Kwoj ke juõn ‘Dri Kõmñe kin Joij eo an Anij’?

“Komin kanuij yokwe dron einwõt ro jimjen jimjatin ilo Christ, im komin kwalok ami mõnõnõ in kautiej dron.”​—ROM. 12:10, UBS.

1. Ta eo Nan eo an Anij ej kalimur ñõn kij kake?

 ELÕÑ alen Nan eo an Anij ej kalimur ñõn kij bwe Jeova enaj jibõñ kij ñe jej ebwer ak ñe erup buruer. Ñõn wanjoñok, lemnok mõk kin nan in kainemõn kein: “Jeova ej kejerkak im drebij ro otemjej re buñ; im kajutõk ro otemjej re kumliklik.” “Ej kãejmour ro erup burueir; Ej kitimi kinej ko kinjeir.” (Sam 145:14; 147:3) Bareinwõt, Jemeruij ilõñ mõke ej ba: “Bwe Ña Jeova, am Anij, I naj kapjere anbijmaroñõm, im ba ñõn yuk, Kwon jab mijõk; I naj jibõñ yuk.”​—Ais. 41:13.

2. Ewi wãwen an Jeova lelok jibõñ ñõn dri korijer ro an?

² Bõtab, ewi wãwen an Jeova, eo ej jokwe ilõñ, ej ‘kapjere peir’? Ewi wãwen an ‘kajutõk kij ñe jej kumliklik’ kin buromõj? Jeova Anij ej letok jibõñ ñõn kij ilo elõñ wãwen ko. Ñõn wanjoñok, ej lelok ñõn armij ro an “maroñ eo e kanuij lap” ikijen jitõb kwojarjar eo an. (2 Kor. 4:7; Jon 14:16, 17) Dri korijer ro an Anij rej bareinwõt bõk kõkãtõk jen kajur eo ej itok jen ennan eo ilo Nan in kakõrmol eo an Anij, Baibel eo. (Hib. 4:​12) Eor ke bar juõn wãwen me Jeova ej kakajur kij? Jej lo uak eo ilo buk in Juõn Piter.

Kar Kwalok ‘Joij an Anij ilo Elõñ Wãwen Ko’

3. (a) Ta eo dri jilik Piter ej ba kin melejoñ ko? (b) Ta eo kar kemelele kake ilo 1 Piter japter 4?

³ Dri jilik Piter ear jejelok ñõn dri kabit ro, im kalikar bwe eor ibeir un eo ñõn air lõñliñ kin ajenkij eo eber imair. Ej wõnmanlok im ba: “Meñe kiõ jirik ien, elañe en ein drein, kom ar iñtan kin elõñ men in melejoñ.” (1 Pit. 1:​1-6) Lemnok kin nan in “elõñ.” Ej kwalok bwe enaj lõñ wãwen melejoñ ko remaroñ iioni. Ak, Piter ear jab baj ba wõt men in, im kõmõn bwe ro jein im jãtin ren lemnok elañe remaroñ kijenmij iomin aolep melejoñ ko rekajjo wãweir. Jen men in, Piter ear kalikar bwe dri Kristian ro remaroñ liki bwe Jeova enaj jibõñ ir ñõn kijenmij iomin jabrewõt kain melejoñ ko rej jelmaiki. Kalimur in ej walok ilo tujemlokõn letter in an Piter, ijo me ej bwebwenato kin men ko rej ekkejellok ñõn “jemlokõn men otemjej.”​—1 Pit. 4:7.

4. Etke nan ko ilo 1 Piter 4:10 rej kainemõn kij?

⁴ Piter ej ba: “Einwõt jabrewõt iami e ar bõk men in lewoj, en jibõñ dron kake, einwõt dri kõmñe remõn an joij an Anij, elõñ wãwen.” (1 Pit. 4:​10) Piter ej bar kajerbal nan in “elõñ.” Ilo juõn wãwen ej ba, ‘Melejoñ ko rej walok ilo elõñ wãwen ko, ak joij an Anij ej bareinwõt walok ilo elõñ wãwen ko.’ Etke ennan in elukkun kainemõn? Kinke ej kalikar bwe jekron ta melejoñ eo jej iione, ien otemjej enaj or juõn wãwen Anij enaj kwalok an joij ñõn jibõñ kij ñõn kijenmij. Ak ilo nan ko an Piter, kwar lo ke wãwen eo Jeova ej kwalok an joij ñõn kij? Ej ikijen dri Kristian ro mõtar.

