Ewi Wãwen Jemaroñ Kebak Eo Ej “Roñjake Jar”

“O Kwe kwoj roñjake jar, ñõn Kwe kõniek otemjej e naj itok.”​—SAM KO 65:2.

1. Ta eo ej kajenolok armij jen menin mour ko jet ion lal, im men in ej kabellok ta ñan kij?

 JEN ian aolep thousand men ko remour ion lal, armij wõt ewõr air maroñ ñan kabuñ ñan Ri Kõmanman eo. Armij ro wõt rej lemnak kin aikwij eo kin men ko lor jitõb im ewõr air kõnan ñan kabwe aikwij in. Men in ej kabellok juõn ien emõn ñan ad ejaake juõn kõtan ebak ibben Jemed ilañ.

2. Jerawiwi ear jelet kõtan eo an armij ibben Ri Kõmanman eo ilo wãwen et eo enana?

² Anij ear kõmanman armij kin maroñ eo ñan kebak Ri Kõmanman eo an. Kar kõmanman Adam im Eve bwe ren wãppen. Kin men in, rar maroñ beran ilo air kebak Anij einwõt juõn ajiri ej kebak jemen. Bõtab, jerammõn in ear jako ke rar jerawiwi. Adam im Eve rar jab bokake Anij inem rar luji kõtan eo air ebak ibben. (Jenesis 3:8-13, 17-24) Ej melelen men in ke bwe ro nejin Adam rejjab wãppen rar jab maroñ konono ibben Anij? Jaab, Jehovah ear kõtlok bwe ren maroñ kebak e elañe rar lor jet men in aikwij ko. Ta men in aikwij kein?

Men in Aikwij ko ñan Kebak Anij

3. Ewi wãwen armij ro rejjab wãppen rar maroñ kebak Anij, im wanjoñok et eo ej kalikar men in?

³ Juõn men me ear walok ikõtan lõmaro ruo nejin Adam ej jibañ kij ñan lo ta eo Anij ej aikwij bwe armij ro rejjab wãppen ren kõmmane ñan air kebak E. Cain im Abel jimor rar kajeoñ in kebak Anij ilo air lelok men in katok ko ñan e. Anij ear buñburuen kake men in katok eo an Abel, ak jab kin eo an Cain. (Jenesis 4:3-5) Kar ta oktak eo? Dri Hibru 11:4 ej ba: “Kin tõmak Ebel e ar katok ñõn Anij kin men in katok emõn jen eo an Kein, kin eo e ar jebarek kennan kin an wãnik.” Inem ealikar bwe, tõmak ej juõn men in aikwij ñan ad maroñ kebak Anij. Bar juõn men in aikwij ej alikar ilo nan ko an Jehovah ñan Cain: “Elañe kwoj kõmõn emõn, e jamin alikar ke?” Aet, Anij enaj kar buñburuen kake Cain elañe ear oktak im kõmman emõn. Bõtab, Cain ear karmijeteik nan in kakabilek eo an Anij, ear mõn Abel jatin, im kar jilkinloke bwe en juõn ri ko. (Jenesis 4:7-12) Kin men in, jen jinoin, kar kalikar aorõkin ad kebak Anij kin tõmak im ilo ad kõmman jerbal ko remõn.

4. Ta eo jej aikwij kile ikijen ad kebak Anij?

⁴ Elañe jekõnan kebak Anij, jej aikwij kile bwe jejjab wãppen. Armij otemjej rej jerawiwi, im ej juõn men in kabañ kij ñan ad kebak Anij. Ri kanan Jeremiah ear jeje ikijen Israel: “Kimar jerawiwi . . . Einwõt juõn kõdro emejil, eo jar ko am rar jab maroñ dribloke.” (Liãjlol 3:42, 44) Meñe eindein, ilo bwebwenato in armij Anij ear kalikar bwe ear mõnõnõ in bõk jar ko an ro rej kebak e ilo tõmak im kin juõn buru emõn, im ilo air bokake kien ko an. (Sam Ko 119:145) Wõn kar jet ian armij rein, im ta eo jemaroñ katak jen jar ko air?

