“Nan in Katak ko Am Rej Kabuñburuõ”

“Bwe jabrewõt men ko ar jeje mokta, ar jeje ken katakin kij.”​—DRI ROM 15:4.

1. Ewi wãwen an Jehovah letok nan in katak ko, im etke jej aikwiji?

 JEHOVAH ej lelok ñan armij ro an nan in katak ko ñan jibañ ir kijenmij kin ijjibed ko ilo ien kein rebin. Jet ian nan in katak kein rej walok ñe jej read Bible ibbed make, ko jet rej kwaloki ilo katak ko ak uak ko rej walok ilo kwelok ko an Christian. Elõñ ian men ko jej readi ak roñjake ilo ien kein emwij ad jelã kaki. Bõlen, ededelok ad kar katak kin melele kein mokta. Kinke ekkã ad kõnan meloklok, ej juõn men in aikwij ñan kakememej kij make kin karõk ko, kien ko, im nan in jiroñ ko an Jehovah. Jej aikwij kamolol kin nan in katak ko an Anij. Rej kõketak kij ilo air jibañ kij lemnak wõt kin un ko me rar kamakit kij ñan bõk juõn wãwen mour me ej errã ibben ankil an Anij. Kin men in, ri jeje sam ear al ñan Jehovah: “Nan in katak ko am rej kabuñburuõ.”​—Psalm 119:24.

2, 3. (a) Etke Jehovah ear kejbãrok ñan ran kein ad bwebwenato ko kin mour ko an armij ro ilo Bible? (b) Bwebwenato et ko ilo Bible jenaj etali ilo katak in?

² Meñe kar jeje Nan in Anij elõñ buki yiõ ko remotlok, elap wõt an kajur. (Dri Hibru 4:12) Ej kwalok kin bwebwenato ko remol kin mour ko an armij ro ilo Bible. Meñe manit ko im lemnak ko elap air oktak jen ien ko me Bible eo ej bwebwenato kaki, abañ ko jej iioni kiõ ekkã air einlok wõt ko rar iioni ilo ien ko mokta. Elõñ bwebwenato ko emwij air jei ilo Bible ñan tokjen eo ad rej letok wanjoñok ko rekamãnãn buru kin armij ro me rar yokwe Jehovah im rar karejar ñan e ilo tiljek meñe rar iion wãwen ko rebin. Bwebwenato ko jet rej kwalok kin kain mwil rot Anij ej dike. Jehovah ear kobaiki ilo Bible bwebwenato ko kin mour ko an armij, emõn im nana, ñan kakememej kij kin katak ko raorõk. Ej einwõt an kar ri jilek Paul je: “Bwe jabrewõt men ko ar jeje mokta, ar jeje ken katakin kij, bwe kij kin kijenmij, im kin ainemõn jen Jeje ko, en or ar kejatrikrik.”​—Dri Rom 15:4.

³ Jen etale jilu bwebwenato ko ilo Bible eo: bwebwenato eo kin wãwen an kar David jerbal ibben Saul, ikijen Ananias im Sapphira, im kin mwilin Joseph ibben lio belen Potiphar. Kajjojo iair rej katakin kij elõñ katak ko raorõk.

Tiljek ñan Karõk ko an Anij

4, 5. (a) Ta wãwen eo ear bed ikõtan King Saul im David? (b) Ewi wãwen an kar David emmakit ñan kijirãt eo an Saul?

⁴ King Saul ear jab kejbãrok an tiljek ñan Jehovah im ear jab tellokin an iroij ion armij ro An. Inem Anij ear karmijeteik e im ear jiroñ ri kanan Samuel bwe en kabiti David einwõt king eo an Israel ilo ran ko renaj itok. Ke David ear kwalok an kabel im beran einwõt juõn ri tarinae im ear bõk nebar jen armij ro, Saul ear jino watõk David einwõt juõn eo ej jiaik e. Elõñ alen an Saul kõnan mõn e. David ear maroñ ko ilo kajjojo ien kinke Jehovah ear bed ibben.—1 Samuel 18:6-12, 25; 19:10, 11.

