“Kajitõk Ko Ami Ren Walok Ñõn Anij”

“Ilo men otemjej kin jar im akwelap kab kamolol, kajitõk ko ami ren walok ñõn Anij.”​—DRI PILIPPAI 4:6.

1. Jej bõk jerammõn eo ñan ad konono ibben wõn, im etke men in ekabwilõñlõñ?

 ELAÑE kwar kajitõk ñan am kwelok ibben iroij eo ilo ailiñ eo am, ta naj uak eo? Kwomaroñ bõk juõn uak ejoij jen office eo an, ak ejeja am naj maroñ konono ibben iroij eo. Bõtab, wãwen eo elukkun oktak ibben Iroij eo elaptata iair, Jehovah Anij, Iroij Bõtata eo an ijoko otemjej ilañ im ilal. Jemaroñ kebak e jen jabdewõt jikin jej bed ie im ilo jabdewõt ien jej kãlete. Ien otemjej ej roñjake jar ko remõn. (Jabõn Kennan Ko 15:29) Men in elap an emõn! Kamolol eo ad kin men in en kar kamakit kij ñan keini ad jar ñan Eo jej naetan Eo ej “roñjake jar.”​—Sam Ko 65:2.

2. Ta eo ej men in aikwij bwe Anij en buñburuen kake jar ko ad?

² Bõtab, juõn armij emaroñ kajitõk, ‘Jar et ko Anij ej buñburuen kaki?’ Bible eo ej kamelele kin juõn men me elap an aorõk elañe jekõnan bwe Anij en eoroñ jar ko ad ke ej ba: “Elañe ejelok tõmak, armij re ban kabuñburuen; bwe eo ej itok ñõn Anij, emõn en tõmak kin an Anij ber, im kin An lelok jinekjij ñõn ro rej kabukot E.” (Dri Hibru 11:6) Aet, einwõt kar kamelele kake ilo katak eo lok juõn, men in aikwij eo elap ñan kebak Anij ej tõmak. Anij ej mõnõnõ in roñjake jar ko an ro rej kebak e, ak rej aikwij kõmmane ilo tõmak im kin jerbal ko ej buñburuen kaki im bareinwõt kin mol im juõn buru emõn.

3. (a) Einwõt an jar ko an ri karejar ro ilo ien ko etto kalikar, jar ko ad remaroñ kitibuj ta? (b)  Ta wãwen jar ko reoktak jen don?

³ Ri jilek Paul ear rejañ Ri Christian ro ilo ran ko an: “Komin jab inebata kin jabrewõt; a ilo men otemjej kin jar im akwelap kab kamolol, kajitõk ko ami ren walok ñõn Anij.” (Dri Pilippai 4:6, 7) Elõñ joñok ko ilo Bible kin ro rar kwalok inebata ko air ñan Anij. Ibwiljin rein kar Hannah, Elijah, Hezekiah, im Daniel. (1 Samuel 2:1-10; 1 Kiñ Ro 18:36, 37; 2 Kiñ Ro 19:15-19; Daniel 9:3-21) Jej aikwij lor joñok eo air. Lale, bareinwõt, bwe nan ko an Paul rej kwalok bwe jar ko ad remaroñ walok ilo elõñ wãwen ko. Ear konono kin kamolol, melelen, jar ko me jej kwalok ad kamolol kin ta eo Anij ej kõmmane ñan kij. Men in emaroñ koba nan in nebar ko. Akwelap ej melelen eowor ilo ettã buru im mol. Im jemaroñ kwalok kajitõk ko, ak kajitõk ilo alikar im jejjet kin juõn men. (Luk 11:2, 3) Jemed ilañ ej mõnõnõ ñe jej kebak e ilo jabdewõt ian wãwen kein.

