Kwon Meletlet Im Mijak Anij!

“Mijõk Jeova, jinoin meletlet.”​—JABÕN KENNAN KO 9:10.

1. Etke elõñ rej lo bwe ebin air melele kin lemnak eo kin mijak Anij?

 MOKTA rar watõke einwõt juõn nan in nebar ñe rej kwalok kin juõn armij bwe ej juõn eo ej mijak Anij. Rainin, elõñ rej watõk lemnak eo kin mijak Anij einwõt juõn mantin mour eo etto, ak ebin melele kake. ‘Elañe Anij yokwe,’ rej kajitõk, ‘etke ij aikwij mijake?’ Ñan ir, mijak ej juõn eñjake enana. Bõtab, mijak eo emol kin Anij ewõr juõn melele elaplok im, einwõt jenaj loe, ejjab juõn eñjake bajjek.

2, 3. Mijak Anij eo emol ej kitibuj ta?

² Ekkar ñan Bible eo mijak Anij ej juõn kadkadin emõn. (Aiseia 11:3) Ej kautiej eo emũlal kin Anij, juõn kõnan ekajur ñan kabuñburuen. (Sam Ko 115:11) Ekoba ad bõk im bokake kien ko kin mour erreo an Anij im juõn kõnan ñan mour ekkar ñan ta eo Anij ej ba ejimwe ak bwid. Juõn book in kamelele ej kwalok bwe juõn mijak rot in emõn ej kwalok “juõn lemnak kin Anij me ej tellok ñan mwil emeletlet im bõprae nana ko otemjej.” Ilo ekkar, Nan in Anij ej jiroñ kij: “Mijõk Jeova, jinoin meletlet.”​—Jabõn Kennan Ko 9:10.

³ Emol, mijak Anij ej kitibuj elõñ wãwen ko kin makitkit ko an armij. Ejjab tellok ñan meletlet wõt ak bareinwõt ñan lañliñ, ainemõn, mweie, mour aetok, kejatdikdik, im liki. (Sam Ko 2:11; Jabõn Kennan Ko 1:7; 10:27; 14:26; 22:4; 23:17, 18; Jerbal 9:31) Ej ekkeijaklok ñan tõmak im yokwe. Ilo mol, ej kitibuj kõtan eo ad ibben Anij im armij ro jet. (Duteronomi 10:12; Job 6:14; Dri Hibru 11:7) Mijak Anij ekoba juõn tõmak emũlal bwe Jemed ilañ ej kea kake kij im ebojak in jeorlok jerawiwi ko ad. (Sam Ko 130:4) Ro ri nana me rejjab ukwelok wõt ewõr unin air mijak Anij.​—Dri Hibru 10:26-31.

Katak ñan Jelã Mijak Jehovah

4. Ta eo emaroñ jibañ kij ñan “jela mijõk Jeova”?

⁴ Kinke mijak Anij eaorõk ñan kõmman bebe ko remeletlet im bõk jerammõn an Anij, ewi wãwen jemaroñ “jela mijõk Jeova” ilo jimwe? (Duteronomi 17:19) Elõñ wanjoñok ko kin maan im kõrã ro rej mijak Anij kar jeje kaki ilo Bible einwõt “ken katakin kij.” (Dri Rom 15:4) Ñan jibañ kij melele kin ta melelen mijak Anij, jen lemnak kin mour eo an juõn ian wanjoñok kein, King David in Israel eo etto.

5. Ewi wãwen jerbal in lale sheep ear jibañ ñan katakin David kin mijak Jehovah?

⁵ Jehovah ear karmijeteik king eo moktata an Israel, Saul, kin an kar mijak armij im ejelok an mijak Anij. (1 Samuel 15:24-26) Ijo tu-rãjet, ial in mour eo an David im kõtan eo an ebak ibben Jehovah ej kwalok bwe emol ear juõn emaan eo ear mijak Anij. Jen ke ear ajiri, ekkã an kar David bed inabõj im lale sheep ko an jemen. (1 Samuel 16:11) An kar lale sheep ko ilo boñ iumin iju ko men in ear maroñ jibañ David ñan an melele kin mijak Jehovah. Meñe David ear kile ilo juõn joñan edik kin lapin lañ ko, ear bõk jemlok eo ejimwe—Anij ej tellokin bõk nebar im aibujuij. “Ke ij lale lõñ ko Am, jerbal an arriim; aliñ im iju ko Kw’ar kõmõnmõni,” ear je tokelik, “ta armij bwe Kwon kememej e? Im nejin armij bwe Kwon itok ñõn iben?”​—Sam Ko 8:3, 4.