5, 6. Ta eo jemaroñ katak jen wãwen an kar Abraham kebak Anij?

⁵ Juõn ian armij rein kar Abraham. Anij ear buñburuen kake jibadbad ko an Abraham  ñan an kebak e, bwe Anij ear naetan Abraham ‘jeran.’ (Aiseia 41:8) Ta eo jemaroñ katak jen wãwen an kar Abraham kebak Anij? Bõran family in etiljek ear kajitõk ibben Jehovah kin juõn ri jolet, ilo an ba: “Ta men eo Kwo naj letok ñõn iõ, bwe ejelok nejiõ.” (Jenesis 15:2, 3; 17:18) Ilo bar juõn ien, ear kwalok an inebata kin wõn ro renaj bõk lomor ke Anij ear ekajete ri nana ro ilo Sodom im Gomorrah. (Jenesis 18:23-33) Abraham ear bareinwõt jar kin ro jet. (Jenesis 20:7, 17) Im, einwõt kar eindein ibben Abel, jet ien wãwen an Abraham kebak Anij kar ikijen juõn men in katok ñan Jehovah.​—Jenesis 22:9-14.

⁶ Ilo aolep ien kein, Abraham ear eñjake an beran ilo an konono ibben Jehovah jabdewõt ien. Bõtab, beran in konono in ear koba ibben juõn lemnak ettã kin jutak eo an iman Ri Kõmanman eo an. Lale nan in kautiej eo an, jemaroñ loe ilo Genesis 18:27: “Iroij, kwon jolok aõ bwid kin aõ kajinet. Ña armij wan, im ejjab tellokũ ba jabdrewõt.” Ej juõn lemnak elap an emõn ñan ad kajeoñe!

7. Ta men ko ro jeban bwij ko rar jar ñan Jehovah kaki?

⁷ Ro jeban bwij ko rar jar kin elõñ men ko, im Jehovah ear mõnõnõ in roñjake ir. Jacob ear jar juõn jar in kallimur. Elikin an kajitõk kin jibañ jen Anij, ear kallimur: “Jen men otemjej Kwoj letok ñõn iõ, emol I naj lewoj juõn mõtõn joñoul.” (Jenesis 28:20-22) Tokelik, ke ear iten wõnmae jein, Jacob ear akwelap ibben Jehovah kin kejbãrok, ilo an ba: “Kwon lomoren iõ, ij akwelap ñõn Yuk, jen pein jeiõ, jen pein Iso: bwe I mijõk e.” (Jenesis 32:9-12) Jeban family eo Job ear kebak Anij ikijen family eo an, im lelok men in katok ko kin ir. Ke lõmarojil jeran Job rar jerawiwi kin nan ko rar ba, Job ear jar kin ir, im “Jeova e ar eoroñ Job.” (Job 1:5; 42:7-9) Bwebwenato kein rej jibañ kij ñan ad kile men ko jemaroñ jar ñan Jehovah kaki. Jej bareinwõt lo bwe Jehovah ebojak in uake jar ko an ro rej kebak e ilo juõn wãwen ejimwe.

Iumin Bujen Kien Eo

8. Iumin bujen Kien eo, kar ewi wãwen air kwalok kin men ko ñan Jehovah kin armij ro?

⁸ Elikin an kar Jehovah lomoren ailiñ in Israel jen Egypt, ear lelok ñan ir bujen Kien eo. Kien eo ear kwalok kin lajrak eo ñan kebak Anij ikijen dolul in priest ro.  Kar jitõñ jet Ri Levi ro ñan air jerbal einwõt priest kin armij ro. Ke men ko elap air jelet ailiñ eo rar walok, jet ien juõn king ak juõn ri kanan ear jutak kin armij ro im jar ñan Anij kaki. (1 Samuel 8:21, 22; 14:36-41; Jeremiah 42:1-3) Ñan wanjoñok, ilo ien aje temple eo, King Solomon ear kebak Jehovah ilo jar. Jeltokin, Jehovah ear kalikar bwe ear buñburuen kake jar eo an Solomon ilo an kobrak temple eo kin aibujuij eo An im ba: “Lojiliñiõ re naj jujellok ñõn jar eo rej jare ilo jikin in.”​—2 Kronikel 6:12–7:3, 15.

