rej kajeoñe Jehovah im Jesus. Rej kwalok yokwe ñan aolepen bwij eo bwijin Anij ilo air ‘niknik ilo katakin’ congregation eo. Katak ko air rej bedbed ion Bible rej najidik im kejbãrok bwij eo, im air boub wõt in kõmman jerbal kein ej alikar iman mejen aolep armij. (1 Timote 4:13, 16) Meñe ejjab alikar iman mejen armij, ilo ien ko jet rej boub wõt ilo air kejbãrok elõñ lokbook ko an congregation eo, jeje letter ko, kõmman karõk im lajrak ko, im kabwe aikwij ko jet ñan kõmman bwe kwelok ko an congregation eo im makitkit ko an ren wõnmanlok ilo “ekar im ilo lajrõk.” (1 Dri Korint 14:40) Enañin aolep jerbal kein rej kõmmani meñe ejjab iman mejen armij ro im ejeja an armij ro kamolol ir kake. Emol bwe men in ej juõn jerbal rej kõmmane ilo yokwe.—Dri Galetia 5:13.

6, 7. (a) Ta juõn ian wãwen ko shepherd ro remaroñ kalaplok air jelã kajjen ro rej einwõt sheep? (b) Etke ewõr tokjen ñan kwalok eñjake ko ad ñan juõn elder?

⁶ Ilo yokwe Christian shepherd ro rej kate ir ñan kwalok air itoklimo kin kajjojo ro uan congregation eo. (Dri Pilippai 2:4) Juõn wãwen shepherd ro ilo jitõb rej kalaplok air jelã kajjen ro uan congregation eo ej ilo air jerbal ibbeir aerã ñan aerã ilo jerbal in kwalok nan ilobwilij. Ekkã an Jesus ãñinlok ri kalor ro an ibben ilo jerbal in kwalok nan im ear kajerbal ien kein ñan an kõketak ir. (Luk 8:1) Juõn Ri Christian etto an jerbal einwõt shepherd ilo jitõb ear ba: “Juõn ian wãwen ko remõntata ñan jelã kajjen im kõketak ro jeid im jatid maan ak kõrã ej ilo ad jerbal ibbeir ilo jerbal in kwalok nan.” Elañe kwojañin jerbal ibben  juõn ian elder ro ilo jerbal in kwalok nan, kwon karõk ilo mõkaj in jerbal ibbeir.

⁷ Yokwe ear kamakit Jesus bwe en lañliñ im buromõj ibben ri kalor ro an. Ñan wanjoñok, ke ri kalor ro 70 rar jeblak ilo lañliñ jen jerbal in kwalok nan eo air, Jesus ear “lõñliñ.” (Luk 10:17-21) Bõtab, ke ear lo wãwen an mij eo an Lazarus jelet Mary im ro uan family eo an im ro jeran, “Jisõs e jõñ.” (Jon 11:33-35) Ejja wãwen dein, shepherd ro ilo jitõb rej yokwe ro rej einwõt sheep ilo air kwalok air kea kin ir. Yokwe ej kamakit ir ñan air “lõñliñ iben ro rej lõñliñ, im jõñ iben ro rej jõñ.” (Dri Rom 12:15) Elañe kwoj iion lañliñ ak buromõj ilo mour eo am, kwon kwalok buruõm ñan Christian shepherd ro. Ñe rej roñ kin men ko rej kalañliñ yuk kake men in enaj juõn men in rejañ ñan ir. (Dri Rom 1:11, 12) Ñe rej jelã kin melejoñ ko am renaj mõnõnõ in kakajur im kainemõn yuk.​—1 Dri Tessalonika 1:6; 3:1-3.

8, 9. (a) Ewi wãwen an juõn elder kamol an yokwe lio belen? (b) Ewi joñan an aorõk ñan juõn shepherd ilo jitõb bwe en kwalok yokwe ñan family eo an?

⁸ Yokwe eo an juõn shepherd kin bwij eo ej alikar elaptata ilo wãwen eo ej jerbal ibben family eo an. (1 Timote 3:1, 4) Elañe emwij an mare, wãwen an kwalok yokwe im kautiej lio belen ej juõn joñok ñan lõmaro jet bwe ren kajeoñe e. (Dri Epesõs 5:25; 1 Piter 3:7) Lemnak kin nan ko an juõn Christian kõrã etan Linda. Leo belen ear juõn elder elõñlok jen 20 yiõ ko mokta jen an kar mij. Ear ba: “Leo ibba ear boub in lale aikwij ko an congregation eo ien otemjej. Ak ear watõk iõ einwõt juõn ian ro uan kumi eo an. Ekkã an kwalok an kamolol kin aõ jibañ e, im ear bõk ien ñan an bed ibba. Tokjen men in, Iar eñjake an yokwe iõ im jab ebanban ke ear bõk ien ñan an jerbal ilo congregation eo.”

