Lo! Dri Korijer eo Jeova ej Lõñliñ Kake

“Lo, Aõ Dri Korijera, . . . Aõ ej lõñliñ kake.”​—AIS. 42:1.

1. Kinke ej ebaktok ran in kememej mij eo an Kraist, ta eo kar rejañ armij ro an Anij ñõn air kõmõne, im etke?

 KINKE ran in kememej mij eo an Kraist ej ebaktok, armij ro an Anij rej bõk rejañ ñõn lor nan in kakabilek eo an Paul ñõn “jerlok ñõn Jisõs, Dri tel im Dri kowãppen tõmak eo ar.” Paul ear bareinwõt ba: “Bwe komin kalomõnlokjen kin Eo e ar kijenmij ilo an ro dri jerawiwi matõrtõr E, bwe komin jab mõk im kijelok ilo buruemi.” (Hib. 12:​2, 3) Ilo ar lukkun lemnok kin tiljek eo an Kraist ñõn mij einwõt katok in binmour eo, enaj jibõñ dri kabit ro im s̃ip ro jet mõtair ñõn wõnmanlok wõt im jerbal ilo tiljek ñõn Jeova im bõprae air ‘mõk im kijelok ilo buruer.’​—Keiri Dri Galetia 6:⁠9.

2. Ta eo jemaroñ katak jen kanan ko ilo buk in Aiseia me rej ekkejellok ñõn Nejin Anij?

² Jeova ear kakõrmole dri kanan Aiseia ñõn an je elõñ kanan ko kin Nejin. Kanan kein renaj jibõñ kij ñõn “jerlok ñõn Jisõs, Dri tel im Dri kowãppen tõmak eo ar.” * Rej letok melele ko kin karkar ko karkarin, iñtan ko an, im ke kar koutiej e einwõt Kiñ im dri Lomor eo ar. Renaj kalaplok melele eo ar kin Kwojkwoj in Mij eo me jenaj kememeje ilo yiõ in ilo ran in Taije, Eprõl 9, elikin tulokin al.

Kar Kalikar Wõn Dri Korijer Eo

3, 4. (a) Ilo buk in Aiseia, nan in “dri korijer” ej jerbal ñõn wõn? (b) Ewi wãwen an Baibel eo mõke kalikar kin “Dri Korijer” eo kar kwalok kake ilo Aiseia japter 42, 49, 50, 52, im 53?

³ Nan in “dri korijer” ej walok elõñ alen ilo buk in Aiseia. Jet ien ej jerbal ñõn dri kanan eo mõke. (Ais. 20:3; 44:26) Ilo ien ko jet ej jerbal ñõn ailiñ in Israel, ak Jekõb. (Ais. 41:​8, 9; 44:​1, 2, 21) Ak ta kin kanan ko relap ikijen Dri Korijer eo me kar jei ilo Aiseia japter 42, 49, 50, 52, im 53? Jeje ko ilo kajin Grik rej lukkun kalikar wõn Dri Korijer in an Jeova me japter kein rej kwalok kake. Ekaitoktoklimo bwe, dri utiej eo jen Itiopia me buk in Jerbal ej konono kake ear riiti juõn ian kanan kein ke jitõb eo ear kamakit Pilip ñõn an kebak e. Elikin an kar dri utiej eo riiti eon eo ilo Aiseia 53:​7, 8, ear kajitõk iben Pilip: “Ij kajitõk ibõm, kin wõn an dri kanan konono men in? kin e mõke ak kin bar juõn armij ke?” Pilip ear mõkõj an kemelele bwe Aiseia ear konono kin Messaia eo, Jisõs.​—Jerb. 8:​26-​35.

