Tõbar Buruen juõn Ajiri

KWO nañin ke kar eñjake am buromõj ñe kwoj lo an juõn ajiri ikkure kin ikkure ko kin kilen tarinae? Wãwen ikkure kein rej walok aolep ran meñe ibwiljin ro redik, kinke kowadoñ emwij an jededlok ilo men in kamõnõnõ ko. Ewi wãwen am naj jibañ juõn ajiri ñan an kõnan ikkure kin kein ikkure ko remõn im jab ko kin tarinae? Waltraud, juõn Ri Kennan an Jehovah im etto an juõn missionary ilo Africa, ear lo juõn wãwen ñan jibañ juõn ladik ñan kõmmane menin.

Kin an lap tarinae, Waltraud ear aikwij in etal jen jikin eo ear jokwe ie im emmakit ñan bar juõn ailiñ ilo Africa. Ijo ear jino katak Bible ibben kõrã eo jinen juõn ladik lalem an yiõ. Jabdewõt ien ej lolok jinen ladik in, ladik eo ej ikkure kin juõn riap in bu, ej kein ikkure eo an ej make wõt. Waltraud ejañin kar lo an ladik in jitõñlok jabdewõt men kin bu eo, ak aolep ien ej boub in kabelloke im bar kili bu eo, einwõt ñe ej bar kanne kobban.

Waltraud ear ba ñan ladik eo: “Werner, kwo jelã ke etke Ij jokwe ilo bukwon in am? Ej kin tarinae—Iar aikwij emmakit jen bukwon eo aõ bwe in ko jen emaan ro rekauwatata me rej buki armij ro kin bu ko air me rej einlok wõt bu ne am. Kwoj lemnak emõn ke bu rot in?”

“Jab, ejjab emõn,” Werner ear uak ilo an buromõj.

“Ejimwe am uak,” Waltraud ear ba. Inem ear kajitõk: “Kwo jelã ke etke Ij lotok kwe im jinõm aolep week? Ej kinke Ri Kennan ro an Jehovah rekõnan jibañ ro jet bwe ren lo ainemõn, ibben Anij im ro ri turiir.” Kin melim jen jinen Werner, Waltraud ear ba ñane: “Ñe kwo naj letok bu ne am, I naj joloke, im Ij kallimur bwe enaj wõr juõn am kein ikkure truck me emen neen.”

Werner ear lelok ñan lio bu eo an. Ear aikwij kõttar iumin emen week ko, ak ejjab to kein ikkure eo an ear tõbraktok—juõn truck kõmman jen alal, eo ear mõnõnõ in bõke kin juõn ettõñ elap.

Kwoj bõk ke ien ñan am bwebwenato ibben ajiri ro nejim, im kajeoñ in tõbar burueir bwe ren emmakit ñan air jolok kein ikkure ko rej einwõt kein tarinae ko? Elañe aet, kwo naj katakin ir juõn katak me enaj wõr tokjen ñan ir ñan indio.