Kalimjek Men Ko Remõn Kin Dolul Eo An Jehovah

“Kim naj jokõne kin an mweo imõm emõn, kin jikin kwojarjar in tempel eo Am.”​—SAM KO 65:4.

1, 2. (a) Karõk ko ikijen temple eo enaj kar jelet armij ro an Anij ilo wãwen et? (b) Ewi wãwen David ear jurake jerbal in kalek temple eo?

 DAVID ilo Israel eo etto ear juõn ian armij ro rebuñbuñ me Jeje Ko ilo kajin Hebrew ej konono kake. Armij in ear juõn ri lale sheep, ri kajañjañ, ri kanan, im king, eo ear liki Jehovah Anij kin aolepen buruen. Kõtan eo an emũlal ibben Jehovah ear kamakit buruen David ñan an kõnan kalek juõn em imõn Anij. Juõn em rot in, ak temple, enaj jikin kabuñ eo emol ilo Israel. David ear jelã bwe karõk ko ikijen temple eo renaj kar bõktok lañliñ im jerammõn ko ñan armij ro an Anij. Kin men in David ear al: “Emõnõnõ armij eo Kwoj kãlet e, im kebakwoj e, bwe en jokwe iloan worwor ko Am; kim naj jokõne kin an mweo imõm emõn, kin jikin kwojarjar in tempel eo Am.”​—Sam Ko 65:4.

² Ak kar jab lelok maroñ eo ñan David ñan an lolorjake jerbal in kalek mweo imõn Jehovah. Jen men in, kar lelok jerbal in ejej uan ñan Solomon, leo nejin. David ear jab ellotan kinke bar juõn armij ear bõk jerammõn in me e make ear kõnan bõke. Men eo eaorõktata ibben kar bwe ren kaleke temple eo. Ear jurake jerbal in kin aolepen buruen ilo an lelok ñan Solomon karõk ko ñan kalek temple eo me ear bõki jen Jehovah. Bareinwõt, David ear karõk elõñ thousand Ri Levi ro ekkar ñan lajrak in jerbal ko air im ear jabawõt kin juõn joñan elap in gold im silver ñan jerbal in kalek temple eo.​—1 Kronikel 17:1, 4, 11, 12; 23:3-6; 28:11, 12; 29:1-5.

3. Ta lemnak eo ej bed ibben ri karejar ro an Anij kin karõk ko kin kabuñ eo emol?

³ Ri Israel ro retiljek rar jurake karõk ko kar kõmmani kin kabuñ eo emol ilo  imõn Anij. Einwõt ri karejar ro an Jehovah rainin, kij bareinwõt jej jurake karõk ko kar kõmmani kin kabuñ ilo dolul eo an Jehovah ion lal. Ilo wãwen in jej kwalok bwe ewõr ibbed ejja lemnak eo wõt ear bed ibben David. Ejelok juõn jitõb in ellotan ibbed. Jen men in, jej kalimjek wõt men ko remõn kin dolul eo an Anij. Kwonañin ke lemnak kin men ko remõn jemaroñ kamolol kaki? Jen lemnak kin jet iair.

Kamolol kin Ro Rej Tel

4, 5. (a) Ewi wãwen an class in “dri korijer etiljek im meletlet” kajejjet jerbal eo an? (b) Ewi lemnak eo an jet Ri Kennan ro kin ekan ko ilo jitõb rar bõki?

⁴ Ewõr un ko remõn ibbed ñan ad kamolol kin “dri korijer etiljek im meletlet” ro Jesus Christ ear jitõñ ir ion men ko an ion lal. Class in Christian ri kabit ro rej tel ilo jerbal in kwalok nan kin news eo emõn, kõmman karõk kin kwelok ko kin kabuñ, im jeje book ko rej bedbed ion Bible ilo elõñlok jen 400 kajin ko. Elõñ million armij ro ibelakin lal ilo kamolol rej bõk ekan kein ilo jitõb “ilo ien emõn.” (Matu 24:45-47) Emol ejelok unin ñan ad ellotan.

