“Eñin Ial eo, Komin Etetal Iloan”

Bwebwenato eo kin Emilia Pederson

Ekkar ñõn Ruth E. Pappas

KÕRA eo jinõ, Emilia Pederson, ear lotak ilo yiõ eo 1878. Meñe ear erom juõn dri kaki ilo jikuul, ear lukkun kõnan kajerbal mour eo an ñõn jibõñ armij ro ñõn air druaklok ñõn Anij. Juõn dipdip kileplep me ear ber imweo imwem ilo bukwon eo edrik etan Jasper, Minnesota ilo Amerika, kar kein kamol eo kin kõnan eo an Mama. Ear bõke ñõn an jilkinlok men ko mweien ñõn China, ijo ear kõnan jerbal einwõt juõn mejinede. Bõtab, ke ear mij jinen, ear aikwij jolok mejenkajik eo an im berwõt ñõn lale ro jãtin. Ilo yiõ eo 1907 ear mareiki Theodore Holien. Iar lotak ilo Tijemba 2, 1925, eo driktata ian ajiri ro jiljilimjuõn.

Mama ear lukkun kõnan lo uak in kajitõk ko an kin Baibel eo. Juõn iair ej kin katak eo bwe Hell ej juõn jikin eurur kin kijeek ñõn kaiñtan ro renana. Ear kajitõk iben juõn dri lotok, eo ej lolorjake Kabuñ in Lutheran, ñõn kwalok tu ia emaroñ lo kein kamol eo ilo Baibel kin katak in. Ilo mol, leo ear ba bwe jekron ta eo Baibel ej ba, jej aikwij katakin armij kin Hell einwõt juõn jikin bwil.

Kar Kajuburu Kõnan eo An ñõn Jela Mol Eo

Ejjabto elikin yiõ eo 1900, lio jãtin Mama, etan Emma, ear etal ñõn Northfield, Minnesota, ñõn jikuul in kajõñjõñ. Ear jokwe iben dri kaki eo an, etan Milius Christianson, me lio iben ear juõn ian dri Kennan ro an Jeova. Emma ear ba bwe eor juõn jein me ej lukkun niknik in riit Baibel. Ejjabto tokelik, lio belen Milius Christianson ear je juõn letter ñõn Mama im kobaik ilo letter eo an uak in kajitõk ko an kin Baibel eo.

Juõn ran, juõn ian dri Kennan ro an Jeova etan Lora Oathout ear itok jen Sioux Falls ilo South Dakota, ñõn kwalok nan ilo Jasper. Mama ear katak buk ko me kar lelok ñõn e, im ilo yiõ eo 1915, ear jino kwalok iben ro jet kin men ko ear katak kaki ilo Baibel, im leto-letak buk ko me Lora ear lelok ñõn e.

Ilo 1916, Mama ear kõnan ber ilo kwelok eo elap ilo Sioux City, Iowa ke ear roñ bwe Charles Taze Russell enaj ber ie. Ilo ien in, ear or lailim nejin Mama, im Marvin, eo edriktata, kar lailim wõt an aliñ. Meñe eindrein, Mama ear bõk aolep ajiri ro nejin, im ear kõmõne juõn tõreb enañin 100 mail aitokin ñõn Sioux City ñõn ber ilo kwelok eo. Ear roñjake katak ko an Brother Russell, aluije “Pija ko kin Menin Kõmõnmõn Ko (Photo-Drama of Creation),” im ear baptais. Ke ear jeblak ñõn mweo imõn, ear je juõn bwebwenato kin kwelok eo elap, im likiti ilo nuuj peba eo etan Jasper Journal.

Ilo 1922, Mama ear juõn ian 18,000 armij ro rar ber ilo kwelok eo elap ilo Cedar Point, Ohio. Elikin kar kwelok eo, ear jab bwijrõk jen an kwalok kin Ailiñ eo an Anij. Joñok in an ear  rejañ kim ñõn bokake nan in kakabilek in: “Eñin ial eo, komin etetal iloan.”​—Ais. 30:21.

