Mijak Jehovah—Kwonaj Mõnõnõnõ!

“Emõnõnõ armij eo ej mijõk Jeova.”​—SAM KO 112:1.

1, 2. Mijak Jehovah emaroñ bõktok ta?

 MÕNÕNÕ ejjab juõn men ebidodo loe. Mõnõnõ eo emol ej wawa ion ad kõmman jokãlet ko rejimwe, kõmman men ko remõn, im illok jen ta eo ebwid. Ri Kõmanman eo ad, Jehovah, ear letok ñan kij Nan eo an, Bible eo, ñan katakin kij kilen bõk wãwen mour eo emõntata. Ilo ad bukõt im lor tel eo an Jehovah, im ilo wãwen in kwalok ad mijak Anij, jenaj maroñ lo juburu im mõnõnõ eo emol.​—Sam Ko 23:1; Jabõn Kennan Ko 14:26.

² Ilo katak in, jenaj lale wanjoñok ko ilo Bible eo im ilo ran kein me rej kwalok kin ewi wãwen mijak eo emol kin Anij ej kamaroñ juõn armij ñan an jumae ijjibed eo ñan kõmman men eo enana im beran eo ñan kõmman men eo ejimwe. Jenaj lo bwe mijak Anij emaroñ bõktok mõnõnõ ilo an kamakit kij ñan kajimwe juõn ial ebwid, einwõt King David ear kõmmane. Jenaj bareinwõt lo bwe mijak Jehovah emol ej juõn men in jolet eaorõk me ro jemen im jinen remaroñ lelok ñan ro nejiir. Ilo mol, Nan in Anij ej kallimur ñan kij: “Emõnõnõ armij eo ej mijõk Jeova.”​—Sam Ko 112:1.

Bar Bõk Mõnõnõ eo Ear Jako

3. Ta eo ear jibañ David ñan an maroñ ellã ion jerawiwi ko an?

³ Einwõt jaar etale ilo katak eo lok iman, ilo jilu ien ko David ear likjap in kwalok mijak eo ekkar ñan Anij im ear jerawiwi. Bõtab, wãwen an kar emmakit ñan kauwe eo an Jehovah ear kwalok bwe meñe ear kõmman jerawiwi kein ear juõn eo ear mijak Anij. An kautiej Anij ear kamakit e ñan an kwalok ruõn, kajimwe ial eo an, im bar kajutak juõn kõtan emõn ibben Jehovah. Meñe bwid ko an rar bõktok elap eñtan ñan e im ro jet, ukwelok eo an emol ear kõmman bwe Jehovah en wõnmanlok in jurak im kajerammõn e. Joñok eo an David emaroñ kaberan Ri Christian ro rainin me rar kõmman bwid ko relap.

4. Ewi wãwen mijak Anij emaroñ jibañ juõn armij ñan an bar lo mõnõnõ?

 ⁴ Lemnak kin wãwen eo kar ibben Sonja. * Meñe ear juõn ri evanjel full-time, Sonja ear tel an ibben ro enana mwiliir, ear kõmmani men ko rejõkkar, im rar bukwelok e jen congregation an Christian. Ke ear kile bwe men ko ear kõmmani renana, Sonja ear kõmman men otemjej ear aikwij ñan an kajimwe kõtan eo an ibben Jehovah. Tokelik, rar kajeblak e ñan congregation eo. Ilo aolep men ko rar walok ñan e, ear jab jako an Sonja kõnan karejar ñan Jehovah. Eliktata, ear maroñ bar deloñ ilo jerbal in kwalok nan full-time einwõt juõn pioneer. Tokelik, ear mareiki juõn Christian elder emõn, im kiõ lio ej mõnõnõ in jerbal ibben ilo congregation eo. Meñe Sonja ej buromõj kin an kar jebwãbwe jen ial in Christian, ej mõnõnõ bwe an mijak Anij ear jibañ e ñan an bar jeblak.

Emõnlok Eñtan Jen Am Jerawiwi

5, 6. Kamelele kin ewi wãwen im etke ruo alen David ear jab kõnan mõn Saul.

