Jodikdik ro, Komin Kãlet Ñan Ami Karejar Ñan Jehovah

“Komin kãlet ranin wõn eo kom naj jerbal ñõn e.”​—JOSHUA 24:15.

1, 2. Ta baptais ko rejõkkar kabuñ ko an Christendom rej kõmmane?

 “KOMIN kõtlok bwe [ajiri ro] ren erom Christian ilo ien eo ñe remaroñ jelã kin wõn Christ.” Juõn ri jeje etan Tertullian ear jei nan kein ilo tujemlokin ebeben eo kein karuo C.E. Ear jumae manit eo kin baptaise ajiri, eo ro rar ba rej Christian me rar ellok im jumae Anij rar kõmmane ilo kabuñ eo air ilo ran ko. Bata eo etan Augustine ilo ien eo etto ear jab errã ibben Tertullian im Bible eo kinke ear ba bwe baptais ej karreoik ajiri ro jen lipjinjin in jerawiwi eo moktata, im ajiri ro rejañin baptais ak rej mij renaj illok ñan kijeek eo. Lemnak in ear kamakit armij ro bwe ren baptaise ajiri ro ilo mõkaj elikin wõt air lotak.

² Elõñ dolul in kabuñ ko an Christendom rej baptaise wõt niñniñ ro rej kab lotak ilo ran kein. Bareinwõt, ilo aolepen bwebwenato ko an armij, iroij ro im ri tel ro an kabuñ ko ilo ailiñ ko rar ba rej Christian, rar iun “ri pagan ro” rar anjo ioir bwe ren baptais. Ak ejelok bedbed ilo Bible bwe ren baptaise ajiri ro im iun armij ro reritto bwe ren baptais.

Rejjab Baj Lotak im Ededelok air Wujleplok Mour eo Air Rainin

3, 4. Ta eo emaroñ jibañ ajiri ro me jemeir im jineir emwij air wujleplok bwe ir bareinwõt ren mõnõnõ in wujleplok air mour ñan Anij?

³ Bible eo ej kwalok bwe Anij ej watõk ajiri ro bwe re kwojarjar meñe juõn ian jemen ak jinen ej juõn Ri Christian etiljek. (1 Dri Korint 7:14) Ej melelen ke bwe ajiri rein emwij air wujleplok air mour ñan Jehovah? Jaab. Bõtab katak ko ajiri rein rar bõk jen jemeir im jineir ro emwij air wujleplok  air mour ñan Jehovah remaroñ tellok ir ñan air mõnõnõ in lelok air mour ñan Jehovah. Ri meletlet eo King Solomon ear je: “Nejiõ, kwon kejbãrok kien jemõm, im jab illok jen nan in kibel an jinõm. . . . Ñe kwoj etetal e naj tel yuk; ñe kwoj kiki e naj mijrake yuk; im ñe kwoj ruj e naj konono ibõm. Bwe nan in jiroñ juõn lamp; im kien ej maram; im nan in kowe ko im katak rej ial in mour.”​—Jabõn Kennan Ko 6:20-23.

⁴ Tel eo an Christian jemen im jinen ro emaroñ kejbãrok ajiri ro nejiir, elañe ajiri ro rekõnan lori. Bareinwõt Solomon ear ba: “Juõn nejin e meletlet, ej kamõnõnõik jemen; a juõn nejin e dri bwebwe, ej men in erro ñõn jinen.” “Kwon eoroñ, nejiõ, im kwon meletlet, im kwon tellok buruõm ilo ial eo.” (Jabõn Kennan Ko 10:1; 23:19) Aet, ñan bõk tokjen jen wãwen an jememi im jinemi katakin kom, kom jodikdik ro komij aikwij mõnõnõ in bõk nan in kakabilek, im kajimwe ko air. Komij jab lotak ilo meletlet, ak kom maroñ oktak im “meletlet” im ilo mõnõnõ lor “ial in mour.”

Ta In Kowe?

5. Ta nan in kakabilek eo Paul ear lelok ñan ajiri ro im ro jemeir?

⁵ Ri jilek Paul ear je: “Ajiri rõn, komin bokake jememi im jinemi ilo Iroij: bwe men in e jime. Kwon koutiej jemõm im jinõm (eo kien moktata eor kalimur iben), Bwe en emõn ibõm, im bwe en eto am mour ion lõl. Im kom, ro jemeir, komin jab biuktõke ro nejimi ñõn illu: a komin kakajiririik ir ilo kaje im kowe an Iroij.”​—Dri Epesõs 6:1-4.