 ⁴ Ke Jisõs ear niñniñ wõt, juõn eman ewãnik etan Simeõn ear kwalok iomin kajur eo an jitõb kwojarjar bwe “niñniñ Jisõs” enaj erom “juõn maram ñõn ro dri ailiñ ko,” einwõt an kar kanan kake ilo Aiseia 42:6 im 49:​6. (Luk 2:​25-​32) Bareinwõt, Aiseia 50:​6-9 ear kanan kin menin kajookok ko me renaj kar kõmõne ñõn Jisõs ilo boñin eo kar ekajete. (Mat. 26:67; Luk 22:63) Elikin ran in Pentekost ilo yiõ eo 33, dri jilik Piter ear kalikar kin Jisõs einwõt “Dri Korijer” eo an Jeova. (Ais. 52:13; 53:11; riit Jerbal 3:​13, 26.) Ta eo jemaroñ katak jen kanan kein kin Messaia eo?

Jeova ej Katakin Dri Korijer eo An

5. Ewi wãwen an kar Jeova katakin Dri Korijer eo an?

⁵ Juõn ian kanan ko an Aiseia kin dri korijer eo an Anij ej kwalok kin kõtan eo an Jeova iben manji eo Nejin ilo ien eo mokta jen an kar itok ñõn lõl. (Riit Aiseia 50:​4-9.) Dri Korijer eo mõke ej kwalok bwe Jeova ear wõnmanlok wõt ilo an katakin e, ke ej ba: “Ej kworuj lojiliñiõ bwe en roñ einwõt ro emwij katakin ir.” (Ais. 50:4) Iomin aolepen ien kein, Dri Korijer eo an Jeova ear bokake Jemen im katak jen e, im ear erom juõn eo ear kõtãik e ñõn Jemen. Ej juõn jerammõn ejejuan ke ear katak jen eo ear Kõmõnmõn men ko ilõñ im ilõl!

6. Ewi wãwen Dri Korijer eo ear kalikar bwe ear kõtãik e ñõn Jemen?

⁶ Ilo kanan in, Dri Korijer eo ej konono kin Jemen einwõt “Iroij Jeova.” Men in ej kalikar bwe Dri Korijer eo ear kile bwe Jeova ej iroij potata eo ijoko otemjej. Ñõn kwalok bwe ear kõtãik e ñõn Jemen, ear ba: “Iroij Jeova e ar kabellok lojiliñiõ im I ar jab bõt, im jab oktõkliklok.” (Ais. 50:4, 5) Ear “ber iturin [Jeova], einwõt juõn dri mejerik” ilo airro kõmõnmõn men ko ilõñ im ilõl im armij ro. “Dri mejerik” in ear ‘mõnõnõ ien otemjej iman [Jeova], im mõnõnõ kin lõl, jikin jokwe; im an lõñliñ e ar iben ro nejin armij.’​—Ken. 8:​22-​31.

7. Ta eo ej kwalok bwe Dri Korijer eo ear liki bwe Jemen enaj kar rejetak e iomin melejoñ ko ear iioni?

⁷ Wãwen katakin eo me Dri Korijer eo, Jisõs, ear bõke im yokwe eo an kin armij ear keboj e ñõn ien eo ear itok ñõn lõl im jelmae jumae ko relap. Ear lõñliñ wõt ñõn kõmõnmõn ankil an Jemen, meñe ear jelmae matõrtõr ko relap. (Sam 40:8; Mat. 26:42; Jon 6:​38) Iomin aolep melejoñ ko an ion lõl, Jisõs ear liki bwe Jemen enaj jibõñ im rejetak e. Einwõt kar kanan kake ilo buk in Aiseia, Jisõs ear maroñ ba: “Ej ebak, Eo ej kowãnik Iõ; wõn e naj akwaile Iõ?  . . Lo, Iroij Jeova e naj jibõñ Iõ.” (Ais. 50:​8, 9) Emol an kar Jeova jibõñ Dri Korijer eo an etiljek iomin aolep ien ko in an kwalok nan ion lõl einwõt an bar juõn kanan ilo buk in Aiseia kwalok kake.