6. Ewi kar eñjake eo an David ke ear kile utiej bõtata eo an Jehovah?

⁶ Ilo ekkar, David ear bwilõñ ke ear keidi  joñan dikin ibben lapin lañ ko. Jen an menin kamijake, jelã in ear kamakit e ñan an nebar Jehovah im ba: “Lõñ ko rej kennan kin aibujuij an Anij, im mejatoto ej kwalok jerbal an pein.” (Sam Ko 19:1) Kautiej in kin Anij ear karuaklok David ñan Jehovah im kõmman bwe en kõnan katak im lor ial ko An rewãppen. Lemnak kin ewi eñjake eo an David ke ear al ñan Jehovah: “Bwe Kwe kwo laplap, im Kwoj kõmõn men in bwilõñ ko: Kwe wõt kwo Anij. Kwon tel iõ, O Jeova ilo Am ial; I naj etal ilo mol eo Am: Kwon kadrebijik buruõ bwe en mijõk etõm.”​—Sam Ko 86:10, 11.

7. Ewi wãwen mijak Anij ear jibañ David ñan an tarinaik Goliath?

⁷ Ke Ri Philistia ro rar nitbwili ailiñ in Israel, juõn air ri tarinae etan Goliath, eo ej ruatimjuõn jima nee aetokin, ear kajirere kake Ri Israel ro, im ba: ‘Komin kãlet juõn emaan bwe en tarinaik iõ! Elañe ej anjo, kim naj ri karejarami.’ (1 Samuel 17:4-10) Saul im aolepen jar in tarinae eo an rar lelñoñ—ak jab David. Ear jelã bwe jej aikwij mijak Jehovah wõt, im jab jabdewõt armij, jekdon ewi joñan an kajur. “Ña ij iwij ilo etan Jeova an inelip eo,” David ear jiroñ Goliath, “bwe armij otemjej rej kwelok ijin ren jela bwe Jeova e jab lomoren kin jãji im mõri: bwe tõrinae eo an Jeova.” Kin buwat eo an im juõn wõt dekã—im jibañ jen Jehovah—David ear mõn ri inea eo.​—1 Samuel 17:45-47.

8. Ta eo wanjoñok ko ilo Bible kin ro rar mijak Anij rej katakin kij kake?

⁸ Jemaroñ jelmae abañ ko rebin ak ri kijirãt ro rekamijak einwõt kar David. Ta eo jemaroñ kõmmane? Jemaroñ kamadmõde ilo ejja wãwen eo wõt David im ro jet retiljek ilo ien ko etto rar kõmmane​—kin mijak Anij. Mijak Anij emaroñ anjo ion mijak armij. Ri karejar eo an Anij etiljek Nehemiah ear rejañ Ri Israel ro mõttan, ro me rar bed iumin ijjibed ko jen ri kijirãt ro: “Komin jab mijõk ir: komin kememej Iroij eo ej lap im dri kalelñoñ.” (Nihimaia 4:14) Kin jibañ jen Jehovah, David, Nehemiah, im ri karejar ro jet retiljek an Jehovah rar lo tõbrak in kajejjet jerbal ko air Anij ear lelok ñan ir. Kin mijak Anij, kij bareinwõt jemaroñ kõmman eindein.

 Jelmae Abañ ko Ilo Mijak Anij

9. Iumin melejoñ et ko David ear kwalok an mijak Anij?

⁹ Elikin an kar David mõn Goliath, Jehovah ear kõmman bwe en bõk anjo ilo tarinae ko jet. Bõtab, Saul kin an ebanban ear kajeoñ in mõn David, mokta ilo wãlok, inem ilo etao, im eliktata kin juõn jar in tarinae. Meñe Jehovah ear kallimur ñan David bwe enaj king, iumin elõñ yiõ ko David ear aikwij ko, im tarinae, im kõttar ien eo ejejjet bwe Jehovah en kairoije einwõt king. Ilo aolep men kein, David ear kwalok an mijak Anij eo emol.​—1 Samuel 18:9, 11, 17; 24:2.