⁵ Iumin elõñ yiõ, juõn kõrã Ri Kennan eritto an Jehovah etan Elfi ear lo kainemõn im jibañ ilo an bõk ñan buruen nan in kakabilek ko rej bedbed ion Bible jemaroñ loi ilo book ko an class in ri karejar in. Juõn kamolol emũlal ear kamakit Elfi ñan an je: “Ta eo inaj kar kõmmane elañe ear ejelok jibañ jen dolul eo an Jehovah?” Peter im Irmgard rar bareinwõt ri karejar ro an Anij iumin elõñ yiõ ko. Irmgard ej kwalok an kamolol kin aolep book ko me “dolul eo an Jehovah eo ewõr an yokwe im kea” ear kõmmani. Book kein rekoba ko kar keboje ñan armij ro ewõr aikwij ko ejej uair, einwõt ro rebilo ak jaroñroñ.

6, 7. (a) Ewi wãwen rej lolorjake makitkit ko an congregation ko ibelakin lal? (b) Ta eo armij ro rar ba kin dolul eo an Jehovah ion lal?

⁶ Governing Body eo an Ri Kennan ro an Jehovah, ej juõn kumi edik in ri kabit maan ro rej jerbal ilo headquarter ko an Ri Kennan ro an Jehovah ilo Brooklyn, New York, im rej jutak kin ‘ri karejar in etiljek.’ Governing Body eo ej jitõñ ri karejar ro an Jehovah ewõr air iminene ñan air jerbal ilo ra ko me rej lolorjake makitkit ko an elõñlok jen 98,000 congregation ko ibelakin lal. Maan ro me rej kajejjet men in aikwij ko ilo Bible rej jitõñ ir einwõt elder im ministerial servant ro ilo congregation kein. (1 Timote 3:1-9, 12, 13) Elder ro rej  tel im ilo yokwe lale bwij eo an Anij ej bed ibbeir. Ej juõn jerammõn elap ñan ad mõttan bwij in im ñan lo yokwe im burukuk eo ej bed ibwiljin ro ‘jimjãn jimjatid’!​—1 Piter 2:17; 5:2, 3.

⁷ Jen air aol, elõñ ekkã air kwalok air kamolol kin tel eo ilo yokwe kin men ko lor jitõb rej bõk jen elder ro. Ñan wanjoñok, lemnak kin Birgit, eo ej 30 jima yiõ dettan im ej juõn Christian kõrã ri belele im ewõr nejin. Ke ear juõn jodikdik, ear tel an ibben ro ri nana im mõttan jidik ear jerawiwi. Ak nan in kakabilek ko ralikar jen Bible eo jen elder ro im rejañ jen ri tõmak ro mõttan rar jibañ e ñan an etal jen wãwen eo ekauwatata. Ewi lemnak eo an Birgit kiõ? Lio ej ba: “Elap aõ kamolol bwe ij bedwõt ilo dolul eo emõn an Jehovah.” Juõn ladik jodikdik 17 yiõ dettan etan Andreas ear ba: “Dolul in emol an Jehovah, ej dolul eo emõntata ilo lal in.” Jejjab aikwij kamolol ke kin men ko remõn jen dolul eo an Jehovah ilo lal?

Ro Rej Tel Rejjab Wãppen

8, 9. Ewi wãwen jet armij ilo ran ko an David rar emmakit, im ewi wãwen an kar emmakit ñan kõmman ko air?

⁸ Emol, ro kar jitõñ ir ñan air tel ilo kabuñ eo emol rejjab wãppen. Ir aolep rej kõmman bwid, im jet iair rej aikwij kate ir ñan anjo ion mõjno ko air. Jej aikwij abõnõnõ ke kin men in? Jaab. Armij ro kajjojo me rar bõk eddo ko relap ilo Israel etto rar bareinwõt kõmman bwid ko relap. Ñan wanjoñok, ke David ear juõn likao kar kajitõk ibben bwe en jerbal einwõt juõn ri kajañjañ ñan kainemõn King Saul. Tokelik, Saul ear kajeoñ in mõn David, eo ear aikwij ko jen e ñan kejbãrok mour eo an.​—1 Samuel 16:14-23; 18:10-12; 19:18; 20:32, 33; 22:1-5.