“Jibõñ Dron”

5. (a) Ta eo dri Kristian ro kajuju rej aikwij kõmõne? (b) Ta erro ak jerbal eo kar letok ñõn kij?

⁵ Ke Piter ear konono ñõn aolep ro uan congregation eo, ear ba: “Im elap jen men  otemjej, komin kanuij yokwe dron.” Inem ear wõnmanlok im ba: “Einwõt jabrewõt iami e ar bõk men in lewoj, en jibõñ dron kake.” (1 Pit. 4:​8, 10) Kin men in, armij ro kajuju ilo congregation eo eor kunan ñõn kõkãtõk dri Kristian ro mõtõn. Jeova ear letok ñõn kij juõn men eaurõk, im ej erro eo ar ñõn jibõñ ro jet kake. Inem, Jeova ear letok ta ñõn kij? Piter ej ba bwe ej juõn ‘men in letok’ jen Anij. Ta menin letok in? Ewi wãwen ar “jibõñ dron kake”?

6. Ta jet ian menin letok ko Anij ear letok ñõn dri Kristian ro?

⁶ Nan eo an Anij ej ba: “Men in letok emõn im wãppen otemjelok re jen lõñ.” (Jem. 1:​17) Emol bwe, aolep menin letok ko me Jeova ej letok ñõn armij ro an rej wãwen ko me ej kwalok joij eo an. Juõn menin letok eaurõk me Jeova ej letok ñõn kij ej jitõb kwojarjar eo an. Menin letok in ej kamaroñ kij ñõn kadrek karkar ko me rej kamõnõnõik Anij, einwõt yokwe, lejokmen, im inemõn. Inem, karkar kein rej kamakit kij ñõn ar bareinwõt kwalok yokwe ñõn ro mõtar ilo tõmak im bwe jen pojõk in jibõñ ir. Meletlet im jelalokjen eo ejime rej bareinwõt jet ian menin letok ko remõn me jej bõki kin jibõñ eo jen jitõb kwojarjar eo. (1 Kor. 2:​10-​16; Gal. 5:​22, 23) Emol, jemaroñ watõk aolepen kajur, maroñ, im kabel ko ar einwõt menin letok ko jej kajerbali ñõn nebar im koutiej Jemeruij ilõñ. Anij ear letok ñõn kij erro eo ñõn kajerbal maroñ im karkar ko ar einwõt juõn wãwen ñõn kwalok kin joij eo an ñõn dri tõmak ro mõtar.

Ewi Wãwen Jemaroñ “Jibõñ Dron”?

7. (a) Nan ko “einwõt jabrewõt” ej kalikar ta? (b) Ta kajitõk ko jej aikwij kajitõkin kij mõke, im etke?

⁷ Piter ej bareinwõt ba ikijen menin letok ko jar bõki: “Einwõt jabrewõt iami ear bõk men in lewoj” komin kajerbale. Nan eo “einwõt jabrewõt” ej kalikar bwe emaroñ oktõk karkar ko, maroñ ko, im bareinwõt joñõn eo jej bõke. Meñe eindrein, kar rejañ kajuju armij ñõn kajerbal [jabrewõt menin letok] ñõn “jibõñ dron kake.” Bareinwõt, ennan eo ñõn kajerbale “einwõt dri kõmñe remõn” ej juõn nan in kakien. Inem, jej aikwij kajitõkin kij mõke: ‘Ij lukkun ke kajerbal menin letok ko me kar letok ñõn iõ bwe in kakajur dri tõmak ro mõta?’ (Keiri 1 Timote 5:​9, 10.) ‘Ak ij ke kajerbal maroñ ko iar bõki jen Jeova ñõn tokjen eo aõ mõke,  bwelen ñõn kõmõn aõ mweie ak utiej?’ (1 Kor. 4:7) Elañe jej kajerbal menin letok ko ar ñõn “jibõñ dron,” jenaj kamõnõnõik Jeova.​—Ken. 19:17; riit Dri Hibru 13:16.