9. Ta eo rar aikwij kõmmane ñan kebak Jehovah ilo jimwe ilo jikin kwojarjar eo?

⁹ Ilo Kien eo kar lelok ñan Israel, Jehovah ear kobaik juõn men in aikwij ñan kebak e ilo jikin kwojarjar eo. Kar ta eo? Ilo aolep jibboñ im jota, ijellokin an katok kake menin mour ko, priest eo elap ear aikwij tile kaijurjur eo eñaj iman Jehovah. Tokelik, priest ro jet bareinwõt rar maroñ kõmman jerbal in, ak jab ilo Ran in Kilajrak eo. Elañe priest ro rar jab kabuñ ilo wãwen in, Jehovah ejamin kar buñburuen kake jerbal ko air.​—Exodus 30:7, 8; 2 Kronikel 13:11.

10, 11. Ta kein kamol eo ewõr ibbed bwe Jehovah ear mõnõnõ in roñjake jar ko an armij ro kajjojo?

¹⁰ Ilo Israel eo etto, wãwen eo ñan kebak Anij kar ikijen ro wõt im kar jitõñ ir ke? Jaab, Jeje ko ilo Bible eo ej kwalok bwe Jehovah ear mõnõnõ in bõk jar ko an armij ro kajjojo. Ilo jar eo an Solomon ñan aje temple eo, ear akwelap ñan Jehovah, im ba: “Jabrewõt jar im akwelap jabrewõt armij ej kõmõne, ak ro drom Israel otemjej, . . . im e naj erlokwe pein ñõn mwin; inem Kwon roñjake jen lõñ ko.” (2 Kronikel 6:29, 30) Gospel eo an Luke ej jiroñ kij bwe ke Zechariah, jemen John Ri Baptais, ear lelok kaijurjur ilo jikin kwojarjar eo, juõn jar elap in ri kabuñ ro rejjab priest ro an Jehovah rar “jar inabij.” Alikar, eñin kar manit eo an armij ñan air kuktok ibben don ilo jar inabõj in jikin kwojarjar eo ke priest eo ear lelok kaijurjur ñan Jehovah ion lokatok eo kõmman jen gold.​—Luk 1:8-10.

¹¹ Inem, ke rar kebak Jehovah ilo wãwen eo ekkar, ear mõnõnõ in bõk jar ko an ro rar jutak kin aolepen ailiñ eo im bareinwõt jen kajjojo armij ro rar make kebak e. Rainin, jejjab bed iumin bujen Kien eo. Bõtab, elõñ men ko raorõk jemaroñ katak kin jar jen wãwen ko Ri Israel ro etto rar kebak Anij.

Iumin Lajrak in Christian

12. Karõk et eo ej jerbal kiõ bwe Ri Christian ro ren maroñ kebak Jehovah?

¹² Kiõ jej bed iumin lajrak eo Christ ear kajutake. Ejelok juõn lukkun temple ijo priest ro rej jutak kin armij ro otemjej an Anij ak ijo jemaroñ jallok ñan e ñe jej jar ñan Anij. Mekarta, ewõr wõt juõn karõk jej aikwij lore ñan ad kebak Jehovah. Ta eo? Ilo 29 C.E., ke kar kabit Christ im jitõñ e  einwõt Priest Elap, juõn temple ilo jitõb ear jino jerbal. * Temple in ilo jitõb kar karõk eo ekãl ñan kebak Jehovah ilo kabuñ ion bedbed in katok eo an Jesus Christ.—Dri Hibru 9:11, 12.

