Kar ‘Wãkare Dri Korijer eo an Jeova kin Jerawiwi Ko Ar’

“A emwij wãkare E kin jerawiwi ko ar, im kakinijnij E kin bwir ko ar; . . . im kaejmour kij kin dribitbit ko An.”​—AIS. 53:5.

1. Ta eo jen lemnok kake ñe jej kememe Kwojkwoj in Kememej eo, im kanan ta eo enaj jibõñ kij ñõn kõmõne men in?

 JEJ kememe Kwojkwoj eo ñõn kememej mij eo an Kraist im bareinwõt aolep men ko me mij im jerkakbiji eo an rar kõtõbraki. Kwojkwoj eo ej kakememej kij kin an Jeova kwalok bwe E eo ej tellokin iroij potata, ñõn kokwojarjar ãt eo etan, an jejit kitien karõk eo an, im ñõn lomoren armij otemjej. Bwelen ejelok bar juõn kanan ilo Baibel emõnlok an kwalok kin katok eo an Kraist im men eo ear kõtõbrake jen eo ilo Aiseia 53:​3-12. Aiseia ear kanan kin iñtan eo an Dri Korijer eo im ilo tibdik ear kwalok kin mij eo an Kraist im kin jerammõn ko renaj walok ñõn dri kabit ro jãtin im ‘s̃ip ro jet’ kin tokjen mij eo an.​—Jon 10:16.

2. Kanan eo ilo buk in Aiseia ej kamol ta, im enaj jelet kij ilo wãwen it?

² Jiljilimjuõn buki yiõ ko mokta jen an kar Kraist lotok, Jeova ear kakõrmole Aiseia ñõn an kanan bwe Dri Korijer eo ear kãlete enaj tiljek wõt meñe enaj iion melejoñ ko relukkun lap. Unin an kar Jeova kakõrmol kin kanan in ej ñõn kamol bwe ej liki bwe Nejin enaj tiljek wõt ñõn E. Ñe jej etale kanan in, buruer enaj obrõk kin kamolol im enaj kajurlok tõmak eo ar.

 Kar “Kejekron” im “Jab Koutiej E”

3. Etke dri Ju ro ren kar karuwaineneik Jisõs, ak ta eo rar kõmõne?

³ Riit Aiseia 53:3. Lemnok mõk kin eñjake eo an Nejin Anij ke ear aikwij karmijeteik jerammõn eo ñõn an jerbal iben Jemen ilõñ bwe en itok ñõn lõl in ñõn katok kin mour eo an ñõn lomoren armij jen jerawiwi im mij! (Pil. 2:​5-8) Unin an kar katok kin mour eo an ej ñõn jeorilok jerawiwi ko an armij, me katok kin menin mour ko iomin Kien Moses ear annañelok. (Hib. 10:1-4) Dri Ju ro me rar kõtar Messaia eo, ren kar karuwaineneik im koutiej e. (Jon 6:​14) Ak jen an eindrein, dri Ju ro rar “kejekron” Kraist im jab koutiej e, einwõt Aiseia ear kanan kake. Dri jilik Jon ear je: “Ear itok ñõn ailiñ eo an, ak ro dron rar jab bõk e.” (Jon 1:​11, UBS) Dri jilik Piter ear jiroñ dri Ju ro: “Anij an ro jimar . . . E ar kaibujuij Nejin, Jisõs; eo kom ar ketõk E im karmijete iman mejen Pailat, ke e ar lemnok bwe en kõtlok E. A kom ar karmijete Dri Kwojarjar im Emõn.”​—Jerb. 3:​13, 14.

4. Ewi wãwen Jisõs ear jela kin nañinmij ko?

⁴ Aiseia ear bareinwõt kanan bwe Jisõs enaj “jela liãjlol [ak nañinmij].” Ilo ien jerbal in kwalok nan eo an, emol bwe jet ien Jisõs ear mõk, ak ejelok kein kamol bwe ear nañinmij. (Jon 4:⁠6) Bõtab, ear jela kin nañinmij ko an ro ear kwalok nan ñõn ir. Ear tiriamokake ir im kemour elõñ. (Mark 1:32-34) Inem Jisõs ear kajejit kitien kanan eo me ej ba: “E mõke wõt bõk mõjino ko ar, im bõklok nañinmij ko ar.”​—Mat. 8:​16, 17; Ais. 53:⁠4.