8, 9. (a) Kwalok jet ian wãwen ko me dri Kristian ro ibelakin lõl rej jibõñ dri tõmak ro mõtair. (b) Ewi wãwen ro jeõm im jãtõm ilo congregation eo am rej jibõñ dron?

⁸ Nan eo an Anij ej kwalok elõñ wãwen ko me dri Kristian ro ilo ran ko an dri jilik ro rar jibõñ dron. (Riit Dri Rom 15:25, 26; 2 Timote 1:16-​18.) Ejja wãwen drein ranin, dri Kristian ro remol rej mõnõnõ in bokake kien eo ñõn kajerbal menin lelok ko air ñõn jibõñ dri tõmak ro mõtair. Lemnok kin jet ian wãwen ko me rej kõmõne men in.

⁹ Elõñ dri kristian man ro rej jolok elap auõ ko kajuju aliñ ñõn keboji katak ko air ñõn kwelok ko. Ilo kwelok ko, ñe rej kwalok jet ennan ko raurõk me rar loi ilo ien air katak Baibel ibeir mõke, nan in kemelele ko air rej kamakit aolep armij ro ilo congregation eo ñõn air kijenmij. (1 Tim. 5:​17) Elõñ ro jeir im jãtir jejela kajeir kin air kwalok joij im yokwe ñõn dri tõmak ro mõtair. (Rom. 12:15) Ekkeini an jet lolok ro me reburomõj im rej jar ibeir. (1 Tes. 5:​14) Ro jet rej kajerbal ien ko air ñõn je nan ko rekõketak ñõn dri Kristian ro jeir im jãtir me rej kijenmij iomin melejoñ. Bar ro jet ilo joij rej jibõñ ro eor air utame ilo enbwin ñõn air ber ilo kwelok ko an congregation. Elõñ tausan dri Kennan ro rej bõk kunair ilo jerbal eo ñõn jibõñ dri tõmak ro mõtair ñõn kalek moko me jorran ko relap rar kokkure. Yokwe im jibõñ ko me ro jeir im jãtir rar kwaloke rej aolep mõtõn ‘joij an Anij kar kwaloke ilo elõñ wãwen ko.’​—Riit 1 Piter 4:​11.

Ta eo Elaplok an Aurõk?

10. (a) Ta wãwen ko ruo Paul ear lemnok kake kin jerbal eo an ñõn Anij? (b) Ewi wãwen ar kajeoñwe Paul ranin?

¹⁰ Kar lelok ñõn dri korijer ro an Anij juõn menin letok ñõn air kajerbale ñõn jibõñ dri tõmak ro mõtair im bareinwõt juõn ennan ñõn kwalok kake ñõn armij otemjej. Dri jilik Paul ear kile wãwen kein ruo kin jerbal eo an ñõn Jeova. Ear jeje ñõn congregation eo ilo Epesõs ikijen “jerbal in joij an Anij” me kar lelok ñõn e ñõn tokjen eo air. (Ep. 3:2) Ak, ear bareinwõt ba: “Anij e ar likit gospel eo na ibem.” (1 Tes. 2:4) Einwõt Paul, jej bareinwõt kile bwe kar letok ñõn kij jerbal eo ñõn kwalok nan kin Ailiñ eo an Anij. Ilo ar kijejeto ilo jerbal in kwalok nan, jej kate kij ñõn kajeoñwe joñok eo Paul ear likiti ilo an niknik in kwalok kin nuuj eo emõn. (Jerb. 20:20, 21; 1 Kor. 11:1) Jejela bwe kwalok ennan eo kin Ailiñ eo emaroñ lomoren armij. Ak ilo ejja ien eo wõt, jej bareinwõt kate kij ñõn kajeoñwe Paul ilo ar bukot ien ko remõn ñõn lelok “men in yokwe an Jitõb” ñõn dri tõmak ro mõtar.​—Riit Dri Rom 1:​11, 12; 10:13-​15.