Dri Korijer eo Ej Kwalok Nan ion Lõl

8. Ta eo ear kamol bwe Jisõs kar “dri kãlet” eo an Jeova, einwõt kar kanan kake ilo Aiseia 42:⁠1?

⁸ Baibel eo ej jiroñ kij kin ta eo ear walok ke Jisõs ear baptais ilo yiõ eo 29: “Jitõb Kwojarjar . . . Ej kãlõltak ion; im ainiken ej itok jen lõñ, im ba, Kwe Nejiõ, jitenburu iba, Ij mõnõnõ kake Yuk.” (Luk 3:​21, 22) Ilo wãwen in Jeova ear kwalok ilo alikar kin wõn eo kar an “dri kãlet,” me kanan eo ilo Aiseia ear konono kake. (Riit Aiseia 42:​1-7.) Iomin ien jerbal in kwalok nan eo an ion lõl, Jisõs ear kajijet kitien kanan in ilo juõn wãwen ekabwilõñlõñ. Ilo Gospel eo an, Matu ear eliji nan ko rej ber ilo Aiseia 42:​1-4 im kajerbali ñõn jitõñlok ñõn Jisõs.​—Mat. 12:​15-​21.

9, 10. (a) Ewi wãwen an kar Jisõs kajejit kitien kanan eo ilo Aiseia 42:3 iomin ien eo ear kwalok nan ion lõl? (b) Ewi wãwen an kar Kraist “kadrioijtok ekajet jime ilo mol” ke ear ber ion lõl, im ñãt eo enaj “likit ekajet jime ilo lõl”?

⁹ Dri tel ro an kabuñ eo an dri Ju rar karmijeteik armij ro retã. (Jon 7:​47-​49) Ear lej ear kõmõn ñõn ir, inem rar maroñ keiri ir  ñõn “koba eobõp” ak “lamp eo erik an urur” ñe ej iten kun. Bõtab, Jisõs ear kwalok an tiriamo ñõn ro rejeramel im ro dri aikwij. (Mat. 9:​35, 36) Ear lelok juõn nan in kir ejoij, ke ear ba: “Komin itok ñõn iba, kom otemjej rej jerbal im ban, im I naj kakijeik kom.” (Mat. 11:28) Bareinwõt, Jisõs ear “kadrioijtok ekajet jime,” ilo an katakin kin kien ko an Jeova kin jime im bwir. (Ais. 42:3) Ear bareinwõt kwalok bwe armij rej aikwij jerbale kien eo an Anij ilo juõn wãwen ekamanwa im tiriamo. (Mat. 23:23) Jisõs ear kwalok ekajet jime ilo an kwalok nan ilo ejelok kalijeklok ñõn ro remweie im jeramel jimor.​—Mat. 11:5; Luk 18:18-​23.

¹⁰ Aiseia ear bareinwõt kanan bwe “dri kãlet” eo an Jeova enaj “likit ekajet jime ilo lõl.” (Ais. 42:⁠4) Eñin men eo enaj kõmõne ejjabto jen kiõ ñe ej jerbal einwõt Kiñ ilo Ailiñ eo an Anij. Enaj itok in kokkure aolep kien ko an lõl in im iroij eo an mõke ewãnik enaj bõk jikiir. Enaj bõktok juõn lõl ekãl, ijo me “kwojarjar ej jokwe iloan.”​—2 Pit. 3:⁠13; Dan. 2:​44.

“Juõn Maram” im “juõn Bujen”

11. Ilo wãwen it eo Jisõs ekar “juõn maram ñõn ro dri ailiñ ko” ke ear ber ion lõl, im ewi wãwen an eindrein ilo ran kein ar?

¹¹ Ilo an jejit kitien kanan eo ilo Aiseia 42:6, Jisõs ear kamol an kar “juõn maram ñõn ro dri ailiñ ko.” Ke ear kwalok nan ion lõl, ear bõktok maram eo ilo jitõb elaptata ñõn dri Ju ro. (Mat. 15:24; Jerb. 3:​26) Ak Jisõs ear ba: “Ña, maram in lõl.” (Jon 8:​12) Ear erom juõn maram ñõn dri Ju ro im ñõn dri ailiñ ko ikijen an kar bõktok melele ko relap kin mol eo im bareinwõt ilo an lelok mour eo an ewãppen einwõt juõn katok in binmour ñõn armij otemjej. (Mat. 20:28) Elikin an kar jerkakbiji, ear kakien dri kalor ro an ñõn kwalok kin e “ñõn eneo etolok tata i lõl.” (Jerb. 1:⁠8) Ilo ien jerbal in kwalok nan eo air, Paul im Barnebas rar elij nan ko ilo kanan eo ilo Aiseia 42:​6 kin “maram ñõn ro dri ailiñ ko” im rar jerbale ñõn jerbal in kwalok nan eo me rar kõtõbraki ibwiljin dri ailiñ ko. (Jerb. 13:​46-​48) Jerbal in ej wõnmanlok wõt ke bween dri kabit ro ion lõl im s̃ip ro jet mõtair rej kwalok nan kin nuuj eo emõn im jibõñ armij ro ñõn tõmak ilo Jisõs, eo ej “maram ñõn ro dri ailiñ ko.”