4. Meñe Jehovah ejelã aikwij ko ad, etke jej aikwij kwalok wõt kajitõk ko ad ñan e?

⁴ Jet remaroñ kajitõk, ‘Jehovah ejelã ke kadede kin aolep aikwij ko ad?’ Aet, e jelã. (Matu 6:8, 32) Inem, etke ekõnan wõt bwe jen kebak e kin kajitõk ko ad? Lemnak kin wanjoñok in: Owner eo an juõn mõn wia ej tilmake juõn men in lelok ñan jet ian ri wia ro an. Bõtab, ñan bõk men in letok eo, ri wia ro rej aikwij kebak owner eo im kajitõk bwe ren bõke. Ro remakoko in kõmmane men in rej kwalok bwe rejjab lukkun kamolol kin men in letok eo. Eindein, ñe jejjab kwalok kajitõk ko ad ilo jar men in enaj kalikar ad jab kamolol kin men eo Jehovah ej letoke.  Jesus ear ba: “Komin kajitõk im kom naj bõk.” (Jon 16:24) Ilo wãwen in, jej kwalok ad atartar ion Anij.

Ewi Wãwen Ad Aikwij Kebak Anij?

5. Etke jej aikwij jar ilo etan Jesus?

⁵ Jehovah ejjab kõmman elõñ kien ko rebin kin kilen jar. Mekarta, jej aikwij katak kin wãwen eo ekkar ñan ad kebak Anij, me Bible eo ej kamelele kake. Ñan wanjoñok, Jesus ear katakin ri kalor ro an: “Elañe kom naj kajitõk iben Jema, E naj lewoj ñõn kom ilo eta.” (Jon 16:23) Kin men in, jej aikwij jar ilo etan Jesus, ilo ad kile bwe Jesus ej ial eo wõt me Anij ej letok jerammõn ko ñan kij armij.

6. Ñe jej jar, en ewi wãwen enbwinid?

⁶ En ewi wãwen enbwinid ñe jej jar? Ilo Bible eo, ejjab kalikar kin juõn wãwen jej aikwij jutak ak jijet bwe Anij en roñjake jar ko ad. (1 Kiñ Ro 8:22; Nihimaia 8:6; Mark 11:25; Luk 22:41) Men eo eaorõk ej bwe jen jar ñan Anij ilo mol im kin juõn buru emõn.​—Joel 2:12, 13.

7. (a) Ta melelen nan in “amen”? (b) Ewi wãwen ad kajerbale ilo jimwe ilo jar ko?

⁷ Ta kin ad ba “amen”? Jeje ko rej kalikar bwe men in ej juõn wãwen ejejjet ñan kajemlok jar ko ad, elaptata ñe jej jar ibwiljin armij ro. (Sam Ko 72:19; 89:52) Nan in Hebrew eo ʼa·menʹ ej melelen “en eindein.” McClintock and Strong’s Cyclopedia ej kamelele bwe aorõkin ad ba “Amen” ilo jemlokin jar ko ej “ñan kamol nan ko rar walok, im ñan kajitõk bwe en jejjet kitieir.” Kin men in, ñe ej ba “Amen,” ilo jemlokin jar eo, armij eo ej jar ej kalikar eñjake eo an emol kin ta eo ej kab mwij an ba. Ñe Ri Christian eo ej jar ilo etan congregation eo ej ba nan in ilo jemlokin, ro rej roñjake remaroñ bareinwõt ba “Amen” ilo burueir ak ilo juõn ainikien emõn roñjake ñan kalikar bwe rej errã kin ta eo kar ba.​—1 Dri Korint 14:16.

8. Ewi wãwen jet ian jar ko ad remaroñ einlok wõt ko an Jacob ak Abraham, im ta eo men in enaj kwalok kin kij?

⁸ Ewõr jet ien ko ñe Anij emaroñ kõtlok bwe jen kwalok tumũlal in itoklimo eo ad kin men ko jej jar kaki. Jej aikwij einwõt Jacob ilo ien ko etto, eo ear oktak ibben juõn enjel aolepen boñin eo bwe en maroñ bõk juõn jerammõn. (Jenesis 32:24-26) Ak ilo jet wãwen ko jej aikwij einwõt Abraham, eo ear eowore Jehovah elõñ alen kin Lot im elõñ armij ro jet rewãnik me rar bed ilo Sodom. (Jenesis 18:22-33) Eindein ad maroñ akwelap ibben Jehovah kin men ko raorõk ñan kij, im akwelap ibben ion bedbed in ekajet jimwe, yokwe, im tiriamokake eo an.

Ta eo Jemaroñ Jar Kake?