6, 7. Ta eo ej kitibuji ilo jerbal in kakajiririk ajiri ro ilo “kaje im kowe an Iroij,” im etke ejjab melelen bwe jemen im jinen ajiri ro rej kareel buruen ajiri ro ilo jab jimwe?

⁶ Christian jemen im jinen ro rej kareel ke buruen ajiri ro nejiir ilo jab jimwe ñe rej kakajiririk ir ilo “kaje im kowe an Iroij”? Jaab. Wõn eo emaroñ kõrraate jemen im jinen ro kin air katakin ro nejiir kin ta eo rej watõke emõn im jimwe im ewõr tokjen ñan mour erreo? Armij ro rejjab kõrraat ro rejjab tõmak ilo Anij ñe rej katakin ro nejiir bwe ejelok Anij. Ro rej bed ilo kabuñ in Catholic rej ba bwe rej aikwij katakin ro nejiir kin katak ko an Catholic, im ejeja an armij ro kõrraate ir ñe rej kõmmane men in. Ilo ejja wãwen lok wõt, armij ro ren kar jab kinaak Ri Kennan ro an Jehovah im ba bwe rej ukõt lemnak ko an ajiri ro nejiir ñe rej katakin ir bwe ren bõk lemnak eo an Jehovah kin katak ko remol im kien ko ikijen mour erreo.

⁷ Ekkar ñan book eo Theological Dictionary of the New Testament (Dictionary eo ñan Kallimur eo Ekãl ilo Bible), nan in Greek eo rej ukõt nan eo “kowe” jen e ilo Epesõs 6:4 ej jitõñlok ñan juõn kilen “kajimwe lemnak eo, kajimwe men eo ebwid, ñan kakõmõnmõnlok juõn lemnak ilo jitõb.” Ta elañe juõn jodikdik ej jumae jemen im jinen kinke ekõnan kõmman men ko ro mõttan rej kõmmane? Wõn eo elaplok an ioni ñan men ko renana—ro jemen im jinen ke ak armij ro mõttan? Elañe ro mõttan rej jibede jodikdik eo bwe en bõk uno ko rejõkkar, kadõk, ak kõmman mour in lũñ, jej aikwij ke kõrraate jemen im jinen kin airro kate ir ñan kajimwe lemnak eo an ajiri eo im jibañ e ñan kile bwe enaj jorrãn elañe ejjab kajimwe lemnak eo an?

8. ‘Karel buruen’ Timothy ear kitibuj ta?

⁸ Ri jilek Paul ear jejelok ñan likao eo Timothy: “A kwon berwõt ilo men ko kw’ar katak im rel buruõm kaki, bwe kwo jela wõn eo kw’ar katak iben; Im jen ke kwoj ajiri, kw’ar jela jeje ko rokwojarjar, ko re maroñ in kameletlet yuk ñõn lomor kin tõmak eo ej ilo Kraist Jisõs.” (2 Timote 3:14, 15) Jen ke ear ajiri, jinen im jibwin Timothy ro im rar Ri Jew rar kabin tõmak eo an ilo Anij ikijen jelãlokjen eo ej bedbed ion Jeje ko ilo  Bible. (Jerbal 16:1; 2 Timote 1:5) Tokelik, ke rar erom Ri Christian ro, rar jab jibed Timothy bwe en tõmak ak rar ‘karel buruen’ ilo air kamelele ilo kõmmanwa kin katak ko rar bedbed ion jelãlokjen eo ilo Bible.

Jehovah Ej Kir Yuk ñan Am Kãlet

9. (a) Ewi wãwen Jehovah ear kautiej kij, im etke? (b) Ewi wãwen Nejin Anij ear kajerbal maroñ in kãlet eo an?