13. Ikijen jar, ta wãwen eo temple eo ilo Jerusalem ej einlok wõt ilo temple eo ilo jitõb?

¹³ Elõñ wãwen ko ilo temple eo ilo Jerusalem rej pijaiklok wãwen ko ilo temple eo ilo jitõb, ekoba ko ikijen jar. (Dri Hibru 9:1-10) Ñan wanjoñok, kaijurjur eo kar lelok ilo jibboñ im jota, ion lokatok in kaijurjur eo ilo jikin Kwojarjar ilo temple eo, ear jutak kin ta? Ekkar ñan book in Reveles̃õn, “kaijurjur, rej jar ko an ro remõn.” (Reveles̃õn 5:8; 8:3, 4) Kar kakõrmol David bwe en je: “Aõ jar en ber einwõt melu imam.” (Sam Ko 141:2) Kin men in, ilo lajrak eo an Ri Christian ro, kaijurjur eo eñaj ejimwe an jutak kin jar ko im nan in nebar ko ñan Jehovah.​—1 Dri Tessalonika 3:10.

14, 15. Ta eo jemaroñ ba kin wãwen kebak Jehovah ikijen (a) Christian ri kabit ro? (b) “bar jet Aõ s̃ip”?

¹⁴ Wõn ro remaroñ kebak Anij ilo temple in ilo jitõb? Ilo temple eo ion lal, priest ro im Ri Levi ro rar bõk jerammõn eo ñan jerbal iloan worwor in imõn kabbed eo, ak priest ro wõt rar maroñ deloñ ilo Jikin Kwojarjar eo. Christian ri kabit ro me kejatdikdik eo air ej ñan mour ilañ rej bõk juõn jerammõn ejej uan ilo jitõb me jikin eo iloan worwor in imõn kabbed eo im Jikin Kwojarjar eo rar annañeloke, eo ej kamaroñ ir ñan air lelok jar im nan in nebar ko ñan Anij.

¹⁵ Ta kin kumi in “bar jet Aõ s̃ip” ro me kejatdikdik eo air ej ñan mour ion lal? (Jon 10:16) Ri kanan Isaiah ear kwalok bwe armij ro jen ailiñ ko otemjej renaj itok in kabuñ ñan Jehovah “ilo ran ko eliktata.” (Aiseia 2:2, 3) Ear bareinwõt je bwe “ro drua maijet” renaj koba ibben Jehovah. Ñan kalikar an buñburuen kake air kebak e, Anij ear ba: “I naj . . . kamõnõnõik ir ilo imõn jar eo Aõ.” (Aiseia 56:6, 7) Reveles̃õn 7:9-15 ej letok tibdikin melele ko jet, ej kwalok kin juõn “jar elap” jen “ailiñ otemjej” me rej koba ibben don ilo air kabuñ im jar ñan Anij “ran im boñ” ke rej jutak iloan worwor eo itulik in temple eo ilo jitõb. Ej kainemõn kij ñan ad jelã bwe aolep ri karejar ro an Anij rainin remaroñ anemkwoj in kebak Anij ilo liki bwe ej roñjake ir!

Ta Jar ko Anij Ej Buñburuen Kaki?

16. Ta eo jemaroñ katak kin jar jen Ri Christian ro jinoin?

¹⁶ Ri Christian ro jinoin rar juõn jar in armij ekkã air kar jar. Ta ko rar jar kaki? Christian elder ro rar kajitõk kin jibañ ñan kãlet maan ro me renaj bõk eddo ko ilo dolul eo. (Jerbal 1:24, 25; 6:5, 6) Epaphras ear jar kin ri tõmak ro mõttan. (Dri Kolosse 4:12) Ro uan congregation eo ilo Jerusalem rar jar kin Peter ke ear bed ilo prison. (Jerbal 12:5) Ri Christian ro jinoin rar kajitõk ibben Anij ñan an kaberan ir ke rar jelmae  jumae, ilo air ba: “O Iroij, kwon lale air nan in kalelñoñ: im letok ñõn ro dri korijerõm, bwe kin elap beran ren kwalok Am in nan.” (Jerbal 4:23-30) Ri kalor eo James ear rejañ Ri Christian ro ñan air jar ñan Anij kin meletlet ñe rej bed iumin melejoñ. (Jemes 1:5) Kwoj kobaik ke men kein ilo jar ko am ñan Jehovah?

