Job—Juõn Emaan Eo Ear Kijenmij Im Tiljek

“Kwar kalomõnlokjen kake dri korijera Job ke? bwe ejelok einwõt ilo lõl, juõn armij e wãppen im wãnik, eo ej mijõk Anij im jeorlok jen nana.”—JOB 1:8.

1, 2. (a) Ta jorrãn ko Job ear iioni ilo an jab kõtmene kaki? (b) Kwalok kin wãwen mour eo an Job mokta jen an kar iion jorrãn kein.

 EAR wõr juõn emaan me ear mõnõnõ kin elõñ men ko remõn—mweie, utiej, ejmour, im juõn mour in family elemõnõnõ. Inem emõkaj an walok jilu jorrãn ko. Ilo idiñ, ear luji aolep men ko mweien. Jeltokin, juõn lañ me ejeja an walok ear bõk mour ko an aolep ro nejin. Ejjabto tokelik, ear bõk juõn nañinmij ekõmetak kin wõt ilo aolepen enbwinin. Bõlen kwoj kile bwe armij in kar Job, juõn armij elap konono kake ilo book eo ilo Bible ej bõk etan.​—Job, chapter 1 im 2.

² “O e nañin emõn elañe ña ij einwõt ilo aliñ ko mokta,” Job ear ñijlok im ba. (Job 3:3; 29:2) Ñe ej walok juõn jorrãn, aolep rej jañnuwaade tok ien ko remõn mokta. Ikijen Job, ear jimwe wãwen an mour, im kar kejbãrok e jen an iion jorrãn ko. Armij ro reutiej rar kautiej e im bukõt nan in kakabilek ko an. (Job 29:5-11) Ear mweie, ak ear jokkin wõt juõn ilo an lemnak kin money. (Job 31:24, 25, 28) Ke ear iion kõrã ro ejako beleir im ajiri ro ratajinimjin, ear jibañ ir. (Job 29:12-16) Im ear tiljek ñan lio belen.​—Job 31:1, 9, 11.

3. Ewi wãwen an kar Jehovah lemnak kin Job?

³ Wãwen mour eo an Job ear wãnik kinke ear kabuñ ñan Anij. “Ejelok einwõt ilo lõl,” Jehovah ear ba, “juõn armij e wãppen im wãnik, eo ej mijõk Anij im jeorlok jen nana.” (Job 1:1, 8) Ak meñe Job ear tiljek, jorrãn ko rar kokkure wãwen mour eo an eainemõn. Aolep men ko ear jerbal ñan kõtõbraki rar jako, im eñtan im buromõj rar melejoñe kadkad ko remol kadkadin.

4. Etke ewõr tokjen ad etale men ko Job ear iioni?

⁴ Emol, ejjab Job wõt ri karejaran Anij ear iion jorrãn ko ilo an mour. Elõñ Ri Christian ro rainin rej lo bwe men ko rej iioni rej einlok wõt ko an Job. Kin un in, ewõr ruo kajitõk ko remõn ñan ad kalmenlokjen kaki: Ñe jej kememej melejoñ ko an Job, ewi wãwen men in emaroñ jibañ kij ñe jej iion jorrãn  ko? Im ewi wãwen ej katakin kij bwe en laplok ad joij ñan ro jet me rej eñtan?

Juõn Aitwerõk kin Tiljek im juõn Melejoñ kin Mol

5. Ekkar ñan Satan, etke Job ear karejar ñan Anij?

⁵ Men eo ear walok ñan Job ear einjuõn. Ilo an Job jaje kake, Devil eo ear kajitõk kin unin an Job karejar ñan Anij. Ke Jehovah ear jitõñlok ñan kadkad ko remõn kadkadin Job ilo juõn ien ke jitõb ro ilañ rar koba ibben don, Satan ear uak: “Kwar jab likit juõn worwor in kabol e, im mweo imõn, im men ko otemjej iben, ijoko otemjej ke?” Ilo wãwen in Satan ear ba bwe jitõb in kibbon kar men eo ear kamakit Job—im ear bar kobaik aolep ri karejar ro jet an Anij. “A Kwon kõtellok peõm kiõ, im uñire men otemjej an, inem e naj karmijete Yuk iman mejõm,” Satan ear ba ñan Jehovah.—Job 1:8-11.

