Lo Lõñliñ ilo Jerbal in Kõmõn Dri Kalor

“Komin ilok, im kõmõn . . .  dri kalora.”​—MAT. 28:19.

1-3. (a) Ewi wãwen an elõñ armij lemnok kin katak Baibel iben armij ro? (b) Ta kajitõk ko jenaj etali?

 JUÕN sister ej jiboñ kumi eo ej konono kajin Hindi ilo Amerika ear je, “Iar katak iben juõn baamle jen Pakistan iomin 11 wik. Kin men in, kimar oktõk im ebake doon. Ear toor meja kin dren in kemjalal ke ij lemnok kin an ebak an baamle in naj rol ñõn Pakistan. Men eo ear kõmõn aõ dren in kemjalal ej kin aõ buromõj kin aõ jamin bar kõmao ibeir, bareinwõt kin lõñliñ eo iar bõke jen aõ katakin ir kin Jeova.”

² Kwonañin ke bõk lõñliñ eo ej itok jen am katak Baibel iben juõn armij einwõt sister in? Jisõs im dri kalor ro an ilo ebeben eo kein kajuõn rar bõk elap lõñliñ ilo jerbal in kõmõn dri kalor eo. Ke dri kalor ro 70 me Jisõs ear katakin ir rar jeblak kin juõn ennan ekalõñliñ, Jisõs mõke ear “lõñliñ ilo Jitõb Kwojarjar.” (Luk 10:17-​21) Eindrein, ranin elõñ rej bõk elap lõñliñ ilo jerbal in koman dri kalor eo. Menin kamol eo ej bwe ilo 2007, dri kwalok ro remõnõnõ im elap air kate ir rar kõmõn joñõn in jiljino jimõtõn million dri katak Baibel ro kajuju alliñ!

³ Bõtab, jet dri kwalok ro rejañin bõk lõñliñ eo ej itok jen air katak Baibel iben juõn armij. Bwelen ro jet rejañin katak Baibel iben jabrewõt iomin juõn ien eaitok. Ta aituerõk ko jemaroñ jelmaiki ñe jej kate wõt ñõn katak iben  juõn armij? Ewi wãwen jemaroñ anjo ion aituerõk kein? Im ta jerammõn ko jej bõki ñe jej kõmõn joñõn wõt ar maroñ ñõn bokake kien eo an Jisõs: “Komin ilok im kõmõn . . .  dri kalora”?​—Mat. 28:19.

Aituerõk ko me Remaron Bõk Lõñliñ eo Ar

4, 5. (a) Ewi wãwen armij ro ilo jet jikin ko ilo lõl in rej emmakit ñõn jerbal in kwalok nan eo ar? (b) Ta aituerõk ko dri kwalok ro rej jelmaiki ilo jet jikin ko?

⁴ Ilo jet jikin ko ilo lõl in, armij ro rej kijorur in bõk buk ko ar im rej mõnõnõ in katak Baibel iber. Ruo dri belele rar jerbal ilo Zambia ilo iomin jidrik ien rar je: “Bwebwenato ko remol. Ilo Zambia, jerbal in kwalok nan ekanuij in emõn. Kwojjab baj ba wõt jerbal in kwalok nan ilo turin ial ko! Armij ro rej kebake kim, im jet rej kajitõk kin buk ko rej itoklimo kaki.” Ilo 2007, ro jeer im jãter ilo Zambia rar katak iben elõñlok jen 200,000 dri katak Baibel ro, melelen bwe kajuju dri kwalok ear katak iben elõñlok jen juõn armij.

⁵ Bõtab, ilo jet jikin ko dri kwalok ro remaroñ lo bwe ebin ñõn leto letak buk ko im katak iben armij ro enañin aolep ien. Etke? Ekkã an armij ro joko jen moko imwiir ñe dri kwalok ro rej kalõllõl ilo kejem ko air, im ro rej iion ir ilo moko remaroñ jab itoklimo kin kabuñ. Remaroñ kar drik im ridtolok ilo juõn baamle me ejelok air itoklimo kin kabuñ ak rej drike jerbal ko retao rej walok ilo kabuñ ko rewan. Elõñ armij ro rej bãrok im jibliklik kin s̃eperd ro rewan. (Mat. 9:​36) Eñin unin armij ro remaroñ ekkõl in bwebwenato kin Baibel eo.