⁹ Ri Israel ro jet rar jab jerbal ilo tiljek. Ñan wanjoñok, Joab ri tel in jar in tarinae eo an David ear mõn Abner juõn nukin Saul. Absalom ear karõk ilo ittino ñan an jumae David, jemen, kin jerbal in king. Im Ahithophel ri kakabilek eo David ear liki ear ketak e. (2 Samuel 3:22-30; 15:1-17, 31; 16:15, 21) Ak, David ear jab oktak im juõn ri aol emeo; im ear jab karmijeteik kabuñ eo emol. Ilo mol, ear lukkun oktak wãwen an David emmakit. Abañ ko rar kamakit David bwe en eddeb ñan Jehovah im kejbãrok wõt lemnak eo emõn ke ear ko jen Saul. Ilo ien eo, David ear al: “Kwon tiriamokake iõ, O Anij, Kwon tiriamokake iõ; bwe aõ ej ko ñõn Kwe; aet ilo lurin peiõm I naj tilekek, mae ien iñtan kein ren joko.”​—Sam Ko 57:1.

10, 11. Ta eo juõn Christian etan Gertrud ear iione ke ear juõn jodikdik, im ta eo ear ba kin likjap ko an ri tõmak ro mõttan?

¹⁰ Ejelok unin ad aol kin jab tiljek ilo dolul eo an Anij rainin. Jehovah im enjel ro im ri lale sheep ro ilo jitõb rejjab kõtlok bwe ri nana ro rejjab tiljek ren bedwõt ilo congregation in Christian. Mekarta, kij aolep jej jelmae jab wãppen an armij​—ad make im an ri karejar ro jet an Anij.

¹¹ Juõn ri kabuñ an Jehovah me etto an jerbal etan Gertrud kar naruõn ilo jab mol bwe ear juõn ri jelã mon im bwe ear jab juõn ri kwalok full-time kin Ailiñ eo. Ewi wãwen an kar emmakit? Gertrud ear ellotan ke kin kõmman rot kein nae e? Jaab. Ejjabto mokta jen an kar mij ilo 2003 ke ear 91 yiõ dettan, ear lemnak kin mour eo an im ear kamelele: “Ilo aolepen aõ mour men ko iar iioni rar katakin iõ bwe meñe armij rej kõmman bwid ko, Jehovah ej tel wõt jerbal eo an eaorõk, eo ej kajerbal kij armij jab wãppen.” Ke ear aikwij jelmae jab wãppen ko an ri karejar ro jet an Anij, Gertrud ear jar ñan Jehovah.

12. (a) Ta joñok eo enana jet Ri Christian ro ilo ebeben eo kein kajuõn rar likiti? (b) Ta eo jej aikwij lemnak kake?

¹² Kinke Ri Christian ro retiljek tata bareinwõt  rejjab wãppen, ñe juõn elder ak ministerial servant ej kõmman juõn bwid, jen wõnmanlok im “kõmõnmõn men otemjej kin ejelok lotan ak akwail.” (Dri Pilippai 2:14) Elap an kaburomõjmõj elañe jej lor joñok eo enana an jejjo armij ro ilo congregation eo an Christian ilo ebeben eo kein kajuõn! Ekkar ñan ri kalor eo Jude, ri kaki wan ro ilo ran ko an rar “kejekron kajur in iroij rõn im konono nana nae wuj ko.” Bareinwõt, ri nana rein rar “dri lotan, im dri wanõketak.” (Jud 8, 16) Jej aikwij karmijeteik ial eo me ri lotan ro rar lore im lemnak wõt kin men ko remõn me jej bõk jen ‘ri karejar eo etiljek.’ Jen kaorõk men ko remõn jen dolul eo an Jehovah im “kõmõnmõn men otemjej kin ejelok lotan ak akwail.”