17. Jar ko an wõn Jehovah ej mõnõnõ in roñjake?

¹⁷ Anij ejjab roñjake aolep jar ko. Inem, ewi wãwen jemaroñ jar ilo liki bwe Anij enaj mõnõnõ in roñjake jar ko ad? Armij ro retiljek ilo ien ko remotlok me Anij ear mõnõnõ in roñjake jar ko air rar kebak e ilo mol im kin juõn buru ejimwe. Rar kwalok air tõmak ilo air kõmman jerbal ko remõn. Jemaroñ liki bwe Jehovah enaj roñjake ro rej kebak e ilo ejja wãwen eo wõt ilo ran kein.

18. Elañe rekõnan bwe Anij en roñjake jar ko air, ta eo ej juõn men in aikwij ñan Ri Christian ro?

¹⁸ Ewõr bar juõn men in aikwij. Ri jilek Paul ear kamelele kin men in, ilo an ba: “Kin E kij otemjej bõk ar dreloñ ilo juõn Jitõb ñõn iben Jemer.” Paul ear konono kin wõn ke ear je, “kin E”? Kin Jesus Christ. (Dri Epesõs 2:13, 18) Aet, jemaroñ kebak Jemed ilañ ikijen Jesus wõt.​—Jon 14:6; 15:16; 16:23, 24.

19. (a) Ñããt eo kaijurjur eo Ri Israel ro rar leloke ear oktak im nana ñan Jehovah? (b) Ewi wãwen jemaroñ kõmman bwe jar ko ad ren juõn bwin ñaj ñan Jehovah?

¹⁹ Einwõt emwij ba mokta, kaijurjur ko me priest ro an Israel rar liloki rej jutak kin jar ko remõn an ri karejar ro retiljek an Anij. Bõtab, jet ien, kaijurjur ko Ri Israel ro rar liloki kar men in jõjõ ñan Jehovah. Men in ear eindein ke Ri Israel ro rar tile kaijurjur ko ilo temple eo ak ilo ejja ien eo wõt rar badikdik ñan ekjap ko. (Ezekiel 8:10, 11) Eindein rainin, jar ko an ro rej ba bwe rej karejar ñan Jehovah emaroñ juõn bwin enana elañe ilo ejja ien eo wõt rej kõmmani men ko rej nae kien ko an. (Jabõn Kennan Ko 15:8) Inem, jej aikwij wõnmanlok im kõmman bwe aolepen wãwen ad mour en erreo bwe jar ko ad ren juõn bwin ñaj ñan Anij. Jehovah ej mõnõnõ kin jar ko an ro rej lor ial ko an rewãnik. (Jon 9:31) Bõtab, ewõr wõt jet kajitõk ko. En ewi wãwen ad jar? Ta ko jemaroñ jar kaki? Im ewi wãwen an Anij uake jar ko ad? Katak in tok juõn enaj etale kajitõk kein im ko jet bareinwõt.

[Kamelele eo itulal]

Kwomaroñ Ke Kamelele?

• Ewi wãwen armij ro rejjab wãppen remaroñ kebak Anij ilo juõn wãwen ej buñburuen kake?

• Ilo jar ko ad, ewi wãwen jemaroñ kajeoñe jeban in family ko etto?

• Ta eo jemaroñ katak jen jar ko an Ri Christian ro jinoin?

• Ñããt eo jar ko ad rej einwõt juõn bwin ñaj ñan Anij?

[Kajitõk ko ñan katak]

[Pija eo ilo peij 15]

Etke Anij ear bõk men in katok eo an Abel ak jab eo an Cain?

[Pija eo ilo peij 16]

“Ña ein bõñõlñõl im brij in ubaj”

[Pija eo ilo peij 17]

“Emol I naj lewoj juõn mõtõn joñoul”

[Pija eo ilo peij 18]

Jar ko am rej ke einwõt juõn bwin ñaj ñan Jehovah?