10. Ewi wãwen an kar David kwalok an mijak Anij ke ear jelmae juõn wãwen ekauwatata?

¹⁰ Juõn ien, David ear bukõt juõn jikin kone ibben Achish, king eo an jikin kwelok eo ilo Gath ilo Philistia, kabijuknen eo an Goliath. (1 Samuel 21:10-15) Ri karejar ro an king eo rar kinaak David einwõt juõn ri kijirãt an ailiñ eo air. Ewi wãwen an kar David emmakit ilo wãwen in ekauwatata? Ilo jar ear kwalok buruen ñan Jehovah. (Sam Ko 56:1-4, 11-13) Meñe ear aikwij kõmman einwõt ñe e wudiekek, David ear jelã bwe Jehovah eo ear lomoren e ilo an kajerammõn jibadbad ko an. Kin an kar David liki Jehovah kin aolepen buruen ear kalikar bwe emol an kar mijak Anij.​—Sam Ko 34:4-6, 9-11.

11. Ewi wãwen ad maroñ kwalok mijak Anij ñe jej bed iumin melejoñ ko, einwõt David ear kõmmane?

¹¹ Einwõt David, jemaroñ kwalok ad mijak Anij ilo ad liki kallimur ko an ñan jibañ kij kamadmõde abañ ko ad. David ear ba: “Kwon karebillok am ial ion Jeova, kwon bareinwõt liki E, im E naj kõmõne.” (Sam Ko 37:5) Ejjab melelen men in bwe jej baj likit abañ ko ad ilo pein Jehovah im jab kõmman jabdewõt im kõtmene bwe en kamadmõde abañ ko ad. David ear jab jar ñan Anij kin  jibañ inem jab kõmman jabdewõt men. Ear kajerbal maroñ ko an ilo enbwin im lemnak ko Jehovah ear lelok ñan e im ear jerbale abañ eo an. Ak, David ear jelã bwe jibadbad ko an armij rejamin kõmman bwe en wõr tõbrak. En eindein ibbed. Elikin ad kajeoñ in kamadmõde abañ ko ad joñan wõt ad maroñ, kiõ jej aikwij likit men otemjej ibben Jehovah. Ilo mol, elõñ alen men eo dein wõt jemaroñ kõmmane ej ñan ad atartar ion Jehovah. Eñin ien eo jemaroñ kwalok ad mijak Anij. Jemaroñ bõk kainemõn ilo nan kein an David: “Bebe etino an Jeova iben ro rej mijõk E, im E naj kwalok ñõn ir bujen eo An.”​—Sam Ko 25:14.

12. Etke jej aikwij watõk bwe jar ko ad raorõk, im lemnak et eo en jab wõr ibbed?

¹² Inem, jej aikwij watõk jar ko ad im kõtan eo ad ibben Anij einwõt juõn men eaorõk. Ñe jej kebak Jehovah, jej aikwij “tõmak kin an Anij ber, im kin An lelok jinekjij ñõn ro rej kabukot E.” (Dri Hibru 11:6; Jemes 1:5-8) Im ñe ej jibañ kij, jej aikwij ‘kwalok ad kamolol,’ einwõt ri jilek Paul ear kakabilek kij kake. (Dri Kolosse 3:15, 17) Jen jab einwõt ro me juõn Christian ri kabit ear kwalok kake ir: ‘Rej watõk bwe Anij ej einwõt juõn ri karejar,’ ear ba. ‘Ñe rej aikwiji juõn men, rej kir e bwe en itok. Im ñe emwij air bõk men eo rar kõnan, rekõnan bwe en illok.’ Lemnak rot in ej kwalok bwe ejelok air mijak Anij.

Ke Mijak Anij Ear Diklok

13. Ñããt eo David ear likjap in kwalok an kautiej Kien eo an Anij?