9. Ta men ko raorõk rej aikwij moktata ilo jar ko ad?

⁹ Kememej bwe Paul ear ba: “Kin jabrewõt . . . kajitõk ko ami ren walok ñõn Anij.” (Dri Pilippai 4:6) Kin men in, jar ko ad make remaroñ kitibuj jabdewõt men ilo wãwen mour eo ad. Bõtab, men ko Jehovah ej itoklimo kaki ren men ko moktata ilo jar ko ad. Daniel ear likit juõn joñok emõn kin men in. Ke Israel ear bõk kaje kin jerawiwi ko air, Daniel ear akwelap ñan Jehovah bwe en tiriamokake ir, im ba: “Kwon jab kõttar, innem aoleb renaj jelã bwe kwe Anij.” (Daniel 9:15-19) Jar ko ad rej bareinwõt ke kwalok bwe kokwojarjar etan Jehovah im jejjet in kitien ankil an rej men ko raorõk ibbed?

10. Ewi wãwen ad jelã bwe jemaroñ jar kin men ko ad make?

¹⁰ Mekarta, jemaroñ kajitõk kin men ko ad make bareinwõt. Ñan wanjoñok, einwõt ri jeje sam, jemaroñ jar ñan bõk melele ko remũlal kin men ko lor jitõb. Ear jar: “Kwon letok ñõn iõ jelalokjen, inem I naj bokake kiõm, aet I naj lale kin aolepen buruõ.” (Sam Ko 119:33, 34; Dri Kolosse 1:9, 10) Jesus ear “katok kin jar ko im akwelap ko, im elap An  lamij im jõñ ñõn Eo e ar maroñ in lomor E jen mij.” (Dri Hibru 5:7) Ilo an kõmmane, ear kwalok bwe ekkar ad kajitõk kin kajur ñe jej jelmae men in kauwatata ak melejoñ ko. Ke ear katakin ri kalor ro kilen jar, Jesus ear kobaik men ko air make, einwõt jeorlok bwid ko im bõk kijeir kajjojo ran.

11. Ewi wãwen jar emaroñ jibañ kij bwe jen jab bo ilo men in kabo ko?

¹¹ Ilo wanjoñok in kin jar, Jesus ear kobaik kajitõk eo: “Im jab kadreloñ kim ilo kabo, a lomoren kim jen eo enana.” (Matu 6:9-13) Tokelik ear kakabilek: “Komin ekil im jar, bwe komin jab dreloñ ilo kabo.” (Matu 26:41) Jar elap an aorõk ñe jej jelmae men in kabo ko. Jemaroñ iion kabo eo ñan kajekdon nan in kakabilek ko ilo Bible ilo jikin jerbal eo ak ilo school. Ro rejjab Ri Kennan ro remaroñ kir kij ñan koba ibbeir ilo makitkit ko rejõkkar ñan Christian. Remaroñ kajitõk ibbed ñan kõmman juõn men me ej jumae kien ko kin mwil emõn. Ilo ien rot kein, emõn bwe jen lor nan in kakabilek eo an Jesus ñan jar—ilo ien lok iman im ñe jej jelmae men in kabo eo jimor—im kajitõk ibben Anij ñan jibañ kij bwe jen jab bo.

12. Ta men in inebata ko remaroñ kamakit kij bwe jen jar, im ta eo jemaroñ kõtmene bwe Jehovah enaj kõmmane?

¹² Elõñ ijjibed im inebata ko reoktak jen don remaroñ walok ilo mour ko an ri karejar ro an Anij rainin. Nañinmij im abañ ko kin eñjake rej unjen inebata ko relap ñan elõñ. Wãwen kowadoñ ko relej ibelakid rej kõmman inebata ilo mour ko ad. Abañ ko kin money rej kõmman bwe en bin ad kabwe aikwij ko ad. Elap an kainemõn kij ñan  jelã bwe Jehovah ej roñjake ri karejar ro an me rej bõkmantak inebata kein ñan e! Psalm 102:17 ej ba kin Jehovah: “Enaj roñjake ro dron ear jolok ir, im eoroñ jar ko air.”

13. (a) Ta men ko am make kwomaroñ jar kaki? (b) Kwalok juõn wanjoñok kin juõn jar rot in.