⁵ Ilo mol, mijak Anij emõnlok kinke ej jibañ juõn armij bõprae an kõmman juõn bwid elap. Men in ear mol ibben David. Juõn ien, ke Saul im jilu thousand jar in tarinae eo an rar bukõt David, Saul ear deloñ ilo juõn roñ—ejja roñ eo wõt David im ro don rar tilekek ie. Ro don David rar rejañ e ñan an mõn Saul. Ñan ir ear einwõt ñe Jehovah ear lelok ri kijirãt eo an David ilo pein. Ilo ejelok keroro, David ear ajadikdiklok ñan turin Saul im bukwe liboror eo an. Kinke David ear juõn eo ej mijak Anij, meñe men in ear kõmmane edik ak ear kabõnõnõik bõklikit eo an. David ear ubakelok ro don jen turin, im ba: “Jeova en bõprae aõ kõmõn men in nae aõ iroij, eo Jeova e ar kabite, bwe in kõtellok peiõ nae e, bwe Jeova e ar kabite.” *​—1 Samuel 24:1-7.

⁶ Tokelik, Saul ear camp ilo boñen eo, im “kiki mitoñ jen Jeova e ar buñ” ion im aolep ro don. David im leo mañden eberan Abishai rar deloñ ilo camp eo im jutak iturin Saul ke ej kiki. Abishai ear kõnan mõn Saul. David ear kabõjrak Abishai, ilo an kajitõk: “Bwe wõn eo e maroñ in erlokwe pein nae eo Jeova e ar kabite, im ejelok ruõn?”​—1 Samuel 26:9, 12.

7. Ta eo ear bõprae David jen an jerawiwi?

⁷ Etke David ear jab mõn Saul ilo ien kein ruo ear iione? Kinke elaplok an kar mijak Jehovah jen an mijak Saul. Kin mijak eo ekkar kin Anij, David ear bojak in eñtan, elañe ear men in aikwij, jen an jerawiwi. (Dri Hibru 11:25) Ear lukkun liki bwe Jehovah enaj kejbãrok armij ro An im e. David ear jelã bwe an bokake im liki Anij enaj bõktok mõnõnõ im elõñ jerammõn, ak elañe ej kajekdon Anij ejamin buñburuen kake. (Sam Ko 65:4) Ear bareinwõt jelã bwe Anij enaj kajejjet kitien kallimur eo An ñan kairoij David einwõt king im jolok Saul ilo ien im wãwen eo An make.​—1 Samuel 26:10.

Mijak Anij Ej Bõktok Mõnõnõ

8. Ewi wãwen mwilin David ke ear iion ijjibed ko ej juõn joñok emõn?

⁸ Einwõt Ri Christian ro, jej kõtmene bwe jenaj iion kajirere, matõrtõr, im melejoñ ko jet. (Matu 24:9; 2 Piter 3:3) Jet ien, jemaroñ iion abañ ko ibben ri kabuñ ro mõttad. Bõtab, jej jelã bwe Jehovah ej lo men otemjej, roñjake jar ko ad im, ilo ien eo ejejjet, enaj kajimwe men ko ekkar ñan ankil an. (Dri Rom 12:17-21; Dri Hibru 4:16) Kin men in, jen ad mijak ro rej jumae kij, jej mijak Anij im reilok ñan e ñan lomoren kij. Einwõt David, jejjab irenwõne kin kij make, im bareinwõt jejjab ebbururu kin kien ko rewãnik ñan bõprae ad eñtan. Ilo jemlokin, men in enaj bõktok mõnõnõ. Ak ewi wãwen?

9. Kwalok juõn wanjoñok kin ewi wãwen mijak Anij emaroñ walok ilo mõnõnõ meñe jej iion matõrtõr.

⁹ “Ij lemnak kin juõn jiroñ im jinen me rej  Christian. Kin air jab bõk kunair ilo makitkit ko an kien rar makoko in wia card ko ñan kalikar kumi in kien et eo rej rejetake,” juõn missionary me etto an jerbal ilo Africa ej ba. “Juõn kumi in emaan rar mõn ir ilo lej im jiroñ ir bwe ren jeblak ñan mweo imwiir. Ke rar etetal, jinen ear kajeoñ in kainemõn lio nejin ear jañ, eo ear jab melele kin etke men in ear walok. Rar jab mõnõnõ ilo ien eo, ak ear erreo bõklikit eo air. Tokelik, rar mõnõnõ bwe rar bokake Anij. Elañe rar wia card ko, kumi eo enaj kar lukkun mõnõnõ. Lõmaro renaj kar lelok ñan ir bottle in cola ko im eb ibelakiir mae ien rej tõbar mweo imwiir. Ak jiroñ eo im jinen, elañe ilo air jelã rar ebbururu, renaj kar einwõt armij ro elaptata air jab mõnõnõ ilo lal in.” Air mijak Anij ear kejbãrok ir jen air bõk eñjake in enana.

