“Kin wõt juõn Ladik Ruatimjuõn An Yiõ”

JABDEWÕT ien ke Ri Kennan ro an Jehovah rar itok ñan kejam eo an juõn kõrã etan Wiesława, eo ej jokwe ilo ailiñ in Poland, ilo joij ej kamolol ir inem ba bwe ejelok an ien ñan konono ibbeir. Juõn ran, Samuel eo ej ruatimjuõn an yiõ ear itok ibben jinen ñan kejam eo an lio. Ilo ien in Wiesława ear bebe in roñjake ennan eo im bõk juõn magazine kin juõn paradise ion lal.

Kinke Kwojkwoj in Kememej kin mij eo an Jesus Christ ear ebak, Samuel ear kõnan kirtok Wiesława ñan ran in ejej uan im aorõk. Inem, ladik eo ear etal ibben jinen lok, ñan bar lolok kõrã eo, ak kiõ ewõr juõn peba in kir ibben. Ke ear lo an emõn baotokin ladik eo, Wiesława ear kajitõk ilo joij bwe ren kõttar jidik inem ear bar deloñ ilo mweo imõn im jeniji nuknuk eo an ñan bar juõn nuknuk ekkar. Ke ear roltok, ear roñjake Samuel, bõk peba in kir eo, im kajitõk: “Ij aikwij iwõj make iaõ ke ak ibben leo beleiõ?” Im ear bareinwõt ba: “Meñe leo beleiõ ejjab itok ibba, inaj iwõj. Inaj iwõj kin kwe, Samuel.” Samuel ear mõnõnõ, ke lio ear kejbãrok kallimur eo an.

Ilo ien Kwojkwoj in Kememej eo, Samuel ear jijet turin Wiesława im ear kwalok eon ko rej konono kaki. Menin ear kabwilõñ lio. Ear mõnõnõ kin Kwojkwoj in Kememej eo kinke melele ko remũlal rar kameleleiki ilo wãwen ko rebidodo. Ear bareinwõt emmakit kin karuwaineneik eo emãnãn im joij ro ilo congregation eo rar kwalok. Jen ien eo, ear laplok an Wiesława kwalok an itoklimo kin men ko lor jitõb im kiõ ej ekkeini an kobalok ibben Ri Kennan ro an Jehovah. Ejjabto ear ba: “Ijook bwe mokta iar jab roñjake yuk ke kwar itok ñan kejam eo aõ. Im emol bwe iar roñjake ennan eo am kin wõt juõn ladik ruatimjuõn an yiõ, kin Samuel.”

Einwõt Samuel ilo Poland, elõñ ajiri Ri Kennan ro an Jehovah rej kaibujuij Anij kin loir im ilo mwil ko mwiliir remõn im erreo. Elañe kwoj juõn ajiri, kwomaroñ bareinwõt jibañ armij ro remõn ñan kwalok air itoklimo kin men ko raorõk ilo jitõb.