Einwõt ñe ‘Anij ear Dreñlok E’

5. Ewi wãwen an kar dri Ju ro watõke mij eo an Jisõs, im etke men in ear kalaplok an iñtan?

⁵ Riit Aiseia 53:4. Elõñ armij ro ilo ien ko an Jisõs rar jab melele kin unin ear iñtan im mij. Rar lemnok bwe Anij ear kajeik e, einwõt ñe ear kaiñtan e kin juõn nañinmij enana. (Mat. 27:38-​44) Dri Ju ro rar naruõn Jisõs im ba bwe ej blaspim. (Mark 14:​61-​64; Jon 10:33) Ilo mol, Jisõs ear jab juõn dri jerawiwi im juõn eo ej blaspim. Ak kin an lap an yokwe Jemen, men eo me ear kalaplok an iñtan einwõt Dri Korijer eo an Jeova, kar an lemnok bwe renaj liakelok e ñõn mij kin an blaspim. Meñe eindrein, ear mõnõnõ in kõtãik e ñõn kõmõnmõn ankil an Jeova.​—Mat. 26:39.

6, 7. Ilo wãwen it Jeova ear “kaiñtan” Nejin etiljek, im etke ear juõn “men in mõnõnõ” ñõn Anij?

⁶ Jemaroñ melele kin etke kanan eo an Aiseia ear ba bwe ro jet renaj lemnok bwe Anij ear “dreñlok E,” ak jemaroñ bwilõñ kin an kanan eo ba bwe: “Jeova e buñburuen in kaiñtan E.” (Ais. 53:10) Kinke Jeova ear bareinwõt ba: “Lo, Aõ Dri Korijera, . . . Aõ dri kãlet, im Aõ ej lõñliñ kake,” ewi wãwen an Jeova maroñ “buñburuen in kaiñtan E”? (Ais. 42:⁠1) Ilo wãwen it jemaroñ ba bwe men in ear kabuñburuen Jeova?

⁷ Ñõn melele kin mõtõn in ilo kanan eo, jej aikwij kememej bwe ilo an Setan aituerõke iroij potata eo an Jeova, ear kõmõn bwe en or berre kin tiljek eo an aolep dri  korijer ro an Anij ilõñ im ilõl. (Job 1:​9-​11; 2:​3-5) Ilo an kar tiljek wõt ñõn mij, Jisõs ear lelok juõn uak emõn ñõn aituerõk eo an Setan. Kin men in, meñe Jeova ear kõtlok bwe dri kijirãt ro ren mõn Kraist, ejelok berre bwe Jeova ear iñtan ke ear lo air mõn Dri Korijer eo an. Bõtab, ke Jeova ear lo an Nejin tiljek, men in ear kamõnõnõik buruen. (Ken. 27:11) Bareinwõt, kin an Jeova jela kin tokjen ko me mij eo an Nejin enaj bõktoki ñõn armij ro rej ukwelok, men in ear lap an kamõnõnõik Jeova.​—Luk 15:7.

“Wãkare E kin Jerawiwi ko Ar”

8, 9. (a) Ewi wãwen kar ‘wãkare Jisõs kin jerawiwi ko ar’? (b) Ewi wãwen an kar Piter kamol men in?

⁸ Riit Aiseia 53:​6. Einwõt s̃ip eo ejebwãbwe, armij ro rejerawiwi rar jebwãbwe im rej bukot jet wãwen ko ñõn lomoren ir jen nañinmij im mij me rar jolite jen Adam. (1 Pit. 2:​25) Kin air jab wãppen, ejelok juõn ian ro nejin Adam ear maroñ kõllãik wõnan men eo Adam ear luji. (Sam 49:7) Bõtab, kin yokwe eo an elap, ‘Jeova ear likit ion Nejin ejitenburu iben me ej Dri Korijer eo an ear kãlete, jerawiwi ko ar otemjej.’ Ilo an kõtlok bwe ren “wãkare E kin jerawiwi ko ar im kakinijnij E kin bwir ko ar,” Kraist ear inek jerawiwi ko ar ion alal in iñtan eo im ear mij kin kij.