¹³ Ke ear lo jibañ eo an Jehovah ilo ien an kar iion abañ ko men in ear kamũlallok an David mijak Anij im kakajurlok an liki e. (Sam Ko 31:22-24) Bõtab, jilu alen mijak eo an David kin Anij ear diklok, im men in ear tellok ñan jorrãn ko relap. Im eo kein kajuõn ej kitibuj ien eo ear karõk bwe ren bõktok tebteb in kallimur eo an Jehovah ñan Jerusalem ion juõn wagon im jab ion aeran Ri Levi ro, einwõt Kien eo an Anij ear jiroñ ir. Ke Uzzah, eo ear tel wagon eo, ear kõtellok pein ñan Tebteb eo im jibwe bwe en jab okjak, ear mij ilo ien eo wõt kin “bwir eo an.” Aet, ear lap jerawiwi eo an Uzzah, ak elaptata, likjap eo an David ñan kwalok kautiej Kien eo an Anij ej men eo ear bõktok jorrãn eo. Mijak Anij ej melelen bwe jen kõmmane men ko ekkar ñan karõk ko an.​—2 Samuel 6:2-9; Bwinbwin 4:15; 7:9.

14. Ta eo ear walok jen an kar David bwine Israel?

¹⁴ Tokelik, kin an Satan kareel e, David ear karõk bwe ren bwine ri tarinae ro an Israel. (1 Kronikel 21:1) Ilo an kõmmane menin, David ear kwalok bwe ediklok an kar mijak Anij, im tokjen men in ear mij 70,000 Ri Israel ro. Meñe David ear ukwelok iman Jehovah, e im ro iturin rar bõk elap eñtan.​—2 Samuel 24:1-16.

15. Ta eo ear kõmman bwe David en bo ilo jerawiwi in lũñ?

¹⁵ Bar juõn ien ke ear diklok an David mijak Anij ear tellok e ñan an lũñ ibben Bath-sheba, lio belen Uriah. David ear jelã bwe ebwid ñan an juõn lũñ ak mijkaie kin belen bar juõn armij. (Exodus 20:14, 17) Abañ eo ear ijjino ke David ear lale an Bath-sheba tutu. Mijak Anij en kar kamakit e ñan an ukõt mejen im lemnak ko an ilo mõkaj. Jen men in, David ear ‘kalimjek wõt e’ mae ien mõm eo an ear laplok jen an kar mijak Anij. (Matu 5:28; 2 Samuel 11:1-4) David ear meloklok bwe Jehovah ear itoklimo kin aolep wãwen ko ilo an mour.​—Sam Ko 139:1-7.

16. Ta tokjen ko renana David ear eñtan kaki kin jerawiwi eo an?

¹⁶ Lũñ eo an David ibben Bath-sheba ear kõmman bwe en wõr juõn nejiiro ladik. Ejjabto tokelik, Jehovah ear jilkinlok Nathan ri kanan eo an ñan an kajerwawaik jerawiwi eo an David. Ke ej iañaktok aan, David ear bar kwalok an mijak Anij im ear ukwelok. Ear akwelap bwe Jehovah en jab jolok e ak bõk jitõb kwojarjar eo An jen e. (Sam Ko 51: 7, 11) Jehovah ear jeorlok bwid eo an David im kadiklok kaje eo an, ak Ear jab kejbãrok e jen aolep tokjen ko renana renaj walok jen men ko ear kõmmani. Ladik eo nejin ear mij, im metak buru im jorrãn rar buñõt family eo an jen ien eo manlok. Ear madmõde tokjen ko relukkun nana kin an kar diklok an mijak Anij!—2 Samuel 12:10-14; 13:10-14; 15:14.

17. Kwalok juõn wanjoñok kin metak buru eo emaroñ walok jen kõmman ko rejerawiwi.

¹⁷ Rainin, likjap eo ñan mijak Anij ilo mour erreo emaroñ bareinwõt bõktok tokjen ko renana im etto air bed. Lemnak kin metak eo an juõn kõrã ri belele ke ear jelã bwe Ri Christian leo belen ear jab tiljek ñan e ke ear emmakit ñan bar juõn ailiñ ñan an jerbal. Lio ear manlok kin an ilbõk im lukkun buromõj, ej kalibubu mejen kin pein im jañ. Enaj ewi toan mokta jen an lio naj bar liki im kautiej leo belen? Remaroñ kar bõprae tokjen kein renana ikijen air mijak Anij ilo mol.​—1 Dri Korint 6:18.