11. Ewi wãwen ar aikwij watõki jerbal ko ar ñõn kwalok nan im kõkãtõk dri tõmak ro mõtar?

¹¹ Ta ian jerbal kein ruo eaurõklok ñõn an dri Kristian ro kõmõne? Ar kwalok juõn kajitõk einwõt in ej einlok wõt ar kajitõk kin juõn bao: Ta pã eo eaurõklok ian pã ko ruo pein? Uak eo ealikar. Juõn bao ej aikwij kajerbal pã ko ruo pein ñõn an maroñ kelok. Ilo ejja wãwen in wõt, jej aikwij bõk kunar ilo wãwen ko ruo ilo jerbal eo ar ñõn Anij bwe jen kajejit jerbal ko kar litoki ñõn kij dri Kristian ro. Kin men in, jejjab lemnok bwe ejenolok erro eo ar ñõn kwalok nan kin nuuj eo emõn im ñõn rejañ dri tõmak ro mõtar. Jen an eindrein, jej watõk men kein einwõt an kar dri jilik Piter im Paul watõki, einwõt erro ko me rej jerbal iben dron. Ilo wãwen it?

12. Ewi wãwen jemaroñ jerbal einwõt ro me Jeova ej kajerbal ir?

¹² Einwõt dri kwalok ro rekijejeto, jej kajerbal jabrewõt kabel ko ar kin katakin ñõn tõbar buruen armij otemjej kin ennan eo  ekõkãtõk kin Ailiñ eo an Anij. Ilo wãwen in, jej kejatrikrik ñõn jibõñ ir erom dri korijer ro an Kraist. Ak, jej bareinwõt kajerbal jabrewõt maroñ im menin letok ko jet me eor iber, me rej wãwen ko jej kwalok kin joij eo an Anij, ñõn rejañ dri tõmak ro mõtar kin nan ko rekõkãtõk im jerbal ko remõn. (Ken. 3:​27; 12:25) Ilo wãwen in, jej kejatrikrik ñõn jibõñ ir ñõn wõnmanlok wõt einwõt dri kalor ro an Kraist. Ilo jerbal ko ar jimor ñõn kwalok nan ñõn ro jet im “jibõñ dron” eor iber juõn jerammõn elap ñõn jerbal einwõt ro me Jeova ej kajerbale ir.​—Gal. 6:​10.

“Komin Kanuij Yokwe Dron”

13. Ta eo enaj walok elañe jejjab “jibõñ dron”?

¹³ Paul ear rejañ dri tõmak ro mõtõn: “Komin kanuij yokwe dron einwõt ro jimjen jimjatin ilo Christ, im komin kwalok ami mõnõnõ in kautiej dron.” (Rom. 12:​10, UBS) Emol, ar yokwe ro jeir im jãtir ej kamakit kij ñõn jerbal kin aolepen buruer einwõt dri jerbal ro kin joij eo an Anij. Jej kile bwe elañe Setan ear lo tõbrõk ñõn kabwijrõk kij jen ar “jibõñ dron,” enaj kokkure ar burukuk iben dron. (Kol. 3:​14) Im elañe jejjab burukuk iben dron, men in enaj tellok ñõn ar luji kijejeto eo ar ilo jerbal in kwalok nan. Setan elukkun jela bwe ej aikwij kabwijrõk wõt juõn mõtõn in jerbal eo ar ñõn kabwijrõk kij jen ar kajejit erro eo ar ñõn Anij, im ilo nan in kõkkar, ej einwõt ñe ej kokkure rãjet in pein juõn bao bwe en jab maroñ kelok.