⁵ Iumin elõñ yiõ ko, David ear aikwij mour einwõt juõn eo ej ko. Ke ear walok  juõn ien emõn ñan an maroñ mõn Saul, ro mõttan David rar rejañ e ñan an kõmmane, im ba bwe Jehovah ear lelok ri kijirãt eo an David na ilo pein. David ear makoko in kõmmane. Tiljek eo an ñan Jehovah im an kautiej jea eo an Saul einwõt king ri kabit eo an armij ro an Anij ear kamakit e ñan an jerbal ilo wãwen in. Jehovah ear jitõñ Saul einwõt king eo an Israel. E eo enaj jolok e ñe ej lo bwe ej juõn men ekkar ñan an kõmmane. David ear melele bwe ejelok an jimwe ñan an kõmmane menin. Elikin an kar kõmman joñan wõt an maroñ ñan kadiklok kijirãt eo an Saul, David ear bõk jemlok eo: “Jeova e naj mõn e; ak ran in mij eo an e naj itok: ak e naj wõnlõllok ilo tõrinae, im mij. Jeova en bõprae aõ kõtellok peiõ nae eo Jeova e ar kabit.”​—1 Samuel 24:3-15; 26:7-20.

6. Etke eaorõk bwe jen lemnak kin bwebwenato eo kin David im Saul?

⁶ Bwebwenato in ewõr juõn katak eaorõk ie. Kwonañin ke kajitõk ibbam make kin etke jet abañ ko rej walok ilo congregation eo an Christian? Bõlen juõn armij ej emmakit ilo juõn wãwen ejõkkar. Mwilin emaroñ jab lukkun nana, ak kwoj abõnõnõ kake. Ewi wãwen kwon kar emmakit? Kinke kwo kõnan kwalok am itoklimo kin Ri Christian in jeim ak jatõm im kin tiljek eo am ñan Jehovah, kwomaroñ bebe ñan am konono ibben ilo juõn wãwen ejoij, kin mejenkajjik eo ñan kamadmõde abañ eo. Ak, ta elañe abañ eo ej wõnmanlok wõt? Elikin am kajeoñ in kamadmõde joñan wõt am maroñ, kwomaroñ likit men in ilo pein Jehovah. Eñin men eo David ear kõmmane.

7. Ilo ad kajeoñe David, ewi wãwen jen kar emmakit ñe jej iion ekajet jab jimwe ak rej kwalok kalijeklok nae kij?

⁷ Ak kwomaroñ jelmae abañ ko kin ekajet jab jimwe ak rej kalijeklok nae yuk kin kabuñ eo am. Bõlen ejelok juõn men kwomaroñ kõmmane ilo tõre in kin abañ kein. Juõn wãwen rot in emaroñ bin ad kijenmij kake, ak ewõr juõn men jemaroñ katak jen wãwen eo David ear emmakit ñan ekajet jab jimwe. Sam ko David ear jei rej juõn lokbook jab kin jar ko wõt jen buruen bwe Anij en jab kõtlok bwe Saul en mõn e ak rej bareinwõt kin tiljek eo an ñan Jehovah im itoklimo eo an ñan kaibujuij etan Anij. (Sam Ko 18:1-6, 25-27, 30-32, 48-50; 57:1-11) David ear tiljek wõt ñan Jehovah meñe Saul ear wõnmanlok im emmakit ilo juõn wãwen ejjab jimwe iumin elõñ yiõ ko. Kij bareinwõt jej aikwij kejbãrok ad tiljek ñan Jehovah im dolul eo an jekdon nana ko jej iioni im ta ko ro jet rej kõmmani. Jemaroñ liki bwe Jehovah ejelã kin wãwen eo.​—Sam Ko 86:2.