Mijak Anij Ej Debij Kij Jen Ad Jerawiwi

18. Ta mejenkajjik eo an Satan im ta kõl eo ej kajerbale?

¹⁸ Satan ej mõkaj im kokkure kien ko kin mour erreo an lal in, im elaptata ekõnan kokkure Ri Christian ro remol. Ñan an kõmmane menin, ej kajerbal wãwen eo emõkaj an deloñ ilo buruõd im lemnak ko ad​—ikijen mejed im lojilñiir. (Dri Epesõs 4:17-19) Enaj ewi wãwen am emmakit ñe ilo jab kõtmene kake kwoj iion men ko retton im nana einwõt ilo pija ko, nan ko, ak armij ro?

19. Ewi wãwen mijak Anij ear jibañ juõn Ri Christian ñan an anjo ion juõn men in kabo?

¹⁹ Lemnak kin André, * juõn Christian elder, jemen, im doctor ilo Europe. Ke André ear jerbal in karan ilo hospital, kõrã ro ilo jikin jerbal eo an ekkã air jeje letter ko im kaddebe ion bet eo biten, im kir e ñan an babu ibbeir. André ear makoko in lemnak kin nan in kareelel ko air. Bareinwõt, ear kabuk bar juõn jikin jerbal ñan an illok jen wãwen kein renana ibelakin. Mijak Anij ear juõn ial in meletlet im ear tellok ñan elõñ jerammõn ko, kinke rainin André ej jerbal part-time ilo ra eo an Ri Kennan ro an Jehovah ilo ailiñ eo an.

20, 21. (a) Ewi wãwen mijak Anij emaroñ kejbãrok kij jen ad jerawiwi? (b) Ta eo jenaj etale ilo katak in tok juõn?

²⁰ Ñe jej lemnak wõt kin men ko renana, emaroñ tel kij ñan ad kõnan jolok kõtan eo ad eaorõk ibben Jehovah ñan bõk juõn men ejjab tellokin ad bõke. (Jemes 1:14, 15) Ijo tu-rãjet, elañe jej mijak Jehovah, jejamin kebak—ak jenaj etal jen—armij ro, jikin ko, makitkit ko, im men in kamõnõnõ ko me remaroñ kõmman bwe jen kadiklok ad ekkõl kin mour etton. (Jabõn Kennan Ko 22:3) Jabdewõt jook ak men eo jej aikwij karmijeteiki, edik ñe keidi ibben ad luji buñburu eo an Anij. (Matu 5:29, 30) Mijak Anij ej kitibuj ad jab kajerwawaik kij ñan jabdewõt men etton, ekoba pija in kelwan ko ilo jabdewõt wãwen, ak jen an eindein kõmman bwe mejed en jab “lale wan.” Elañe jej kõmman eindein, jemaroñ liki bwe Jehovah enaj ‘kãejmour kij’ im kabwe jabdewõt men jej aikwiji.​—Sam Ko 84:11; 119:37.

²¹ Emol, bwe emmakit ilo ad mijak Anij ej ien otemjej ial in meletlet. Ej bareinwõt unjen mõnõnõ eo emol. (Sam Ko 34:9) Katak in tok juõn enaj kalikar lok men in.

[Kamelele eo itulal]

Kwomaroñ Ke Kamelele?

• Mijak Anij ej kitibuj kadkad et ko an Christian?

• Ewi wãwen mijak Anij ej jumae mijak armij?

• Ewi wãwen jemaroñ kwalok bwe ejimwe lemnak eo ad kin jar?

• Ewi wãwen mijak Anij emaroñ debij kij jen ad jerawiwi?

[Kajitõk ko ñan katak]

[Pija eo ilo peij 9]

David ear katak ñan an mijak Anij ke ear lale men in kõmanman ko an Jehovah

[Pija ko ilo peij 10]

Ewi wãwen kwonaj emmakit ñe kwoj iion juõn men in kabo ilo jab kõtmene kake?