“Nan in Nan Ebin”

13. Ewi wãwen jet rar emmakit kin jet ian katak ko an Jesus Christ?

¹³ Ke jet ilo ebeben eo kein kajuõn rar ellotane overseer ro kar jitõñ ir, ro jet rar ellotane katak ko an Jesus. Einwõt kar je ilo Jon 6:48-69, Jesus ear ba: “Eo ej mõña kõniekiõ, im irak bõtõktõkiõ, an mour in drio.” Ke emwij air roñjake nan kein, “elõñ ian ro dri kaloran . . . re ba: ‘Nan in nan ebin; wõn e maroñ in roñjake?’” Jesus ear jelã bwe ro “dri kaloran rej lotan kin men in.” Bareinwõt, “jen ien eo, elõñ ian ro dri kaloran rej jeblak, im jab bar etetal iben.” Ak ejjab aolep ri kalor ro an rar ellotan. Lale ta eo ear walok ke Jesus ear kajitõk ibben ri jilek ro 12: “Kom bareinwõt kõnan ilok ke?” Ri jilek Peter ear uak: “Iroij, kim naj ilok ñõn wõn? ibõm nan ko nan in mour in drio. Im kim ar tõmak im jela, bwe Kwe Juõn eo Ekwojarjar an Anij.”

14, 15. (a) Etke jet rej oktak im jab juburu kin jet wãwen kin katak ko an Christian? (b) Ta eo jemaroñ katak jen armij eo etan Emanuel?

¹⁴ Ilo ran kein, juõn oran edik ibwiljin armij ro an Anij rar oktak im jab juburu kin wãwen jet ian katak ko an Christian im rar ellotane dolul eo an Jehovah ion lal. Etke men in ej walok? Ekkã an walok ellotan ñe ejjab bwe air melele kin wãwen an Anij kõmmani men ko. Ri Kõmanman eo ej kwalok jidik kin jidik kin mol eo ñan armij ro an. Kin men in, jen ien ñan ien ej aikwij wõr kajimwe kin melele eo ad kin Jeje Ko. Jarlepju in armij ro an Jehovah rej lañliñ kin kajimwe rot kein. Jejjo rej oktak im “wãnik jen joñan emõn” im rej dike oktak kein. (Ekklisiastis 7:16) Jet remaroñ utiej burueir, im ro jet rej wõtlok ilo aujid eo kin lemnak in make iair. Jekdon ta un eo, ellotan rot in ekauwatata, kinke emaroñ kareel kij bwe jen bar jeblak ñan lal in im wãwen ko an.

¹⁵ Ñan wanjoñok, Emanuel ear juõn Ri Kennan me ear kõrraate jet men ko ear readi ilo book ko jen “dri korijer etiljek im meletlet.” (Matu 24:45) Ear bõjrak jen an read book ko ad im tokelik ear jiroñ elder ro ilo congregation eo bwe ear jab kõnan wõnmanlok einwõt juõn ian Ri Kennan ro an Jehovah. Bõtab, ejjabto tokelik Emanuel ear kile bwe katak ko an dolul eo an Jehovah remol. Ear kebak Ri Kennan ro an Jehovah, kwalok bwid eo an, im kar kajeblak e einwõt juõn ian Ri Kennan ro an Jehovah. Ear bar oktak im juõn armij emõnõnõ.

16. Ta eo emaroñ jibañ kij anjo ion bere ko kin jet ian katak ko an Christian?

¹⁶ Ta elañe jekõnan ellotan kinke ewõr ad bere kin jet ian katak ko an dolul eo an Jehovah? Inem jen meanwõd wõt. ‘Dri korijer eo etiljek’ emaroñ je juõn men me enaj uake kajitõk ko ad im jolok bere ko ad. Ej juõn men in meletlet ñan ad bukõt jibañ jen Christian elder ro. (Jud 22, 23) Jar, katak ibbed make, im kamao ibben ri tõmak ro mõttad rekajur ilo jitõb remaroñ  bareinwõt jibañ kij jolok bere ko ad im kamũlallok kamolol eo ad kin mol ko ilo Bible me rej kakajur tõmak eo ad eo jaar katak jen dolul eo an Jehovah.