12. Ewi wãwen an kar Jeova lelok Dri Korijer eo an einwõt “juõn bujen ñõn ro dri ailiñ”?

¹² Ilo ejja kanan in wõt, Jeova ear jiroñ Dri Korijer eo ear kãlete: “I naj kejbãrok Yuk, im lelok Yuk juõn bujen ñõn ro dri ailiñ.” (Ais. 42:⁠6) Setan elap an kar kate ñõn mõn Jisõs im bõprae e jen an kajejit jerbal in kwalok nan eo an, ak Jeova ear kejbãrok e mae ien eo ear jejit ien an mij. (Mat. 2:​13; Jon 7:​30) Inem Jeova ear kajerkakbiji Jisõs im lelok e einwõt “juõn bujen” ak kalimur, ñõn armij ro ion lõl. Kalimur in ear kamol bwe Dri Korijer eo etiljek an Anij enaj wõnmanlok im jerbal einwõt “juõn maram ñõn ro dri ailiñ ko,” im kanemkwoj ir jen marok eo ilo jitõb.​—Riit Aiseia 49:​8, 9.

13. Ilo wãwen it eo Jisõs ear lomoren “ro rej jijõt ilo marok” ilo ien jerbal in kwalok nan eo an ion lõl, im ewi wãwen an wõnmanlok im kõmõne men in?

 ¹³ Ñõn an jejit kalimur in, Dri Korijer eo Jeova ear kãlete enaj “kabellok mej ko re bilo,” im “kadrioijtok ro dri prison,” im lomoren “ro rej jijõt ilo marok.” (Ais. 42:7) Ilo ien jerbal in kwalok nan eo an ion lõl, Jisõs ear kõmõne men in ilo an kar kajerwawaik mõnit ko rebwir an kabuñ ko rewan im an kwalok nan kin nuuj eo emõn kin Ailiñ eo. (Mat. 15:3; Luk 8:1) Ilo wãwen in ear lomoren dri Ju ro me rar erom dri kalor ro an jen air kamakoko ñõn kabuñ ko rewan. (Jon 8:​31, 32) Ilo ejja wãwen in wõt, Jisõs ear jibõñ elõñ million ro rejjab dri Ju ñõn air katak kin mol eo. Ear kakien dri kalor ro an ñõn “ilok, im kõmõn dri ailiñ ko otemjej bwe ren dri kalora,” im ear kalimur ñõn dri kalor ro an bwe enaj ber ibeir “ñõn jemlokõn lõl.” (Mat. 28:19, 20) Jen ijo ilõñ, Kraist Jisõs ej lolorjake jerbal in kwalok nan eo ej walok ibelakin lõl in.

Jeova Ear Koutiej “Dri Korijer” Eo

14, 15. Etke im ewi wãwen Jeova ear koutiej Dri Korijer eo an?

¹⁴ Ilo bar juõn kanan kin Dri Korijer eo an, Jeova ej ba: “Lo, Dri Korijera e naj kõmõn ilo meletlet, naj koutiej im leliñlok E, im E naj kanuij utiej.” (Ais. 52:13) Jeova ear koutiej Nejin kin an tiljek in kõtãik e ñõn iroij potata eo An im an tiljek wõt iomin melejoñ ko relap ear iioni.