6. Ta aituerõk ko eor iben jet dri kwalok ro?

⁶ Jet dri kwalok ro retiljek rej jelmae bar juõn aituerõk me emaroñ bõk lõñliñ eo air. Meñe ilo jinoin rar kijejeto ilo jerbal in kõmõn dri kalor eo, kiõ rej utame kin air nañinmij ak mõjino enbwinir kin air ridto. Bareinwõt lemnok kin jet berre ko me jemaroñ joon kij mõke kaki. Ñõn wanjoñok, kwoj lemnok ke bwe ejelok am maroñ ñõn katak Baibel iben juõn armij? Bwelen kwomaroñ bõk ejja lemnok eo wõt an kar Moses ke Jeova ear jiroñ e bwe en ilen konono ñõn Pero. Moses ear ba: “O, Iroij, I jab melak, jab mokta, ak kiõ mwijin Am konono ñõn iõ korijerõm; bwe e rumij aõ konono, im e rumij loõ.” (Ex. 4:​10) Lemnok eo bwe jejjab melak ej mõtõn mijõk eo ñõn kõmõn likjõp. Jemaroñ inebata bwe armij eo eban erom juõn dri kalor kinke jejjab juõn dri katakin ekanuij emõn. Kin ar lemnok bwe jenaj likjõp, men in emaroñ kabwer kij bwe jen jab katak iben armij ro. Ewi wãwen jemaroñ anjo ion aituerõk ko kar kwalok kaki?

Keboje Buruõm

7. Ta eo ear kamakit Jisõs ilo an jerbal in kwalok nan?

⁷ Buñten ne eo kein kajuõn ej bwe jen keboje buruer. Jisõs ear ba: “Ilo buruen ej kwalok men eo emõn.” (Luk 6​:45) Itoklimo eo emol kin aikwij ko an ro jet ear kamakit Jisõs ilo an jerbal in kwalok nan. Ñõn wanjoñok, ke ear lo bwe wãwen mour in jitõb eo an dri Ju ro mõtõn ejjab emõn, ear “tiriamokake ir.” Ear ba ñõn dri kalor ro an: “Elap jonikõn, . . . Inem komin jar ñõn Iroij in marmir, bwe En jilkinlok ro dri jerbal ilo jonikõn eo An.”​—Mat. 9:​36-​38.

8. (a) Ta eo jej aikwij lemnok kake? (b) Ta eo jemaroñ katak jen nan ko an juõn dri katak Baibel?

⁸ Ñe jej bõk kunar ilo jerbal in kõmõn dri kalor eo jej aikwij in lukkun lemnok kin ewi joñõn jar bõk tokjen ke juõn ear bõk ien ko an ñõn katak Baibel iber. Bareinwõt, lemnok kin armij ro jenaj wõnmaik ir ilo jerbal in kwalok nan im ewi wãwen renaj bõk tokjen ñe rej roñjake ennan eo jej bõklok ñõn ir. Juõn kõra ear jeje ñõn ra eo ilo ailiñ eo ej ber ie: “Ikõnan ba ñõn kom kin joñõn aõ kamolol kin dri Kennan ro me rej katak iba ilo mweo imõ. Ijela bwe jet ien remaroñ inebata iba kinke elap aõ kajitõk im aolep ien  eto air ber jen ien eo rar karõke. Ak rej meanwõr wõt iba im mõnõnõ in kwalok ñõn iõ kin men ko rar katak kaki. Ij kamolol Jeova im Jisõs bwe armij rein rej mõtõn mour eo aõ.”

9. Ta eo Jisõs ear lemnok kake, im ewi wãwen jemaroñ kajeoñwe e?

⁹ Ilo mol, ejjab aolep rar emmakit ñõn jibarbar ko an Jisõs ilo an jibõñ ir. (Mat. 23:37) Jet rar lor e iomin jidrik ien bõtab tokelik rar jab errã kin katak ko an im rar “jab bar etetal iben.” (Jon 6:​66) Bõtab, Jisõs ear jab kõtlok bwe an armij ro jab itoklimo en kõmõn an lemnok bwe ejelok tokjen ennan eo an. Ear lo bwe ej ien marmir kinke jikin kallip ko rar mouj im ear bõk elap lõñliñ ilo an kar jibõñ ilo ien marmir eo. (Riit Jon 4:​35, 36.) Jen ar baj lale wõt brij eo emõrã ikõtan kããn wit ko, jemaroñ ke bareinwõt lemnok kin jonikõn eo ilo jikin eo kar karõk bwe jen kwalok nan ie? Jen etale ewi wãwen jemaroñ bõk lemnok eo ejime kin men in.

Jeor Kin juõn Lemnok ñõn Marmir

10, 11. Ta eo kwomaroñ kõmõne ñõn drebij wõt am lõñliñ?

¹⁰ Juõn dri kallip ej jeor ine ko kin kõtõbar eo ñõn marmir jonikõn. Ilo ejja wãwen in lok wõt, jej aikwij kwalok nan kin mejenkajik eo ñõn jino katak Baibel iben armij ro. Ak ta elañe ekkeini am kwalok nan ak eiet armij kwoj iion ir ilo moko ak ebin am bar iion ro kwar kõmõn karõk ñõn bar jeblak ibeir? Men in emaroñ kabwer yuk. Kwoj aikwij ke bwijrõk jen am kwalok nan jen em ñõn em? Jaab ñõn jidrik! Jej iion elõñ armij ro kin wãwen kilen kwalok nan in ekeie me kar kajerbale jen etto.