8. Ewi wãwen Ri Kennan ro an Jehovah ilo Mozambique rar emmakit ke kar melejoñe tiljek eo air ñan Jehovah?

⁸ Ri Christian ro ilo Mozambique rej letok  juõn wanjoñok ilo ran kein kin ro rar tiljek wõt ñan Jehovah ilo ien melejoñ. Ilo 1984 elõñ alen ro uan juõn kumi in jumae, ro me rar rakim im tile moko imõn armij ro, im mõn ir, rar nitbwili bukwon ko air. Ejelok jabdewõt men Ri Christian rein remol rar maroñ kõmmane ñan jojomare ir make. Rar jibed armij ro rar jokwe ilo jikin kein ñan air koba ilo jar in tarinae eo air ak ñan rejetake ir ilo wãwen ko jet. Ri Kennan ro an Jehovah rar watõk air kõmman men in ejõkkar ñan jutak in Christian eo air bwe ren bed iolaplap. Air makoko in koba ibben jar in tarinae eo ear lukkun kaillu ir. Rar mõn enañin 30 Ri Kennan ro ilo ien in ebwok, ak meñe rar kamijak ir im ba bwe renaj mõn ir, rar jab maroñ kabwer armij ro an Anij jen air tiljek ñan e. * Einwõt David, rar kijenmij kin ekajet jab jimwe ko ak eliktata rar bõk anjo.

Juõn Katak in Kakkõl

9, 10. (a) Ewi wãwen jemaroñ bõk tokjen jen jet wanjoñok ko ilo Bible? (b) Ta eo ear bwid kin makitkit ko an Ananias im Sapphira?

⁹ Jet armij ro me Bible eo ej konono kaki rej letok katak in kakkõl ko kin mwil ko jej aikwij bõprae. Ilo mol, ewõr ilo Bible bwebwenato ko kin armij ro, meñe ibwiljin ri karejar ro an Anij bareinwõt, me rar kõmman bwid ko im rar iion jorrãn. (1 Dri Korint 10:11) Juõn bwebwenato ej ikijen Ananias im Sapphira, ruo ri belele me rar mõttan congregation in Christian eo ilo Jerusalem ilo ebeben eo kein kajuõn.

¹⁰ Elikin Pentecost 33 C.E., ear wõr juõn aikwij ñan kabwe men ko lor kanniek ñan ri tõmak ro rekãl me rar bedwõt ilo Jerusalem ñan air bõk tokjen jen air kamao ibben ri jilek ro. Jet ro uan congregation eo rar wiakake weto ko air ñan kõmman bwe ejelok juõn en bed ilo aikwij. (Jerbal 2:41-45) Ananias im Sapphira rar wiakake weto eo air im bõktok mõttan in money ko ñan ri jilek ro, im ba bwe men in letok eo air kar aolepen money ko rar bõki jen air wiakake bũdej eo. Emol, Ananias im Sapphira rar maroñ lelok jabdewõt joñan rar kõnan, ak unin lelok eo air ear nana, im makitkit ko air rar jab mol. Rar kõnan kabwilõñ armij, im kõmman bwe ren lemnak bwe ej einwõt ñe rar kõmman juõn men elaplok jen air kar kõmmane. Ri jilek Peter, iumin tel eo an jitõb kwojarjar, ear kwalok jab mol im jelã mon eo air, im Jehovah ear mõn erro.​—Jerbal 5:1-10.

11, 12. (a) Ta jet ian nan in katak ko kin mol? (b) Ta tokjen ko jemaroñ bõki kin ad mol?

 ¹¹ Elañe jej bed ilo kabo eo ñan ukõt mol eo ñan kõmman bwe armij ren lemnak emõn kin kij, bwebwenato eo kin Ananias im Sapphira en juõn katak in kakkõl ñan kij. Jemaroñ mone armij ro, ak jeban mone Jehovah. (Dri Hibru 4:13) Elõñ alen Bible eo ej kakabilek kij bwe jen mol ñan don, kinke ejelok ri riap enaj mour ilo lal eo emwij karreoiki jen men ko rejjab wãnik. (Jabõn Kennan Ko 14:2; Reveles̃õn 21:8; 22:15) Unin men in en kar alikar. Eo ej kowõnmanlok jab mol ej Satan Devil eo.—Jon 8:44.