⁹ Elañe juõn Ri Christian ej juõn shepherd ilo jitõb im ewõr nejin ajiri, wãwen an katakin ir ilo yokwe im ekkeini an kamolol im nebar ro nejin enaj juõn joñok emõn ñan jemen im jinen ro jet bwe ren lore. (Dri Epesõs 6:4) Emol bwe, wãwen an wõnmanlok im kwalok yokwe ñan family eo an ej kamol bwe ej tellokin bõk liki eo kar lelok ñan e ke jitõb kwojarjar eo ear jitõñe bwe en jerbal einwõt juõn shepherd.​—1 Timote 3:4, 5.

Kowõnmanlok Lañliñ im Ainemõn ilo Ad Konono Ibben Don

10. (a) Ta eo emaroñ jelet ilo nana lañliñ im ainemõn eo an congregation eo? (b) Ta aitwerõk eo ear jelet ainemõn eo an congregation eo ilo ebeben eo kein kajuõn, im ewi wãwen rar namejelan aitwerõk eo?

¹⁰ Jitõb kwojarjar eo emaroñ jebar leen lañliñ im ainemõn ilo buruen juõn Ri Christian, ibwiljin kumi in elder ro, im ilo aolepen congregation eo. Bõtab, ñe rej likjap in konono ibben don jen buru emaroñ jelet ilo nana leen lañliñ im ainemõn in. Solomon ilo ien eo etto ear lo im ba: “Ijo ejelok bebe, emwij kajitokjen lemnok ko mokta; a ijo elõñ dri bebe, emwij kabin lemnok ko.” (Jabõn Kennan Ko 15:22) Ijo turãjet, konono ibben don ilo kautiej im alikar ej kowõnmanlok leen lañliñ im ainemõn. Ñan wanjoñok, ke aitwerõk eo kin mwijmwij ear jelet ainemõn eo an congregation eo ilo ebeben eo kein kajuõn, ri tel ro rej uan governing body eo ilo Jerusalem rar bukõt jibañ jen jitõb kwojarjar eo. Rar kwalok lemnak ko air rekajju jen don jen burueir kin katak eo. Elikin air bwebwenato ibben don jen burueir, rar kõmman juõn bebe. Ke rar kejelãik congregation ko kin bebe eo air rar kõmman ilo juõn wõt buru, ro jeiir im jatiir rar “lõñliñ kin nan in kainemõn eo.” (Jerbal 15:6-23, 25, 31; 16:4, 5) Rar kowõnmanlok lañliñ im ainemõn.

11. Ewi wãwen elder ro remaroñ kowõnmanlok lañliñ im ainemõn ilo congregation eo?

¹¹ Ejja wãwen dein rainin, shepherd ro rej kowõnmanlok lañliñ im ainemõn ilo congregation eo ilo air konono ibben don jen burueir. Ñe abañ ko rej jelet ainemõn eo an congregation eo, rej kwelok ibben don im bwebwenato im kwalok eñjake ko air. Rej roñjake ilo kautiej uak ko an shepherd ro mõttair.  (Jabõn Kennan Ko 13:10; 18:13) Elikin air jar ñan bõk jitõb kwojarjar, rej kõmman bebe ko ekkar ñan kien ko ilo Bible im nan in tel ko an “dri korijer e tiljek im meletlet.” (Matu 24:45-47; 1 Dri Korint 4:6) Ñe kumi in elder ro rej kõmman juõn bebe ej wawa ion Bible eo, elder ro kajjojo rej kõttãik ir ñan tel eo an jitõb kwojarjar eo meñe lemnak eo an juõn elder emaroñ kar oktak jen jarlepju in elder ro. Lemnak in ettã ej kowõnmanlok lañliñ im ainemõn im likit juõn joñok emõn iman mejen ro rej einwõt sheep kin ewi wãwen remaroñ etetal ibben Anij. (Micah 6:8) Kwoj rejetak ke bebe ko rej bedbed ion Bible shepherd rein rej kõmmani ilo congregation eo?