¹⁵ Dri jilik Piter ear je kin Jisõs: “Eo ej i anbijmaroñõn Anij im emwij An wõnliñlok ñõn lõñ; im ar kõtãik jen E enjel ro im jiõb ro im kajur ko.” (1 Pit. 3:​22) Eindrein lok wõt, dri jilik Paul ear je: “E ar mõke kõtãik E, im E ar bokake ñõn mij, aet, mij eo ion drebail. Kin men in bareinwõt Anij e ar kanuij koutiej E, im lelok ñõn E Ãt eo e utiej jen ãt otemjej, bwe ilo etan Jisõs bukwe otemjej ren bukwelõlõ, an dri lõñ, im dri lõl, im dri iomin lõl, im bwe lo otemjej ren kwalok bwe Jisõs Kraist e Iroij, ñõn aibujuij an Anij Jemen.”​—Pil. 2:​8-​11.

16. Ewi wãwen kar kõmõn bwe en “kanuij utiej” Jisõs ilo 1914, im ta ko ear kõtõbraki jen ien eo?

¹⁶ Ilo 1914, Jeova ear kõmõn bwe en “kanuij utiej” Jisõs ke ear kairoij e einwõt Kiñ ilo Ailiñ eo an. (Sam 2:⁠6; Dan. 7:​13, 14) Jen  ien eo, Kraist ear ‘iroij ilo bwiljin ro dri kijirãte e.’ (Sam 110:2) Men eo moktata ear kõmõne kar ñõn anjo ion Setan im dimon ro an, im jolõllok ir ñõn lõl. (Rev. 12:​7-​12) Inem, ilo an jerbal einwõt Sairõs eo Elaplok, Kraist ear kanemkwoj bween dri kabit ro ion lõl jen air kamakoko ñõn “Babilõn Elap.” (Rev. 18:2; Ais. 44:28) Ear lolorjake jerbal in kwalok nan eo ibelakin lõl me ear walok ilo an aini “bween” dri kabit ro im bareinwõt million ‘s̃ip ro jet’ me rej mõtõn “bwij erik.”​—Rev. 12:17; Jon 10:16; Luk 12:⁠32.

17. Ta men ko jar katak kaki jen kanan ko an Aiseia ikijen “dri korijer” eo?

¹⁷ Katak eo kin kanan kein rekabwilõñlõñ jen buk in Aiseia ear kalaplok kamolol eo ar kin Kiñ im dri Lomor eo ar, Kraist Jisõs. Ilo an kar kõtãik e ñõn Jemen ilo ien jerbal in kwalok nan eo an, men in ear kalikar bwe ear bõk katakin jen Jemen mokta jen an kar itok ñõn lõl. Ikijen jerbal in kwalok nan eo an ion lõl im an lolorjake jerbal eo tok ñõn kiõ, ear kalikar bwe ej “maram ñõn ro dri ailiñ ko.” Einwõt jenaj lo ilo katak in tok juõn, eor bar juõn kanan kin Dri Korijer Messaia eo me ej kalikar bwe enaj iñtan im katorlok bõtõktõkin ñõn tokjen eo ar. Men kein rej men ko jej aikwij lukkun “kalomõnlokjen” kaki ke Kwojkwoj in mij eo an ej ebaktok.​—Hib. 12:​2, 3.

[Kamelele Ko Itulal]

Ilo Elij

• Wõn “dri korijer” eo kar konono kake ilo kanan ko an Aiseia, im ewi wãwen ar jela?

• Ewi wãwen an kar Jeova katakin Dri Korijer eo an?

• Ewi wãwen Jisõs ej “juõn maram ñõn ro dri ailiñ ko”?

• Ewi wãwen kar koutiej Dri Korijer eo?

[Kajitõk Ko Ñan Katak]

[Pija eo ilo peij 21]

Pilip ear kwalok ilo alikar bwe “dri korijer” eo Aiseia ear konono kake ej Jisõs, Messaia eo

[Pija eo ilo peij 23]

Einwõt Dri Korijer eo Jeova ear kãlete, Jisõs ear tiriamokake ro rejeramel im ro rej ber ilo aikwij

[Pija eo ilo peij 24]

Jeova ear koutiej Jisõs im kairoij e einwõt Kiñ in Ailiñ eo An