⁹ Jehovah emaroñ kar kõmanman kij einwõt robot ko, iun kij bwe jen kõmanman ankil an im jab kõmman ekkar ñan kõnan ko ad. Jen an kar kõmmane men in, ear kautiej kij ilo an letok maroñ in kãlet. Anij eo ad ekõnan bwe ro ri karejaran ren mõnõnõ in jerbal ñan e. Ej mõnõnõ ñe ro ri karejaran, reritto im redik, rej jerbal ñan e ilo yokwe. Joñok eo emõntata kin juõn eo ear kõmanman ankil an Anij ilo yokwe kar eo ej make wõt Nejin ear keotak, kin e Jehovah ear ba: “E in Nejiõ jitenburu iba, Ij mõnõnõ kake.” (Matu 3:17) Nejin, eo ej manjen ear ba ñan Jemen: “I lõñliñ in kõmõnmõn ankil Am, O aõ Anij, aet kiõm ej ber iloan buruõ.”​—Sam Ko 40:8; Dri Hibru 10:9, 10.

10. Ta unin ad karejar ñan Jehovah ilo jimwe?

¹⁰ Jehovah ekõnan bwe ro rej karejar ñan e iumin tel eo an Nejin ren kwalok ejja mõnõnõ eo wõt ñe rej kõmanman ankil An. Ilo kanan, ri jeje sam ear al: “Ro drom rej mõnõnõ im lewoj ir mõke ilo ran in Am kajur: ilo wõlio ko in kwojarjar, jen lojien ejiboñ: ibõm molawi an ien emõn drer.” (Sam Ko 110:3) Aolepen dolul eo an Jehovah, ilañ im ion lal, rej emmakit kinke rej mõnõnõ in kõmanman ankil an Anij.

11. Ta jokãlet eo ej bed iman jodikdik ro me emwij an jemeir im jineir baptais?

¹¹ Inem kom jodikdik ro komij aikwij melele bwe ejjab jememi im jinemi im elder ro ilo congregation eo renaj iun kom ñan ami baptais. Kwe make kwoj aikwij kõnan karejar ñan Jehovah. Joshua eo etto ear jiroñ ri Israel ro: “Korijer ñõn [Jehovah] ilo jime im mol . . . komin kãlet ranin wõn eo kom naj jerbal ñõn e.” (Joshua 24:14-22) Ilo ejja wãwen in lok wõt, kwe make kwoj aikwij kãlet in wujleplok mour eo am ñan Jehovah im lelok mour eo am ñan am kõmanman ankil an.

Kwon Bõk Eddo Eo Am

12. (a) Meñe ro jemen im jinen remaroñ katakin ajiri ro nejiir, ta eo rejjab maroñ kõmmane kin ir? (b) Ñããt eo juõn jodikdik ej aikwij bõk eddo eo kin jokãlet ko ej kõmmani iman mejen Jehovah?

¹² Enaj itok ien eo ñe jodikdik ro rejjab maroñ atartar ion tiljek eo an jemeir im jineir. (1 Dri Korint 7:14) Ri kalor eo James ear je: “Inem eo e jela kin kõmõn emõn, im jab kõmõne, men in jerawiwi ñõn e.” (Jemes 4:17) Ro jemen im jinen rejjab maroñ jerbal ñan Anij kin ro nejiir im bareinwõt ajiri ro rejjab maroñ jerbal ñan Anij kin jemeir im jineir. (Ezekiel 18:20) Emwij ke am katak kin Jehovah im karõk ko an? Emõn ke joñan dettam ñan am melele kin ta eo kwoj katak kake im jino ejaake juõn kõtan ebak ñan e? Inem alikar bwe Anij ej watõk yuk einwõt juõn eo ewõr am maroñ ñan beek in karejar ñan e.

13. Ta kajitõk ko jodikdik ro rejañin baptais rej aikwij kajitõkin ir make kake?

¹³ Kwoj ke juõn jodikdik ejañin baptais im kwoj rittolok ibben jemõm im jinõm ro rej kabuñ ñan Anij, kwoj bed ke ilo kwelok ko  an Christian, im bõk kunam ilo jerbal in kwalok nan kin news eo emõn kin Ailiñ eo? Elañe aet, kwon kajitõkin yuk make: ‘Etke ij kõmmane men in? Ij bed ilo kwelok ko im bõk kunaõ ilo jerbal in kwalok nan ke kinke jema im jinõ rekõnan bwe in kõmmane men kein ak kinke ikõnan kabuñburuen Jehovah?’ Emwij am kamol ñan kwe make ke kin “ta ankil an Anij emõn im kabuñburuen im wãppen”?​—Dri Rom 12:2.

Etke Kwoj Rumij in Baptais?