Kwon Meanwõd im Joij

12. Etke Jesus ear aikwij kwalok meanwõd im joij ke ear jerbal ibben ri jilek ro an?

¹² Jesus ear kwalok meanwõd im joij ke ear jerbal ibben ri jilek ro, meñe elõñ alen rar likjap ilo kõmman ko air. Ñan wanjoñok, elõñ alen Jesus ear kõnan kalikar ñan ir kin aikwij eo ñan air kwalok ettã buru. (Matu 18:1-4; 20:25-27) Ak, ilo boñen eo eliktata in an Jesus mour ion lal, elikin an kwalok juõn joñok kin kwalok ettã buru ilo an kwale neiir, “ro ri kaloran rar akwel kin wõn eo iair enaj utiejtata.” (Luk 22:24; Jon 13:1-5) Jesus ear kauweik ke ri jilek ro? Jaab, ear kõmmanwa ibbeir, im ba: “Bwe ewi eo elap, eo ej jiberak im mõña, ak eo ej jerbal? e jab eo ej jiberak im mõña ke: a Ña ij ber ibemi einwõt eo ej jerbal.” (Luk 22:27) Meanwõd im joij eo an Jesus​—ekoba joñok eo an emõn—rar tõbar buruen ri jilek ro tokelik.

13, 14. Ñããt eo elaptata shepherd ro ilo jitõb rej aikwij kwalok joij?

¹³ Ilo ejja wãwen dein, juõn shepherd ilo jitõb emaroñ aikwij kakabileklek juõn armij elõñ alen kin likjap eo an. Eo ej juõn shepherd ilo jitõb emaroñ abõnõnõ kin armij eo. Bõtab, ilo an kememej wõt kin likjap ko an make, ke ej “kowe ro re jelomene,” emaroñ kwalok meanwõd im joij ñan ro jet. Ilo wãwen in ej kajeoñe Jesus im Jehovah, ro me rej kwalok kadkad kein ñan aolep Ri Christian ro​—ekoba shepherd ro ilo jitõb.​—1 Dri Tessalonika 5:14; Jemes 2:13.

¹⁴ Jet ien, shepherd ro ilo jitõb rej aikwij lelok nan in kakabilek eo ekajur ñan juõn eo ear kõmman juõn bwid elap. Elañe eo ear bwid ejjab ukwelok, shepherd ro ilo jitõb rej aikwij jolok ri nana eo jen congregation eo. (1 Dri Korint 5:11-13) Meñe eindein, wãwen air jerbal ibben armij eo ej kwalok bwe rej dike bwid eo, im jab armij eo. (Jud 23) Ñe shepherd ro ilo jitõb rej kwalok joij men in enaj kabidodoik ial eo bwe sheep ro rejebwãbwe ren jeblaktok ñan congregation eo.—Luk 15:11-24.

Tõmak Ej Kamakit Kij ñan Kõmman Emõn

15. Ta juõn ian wãwen ko shepherd ro ilo jitõb rej kajeoñe emõn eo an Jehovah, im ta eo ej kamakit ir bwe ren kõmman eindein?

¹⁵ “Jeova emõn ñõn ro otemjej,”ekoba ro me ejelok air kamolol kin ta eo ej kõmman ñan ir. (Sam Ko 145:9; Matu 5:45) Emõn eo an Jehovah ej lukkun alikar ñe ej jilkinlok armij ro an ñan kwalok nan kin “gospel in an ailiñ in lõñ.” (Matu 24:14) Shepherd ro ilo jitõb rej kalikar emõn eo an Anij ilo air tel ilo jerbal in kwalok nan. Ta eo ej kamakit ir bwe ren kate  ir im jab mõk? Tõmak eo ekajur ilo Jehovah im kallimur ko an.​—Dri Rom 10:10, 13, 14.

16. Ewi wãwen an shepherd ro ilo jitõb maroñ kõmman “emõn ñõn” ro rej einwõt sheep?

¹⁶ Ijellokin air kõmman “emõn ñõn armij otemjej” ilo air kwalok nan, shepherd ro ewõr eddo eo ñan air kõmman emõn “elaplok ñõn ro rej ber ilo nukin tõmak.” (Dri Galetia 6:10) Juõn wãwen rej kõmman men in ej ilo air lolok ri kwalok ro. “Ij mõnõnõ in lolok ro jeiõ im jatiõ,” juõn elder ej ba. “Ej letok ien ko remõn ñan aõ kamolol im nebar ro jeiõ im jatiõ maan im kõrã kin jerbal ko air im kalikar bwe jerbal ko air ewõr tokjeir.” Jet ien, shepherd ro remaroñ lelok nan in jibañ ko rekeie ikijen ewi wãwen juõn armij emaroñ kakõmõnmõnlok jerbal eo an ñan Jehovah. Ilo air kõmman wãwen dein, shepherd ro remeletlet rej kajeoñe ri jilek Paul. Lale kin wãwen eo ear rejañ ro jein im jatin ilo Thessalonica: “Kimij liki wõt Iroij kin kom bwe komij kõmõn im naj kõmõn men ko kimij jiroñ kom kaki.” (2 Dri Tessalonika 3:4) Nan in kamolol im nebar rot kein rej kamõnõnõik buruen ro rej einwõt sheep im kõmman bwe en bidodolok air “bokake im kõtãik [ir] ñõn ro rej tel [ir].” (Dri Hibru 13:17) Ñe juõn shepherd ilo jitõb ej lowõj yuk, kwon kamolol e kake.