Leen Kwalok Nan kin Ailiñ Eo

Ilo yiõ ko tujinoin ilo 1920 ko, jema im jinõ rar emmakit jen Jasper ñõn bar juõn jikin. Ear or juõn an Baba business me ear lap an lo tõbrõk im ear maroñ kabwe aikwij ko an baamle eo an elap. Ear jab lap an katak Baibel einwõt Mama ak ear rejetak jerbal in kwalok nan kin aolepen buruen im ear lap an karuwaineneik overseer ro rej itoitak. Elõñ alen, ke juõn ian brother ro rej itoitak ear kwalok juõn katak ilo mweo imwem, enañin jibuki armij ro rar ber im ear obrõk rum in bwebwenato eo, jikin mõña eo, im rum in kiki ko.

Ke ear jiljilimjuõn aõ yiõ, lio jãtin Mama, etan Lettie, ear telephone tok im ba bwe ro dri turin, Ed Larson im lio belen, rar kõnan katak Baibel. Ear mõkõj air tõmak men ko rar katak kaki im rar kirtok bar juõn dri turiir, etan Martha Van Daalen, eo ear or rualitõk nejin ajiri, ñõn kobalok ibeir ilo ien rej katak Baibel. Martha im bareinwõt aolepen baamle eo an rar erom dri Kennan ro an Jeova.

Ilo ejja ien eo wõt, Gordon Kammerud, juõn likao me ear jokwe jejjo mail ko jen mweo imwem, ear jino jerbal ilo business eo an Baba. Armij ro rar kakkõl Gordon im ba: “Kwon kejbãrok yuk jen limaro nejin boss eo am bwe elap an oktõk kabuñ en air.” Bõtab, Gordon ear jino katak Baibel im ejjabto tokelik ear kile bwe ear lo mol eo. Jilu aliñ ko tokelik, ear baptais. Jemen im jinen rar bareinwõt erom dri tõmak, im baamle eo aõ rar ebake baamle eo an Holien, Kammerud, im Van Daalen.

Bõk Kakajur jen Kwelok ko Relap

Joñõn an kar Mama bõk kõkãtõk jen kwelok eo elap ilo Cedar Point, ear bebe bwe en jab joko jen juõn. Im ij kememej bwe ke iar drik kim kin etal ñõn jikin ko retolok ñõn ber ilo kwelok kein relap. Juõn kwelok elap ilo Columbus, Ohio, ilo 1931, kar ien eo ejejuan kinke jar bõk ãt in dri Kennan ro an Jeova. (Ais. 43:10-12) Ij bareinwõt kememej kwelok eo elap ilo Washington, D.C. ilo 1935 ke kar kemelele kin ‘jar eo elap’ me buk in Reveles̃õn ej konono kake. (Rev. 7:9) Limaro jeiõ, Lilian im Eunice, rar ian 800 armij ro me rar baptais ilo ien eo.

Baamle eo am rar etal ñõn kwelok ko relap ilo Columbus, Ohio, ilo yiõ eo 1937; Seattle Washington, ilo yiõ eo 1938; im New York City ilo yiõ eo 1939. Baamle eo an Van Daalen im Kammerud im bar ro jet rar itok ibem tok, im kimar camp ilo ial eo am lok. Eunice ear mareik Leo Van Daalen ilo yiõ eo 1940, im rar erom pioneer. Ilo ejja yiõ in wõt, Lilian ear mareik Gordon Kammerud, im ir bareinwõt rar erom pioneer.

Kwelok eo elap me ear walok ilo St. Louis, Missouri, ilo yiõ eo 1941, kar juõn ien ejejuan.  Ilo ijo, elõñ tausan jodrikdrik im ajiri ro rar bõk buk eo etan Ajiri Ro. Kwelok in ear jibõñ iõ ñõn kõmõn oktõk ko kinke ejjabto tokelik, ilo Jeptõmba 1, 1941, iar erom pioneer iben leo jeiõ etan Marvin im lio iben, Joyce. Ilo ien in ear 15 aõ yiõ.