14. Ta joñok ko ilo Bible rej kwalok bwe jejjab aikwij aibedbed jen ad baptais?

¹⁴ “Ta ej bõprae iõ bwe in jab baptais?” Ri Ethiopia eo me ear kwalok kajitõk in ñan ri evanjel eo Philip ej kab jelã bwe Jesus kar Messiah eo. Ak Ri Ethiopia eo ear bwe an jelã kin Bible eo ñan kile bwe ejjab aikwij aibedbed in kwalok iman mejen armij bwe enaj karejar ñan Jehovah einwõt juõn ian ro uan congregation eo an Christian, im men in ear kamõnõnõik e. (Jerbal 8:26-39) Ilo wãwen in lok wõt, juõn kõrã etan Lydia, eo kar “kebellok buruen, bwe en eoroñ nan ko Paul ej konono kaki,” ilo mõkaj e im ro ilo mweo imõn rar “baptais.” (Jerbal 16:14, 15) Ilo ejja wãwen dein, ri lale kalbuj eo ilo Pilippai ear eoroñ Paul im Silas ke rar “konono ñõn e nan in Iroij,” im ear “baptais, e im ro nukin otemjej kiõkiõ.” (Jerbal 16:25-34) Inem, elañe emwij am bõk katak ko relap kin Jehovah im karõk ko an, im kwo lukkun kõnan kõmanman ankil an, im emõn mwilõm iman mejen congregation eo im ekkeini am bed ilo kwelok ko im bõk kunam ilo jerbal in kwalok nan kin news eo emõn kin Ailiñ eo, ejelok unin ñan am jab baptais.​—Matu 28:19, 20.

15, 16. (a) Ta lemnak eo ebwid emaroñ bõpraik jet jodikdik jen air baptais? (b) Ewi wãwen wujleplok im baptais ear maroñ kejbãrok jodikdik ro?

¹⁵ Eñin ke unin am jenliklik jen am bõk buñten nee in eaorõk, ej kinke kwoj mijak in uak ñan Anij elañe kwoj kõmman juõn bwid? Elañe aet, inem kwon kalmenlokjen kin men in: Kwonaj ke jenliklik jen am bõk juõn license ñan kattõr wa kinke kwoj mijak in bed ilo juõn lanwõtwõt tokelik? Ilo mol jaab! Eindein kwon jab jenliklik jen am baptais elañe kwoj bojak. Ilo mol, enaj laplok am kate yuk ñan am jumae kõnan eo ñan kõmman nana elañe emwij am wujleplok am mour ñan Jehovah im kwar bebe ñan kõmanman ankil an. (Dri Pilippai 4:13) Kom jodikdik ro, joij im jab bõk lemnak in bwe elañe kwoj kõttar mae tokelik ñan baptais, kwo jamin aikwij uak ñan Anij kin kõmman ko ami. Elañe emwij am tõbar joñan yiõ eo ewõr am melele im maroñ bõk eddo ko, inem kwo naj aikwij uak ñan Jehovah kin men ko kwoj kõmmani jekdon elañe emwij am baptais ak jaab.—Dri Rom 14:11, 12.

¹⁶ Elõñ Ri Kennan ro ibelakin lal rar ba bwe bebe eo air ñan baptais ke rar jodikdik kar lukkun jibañ ir. Ñan wanjoñok, lemnak kin juõn Ri Kennan ej 23 an yiõ ilo Europe.  Ej kememej bwe ilo an kar baptais ke ear 13 an yiõ men in ear lujure bwe en jab bo ilo “mõm ko an likao.” (2 Timote 2:22) Ke ear dik, ear likit iman bwe en jibadõk mejenkajjik eo ñan an deloñ ilo jerbal in kwalok nan full-time. Rainin, ej mõnõnõ in jerbal ilo juõn ian office in ra eo an Ri Kennan ro an Jehovah. Aolep jodikdik ro, ekoba kwe, kom maroñ bõk elõñ jerammõn ko relap elañe komij kãlet in karejar ñan Jehovah.