6. Aitwerõk et eo eaorõk Satan ear bõkmantak?

⁶ Aitwerõk eo kar juõn eo elap an aorõk. Ilo jinoin Satan ear aitwerõke wãwen an kar Jehovah jerbale iroij bõtata eo an. Men in ear tellok ñan kajitõk eo, Anij emaroñ ke iroij ion lañ im lal ilo yokwe? Ak, einwõt Satan ear ba, jitõb in kibbon eo an armij enaj ke anjo ien otemjej ilo jemlokin? Jehovah ear kõtlok bwe Devil eo en melejoñe Job, ilo an liki kin mol im tiljek eo an eo ri karejaran. Kin men in, Satan make ear bõktok juõn lelkan in jorrãn ko me rar buñõt Job ilo mõkaj. Ke Satan ear likjap in kabwer Job ilo jorrãn ko jinoin, ear kaeñtan e kin juõn nañinmij elap an kõmetak. “Kil wõt kil, aet, men otemjej iben juõn armij e naj lelok kin an mour,” Devil eo ear ba.​—Job 2:4.

7. Ilo wãwen et ko ri karejar ro an Anij rainin rej iion melejoñ ko einlok wõt ko Job ear iioni?

⁷ Meñe jarlepju in armij ro rej Christian rainin rejjab eñtan joñan wõt an kar Job eñtan, ewõr melejoñ ko jet rej eñtan kaki. Elõñ rej jelmae matõrtõr ak abañ ko kin family. Abañ ko kin money ak nañinmij ko relap emaroñ lap air kokkure ir. Jet rar mij kin tõmak eo air. Emol, jejjab aikwij likit ilo lemnak eo ad bwe Satan eo ej kõmmani jorrãn ko kajjojo jej eñtan kaki. Ilo mol, jet abañ remaroñ walok kin bwid ko ad make ak jab wãppen eo ad. (Dri Galetia 6:7) Im abañ ko rej walok kin bwijwõlã ak jorrãn ko jet einwõt makitkit lal, lañ ko, im ñitta, rej jelet kij aolep. Bible eo ej kalikar bwe ilo tõre in, Jehovah ejjab kejbãrok ri karejar ro an ilo kabwilõñlõñ jen jorrãn kein.​—Ekklisiastis 9:11.

8. Ewi wãwen Satan emaroñ kajerbal abañ ko jej eñtan kaki?

⁸ Mekarta, Satan emaroñ kajerbal eñtan ko ñan kamõjnoik tõmak eo ad. Ri jilek Paul ear konono kin an eñtan kin “juõn kãliklik ilo [kõniekin], juõn dri jilikan Setan” ear “ubrare” kake. (2 Dri Korint 12:7) Meñe ear juõn abañ ilo enbwinin, einwõt bilo, ak bar juõn abañ, Paul ear melele bwe Satan ear maroñ kajerbal abañ im inebata eo ej waloktok jene ñan an bõk lañliñ im kijenmij eo an Paul. (Jabõn Kennan Ko 24:10) Rainin, Satan emaroñ kajerbal ro uan juõn family, ri school ro mõttan, ak kien ko ñan air matõrtõre ri karejar ro an Anij ilo jet wãwen ko.

9. Etke abañ ko ak matõrtõr ren jab lap air kailbõk kij?

⁹ Ñe jej jelmae abañ kein ewi wãwen jemaroñ bõk anjo ioir? Ilo ad watõki einwõt juõn ien emõn ñan ad kamol bwe jej yokwe Jehovah im ilo ad kõttãik kij ñan iroij bõtata eo an ran otemjej. (Jemes 1:2-4) Jekdon ta ej kainebataik kij, elañe jemelele kin aorõkin ad tiljek ñan Anij, men in enaj jibañ kij ñan ad kejbãrok jokkin wõt juõn eo ad ilo jitõb. Ri jilek Peter ear jeje ñan Ri Christian ro: “Komeo, ro jitenburu, komin jab lemnok kin men in kijeek e naj itok bwe en melejoñ kom, einwõt elañe men eo ekãl ej walok ñõn kom.” (1 Piter 4:12) Im Paul ear kamelele: “Im ro otemjej re kõnan mour im kwojarjar  ilo Kraist Jisõs, naj matõrtõre ir.” (2 Timote 3:12) Satan ej wõnmanlok wõt im aitwerõke tiljek eo an Ri Kennan ro an Jehovah, einwõt ear kõmmane ñan Job. Ilo mol, Bible eo ej kalikar bwe Satan ear kalaplok an tarinaik armij ro an Anij ilo ran kein eliktata.​—Reveles̃õn 12:9, 17.