¹³ Ilo mol, jabdewõt men me ej jelet jerbal eo ad ñan Jehovah ak kõtan eo ad ibben emaroñ juõn men ekkar ñan ad jar kake. (1 Jon 5:14) Elañe ewõr bebe ko kwoj aikwij kõmmani kin mare, kabuk jikin jerbal, ak kalaplok am jerbal in kwalok nan, kwon mõkaj in bõkmantak men kein ñan Anij, ilo am kajitõk kin tel eo an. Ñan wanjoñok, juõn jiroñ ilo ailiñ in Philippines ear kõnan bõk jerbal in kwalok nan full-time. Bõtab, kar ejelok an jerbal ñan kabwe aikwij ko an. Jiroñ eo ear ba: “Juõn Saturday, iar jar ñan Jehovah kin jerbal in pioneer. Tokelik ilo ejja ran eo wõt, ke iar kwalok nan, iar lelok juõn book ñan juõn jodikdik. Ilo jab kõtmene kake, jodikdik eo ear ba: ‘Kwon etal ñan school eo aõ jibboñtata in Monday.’ Iar kajitõk, ‘Etke?’ Ear kamelele bwe ear bellok juõn jerbal im rej aikwij juõn ri jerbal ilo mõkaj. Iar etal, im emõkaj air letok jerbal eo. Aolep men kein rar walok ilo jidimkij.” Elõñ Ri Kennan ro ibelakin lal rar iion ejja men eo wõt. Inem kwon jab aibedbed in jar ñan Anij im kwalok ta eo ej bed ilo buruõm!

Ta Elañe Jaar Jerawiwi?

14, 15. (a) Etke juõn armij en jab ãliklik in jar meñe ear jerawiwi? (b) Ijellokin an make jar, bar ta eo enaj jibañ juõn armij bwe en kejmouri jen jerawiwi?

¹⁴ Ewi wãwen jar emaroñ jibañ juõn armij elañe ear jerawiwi? Kin air jook, ro me rar jerawiwi remaroñ ãliklik in jar. Bõtab, men in ejjab juõn ial emeletlet ñan lore. Ñan wanjoñok: Pilot ro an balun ko rejelã bwe elañe rejebwãbwe, remaroñ kir ak konono ibben ro rej lale makitkit ko an balun ko ilo airport ko ñan air bõk jibañ jen ir. Ak, ta elañe pilot eo an balun eo ej ãliklik in kir ir kinke ejook bwe ejebwãbwe? Men in emaroñ tellok ñan juõn jorrãn elap! Eindein, armij eo ear jerawiwi im ej jook in jar ñan Anij emaroñ iion jorrãn ko relaplok. An jook en kar jab kabõjrak e jen an konono ibben Jehovah. Ilo mol, Anij ej rejañ ro rar kõmman bwid ko relap ñan air kebak e ilo jar. Ri kanan Isaiah ear rejañ ri jerawiwi ro ilo ran ko an ñan air kir ñan Jehovah, “bwe e naj kanuij wujlep in jolok bwir ko an.” (Aiseia 55:6, 7) Ilo mol, armij eo emaroñ aikwij ‘kamõnõnõik Jehovah’ mokta ilo an kõttãik buruen, etal jen ial eo an enana, im ukwelok ilo mol.—Sam Ko 119:58; Daniel 9:13.

¹⁵ Ñe juõn ej jerawiwi, ewõr bar juõn un eaorõk unin an jar. Ri kalor eo James ej ba ikijen juõn eo ej aikwij jibañ ko ilo jitõb: “Jabrewõt iami e nañinmij ke? en añiñintok elder ro an eklisia, im ren jar ion . . . im Iroij e naj kejerkak e.” (Jemes 5:14, 15) Aet, juõn armij ej aikwij make kwalok bwid eo an ñan Jehovah ilo jar, ak emaroñ bareinwõt kajitõk ibben elder ro bwe ren jar kin e. Men in enaj jibañ e ñan kejmour e ilo jitõb.

Uak ko ñan Jar Ko

16, 17. (a) Ewi wãwen an Jehovah uake jar ko? (b) Bwebwenato et ko rej kwalok bwe jar ej ekkeijaklok ibben jerbal in kwalok nan?