10, 11. Ta tokjen ko remõn rar walok jen an juõn kõrã mijak Anij?

¹⁰ Kwalok mijak Anij ñe juõn ej jelmaik melejoñ ko ikijen kautiej ekwojarjar kin mour ej bareinwõt walok ilo mõnõnõ. Ke Mary ear bõroro kin ajiri eo kein kajilu, doctor eo ear rejañ e ñan an mõn lojen. “Wãwen eo ibbam elap an kauwatata,” ear ba. “Kwomaroñ iion juõn abañ elap kin ejmour ilo jabdewõt ien im mij iloan 24 awa. Inem niñniñ eo enaj mij bareinwõt. Jekdon ta wãwen eo, rejjab maroñ kallimur bwe niñniñ eo enaj ejelok jorrãn ibben.” Mary ear katak Bible ibben Ri Kennan ro an Jehovah ak ejañin kar baptais. “Ak,” Mary ej ba, “Emwij aõ bebe bwe inaj karejar ñan Jehovah, im iar beek ilo buruõ bwe in bokake wõt e, jekdon ta.”​—Exodus 21:22, 23.

¹¹ Ilo ien eo ke ej bõroro, Mary ear boub in katak Bible im lale family eo an. Inem ear ien an ajiri eo lotak. “Ien lotak eo an ear binlok  jen ajiri ro jet nejin, ak kar ejelok abañ ko relap,” Mary ear ba. Mijak Anij ear jibañ Mary bwe en kejbãrok juõn bõklikit emõn, im ejjabto tokelik ear baptais. Ke ear rittolok niñniñ eo, e bareinwõt ear katak ñan an mijak Jehovah, im kiõ ej jerbal ilo juõn ian ra ko an Ri Kennan ro an Jehovah.

‘Kakajur Yuk Make ilo Jehovah’

12. Ewi wãwen mijak Anij ear kakajur David?

¹² Mijak eo an David kin Jehovah ear laplok an kõmmane jen an baj debij e jen an kõmman nana. Ear kakajur e ñan an emmakit ilo juõn wãwen ejelok bere ie im emeletlet iumin wãwen ko rebin. Iumin juõn yiõ im emen alliñ, David im armij ro ibben rar bukõt jikin kone jen Saul ilo Ziklag ilo enen Ri Pilistia ro. (1 Samuel 27:5-7) Juõn ien ke ear jako lõmaro, Ri Amalek ro rar itok im rakimi jikin kwelok eo im tile kin kijeek im bõk aolep limaro belen lõmaro, ro nejiir, im bwij ko otemjej. Ke rar rol im lo ta eo ear walok, David im armij ro ibben rar jañ. Buromõj ear mõkaj an oktak ñan illu, im ro don David rar kõnan kade. Meñe ear buromõj, David ear jab ebwer. (Jabõn Kennan Ko 24:10) Mijak eo an kin Anij ear kamakit e ñan an reilok ñan Jehovah, im “Devid e ar mõke kakajur e ilo Jeova an Anij.” Kin jibañ jen Anij, David im armij ro ibben rar lukwarkware im tõbar Ri Amalek ro im bar bõk aolep men ko mweieir.​—1 Samuel 30:1-20.

13, 14. Ewi wãwen mijak Anij ear jibañ juõn Ri Christian ñan an kõmman bebe ko remõn?