Juõn Lemnak Ebwid im Jet Nan in Kakabilek ko Renana

10. Ta abañ eo Job ear iione?

¹⁰ Job ear iion juõn abañ eo me jejjab aikwij iione. Ear jaje etke jorrãn kein rar buñõt e. Job ear bwid an lemnak im ba bwe ilo juõn wãwen “Jeova e ar letok, im Jeova e ar bõklok.” (Job 1:21) Bõlen, Satan ear kajeoñ in kõmman bwe Job en bõk lemnak eo bwe kar Anij eo ear kaeñtan e.

11. Kamelele kin ewi wãwen Job ear emmakit ñan nana ko ear iioni.

¹¹ Meñe ear lap an Job buromõj ear jab karmijeteik Anij, einwõt lio belen ear rejañ e ñan an kõmmane. (Job 2:9, 10) ‘Wãwen mour eo an ro renana emõnlok jen mour eo aõ,’ ear ba. (Job 21:7-9) Bõlen ear lemnak ‘Etke Anij ej kajeik iõ?’ Elõñ alen ear kõnan bwe en mij. Ear ba, “O emõn Kwon noj iõ ilo Hedis, im kejbãrok iõ ilo etino mae ien an mirlok Am illu.”​—Job 14:13.

12, 13. Ewi wãwen nan ko an lõmarojil jeran Job rar jelet e?

¹² Jilu ian lõmaro jeran Job rar itok in lotok e, ñan air “jõñõt im kainemõn e.” (Job 2:11) Bõtab, rar “dri kainemõn re nana.” (Job 16:2) Bõlen Job ear bõk tokjen jen ro jeran me ear maroñ kwalok buruen ñan ir, ak rein jilu rar kalaplok an bwok im buromõj.​—Job 19:2; 26:2.

¹³ Ilo melele, bõlen Job ear kajitõkin e make: ‘Etke ña? Ta eo iar kõmmane bwe in tellokin bõk jorrãn kein?’ Kamelele ko an lõmarojil jeran rar lukkun bwid. Rar lemnak bwe Job ear bõktok eñtan ion make ilo an kar kõmmane juõn jerawiwi elap. “Wõn e ar joko im ejelok ruõn?” Eliphaz ear kajitõk. “Einwõt I ar lo e, ro rej tõblõl jab wãnik, im jeor jorran, ein drein air marmir.”​—Job 4:7, 8.

14. Etke jen jab mõkaj im lemnak bwe unin an juõn eñtan kinke enana mwilin?

¹⁴ Emol, abañ ko remaroñ walok elañe jej jeor ekkar ñan kanniek im jab ñan jitõb. (Dri Galetia 6:7, 8) Ak, ilo jukjuk im bed in, abañ ko remaroñ walok jekdon emõn mwilid. Bareinwõt, jejjab maroñ ba bwe ro ejelok rueir rejjab iion jorrãn. Jesus Christ, eo ear “ejelok mon iben, erreo otem erreo,” ear eñtan kin juõn mij elukkun kõmetak ion juõn alal in eñtan, im ri jilek James ear mij kin tõmak eo an. (Dri Hibru 7:26; Jerbal 12:1, 2) Nan ko rebwid an Eliphaz im lõmaro ruo mõttan rar kamakit Job ñan an jojomare ãt eo emõn etan im ñan an lukkun kalikar bwe ejelok ruõn. Ak, nan in kinaak ko air bwe eñtan eo an Job ear waloktok jen nana ko Job ear kõmmani emaroñ kar jelet lemnak eo an kin ekajet jimwe eo an Anij.​—Job 34:5; 35:2.