Kimij jokwe ilo juõn jikin rej kõmõn jikin kallip ko, kin men in, ebin an lõmaro ber ilo kwelok kein relap kinke ekkã air walok ilo ien marmir. Inem elikin kwelok ko, ekkã am eliji katak ko ilo melaj in mweo imwem ñõn tokjen eo an ro rar jab maroñ kwelok. Ien kein ear lap air kamõnõnõ.

Jikuul ilo Gilead im Jerbal ilo Ailiñ ko Jet

Ilo Pãpode 1943, kar kajutak Jikuul in Gilead ñõn katakin pioneer ro kin jerbal in mejinede. Kilaj eo mokta ear koba jiljino uan baamle eo an Van Daalen. Lõmarein kar Emil, Arthur, Homer, im Leo; eo rilikiir etan Donald; im Eunice, lio jeiõ me ej belen Leo. Kimar yokyokwe ir kin lõñliñ im buromõj, bwe kimar jaje ñãt eo kim naj bar lo ir. Elikin kadrioijlok eo, kar jilkinlok aolepeir ñõn Puerto Rico, ijo me ear or jejjo wõt dri Kennan ro ilo ien eo.

Juõn yiõ tokelik, Lilian im Gordon im bareinwõt Marvin im Joyce rar ber ilo kilaj eo kein kajilu ilo Gilead. Kar bareinwõt jilkinlok ir ñõn Puerto Rico. Inem, ilo Jeptõmba 1944, iar ber ilo jikuul eo kein kemen ilo Gilead, ke ear 18 aõ yiõ. Elikin aõ kadrioijlok ilo Pãpode 1945, iar jerbal iben ro jeiõ ilo Puerto Rico. Men ko iar iioni rar lukkun kãl ñõn ña! Meñe katak kajin Spain ear lukkun bin, ejjabto jet iam ear or elõñlok jen 20 air dri katak. Alikar bwe Jeova ear kejerammõn jerbal eo am kinke ranin eor tarrin 25,000 dri Kennan ro an Jeova ilo Puerto Rico!

Jorran ko Rej Jelet Baamle eo Am

Leo im Eunice rar berwõt ilo Puerto Rico elikin an lotak ladrik eo nejiir, etan Mark, ilo yiõ eo 1950. Ilo 1952 rar karõk ñõn kakije ilo kabijukneir im lolok ro nukiir. Rar kelok ilo Eprõl 11, ak ekaburomõjmõj bwe ejjabto elikin an kelok balun eo ear wutlok ñõn lojit. Leo im Eunice rar mij. Ak Mark, eo ear ruo an yiõ ilo ien eo, ear ebbebe ilo lojit im juõn eman, me ear bar ellã jen jorran eo, ear likit Mark ilo juõn waan ebbebe im CPR e im ear mour.

Lailim yiõ ko tokelik, ilo Maaj 7, 1957, ke Mama im Baba rar ettõrlok ñõn mõn kwelok eo, ear jorran neen wa eo. Ke Baba ear jeniji neen wa eo iturin ial eo, juõn wa ear dibõje im ear mij. Enañin 600 armij ro rar ber ilo ien katak in mij eo an, im juõn katak emõn kar kwaloke ñõn bukwon eo, ijo elõñ rar koutiej Baba ie.

Jikin Jerbal ko Rekãl

Moktalok jidrik jen an kar Baba mij, kar karõk bwe in jerbal ilo Argentina. Ilo Okõj 1957, iar tõkãklok jikin kwelok in Mendoza ion tol jidrik ko tulõlin Tol Andes. Ilo 1958, kar jitõñ George Pappas, me ear kadrioijlok jen kilaj eo kein ka 30 ilo Gilead, bwe en jerbal ilo Argentina. Kimro George ar jino ebake dron, im ilo Eprõl 1960 kimro ar mare. Ilo 1961, Mama ear mij ke ear 83 an yiõ. Ear tiljek wõt ilo an korijer ñõn Jeova im ear jibõñ elõñ armij ro ñõn kõmõn eindrein.