¹³ Ri karejar ro an Anij rainin rej bareinwõt jelmae wãwen ko me rej aikwij kwalok air liki Jehovah im beran in emmakit ilo ejelok bere. Jen lale wanjoñok eo an Kristina. Ke ear juõn jodikdik, Kristina ear katak Bible ibben Ri Kennan ro an Jehovah. Ak ear kõnan bwe en tijemlok ilo an jelã piano, im elap an kar kate ñan an tõbar mejenkajjik in. Bareinwõt, ear jook in kwalok nan im kin men in ear mijak in bõk eddo ko renaj kar itok elañe ear baptais. Ke Kristina ear wõnmanlok im katak Nan in Anij, ear jino eñjake kajurin. Ear katak ñan an mijak Jehovah, im ear kile bwe Jehovah ej kõtmene bwe ri karejar ro an ren yokwe e kin aolepen burueir, aolepen air lolãtãt, aolepen air, im aolepen air kajur. (Mark 12:30) Men in ear kamakit e ñan an wujleplok an mour ñan Jehovah im baptais.

¹⁴ Kristina ear kajitõk ibben Jehovah ñan an jibañ e kõmman wõnmanlok ko ilo jitõb. “Iar jelã bwe mour an juõn eo etijemlok ilo piano ej kitibuj an ikutkut in ito-itak im kõmman kwon ko ñan an kajañjañ enañin 400 alen concert ko ilo juõn yiõ,” Kristina ej ba. “Inem iar bebe ñan aõ erom juõn ri kaki bwe in maroñ kabwe aikwij ko aõ im jerbal einwõt juõn ri evanjel full-time.” Ilo ien eo, ededelok an kar Kristina karõk ien eo moktata enaj kajañjañ ilobwilij ilo concert hall eo ebuñbuñ tata ilo ailiñ eo an. “Ien kajañjañ eo aõ moktata ear bareinwõt eo eliktata,” ear ba. Tokelik Kristina ear mareiki juõn Christian elder. Kiõ rej jerbal ilo juõn ian ra ko an Ri Kennan ro an Jehovah. Emõnõnõ bwe Jehovah ear lelok ñan e kajur eo ear aikwiji ñan an kõmman bebe ko rejimwe im kiõ emaroñ kajerbal ien im kajur eo an ilo jerbal eo an Jehovah.

Juõn Men in Jolet Eaorõk

15. Ta eo David ear kõnan lelok ñan ro nejin, im ewi wãwen an kar kõmmane?

¹⁵ “Kom ro nejiõ, komin item roñjake iõ,” David ear je. “I naj katakin kom mijõk Jeova.” (Sam Ko 34:11) Einwõt juõn jemen, David ear kõnan lelok ñan ro nejin juõn men in jolet eaorõk—eñin mijak eo emol kin Jehovah. Ikijen nan im kõmman ko an, David ear kwalok kin Jehovah, ejjab einwõt juõn Anij ekijñeñe im kamijak, eo ebojak in kabuk jabdewõt bwid ko nae kien ko An, ak einwõt juõn Jemed ej kwalok yokwe, kea, im ej jeorlok bwid ko an ro nejin ion lal. “Wõn e maroñ in jela bwir ko an?” David ear kajitõk. Inem, ñan kwalok an liki bwe Jehovah ejjab etale ak bukõt bwid ko ad, ear kobaik: “Kwon karreoik iõ jen bwir ko re jab alikar!” David ear jelã bwe elañe ear  kate, Jehovah enaj buñburuen kake nan im lemnak ko an.​—Sam Ko 19:12, 14.

16, 17. Ewi wãwen ro jemen im jinen remaroñ katakin ro nejiir ñan air mijak Jehovah?

¹⁶ David ej juõn joñok emõn ñan ro jemen im jinen ilo ran kein. “Jemem im jinim rar kõmman bwe kimin mõnõnõ in bed ilo mol eo,” Ralph ej ba, eo ej jerbal ilo juõn ian ra ko an Ri Kennan ro an Jehovah ibben leo jatin. “Ke kim ar dik, rar kobaik kim ilo bwebwenato ko air kin makitkit ko an congregation eo, inem kim ar kijejeto kin mol eo einwõt ir. Rar katakin kim bwe kimin maroñ kõmman elõñ men ko remõn im ewõr tokjeir ilo jerbal eo an Jehovah. Ilo mol, iumin jet yiõ ko family eo am ear jokwe ilo juõn ailiñ elap aikwij ri kwalok ro kin Ailiñ eo im kim ar jibañ ñan kajutak elõñ congregation ko rekãl.