Bukõt Jibañ Ñe Jej Jelmae Eñtan Ko

15. Lemnak rot eo enaj jibañ kij ñe jej jelmae eñtan ko?

¹⁵ Ewõr ke juõn men jemaroñ katak jen Job? Jorrãn ko, nañinmij, ak matõrtõr ej einwõt ñe rej walok ilo kalijeklok im jab jimwe. Ej einwõt ñe armij ro jet remaroñ deor jen abañ rot kein. (Sam Ko 73:3-12) Jet ien, jej aikwij kajitõkin kij make kin kajitõk kein raorõk: ‘Yokwe eo aõ ñan Anij ej kamakit iõ ke ñan karejar ñan e jekdon ta emaroñ walok? I kõnan ke lelok ñan Jehovah juõn “uak ñan eo ej kinak E.”’ (Jabõn Kennan Ko 27:11; Matu 22:37) Jen jab kõtlok bwe nan in jamõr ko an ro jet ren kõmman ad bere bwe Jemed ilañ enaj jibañ kij. Juõn Ri Christian etiljek me ear eñtan iumin elõñ yiõ kin juõn nañinmij elap ear ba: “I jelã bwe jabdewõt men me Jehovah ej kõtlok bwe en walok, inaj maroñ kijenmij kake. I jelã enaj letok ñan iõ kajur  eo ij aikwiji. Ien otemjej ear eindein an kõmmane.”

16. Ewi wãwen Nan in Anij ej letok jibañ ñan ro rej jelmae abañ ko?

¹⁶ Ikijen kõl ko Satan ej kajerbali, ewõr ad melele kin men kein me ekar ejelok an Job melele kaki. “Je jab jaje kake marmir ko an,” ak karõk ko an renana. (2 Dri Korint 2:11) Bareinwõt, elõñ melele ko ibbed rekeie jemaroñ bõk jeni. Ilo Bible eo, jej lo bwebwenato ko kin maan im kõrã ro retiljek me rar kijenmij kin elõñ kain abañ ko. Ri jilek Paul, eo ear laplok an eñtan jen ro jet, ear je: “Bwe jabrewõt men ko ar jeje mokta, ar jeje ken katakin kij, bwe kij kin kijenmij, im kin ainemõn jen Jeje ko, en or ar kejatrikrik.” (Dri Rom 15:4) Juõn Ri Kennan ilo Europe me kar kalbuji kin tõmak eo an ilo bata eo an lal kein karuo ear kõrrã kijen mõñã kin jilu ran ko ñan an bõk juõn Bible. “Elap an kar wõr tokjen kõrrã in!” ear ba. “Meñe iar kwuli ilo kanniek, iar bõk ekan ko lor jitõb me ear kejbãrok iõ im ro jet ilo melejoñ ko am iumin ien kein renana. Iar kejbãrok Bible in ñan kiõ.”

17. Ta men in letok ko jen Anij remaroñ jibañ kij ñan kijenmij?

¹⁷ Ijellokin ad bõk nan in kainemõn ko jen Jeje ko ilo Bible eo, ewõr ibbed book ko jet me rej letok ñan kij nan in tel ko rekeie ñan jibañ kij kamadmõde abañ ko. Jet ien, Imõniaroñroñ eo ej kwalok kin bwebwenato ko an Ri Christian ro jeid im jatid me rar iion juõn melejoñ einlok wõt eo kwoj iione. (1 Piter 5:9) Kwomaroñ bareinwõt konono ibben elder ro ak Ri Christian ro jet reritto  ilo jitõb kin men ko kwoj iioni. Ilõñin men otemjej, ikijen jar, kwomaroñ bõk jibañ jen Jehovah im jitõb kwojarjar eo an. Ewi wãwen an kar Paul kijenmij kin ‘ubrar ko’ an Satan? Ilo an katak ñan an atartar ion kajur eo an Anij. (2 Dri Korint 12:9, 10) “I maroñ in kõmõn men otemjej ilo Eo ej kakajur iõ,” ear je.​—Dri Pilippai 4:13.