 Iomin joñoul yiõ kimro George ear jerbal iben mejinede ro jet ilo elõñ mõn mejinede ko. Inem, iomin jiljilimjuõn yiõ kimar ber ilo jerbal in lolok congregation ko. Ilo 1975 kimar jeblak ñõn Amerika ñõn jibõñ ro uan baamle eo me rar nañinmij. Ilo 1980 kar jitõñ leo iba ñõn lolok congregation ko me rar konono kajin Spain. Ilo ien eo kar or enañin 600 congregation ko rej konono kajin Spain ilo Amerika. Iomin 26 yiõ, kimar lolok elõñ iair im kimar mõnõnõ in lo bwe orair ear laplok jen 3,000.

Rar Etetal Ilo “Ial Eo”

Mama ear bareinwõt lõñliñ ke ear lo bwe jodrikdrik ro uan baamle eo an rej bõk kunair ilo jerbal in kwalok nan full-time. Ñõn wanjoñok, Carol, nejin lio jein Mama, etan Ester, ear jino pioneer ilo yiõ eo 1953. Ear mareik Dennis Trumbore, im jen ien eo irro jimor rar bõk kunair ilo jerbal in kwalok nan full-time. Lio juõn nejin Ester, etan Lois, ear mareik Wendell Jensen. Rar jimor ber ilo kilaj eo kein ka 41 ilo Gilead im rar jerbal ilo Nigeria einwõt mejinede ro iomin 15 yiõ ko. Mark, eo me ear mij jemen im jinen ke ear wutlok balun eo, ear ridtolok iben lio jein ak jãtin jemen, etan Ruth La Londe im leo iben, Curtiss. Mark im lio iben, etan Lavonne, rar pioneer iomin elõñ yiõ ko im kakajiririk ajiri ro emen nejiir im katakin ir kin “ial eo.”​—Ais. 30:21.

Orlen, leo jeiõ e wõt emour, ej 90 jima an yiõ. Ej tiljek wõt ilo an korijer ñõn Jeova. Kimro George ej lõñliñ wõt ilo amro wõnmanlok wõt ilo jerbal in kwalok nan full-time.

Men eo Mama Ear Likiti

Tebel eo Mama ear kaurõke eber iba kiõ. Kar menin lelok eo an Baba ñõn e ke irro rar mare. Ilo juõn ian kõkekaak ko eber buk in pija eo an me eor letter ko im bwebwenato ko ear jeje ilo nuuj peba me ear juõn wãwen ear maroñ kwalok nan. Jet iair kar jeje ilo yiõ ko tujinoin 1900 ko. Ilo tebel eo eor letter ko jen ro nejin Mama ke rar jerbal einwõt mejinede. Ij mõnõnõ in riit im bar riiti letter kein! Im ien otemjej letter ko an ñõn kim kar menin kõkãtõk im rar obrõk kin lemnok ko remõn. Ear jab tõbrõk kõnan eo an Mama bwe en juõn mejinede. Bõtab, kijejeto eo an kin jerbal in mejinede ear kamakit buruen ro jet iomin elõñ ebeben ko elikin e. Ij lukkun reimanlok ñõn ien eo ñe aolepen baamle eo maroñ koba iben Mama im Baba ilo paredais eo!​—Rev. 21:​3, 4.

[Pija eo ilo peij 17]

Emilia Pederson

[Pija eo ilo peij 18]

1916: Mama, Baba (ej jibwe Marvin); tulõl, jen anmiñ ñõn anmoon, Orlen, Ester, Lilian, Mildred

[Pija eo ilo peij 19]

Leo im Eunice, moktalok jen air kar mij

[Pija eo ilo peij 20]

1950: Jen anmiñ ñõn anmoon, tulõñ: Ester, Mildred, Lilian, Eunice, Ruth; tulõl: Orlen, Mama, Baba, im Marvin

[Pija eo ilo peij 20]

George im Ruth Pappas ilo jerbal in lolok congregation ko, 2001