Lolok eo Ear Kõmman juõn Oktak

“I AR kijoror in ba ñan family eo aõ kin ruo ‘enjel’ Anij ear jilkintok ñan ibba.” Eindein an juõn emaan je elikin an ruo jiroñ Ri Kennan an Jehovah lolok e. Jejjo week ko mokta jen air kar lolok e, ear mij lio e kar belen iumin 45 yiõ. Ear lukkun buromõj. Ro nejin reritto rar kainemõn e, ak rej jokwe ijoko retolok. Ro mõttan ak ri turin rar jab lolok e.

“Ejako aõ jar ñan Anij kiõ kinke ijjab eñjake aõ lukkun ebake e,” emaan eo ej ba ñan ledik ro ke rej lolok e. Bõtab, rar kwalok joij ñan e im likit juõn tract ibben me ej bedbed ion Bible naetan Ta Kejatrikrik eo kin Ro Rejitenburu Rej Mij? Ear readi boñin eo wõt im lo ainemõn.

Ejjabto tokelik, Ri Kennan rein ruo rar bar lolok. Rar kememej kin wãwen an kar leo buromõj ilo ien lolok eo air mokta im rar itok ñan lale ej et an mour. “Iar lukkun bwilõñ,” leo ear je tokelik, “bwe ruwamaejet rein ruo rar kea kin ña im inebata kin ewi wãwen aõ mour.” Nan ko rar kwalok ñan e jen Bible eo ear lap an kõketak e. Jiroñ rein rar ba bwe renaj bar lolok e. Leo ear lukkun mõnõnõ im men in ear kamakit e ñan an je nan ko i lõñ im jilkinlok letter eo ñan Kingdom Hall eo an Ri Kennan ro an Jehovah.

Mokta jen an emmakit ñan juõn jikin ebaklok ñan juõn ian ajiri ro nejin, lein ear etal ñan juõn ian kwelok ko an Ri Kennan ro an Jehovah im ear mõñã ibben family eo an juõn ian jiroñ ro ruo. Ear je: “Ij emmakit jen bukwon in, ak jiroñ ro ruo im kabuñ eo am enaj bedwõt ilo buruõ im ilo jar ko aõ. Aet, kiõ ij jar—elõñ alen. Iar kõmman juõn oktak elap. Ear lap kunan jiroñ rein ruo ñan kõtõbrak men in, im ikõnan kamolol ir.”