⁹ Dri jilik Piter ear je: “Im emwij kir kom ñõn men in: bwe Kraist e ar iñtan kin kom, im likit joñok ñõn kom, bwe komin anõke jenkwon ne ko neen. Eo e ar mõke bõklok jerawiwi ko ar ilo enbwinin ion wijki eo, bwe, ke emwij ar mij in jerawiwi, jen mour ñõn kwojarjar.” Inem, ilo an eliji nan ko jen kanan eo an Aiseia, Piter ear kakobaba: “Kin kinej ko kinjen ar kemour kom.” (1 Pit. 2:​21, 24; Ais. 53:5) Men in ear kebellok ial eo ñõn an dri jerawiwi ro ejaak juõn kõtan emõn iben Anij, einwõt an Piter wõnmanlok wõt im ba: “Bwe Kraist bareinwõt E ar iñtan kin jerawiwi juõn wõt alen, Dru wãnik kin ro re jab wãnik, bwe En kadruaklok kij ñõn Anij.”​—1 Pit. 3:⁠18.

“Einwõt juõn Lam Rej Tellok E ñõn Mij”

10. (a) Ewi wãwen an kar Jon dri baptais kwalok kin Jisõs? (b) Etke nan ko an Jon rejejit?

¹⁰ Riit Aiseia 53:​7, 8. Ke Jon dri baptais ear lo an itok Jisõs, ear ba ilo juõn ainiken elaj: “Lo, Lam an Anij, Eo ej bõklok an lõl jerawiwi!” (Jon 1:​29) Ilo an konono kin Jisõs einwõt Lam eo, Jon emaroñ kar lemnok kin nan ko an Aiseia: “Einwõt juõn lam rej tellok e ñõn mij.” (Ais. 53:​7) Aiseia ear kanan: “E ar lutõklok an ñõn mij.” (Ais. 53:12) Ekaitoktoklimo bwe, ilo boñin eo Jisõs ear kajutak Kwojkwoj in Kememej mij eo an, ear lelok juõn kõp in wain ñõn dri jilik ro 11 retiljek im ear ba: “Bwe men in draõ dra in kalimur, eo e torlok kin elõñ ñõn jurlok jerawiwi ko.”​—Mat. 26:28.

11, 12. (a) An Aisak mõnõnõ bwe jemen en katok kin e ear pijaik ta kin katok eo an Kraist? (b) Ta eo jej aikwij kememej kin Ebream eo Elaplok, Jeova, ñe jej kememe Kwojkwoj eo?

¹¹ Einwõt Aisak, Jisõs ear mõnõnõ in lelok mour eo an einwõt juõn menin katok. (Jen. 22:​1, 2, 9-​13; Hib. 10:​5-​10) Meñe Aisak ear kõtlok bwe jemen en katok kake e, kar Ebream eo ear lelok menin katok eo. (Hib. 11:17) Ejja eindrein wõt, Jisõs ear mõnõnõ in lelok mour eo an, ak kar Jeova eo ear kõmõn karõk eo kin binmour eo. Katok eo kin Nejin ear kwalok yokwe eo emulõl an Anij kin armij otemjej.

¹² Jisõs mõke ear ba: “Kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” (Jon 3:⁠16) Dri jilik Paul ear je: “A Anij ej kwalok karkarin An yokwe ñõn kij, ilo men in, ke j’ar dri jerawiwi, Kraist e ar mij kin kij.” (Rom. 5:⁠8) Kin men in, meñe jej kwalok ar koutiej Kraist ñe jej  kememej mij eo an, jen jab meloklok bwe eo ear kõmõn karõk kin binmour eo kar Ebream eo Elaplok, Jeova. Jej kememe Kwojkwoj in mij eo ñõn kaibujuij e.

Dri Korijer eo Ej “Kowãnik Elõñ”

13, 14. Ewi wãwen Dri Korijeran Jeova ear “kowãnik elõñ”?