¹¹ Bõtab, ñõn drebij wõt am lõñliñ, kwomaroñ ke ukot kilen am kwalok nan, bwelen kajerbal wãwen ko jet ñõn tõbar armij ro? Ñõn  wanjoñok, kwonañin ke kajeoñ kwalok nan ñõn armij ilo turin ial ko ak ilo jikin jerbal ko air? Kwomaroñ ke kajerbal telephone ko ñõn kennan iben armij ro ak bõk nõmba in telephone ko an ro kwar kwalok nan kin Ailiñ eo ibeir bwe kwomaroñ in bar tõbar ir? Ikijen am kijenmij im ukoktak ilo jerbal in kwalok nan, kwonaj lo lõñliñ eo kin am iion ro rej mõnõnõ in roñjake ennan eo kin Ailiñ eo.

Kijenmij Wõt Meñe Ejelok Air Itoklimo

12. Ta eo jemaroñ kõmõne elañe elõñ ro rejjab itoklimo ilo jikin eo jej kwalok nan ie?

¹² Ta elañe ejelok an armij ro itoklimo kin kabuñ ilo jikin eo kwoj kwalok nan ie? Kwomaroñ ke jinoe bwebwenato eo kin juõn men me enaj kaitoklimoiir? Dri jilik Paul ear jeje ñõn dri tõmak ro mõtõn ilo Korint: “I ar einwõt dri Ju ñõn dri Ju ro . . . Ñõn ro ejelok kien ibeir, einwõt ejelok kien iba ke I jab anemkwojaõ jen kien Anij.” Ta unin Paul ear kõmõn eindrein? Ear ba: “Ña men otemjej ñõn armij otemjej bwe kin otemjej in lomoren jet.” (1 Kor. 9:​20-​22) Jemaroñ ke bar kajerbal men ko me renaj kaitoklimoen ro rej ber ilo jikin eo kwoj kwalok nan ie? Elõñ baamle ko me ejelok air kabuñ rekõnan kakõmõnmõnlok kõtan ko air iben dron. Remaroñ bar kõnan jela kin unin jej mour. Jemaroñ ke kwalok ennan eo kin Ailiñ eo ñõn armij rot in ilo juõn wãwen enaj karel ir?

13, 14. Ewi wãwen jemaroñ kalaplok lõñliñ eo jej bõke jen jerbal in kõmõn dri kalor?

¹³ Juõn edreklok in dri kwalok ro ear kalaplok lõñliñ eo rar bõk jen jerbal in kõmõn dri kalor eo, meñe ilo jikin ko me elap an armij jab itoklimo. Ewi wãwen? Ikijen air katak kajin ko jet. Ruo dri belele 60 jima yiõ ridtair rar lo bwe elõñ tausan dri jikuul in China im baamle ko air rar jokwe ilo jikin eo congregation eo air ej jerbal in kwalok nan ie. Leo ear ba: “Ikijen wãwen in, kar rejañ kim ñõn katak kajin China.” Ear wõnmanlok im ba: “Meñe ej melelen bwe kimar aikwij in jolok elap ien kajuju ran ñõn katak kajin eo, kimar lo elap lõñliñ kin am kar katak Baibel iben dri China ro ilo bukwon eo.”

¹⁴ Meñe kwojjab maroñ katak bar juõn kajin, kwomaroñ kortokjen buk eo etan Nuuj eo Emõn ñõn Armij Ro Jen Ailiñ ko Otemjej (Good News for People of All Nations) ñe kwoj iion ro rej konono bar juõn kajin. Bareinwõt kwomaroñ bõk buk ko ilo kajin eo an armij eo kwoj iione. Emol, ej kitibuj elap ien im ar kate ñõn konono iben ro eoktõk kajin im mõnit ko air. Ak jen jab meloklok nan in kaiñi eo ej ber ilo Nan in Anij: “Eo ej jeor im dreep e naj marmir im jerammõn.”​—2 Kor. 9:6.

Ej Kunan Aolepen Congregation Eo

15, 16. (a) Etke ej kunan aolepen congregation eo ñõn kõmõn dri kalor ro? (b) Ta ijo kunan ridto ro jeer im jãter?