¹² Elõñ tokjen ko remõn rej walok elañe emol wãwen mour eo ad. Ibwiljin tokjen kein rej juõn bõklikit erreo im ad juburu bwe ro jet rej liki kij. Elõñ alen, kin air mol, Ri Christian ro rar maroñ lo jikin jerbal ko ak rar maroñ debij wõt jerbal ko air. Ak, tokjen eo elaptata ej bwe jemaroñ bõk jimjera eo an Anij Laplap elañe jej jerbal ilo mol.​—Sam Ko 15:1, 2.

Kejbãrok Ad Mour Erreo

13. Iumin wãwen et eo Joseph ear bed ie, im ewi wãwen ear emmakit?

¹³ Kar wiakake Joseph, nejin ri patriarch eo Jacob, ilo kamakoko ke ear 17 yiõ dettan. Eliktata ear bed ilo mweo imõn Potiphar, juõn ri utiej ilo Egypt, ijo lio belen karo eo an ear kalimjek Joseph. Lio ear kõnan babu ibben Joseph, eo ear juõn likao elukkun wulio, im aolep ran lio ear ba ñan e: “Kwon babu iba.” Joseph ear bed etolok jen family eo an ilo juõn ene ijo ejelok armij ear jelã kajjen. Ear maroñ babu ibben kõrã in ilo an ejelok armij ej jelã kake. Ak, ke lio belen Potiphar ear jibwe e, Joseph ear ko.—Jenesis 37:2, 18-28; 39:1-12.

14, 15. (a) Etke jej aikwij itoklimo kin bwebwenato eo kin Joseph? (b) Etke juõn Christian kõrã ear kamolol bwe ear bokake nan in katak ko an Anij?

¹⁴ Joseph ear rittolok ilo juõn family ear mijak Anij, im ear melele bwe ebwid ñe ruo armij rej babu ibben don elañe rejañin mare. “Ekijkan aõ maroñ kõmõn nana in elap, im jerawiwi ñõn Anij?” ear kajitõk. Alikar bwe jelãlokjen eo an kin kien eo an Anij kin armij einwõt kar kwalok kake ilo Eden, bwe en wõr juõn wõt belen, ear tel e ñan jemlok eo ear bõke. (Jenesis 2:24) Armij ro an Anij rainin remaroñ bõk tokjen jen air kalmenlokjen kin wãwen an kar Joseph emmakit. Ilo jet jikin ko, lemnak ko an armij kin babu ibben don joñan air anemkwoj, ñe jodikdik ro rej makoko in kõmman lũñ, ro dettair wõt rej kajirere kake ir. Ibwiljin  ro reritto ekkã air ellolo. Kin men in, bwebwenato eo kin Joseph ej kein kakememej eo eaorõk ñan kij ilo ran kein. Ej kien eo an Anij wõt bwe lũñ im lejen rej jerawiwi ko. (Dri Hibru 13:4) Elõñ ro rar bo ilo aujid in kin mour in lũñ rej errã bwe ewõr un eo ekajur unin ñan jab kõmmane. Ibwiljin men ko renana remaroñ walok rej juõn eñjake in jook, juõn bõklikit e abõnõnõ, belen ej ebanban, bõroro, im nañinmij in jiroñ im likao. Einwõt Bible eo ej kakememej kij kake, juõn armij eo ej lũñ ej “mõke jerawiwi nae enbwinin.”​—1 Dri Korint 5:9-12; 6:18; Jabõn Kennan Ko 6:23-29, 32.