¹³ Riit Aiseia 53:11, 12. Kin Dri Korijer eo an ear kãlete, Jeova ear ba: “Dri Korijera e wãnik e naj kowãnik elõñ.” Ilo wãwen it? Ilo jemlokõn eon 12 ej letok ñõn kij uak eo. “Im [Dri Korijer] ar kõmõn men in mirik kin ro dri bwir.” Aolep ro nukin Adam rej lotak im dri jerawiwi, ak “ro dri bwir,” im kin men in rej bõk “wõnan jerawiwi,” melelen mij. (Rom. 5:​12; 6:​23) Inem ej juõn menin aikwij bwe dri jerawiwi ro ren ejaak juõn kõtan emõn iben Jeova. Japter 53 ilo kanan eo an Aiseia ej kwalok ilo juõn wãwen eaibujuij kin wãwen Jisõs enaj kar juõn dri Kilajrõk ñõn armij ro rejerawiwi, ilo an ba: “Kaje eo an aruij ainemõn e ar ber ion, im kaejmour kij kin dribitbit ko An.”​—Ais. 53:⁠5.

¹⁴ Ilo an bõk jerawiwi ko ar im mij kin kij, Kraist ear “kowãnik elõñ.” Paul ear je: “Ebuñburuen Anij bwe ilo [Kraist] men otemjej remõn potata ren ber; Im bwe, ke emwij An kõmõn ainemõn kin bõtõktõkin drebail eo An, En kilajrõk kin E men ko otemjej ñõn E mõke, aet kin E elañe rej men ko ion lõl ak men ko i lõñ.”​—Kol. 1:​19, 20.

15. (a) Ta “men ko ilõñ” me Paul ej konono kaki, im etke kar maroñ watõk ir einwõt rewãnik? (b) Wõn ro wõt im ej tellokir ñõn mõña bred im irak wain eo ilo Kwojkwoj eo?

¹⁵ “Men ko ilõñ” me kar kilajrõki ñõn Jeova ikijen bõtõktõk eo Kraist ear katorloke rej Kristian dri kabit ro, me renaj iroij iben Kraist ilõñ. Dri Kristian ro me rej “dri bõk mõtõn kir jen lõñ” naj ‘kowãnik ir kin mour.’ (Hib. 3:1; Rom. 5:​1, 18) Inem Jeova ej mõnõnõ in bõk ir einwõt lõmaro nejin ilo jitõb. Jitõb kwojarjar ej kalikar ir bwe rej “dri jolit iben Kraist,” im kar kir ir bwe ren erom kiñ ro im pris ro ilo Ailiñ eo an ilõñ. (Rom. 8:​15-17; Rev. 5:​9, 10) Rej erom ro mõtõn Israel ilo jitõb, ak “Israel an Anij,” im rej dreloñe “bujen eo ekãl.” (Jerm. 31:​31-​34; Gal. 6:​16) Einwõt ro uan bujen eo ekãl, ilo ien Kwojkwoj in Kememej eo eor air maroñ ñõn mõña bred im irak wain eo ebũrõrõ, ikijen eo Jisõs ear ba: “Kõp in kalimur eo ekãl ilo draõ eo etorlok kin kom.”​—Luk 22:⁠20.

16. Ta “men ko ion lõl,” im ilo wãwen it eo enaj or iben rein juõn jutõk ewãnik iman Jeova?

¹⁶ “Men ko ion lõl” rej s̃ip ro jet an Kraist, me eor air kejatrikrik ñõn mour in drio ion lõl. Dri Korijer eo Jeova ear kãlete enaj bareinwõt kõmõn bwe en or iben rein juõn jutõk ewãnik iman mejen Jeova. Kin air tõmak ilo katok in binmour eo an Kraist im ilo wãwen in “kwoli im kamouj nuknuk ko air ilo bõtõktõkin Lam,” Jeova ej watõk ir einwõt rewãnik, jab einwõt lõmaro nejin ilo jitõb, ak einwõt ro jeran, im  ej lelok ñõn ir jerammõn eo ñõn ellã jen “iñtan eo an elap.” (Rev. 7:​9, 10, 14; Jem. 2:​23) Kin an s̃ip rein jab mõtõn bujen eo ekãl, rejjab bõk kejatrikrik eo ñõn mour ilõñ. Inem ilo ien kwojkwoj eo rejjab bõk mõtõn bred im wain eo ak rej ber ilo Kwojkwoj eo ñõn kwalok air koutiej kin ien in eaurõk.