18. Ewi wãwen Ri Christian ro mõttad remaroñ letok ñan kij rejañ ko raorõk?

¹⁸ Inem ewõr men ko me remaroñ jibañ yuk, im kwojjab aikwij rumij in bukõti. “Elañe kwoj kijelok ilo ran in jorran, inem erik wõt am kajur,” jabõn kennan eo ej ba. (Jabõn Kennan Ko 24:10) Einwõt an dile ko maroñ kõmman bwe juõn em alal en okjak, eindein buromõj emaroñ kamõjnoik tõmak eo an juõn Ri Christian. Ñan jumae uwõta in, Jehovah ej letok ñan kij jibañ ikijen ri karejar ro mõttad an Anij. Juõn enjel ear weaklok ñan Jesus im kakajur e ilo boñin eo rar jibwe. (Luk 22:43) Ke ear itoitak ñan Rome einwõt juõn ri kalbuj, Paul ear “kamolol Anij im e beranlok” ke ear lo ro jein im jatin ilo jitõb ilo Jikin wia eo an Appiõs im Jilu Tavern. (Jerbal 28:15) Juõn Ri Kennan ilo Germany ej kememej wõt jibañ eo ear bõke ke ear itok ñan kalbuj eo ilo Ravensbrück ke ear juõn jodikdik. “Juõn mõtta Ri Christian ear mõkaj an lo iõ im karuwaineneik tok iõ,” ej kememej. “Bar juõn sister etiljek ear kejbãrok im jibañ iõ, im ear einwõt juõn jinõ ilo jitõb.”

“Kwon Tiljek”

19. Ta eo ear jibañ Job ñan an jumae jibadbad ko an Satan?

¹⁹ Jehovah ear kwalok kin Job einwõt juõn emaan eo ear “kejbãrok wõt an wãnik.” (Job 2:3) Meñe ear buromõj im jab melele kin etke ear eñtan, Job ear jab ebbururu kin aitwerõk eo kin tiljek. Job ear debij wõt an tiljek ñan Anij. Ear ba ilo alikar: “Ñõn ien aõ mij i jamin jolok aõ jime jen ña.”​—Job 27:5.

20. Etke ewõr tokjen kijenmij?

²⁰ Elañe ej eindein bebe eo ad, men in enaj jibañ kij kejbãrok ad tiljek iumin jabdewõt wãwen ko—ñe jej jelmae men in kabo ko, jumae, ak wãwen ko rebin. “Kwon jab lelñoñ kin men ko kwo naj iñtan kaki,” Jesus ear jiroñ congregation eo ilo Smyrna. “Lo, devil e naj jolok jet iami na iloan prisõn bwe en melejoñ kom, im jorran e naj ibemi iomin joñoul ran. Kwon tiljek ñõn mij im I naj lewoj ñõn kwe belin eo belin mour.”​—Reveles̃õn 2:10.

21, 22. Ñe jej kijenmij kin eñtan ko, jelãlokjen et eo emaroñ kainemõn kij?

²¹ Ilo jukjuk im bed in me Satan ej iroij ie, naj melejoñe kijenmij im tiljek eo ad. Mekarta, Jesus ear kallimur ñan kij bwe ñe jej reilok ñan ilju im jeklaj, ejelok unin ad mijak. Men eo eaorõk in ej ñan ad kejbãrok ad tiljek. “Iñtan eo emera im iumelok,” Paul ear ba, ak “aibujuij,” ak jinekjej eo Jehovah ear kallimur ñan kij kake, “e jemlõm erro im in drio.” (2 Dri Korint 4:17, 18) Eñtan eo an Job jemaroñ bareinwõt watõke ekadu ñe keidi ibben elõñ yiõ ko in an mõnõnõ mokta im elikin melejoñ eo an.​—Job 42:16.

²² Ak, emaroñ wõr ien ko ilo mour ko ad ñe melejoñ ko ad rej einwõt ñe rejjab jemlok im ebin ad kijenmij kin eñtan ko ad. Ilo katak in tok juõn, jenaj etale kin ewi wãwen men eo Job ear iione emaroñ katakin kij men ko jet ikijen kijenmij. Jenaj bareinwõt lale wãwen ko jemaroñ kakajur ro jet me rej jelmae eñtan ko.

Ewi Wãwen Kwonaj Uak?

• Ta aitwerõk eo elap Satan ear bõkmantak ikijen tiljek eo an Job?

• Etke jejjab aikwij ilbõk ñe jej iion eñtan ko?

• Ewi wãwen Jehovah ej jibañ kij ñan ad kijenmij?

[Kajitõk ko ñan katak]

[Pija ko ilo peij 21]

Kõmman etale ak research, konono ibben Ri Christian ro reritto ilo jitõb, im kwalok buruõd ilo jar ko ad remaroñ jibañ kij ñan kijenmij