17. Ilo wãwen et ko jej aikwij melejoñe ta eo “ankil an Iroij”?

¹⁷ Wujleplok im baptais ej kakõllan jinoin mour eo ad kinke jen ien eo manlok kõmanman ankil an Jehovah enaj jelet makitkit ko ad ilo wãwen otemjej. Ñe jej kajejjet kitien wujleplok eo ad ej kitibuj ‘wiaik ien.’ Ewi wãwen ad maroñ kõmmane men in? Ilo ad bõk ien jen jibadbad ko rej men bata im kajerbal ien kein ñan ad lukkun katak Bible eo, keini in bed ilo kwelok ko, im kwalok nan kin “gospel in an ailiñ in lõñ” joñan wõt ad maroñ. (Dri Epesõs 5:15, 16; Matu 24:14) Wujleplok eo ad ñan Jehovah im kõnan eo ad ñan kõmanman ankil an enaj jelet mour eo ad ilo jimwe ilo wãwen otemjej, ekoba wãwen eo jej kajerbal ien ad kakije, manit ko ad ñan mõñã im idak, im kain al im kajañjañ rot jej roñjaki. Inem emõn bwe kwon kãlet kakije ko renaj kamõnõnõik yuk ñan indio. Elõñ thousand Ri Kennan jodikdik ro renaj mõnõnõ in jiroñ yuk kin elõñ wãwen ko remõn kwomaroñ bõk mõnõnõ jeni ñe kwoj mour iumin kien ko an “ankil an Iroij.”​—Dri Epesõs 5:17-19.

“Kim Kõnan Iwõj Ibbemi”

18. Ta kajitõk eo jodikdik ro rej aikwij kajitõkin ir make?

¹⁸ Jen 1513 B.C.E. ñan Pentecost 33 C.E., Jehovah ear karõk bwe en wõr juõn dolul in armij ear kãlete ñan kabuñ ñan e im jerbal einwõt ri kennan ro an. (Aiseia 43:12) Ri Israel niñniñ ro rar lotak ilo ailiñ in. Jen ien Pentecost eo, Jehovah ear kajutak bar juõn “ailiñ” ekãl ion lal, Israel ilo jitõb, juõn jar in “armij . . . kin etan.” (1 Piter 2:9, 10; Jerbal 15:14; Dri Galetia 6:16) Ri jilek Paul ear ba bwe Christ ear karreoik ñan e, “armij ro bwe ren An, ro rej kijejeto ilo jerbal ko remõn.” (Taitõs 2:14) Kom jodikdik ro kom maroñ make lale ia eo armij rein rej bed ie. Wõn ro rainin rej einwõt “ailiñ eo e tiljek wõt,” ilo wãwen air mour ekkar ñan kien ko ilo Bible eo, im jerbal einwõt Ri Kennan ro retiljek an Jehovah, im kwalok nan kin Ailiñ eo an einwõt kejatdikdik eo wõt emol ñan armij? (Aiseia 26:2-4) Kalimjek aolep kabuñ ko an Christendom im kabuñ ko jet, im keidi mwiliir ekkar ñan ta eo Bible ej ba kin en kar ewi wãwen mwilin ri karejar ro remol an Anij.

19. Ta eo elõñ million armij ro iaolepen lal rar beek ilo burueir?

¹⁹ Elõñ million armij ro iaolepen lal, ekoba elõñ jodikdik ro, rar beek ilo burueir bwe bwen ri kabit ro an Ri Kennan ro an Jehovah rej ejaakin “ailiñ eo e tiljek.” Rej ba ñan Ri Israel rein ilo jitõb: “Kim kõnan iwõj ibbemi kinke kimar roñ ke Anij ej bed ibbemi.” (Zechariah 8:23) Kimij lukkun kejatdikdik im jar bwe kom jodikdik ro kom naj beek in jutak ibben armij ro an Anij im “kãlet mour”—mour indio ilo lal eo ekãl an Jehovah.—Duteronomi 30:15-20; 2 Piter 3:11-13.

Ilo Elij

• Ta eo ej koba ilo kaje im kowe?

• Kain jerbal rot eo Jehovah ej buñburuen kake?

• Ta jokãlet eo ej bed iman aolep jodikdik ro me ro jemeir im jineir emwij wujleplok air mour?

• Etke jej jab aikwij aibedbed in baptais?

[Kajitõk ko ñan katak]

[Pija ko ilo peij 12]

Kwonaj bokake wõn?

[Pija eo ilo peij 14]

Ewi wãwen wujleplok im baptais emaroñ kejbãrok yuk?

[Pija eo ilo peij 15]

Ta eo ej bõpraik yuk jen am baptais?