14. Wõn ro rej bõk tokjen jen ar “jibõñ dron”? Kwalok juõn wanjoñok.

¹⁴ Ñe jej “jibõñ dron”, enaj or tokjen jab ñõn ro rej bõk joij eo an Anij wõt ak bareinwõt ro rej kwaloke. (Ken. 11:25) Ñõn wanjoñok, lemnok kin Ryan im Roni, ruo dri belele ilo Amerika. Ke rar jela bwe juõn lañ elap an kajur ear kokkure elõñ buki moko imõn dri tõmak ro mõtair, yokwe eo air ear kamakit irro ñõn bwijrõk jen jerbal ko air, etal jen mweo imwiir, im rar wiaik juõn wa me eor jikin jokwe iloan im kõmõnmõne ñõn jokwe ie, im etõr 900 mail ko ñõn Louisiana. Rar ber ijo elaplok jen juõn yiõ im kajerbal ien, kajur, im mweiuk ko air ñõn jibõñ ro jeir im jãtir ilo tõmak. Ryan, eo ej 29 an yiõ, ej ba: “Aõ bõk kunaõ ilo jerbal in ear karuaklok iõ ñõn Anij. Iar lo wãwen an Jeova kejbãrok armij ro an.” Ej bareinwõt ba:  “Ke iar jerbal iben man ro reridto, elap air kar katakin iõ kin kilen kejbãrok dri tõmak ro mõtar. Iar bareinwõt katak bwe elõñ men ko ro emõn dred remaroñ kõmõne ilo rolul eo an Jeova.” Roni, eo ej 25 an yiõ, ej ba: “Elap aõ kamolol bwe iar maroñ bõk kunaõ ñõn jibõñ ro jet. Elaplok aõ mõnõnõ kiõ jen mokta. Ijela bwe ilo yiõ ko rej berotok, inaj wõnmanlok im bõk tokjen jen men in emõn iar iione.”

15. Ta un ko remõn eor iber ñõn wõnmanlok im jerbal einwõt dri kõmñe an joij an Anij?

¹⁵ Emol, bokake kien eo an Jeova ñõn kwalok kin nuuj eo emõn im ñõn kõkãtõk dri tõmak ro mõtar ej bõktok jerammõn ko ñõn aolep. Ro jej jibõñ ir rej bõk rejañ ñõn wõnmanlok ilo air korijer ñõn Jeova, ak kij jej lo lõñliñ eo ej walok jen ar lelok. (Jerb. 20:35) Eor juõn jitõb emãnãn ilo congregation eo ñe kajuju uan rej kwalok air itoklimo kin dron. Bareinwõt, yokwe eo emãnãn jej kwaloke ñõn dron ej kalikar bwe jej dri Kristian ro remol. Jisõs ear ba: “Ilo men in armij otemjej re naj jela bwe komij dri kalora, elañe komij yokwe dron.” (Jon 13:35) Ilõñin men otemjej, jej kwalok ar koutiej Jemer eo eyokwe, Jeova, ke dri korijer ro an ion lõl rej kwalok ejja kõnan eo wõt ñõn jibõñ im kakajur ro rej ber ilo aikwij. Kin men in, eor iber un ko remõn ñõn kajerbal menin letok eo ar ñõn ‘jibõñ dron einwõt dri kõmñe remõn an joij an Anij’! Kwonaj ke wõnmanlok im kõmõne men in?​—Riit Dri Hibru 6:​10.

Kwoj ke Kememej?

• Ilo wãwen it ko Jeova ej kakajur dri korijer ro an?

• Ta erro eo kar letok ñõn kij?

• Ta jet ian wãwen ko jemaroñ jibõñ dri tõmak ro mõtar?

• Ta eo enaj kamakit kij ñõn wõnmanlok im kajerbal menin letok eo ar ñõn “jibõñ dron”?

[Kajitõk Ko Ñan Katak]

[Pija ko ilo peij 13]

Kwoj ke kajerbal ‘menin lewoj’ eo am ñõn korijer ñõn ro jet ak ñõn kamõnõnõik kwe mõke?

[Pija ko ilo peij 15]

Jej kwalok kin nuuj eo emõn ñõn armij ro im jibõñ dri Kristian ro mõtar

[Pija eo ilo peij 16]

Ro rej jibõñ ilo ien ko ewalok jorran rej tellokin bõk nebar kin air kwalok jitõbõn karmijete ir mõke