¹⁷ “Men eo ear kõmman bwe kimin bedwõt ilo ial eo ejimwe ear jab juõn lajrak in elõñ kien ko ak kar mol eo bwe ñan jemem im jinim, Jehovah ear juõn eo emol an bed im elap an joij im emõn. Rar kõnan kalaplok air jelã kake e im ñan kabuñburuen, im kim ar katak jen mijak eo air emol kin Anij im air yokwe e. Meñe ilo ien eo kim ar kõmman bwid ko, jemem im jinim rar jab kõmman bwe kimin eñjake bwe Jehovah ear jab yokwe kim; im bareinwõt rar jab ilo illu kemo kim jen am kõmmani jet men ko. Elõñ alen, rar kajijet kim im konono ibbem, jet ien ear toor den in kemjalal jen mejen jinim, ilo air kajeoñ in tõbar buruem. Im ear wõr tõbrak. Kim ar katak jen nan ko im kõmman ko an jemem im jinim bwe mijak Jehovah ej juõn men emõn im am juõn ian Ri Kennan ro an ej juõn men ekalañliñ, jab juõn eddo.”​—1 Jon 5:3.

18. Ta eo jenaj bõk elañe jej mijak Anij eo emol?

¹⁸ Ibwiljin “nan ko reliktata an Devid,” jej konono: “Eo ej iroij ion armij ilo wãnik, eo ej iroij ilo mijõk Anij, E naj einwõt maram in jiboñ ke al ej tak.” (2 Samuel 23:1, 3, 4) Alikar bwe Solomon, nejin David im eo ear binej jenkwon, ear katak jen nan kein, kinke ear kajitõk ibben Jehovah bwe en lelok ñan e “buru e jelalokjen” im maroñ eo ñan “kili emõn im nana.” (1 Kiñ Ro 3:9) Solomon ear kile bwe mijak Jehovah ej ial eo enaj tellok ñan meletlet im mõnõnõ. Tokelik, ear elij point ko relap ilo tu-kadu kin book in Ekklisiastis ilo nan kein: “Eñin tokjen men eo; emwij roñjake aolepen: kwon mijõk Anij, im bokake kien ko An; bwe eñin aolepen kõmõn emõn an armij ro. Bwe Anij e naj bõktok jerbal otemjej ilo ekajet, im jabrewõt eo emwij noje, elañe emõn ak nana.” (Ekklisiastis 12:13, 14) Elañe jej bokake nan in kakabilek in, enaj mol ad lo bwe “wõnan etã buru im mijõk Jeova” ejjab meletlet im mõnõnõ wõt ak bareinwõt “mweiuk, im nebar, im mour.”​—Jabõn Kennan Ko 22:4.

19. Ta eo enaj kamaroñ kij ñan melele kin “mijõk Jeova”?

¹⁹ Jen wanjoñok ko ilo Bible im bwebwenato ko ilo ran kein, jej lo bwe mijak eo ekkar kin Anij ej emõn an jelet mour eo an ri karejar ro remol an Jehovah. Mijak in ejjab bõprae kij jen ad kõmman men ko rej kaburomõj Jemed ilañ wõt ak emaroñ bareinwõt kaberan kij ñan jelmae ri kijirãt ro ad im kakajur kij ñan kijenmij kin melejoñ ko im abañ ko jej iioni. Kin men in, kij aolep, dik im ritto, jen kate kij ñan katak Nan in Anij, kalmenlokjen kin ta eo jaar katak, im jen keini ad kebak Jehovah ilo jar. Ilo ad kõmmane men in, jejamin lo “jelalokjen kin Anij” wõt ak jenaj bareinwõt melele kin “mijõk Jeova.”​—Jabõn Kennan Ko 2:1-5.

[Kamelele ko itulal]

Kwomaroñ Ke Kamelele?

Ewi wãwen mijak Anij emaroñ

• jibañ juõn armij ñan an maroñ ellã ion juõn jerawiwi elap?

• bõktok mõnõnõ ñe ej bed iumin melejoñ ko im matõrtõr?

• kakajur kij ñan kõmanman ankil an Anij?

• juõn men in jolet eaorõk ñan ro nejid?

[Kajitõk ko ñan katak]

[Pija eo ilo peij 13]

Mijak Jehovah ear debij David jen an mõn King Saul

[Pija ko ilo peij 15]

Mijak Anij ej juõn men in jolet eaorõk me ro jemen im jinen remaroñ lelok ñan ro nejiir