Kejbãrok juõn Lemnak Emõn

17, 18. Ijellokin ad ellotan, ta lemnak eo en bed ibbed, im etke?

¹⁷ Emol, armij jab wãppen ekkã air jerawiwi, im jet rekõnan kwalok abõnõnõ ko air. (Jenesis 8:21; Dri Rom 5:12) Ak elañe jej ellotane armij aolep ien, jemaroñ kokkure kõtan eo ad ibben Jehovah Anij. Kin men in, jej aikwij debij kõnan eo ad ñan aol.

¹⁸ Ijellokin am ellotan kin men ko ilo congregation eo, emõnlok jen kejbãrok juõn lemnak emõn im lor juõn manit me enaj kõmman bwe jen boub, mõnõnõ, kwalok kautiej, jokkin wõt juõn, im bin ilo tõmak. (1 Dri Korint 15:58; Taitõs 2:1-5) Jehovah ej beek men otemjej ilo dolul eo an, im Jesus ej jelã men ko rej walok ilo kajjojo congregation, einwõt ear jelã ilo ebeben eo kein kajuõn. (Reveles̃õn 1:10, 11) Ilo meanwõd katak ñan kõttar Anij im Christ, eo ej Bõran congregation eo. Remaroñ kajerbal ro rej tel ilo congregation eo ñan kajimwe men ko rej men in aikwij.​—Sam Ko 43:5; Dri Kolosse 1:18; Taitõs 1:5.

19. Mae ien eo Ailiñ eo enaj lolorjake aolep makitkit ko an armij, ta eo jej aikwij kalimjeke?

¹⁹ Mõttan jidik jukjuk im bed in enana enaj jako, inem Ailiñ in Messiah eo enaj lolorjake aolep makitkit ko an armij. Mae ien in, elap an aorõk bwe kij kajjojo jen kejbãrok juõn lemnak emõn! Men in enaj jibañ kij ñan kile kadkad ko remõn kadkadin ri tõmak ro mõttad, jen ad kalimjek bwid ak mõjno ko air. Ñe jej kalimjek wãwen ko remõn ilo kadkad ko kadkadiir, men in enaj kamõnõnõik kij. Ijellokin ad mõk ilo eñjake kin ad ellotan, jenaj kajurlok ilo jitõb.

20. Juõn lemnak emõn enaj kamaroñ kij ñan lañliñ kin jerammõn et ko?

²⁰ Juõn jitõb emõn enaj bareinwõt kamaroñ kij ñan kememej aolep jerammõn ko jej lañliñ kaki kinke jej mõttan dolul eo an Jehovah ion lal. Dolul in wõt ej tiljek ñan Iroij Bõtata eo an ijoko otemjej ilañ im ilal. Ewi lemnak eo am kin mol in im kin jerammõn eo ewõr ibbed ñan kabuñ ñan Anij eo wõt emol, Jehovah? Lemnak eo ad en einwõt eo an David, eo ear al: “O Kwe kwoj roñjake jar, ñõn Kwe kõniek otemjej e naj itok. Emõnõnõ armij eo Kwoj kãlet e, im kebakwoj e, bwe en jokwe iloan worwor ko Am; kim naj jokõne kin an mweo imõm emõn.”​—Sam Ko 65:2, 4.

Kwoj Kememej Ke?

• Etke jej aikwij kamolol kin ro rej tel ilo congregation eo?

• Ewi wãwen jen emmakit ñe ro rej tel rej kõmman bwid ko?

• En ewi lemnak eo ad kin kajimwe melele ko ilo Bible?

• Ta eo emaroñ jibañ juõn Ri Christian ñan an anjo ion bere ko?

[Kajitõk ko ñan katak]

[Pija eo ilo peij 28]

David ear lelok ñan Solomon karõk ko ñan kalek temple eo im ear jurake kabuñ eo emol kin aolepen buruen

[Pija eo ilo peij 31]

Christian elder ro rej mõnõnõ in lelok jibañ ko kin men ko lor jitõb