Kamolol ko Rej ñõn Jeova im Dri Korijeran ej Mõnõnõ Kake!

17. Ewi wãwen katak eo kin kanan ko an Aiseia kin Dri Korijer eo ear jibõñ kij ñõn keboj lemnok ko ar kin Kwojkwoj in Kememej eo?

¹⁷ Etale in kin kanan ko an Aiseia kin Dri Korijer eo ear juõn wãwen emõn ñõn keboj lemnok ko ar kin ien Kwojkwoj in Kememej mij eo an Kraist. Men in ej kamaroñ kij ñõn “jerlok ñõn Jisõs, Dri tel im Dri kowãppen tõmak eo ar.” (Hib. 12:⁠2) Emwij ar katak bwe Nejin Anij ejjab juõn eo ej jumae. Jen an einwõt Setan, Jisõs ear mõnõnõ in katak jen Jeova, im watõk e einwõt Iroij Potata eo. Emwij ar lo bwe ilo ien eo Jisõs ear jerbal ion lõl, ear kwalok an tiriamo ñõn ro ear kwalok nan ñõn ir, im ear kemour elõñ jen nañinmij ko air im jibõñ ir ñõn bõk juõn jutõk ewãnik iman Anij. Ilo wãwen in ear kwalok kin ta eo enaj kõmõne ñe enaj Kiñ ilo jukjuk im ber eo ekãl im ñe ej “likit ekajet jime ilo lõl.” (Ais. 42:⁠4) Kijejeto eo ear kwaloke ilo jerbal in kwalok nan eo kin Ailiñ eo, einwõt “juõn maram ñõn ro dri ailiñ ko jet,” ej juõn menin kakememej ñõn dri kalor ro an ñõn kwalok nan kin nuuj eo emõn ilo kijejeto iaolepen lõl.​—Ais. 42:6.

18. Etke kanan eo an Aiseia ear kobrõk buruer kin kamolol ñõn Jeova im Dri Korijer eo an etiljek?

¹⁸ Kanan eo an Aiseia ej bareinwõt kamulõllok melele eo ar kin men eo elap Jeova ear kõmõne ke ear jilkintok Nejin ejitenburu iben bwe en iñtan im mij kin kij. Jeova ear mõnõnõ in lo, jab kin an Nejin iñtan, ak kin an kar drebij an tiljek ñõn mij. Einwõt Jeova, jej aikwij mõnõnõ in kile bwe aolep men ko Jisõs ear kõmõni rej ñõn kamol bwe Setan ej juõn dri riõp im ñõn an kokwojarjar etan Jeova, im ilo wãwen in ej kwalok bwe Jeova wõt ej tellokin iroij potata. Bareinwõt, Kraist ear jolok jerawiwi ko ar im mij kin kij. Ilo wãwen in, ear kebellok ial eo bwe bwij edrik in dri kabit ro im bareinwõt s̃ip ro jet ren bõk juõn jutõk ewãnik iman Jeova. Ñe jej ber iben dron ilo Kwojkwoj in Kememej eo, en obrõk buruer kin kamolol ñõn Jeova im Dri Korijer eo an etiljek.

Ilo Elij

• Ilo wãwen it Jeova ear “buñburuen in kaiñtan” Nejin?

• Ewi wãwen kar “wãkare [Jisõs] kin jerawiwi ko ar”?

• Ewi wãwen Dri Korijer eo ear “kowãnik elõñ”?

• Ewi wãwen katak eo kin kanan ko kin Dri Korijer eo ear keboj lemnok ko ar im buruer ñõn Kwojkwoj eo?

[Kajitõk Ko Ñan Katak]

[Kamelele in juõn pija ilo peij 26]

‘Ar kejekron E im jar jab koutiej e’

[Kamelele in juõn pija ilo peij 28]

“E ar lutõklok an ñõn mij”

[Kamelele in juõn pija ilo peij 29]

“S̃ip ro jet” rej ber ilo Kwojkwoj eo ñõn kwalok air koutiej ien in eaurõk