Inemõn Ej Aikwij Jatõr

17. Ta eo Peter ear katak jen Jesus?

¹⁷ Jesus ear inemõn, meñe rar kaillu e. (Matu 11:29) Ke rar ketak im jibwe Jesus, ear kwalok inemõn im jatõr. Ilo jab lemnak, Peter ear nõõre jãje eo an im jumae. Ak Jesus ear kakememej e: “Kwoj lemnok bwe I jab maroñ in kajitõk iben Jema, im E naj jilkintok ñõn iba kiõ elõñ jen joñoul im ruo lijion enjel ke?” (Matu 26:51-53; Jon 18:10) Peter ear lukkun katak jen men in im tokelik ear kakememej Ri Christian ro: “Kraist e ar iñtan kin kom, im likit joñok ñõn kom, bwe komin anõke jenkwon ne ko neen. . . . Eo ke ar konono nae E, e ar jab bar konono nae; ke E ar iñtan E ar jab kalelñoñ.”​—1 Piter 2:21-23.

18, 19. (a) Ñããt eo elaptata shepherd ro rej aikwij kwalok inemõn im jatõr? (b) Ta kajitõk ko jenaj uaki ilo katak eo tok ilal?

¹⁸ Eindein, shepherd ro rebolemeir rej inemõn bareinwõt meñe ejjab jimwe wãwen an armij ro kõmman nae ir. Ñan wanjoñok, ro me rej kajeoñ in jibañ ir ilo congregation eo remaroñ makoko in jerbale nan in kakabilek ko air. Elañe armij eo ej aikwiji jibañ ej mõjno ak nañinmij ilo jitõb, emaroñ “jamõr an konono, einwõt wã ko an juõn jãji.” (Jabõn Kennan Ko 12:18) Bõtab, einwõt Jesus, shepherd ro rejjab ukõt nana kin nana im konono im makitkit ilo wãwen ko relej. Jen wãwen in, rej kwalok jatõr im tiriamokake ir, im emaroñ wõr tokjen ñan eo ej aikwij bõk jibañ. (1 Piter 3:8, 9) Kwoj katak ke jen joñok eo an elder ro im kwalok inemõn im jatõr ñe kwoj lelok nan in kakabilek ko?

¹⁹ Ejelok bere bwe, Jehovah im Jesus elap airro kamolol kin jerbal ko relap an elõñ thousand shepherd ro me rej mõnõnõ in lale bwij eo ibelakin lal. Jehovah im Nejin rej bareinwõt kwalok yokwe eo air emũlal ñan elõñ thousand ministerial servant ro me rej ‘jibañ ro remõn’ ñe rej rejetak elder ro. (Dri Hibru 6:10) Inem, etke jet ian ro jeid im jatid me emwij air baptais rej jenliklik in jibadõk “jerbal [in] emõn”? (1 Timote 3:1) Im ewi wãwen Jehovah ej katakin ro ej kãlet ir ñan bõk jerbal in shepherd? Jenaj uaki kajitõk kein ilo katak eo tok ilal.

Kwoj Kememej Ke?

• Ta jet ian wãwen ko shepherd ro remaroñ kwalok yokwe ñan bwij eo?

• Ewi wãwen aolep ilo congregation eo remaroñ kowõnmanlok lañliñ im ainemõn?

• Etke shepherd ro rej kwalok jatõr im joij ñe rej lelok nan in kakabilek ko?

• Ewi wãwen an elder ro kwalok emõn im tõmak?

[Kajitõk ko ñan katak]

[Pija ilo page 4]

Yokwe ej kamakit elder ro bwe ren karejar ñan congregation eo

[Pija ilo page 4]

Rej bareinwõt bõk ien ñan bed ibben family ko air ilo ien ikkure . . .

. . . im ilo jerbal in kwalok nan

[Pija ilo page 6]

Ñe elder ro rej konono ibben don jen buru ej kowõnmanlok lañliñ im ainemõn ilo congregation eo