¹⁵ Jenny, * juõn Ri Kennan an Jehovah ejañin mare, ewõr unin an kamolol kin nan in katak ko an Anij. Ilo jikin jerbal eo an, juõn ri jerbal mõttan ewulio ear kareel e. Ke Jenny ear jab kwalok an itoklimo, ear kalaplok an kareel e. “Iar aikwij lukkun kate iõ ñan kejbãrok aõ mour erreo,” ear ba, “kinke ej men in mõnõnõ ñe juõn armij ej kwalok an itoklimo.” Ak, ear kile bwe lein ear kõnan baj kobaik e ñan oran kõrã ro ear babu ibbeir. Ke ear eñjake an mõjnolok bebe eo an ñan jutak bin, ear jar ñan Jehovah im kajitõk bwe en jibañ e ñan kejbãrok an tiljek ñan E. Jenny ear lo bwe men ko ear katak ke ear kõmman etale ko ilo Bible im book ko jet an Christian rar jerbal einwõt kein kakememej ko me rar kamakit e bwe en ekkõl wõt. Juõn ian nan in katak ko kar bwebwenato eo kin Joseph im lio belen Potiphar. “Elañe ij kakememej iõ make kin joñan ij yokwe Jehovah,” ej kajemlok, “Ijjab aikwij mijak bwe inaj kõmman juõn bwid elukkun nana im jerawiwi nae e.”

Bokake Nan in Katak ko An Anij!

16. Ewi wãwen jemaroñ bõk tokjen jen ad elij im kalmenlokjen kin mour ko an armij ro kajjojo me Bible eo ej konono kaki?

¹⁶ Jemaroñ kalaplok kamolol eo ad kin kien ko an Jehovah ilo ad kate kij ñan melele kin etke ear kejbãrok jet bwebwenato ko ilo Bible ñan ad maroñ readi. Ta eo rej katakin kij? Kadkad et ko armij ro ilo Bible rar kwaloki im emõn ñan ad kajeoñe ak bõprae? Emwij je kin elõñ buki armij ro ilo Nan in Anij. Ej emõn bwe aolep ro rej yokwe nan in katak ko an Anij ren kaddeklok juõn kõnan kin meletlet eo ej letok mour, ekoba men ko jemaroñ katak jen wanjoñok ko me Jehovah ear kejbãroki ilo Bible eo. Emakijkij an magazine in kwalok kin bwebwenato ko kin mour ko an armij ro kajjojo me jemaroñ katak jen ir. Etke kwojjab bõk ien ñan am readi katak kein?

17. Ewi wãwen am lemnak kin nan in katak ko an Jehovah, im etke?

¹⁷ Elap ad kamolol kin itoklimo eo ej yokwe me Jehovah ej kwalok ñan ro rej kate ir ñan kõmanman ankil an! Jejjab wãppen, einwõt maan im kõrã ro me Bible eo ej konono kaki rar jab wãppen. Bõtab, lokbook eo kin makitkit ko air elap an wõr tokjen ñan kij. Ilo ad bokake nan in katak ko an Jehovah, jemaroñ bõprae ad kõmman bwid ko relap, im jemaroñ kajeoñe wanjoñok ko remõn an ro rar etetal ilo ial ko rewãnik. Elañe jej kõmmane, jenaj maroñ al ibben ri jeje sam: “Emõnõnõ ro rej kejbãrok nan in kennan ko An [Jehovah], ro rej kabukot E kin aolepen burueir. Aõ e ar lale nan in kennan ko Am, bwe I kanuij yokwi.”​—Sam Ko 119:2, 167.

[Kamelele ko itulal]

Ewi Wãwen Kwonaj Uak?

• Ta eo jemaroñ katak jen lemnak eo an David kin Saul?

• Bwebwenato eo kin Ananias im Sapphira ej katakin kij kin ta?

• Etke bwebwenato eo kin mour eo an Joseph elap an kaitoktoklimo ñan kij ilo ran kein?

[Kajitõk ko ñan katak]

[Pija eo ilo peij 24]

Etke David ear jab kõtlok bwe armij ro mõttan ren mõn Saul?

[Pija eo ilo peij 25]

Ta eo jemaroñ katak jen bwebwenato eo kin Ananias im Sapphira?

[Pija eo ilo peij 26]

Ta eo ear kõmman bwe Joseph en karmijete kareelel ko ñan lũñ?