¹⁶ Ewi wãwen an uak jar ko? Jet jar remaroñ bõk uak ilo mõkaj im alikar. (2 Kiñ Ro 20:1-6) Ko jet remaroñ bõk ien, im uak ko remaroñ binlok ñan ad kile. Einwõt ej kwalok  ilo wanjoñok eo an Jesus kin kõrã eo ejako belen me elõñ alen an kar kebak ri ekajet eo, eindein jet ien jej aikwij kebak Anij elõñ alen ilo jar. (Luk 18:1-8) Bõtab, jemaroñ liki bwe elañe jej jar ekkar ñan ankil an Anij, Jehovah ejamin jiroñ kij: “Kwon jab kabnõnõik iõ!”​—Luke 11:5-9.

¹⁷ Armij ro an Jehovah rar lo an uake jar ko air elõñ alen. Ekkã an alikar men in ilo jerbal in kwalok nan eo ad. Ñan wanjoñok, ruo kõrã Ri Kennan ilo Philippines rar leto-letak book ko ilo juõn bukwon etolok. Ke rar lelok juõn tract ñan juõn kõrã, ear toor den in kemjalal jen mejen. Lio ear ba: “Boñ iar jar ñan Anij ñan an jilkintok juõn armij bwe en katak Bible ibba, im ij lemnak eñin uak eo ñan jar eo aõ.” Ejjabto tokelik, kõrã eo ear jino bed ilo kwelok ko ilo Kingdom Hall eo. Ilo bar juõn jikin ilo Asia, juõn Christian brother ear ikũmkũm in kwalok nan ilo apartment ko ebin deloñ ie kinke ewõr juõn ri waj ak kwoj aikwij juõn key ñan deloñ iloan. Bõtab, ear jar ñan Jehovah, bwe en kaberan wõt e, im ear deloñ ilo building eo. Ear kallallal ion kejam in apartment eo, im juõn kõrã ear diojtok. Ke brother eo ear kameleleik e kin unin an kar lolok e, lio ear jino jañ. Ear ba bwe ear bukõt Ri Kennan ro an Jehovah im ear jar kin jibañ ñan lo ir. Brother eo ear mõnõnõ in jibañ e ñan kebak congregation eo an Ri Kennan ro an Jehovah ilo bukwon eo an.

18. (a) Ñe ej uak jar ko ad, en ewi wãwen ad emmakit? (b) Ta eo jemaroñ liki kake elañe jej jar ilo jabdewõt ien emõntok?

¹⁸ Emol bwe jar ej juõn men in letok emõn. Jehovah ebojak in roñjake im uake jar ko ad. (Aiseia 30:18, 19) Ak, jej aikwij lale ewi wãwen Jehovah ej uake jar ko ad, kinke emaroñ jab aolep ien enaj uak ilo wãwen eo jaar kõtmene kake. Ak, ñe jej kile an tel kij, jen jab meloklok in kwalok ad kamolol im nebar e. (1 Dri Tessalonika 5:18) Bareinwõt, ien otemjej kwon kememej nan in rejañ eo an ri jilek Paul: “Ilo men otemjej kin jar im akwelap kab kamolol, kajitõk ko ami ren walok ñõn Anij.” Aet, kwon kortokjen jabdewõt ien ko remõn ñan am konono ibben Anij. Ilo wãwen in, kwonaj lo mol in ta eo Paul ear ba ikijen ro kar uake jar ko air: “Im ainemõn jen Anij, eo ej elã jen jela otemjej, e naj kejbãrok buruemi im lemnok ko ami.”​—Dri Pilippai 4:6, 7.

Kwomaroñ Ke Uak?

• Ta wãwen jar ko?

• En ewi wãwen ad jar?

• Ta men ko jemaroñ kobaik ilo jar ko ad?

• Ewi tokjen jar ñe juõn ej jerawiwi?

[Kajitõk ko ñan katak]

[Pija ko ilo peij 21]

Jar ko jen buruõd rej jibañ kij bõprae ad bo ilo men in kabo ko

[Pija ko ilo peij 23]

Ikijen jar, jej kwalok ñan Anij kin kamolol eo ad, inebata ko, im kajitõk ko