¹⁵ Ilo mol, jerbal in kõmõn dri kalor eo ejjab berber ion kate ko an juõn wõt armij. Ijellokin, ej kitibuj jibõñ eo an aolepen congregation eo. Etke? Jisõs ear ba: “Ilo men in armij otemjej re naj jela bwe komij dri kalora, elañe komij yokwe dron.” (Jon 13:35) Im emol, ñe dri katak Baibel ro rej ber ilo kwelok ko, ekkã air bwilõñ kin yokwe eo rej loe ñe jej koba iben dron. Juõn dri katak Baibel ear jeje: “Elap aõ mõnõnõ in ber ilo kwelok ko. Armij ro rar lukkun karuwaineneik iõ!” Jisõs ear ba bwe ro rej erom dri kalor ro an remaroñ bõk jumae jen baamle ko air. (Riit Matu 10:35-​37.) Bõtab, ear kalimur bwe ilo congregation eo renaj bõk elõñ ‘jeir im jãtir man im kõra rõn, im ro jineir, im ro nejiir’ ilo jitõb.​—Mark 10:30.

¹⁶ Elap ijo kunan ridto ro jeer im jãter ilo jibõñ dri katak Baibel ro ñõn kõmõn wõnmanlok. Ilo wãwen it? Meñe jet ian ridto ro rejjab maroñ katak Baibel iben juõn armij, uak ko air rekõketak ilo kwelok ko rej kakajur tõmak eo an aolep ro rej roñjake. Bwebwenato ko kin air etetal “ilo ial in wãnik” ej kõmõn bwe en aibujuij lok congregation eo im karel ro emol burueir ñõn rolul eo an Anij.​—Ken. 16:31.

 Anjo Ion Ar Mijõk

17. Ta eo jemaroñ kõmõne elañe jej lemnok bwe ejelok kabel iber ñõn katak Baibel iben juõn armij?

¹⁷ Ta eo kwomaroñ kõmõne elañe kwoj lemnok bwe ejelok kabel ibam ñõn katak Baibel iben juõn armij? Kememej bwe Jeova ear jibõñ Moses ikijen an kar lelok ñõn e jitõb kwojarjar im juõn mõtõn, Aron ak leo jein. (Ex. 4:​10-​17) Jisõs ear kalimur bwe jitõbõn Anij enaj ber ilikin jerbal in kwalok nan eo ar. (Jerb. 1:8) Bareinwõt, Jisõs ear jilkinlok dri jerbal ro ñõn kwalok nan im karuolok iair. (Luk 10:1) Kin men in, elañe kwoj lo bwe ej juõn aituerõk ñõn katak Baibel iben armij ro, jar kin jitõb kwojarjar eo bwe en lewoj meletlet. Inem bukot juõn mõtõm dri kwalok me emaroñ kakajur yuk im an iminene ilo jerbal in kwalok nan emaroñ jibõñ yuk. Ej kakajur tõmak eo ar ñõn kememej bwe Jeova ej kãlet armij bajjek einwõt “men in mõjino ko an lõl” im kajerbal ir bwe ren kajejit jerbal in ekanuij lap.​—1 Kor. 1:​26-​29.

18. Ewi wãwen jemaroñ anjo ion mijõk eo kin ar jab maroñ jibõñ juõn dri katak Baibel ñõn kõmõn wõnmanlok?

¹⁸ Ewi wãwen jemaroñ anjo ion mijõk eo kin ar jab maroñ jibõñ juõn dri katak Baibel ñõn kõmõn wõnmanlok? Jej aikwij kememej bwe jerbal in kõmõn dri kalor eo ejjab einwõt ñe juõn dri kõmat ej keboje mõña ko me rej berber ion mõke elañe renaj enno ak jab. Jen an eindrein, jerbal in kõmõn dri kalor eo ej kitibuj wãwen kein jilu. Jeova ej kõmõne men eo eaurõktata, men in ej ñõn karuaklok armij ro ñõn e. (Jon 6:​44) Kij im ro jet ilo congregation eo jej kate kij ñõn katakin dri katak eo ilo wãwen eo ekabel ñõn jibõñ e bwe en kõmõn wõnmanlok. (Riit 2 Timote 2:​15.) Im dri katak eo ej aikwij in jerbale men ko ej katak kaki. (Mat. 7:​24-​27) Elañe dri katak eo ej bwijrõk jen an katak, men in emaroñ kaburomõj kij. Jej kejatrikrik bwe dri katak Baibel ro renaj kõmõn jokãlet eo ejime, ak kajuju iair ej aikwij “lelok nan kin e mõke ñõn Anij.”​—Rom. 14:12.

Ta Jerammõn Ko?

19-21. (a) Ta tokjen ko jenaj bõki jen ar katak Baibel iben armij ro? (b) Ewi wãwen an Jeova lemnok kin aolep ro rej bõk kunair ilo jerbal in kwalok nan?

¹⁹ Katak iben armij ro kin Baibel eo ej jibõñ kij ñõn lemnok wõt ñõn bukot mokta Ailiñ eo. Ej bareinwõt likit mol eo kin Nan in Anij ilo lolãtãt eo ar im buruer. Etke ej eindrein? Juõn pioneer etan Berak ej kemelele: “Katak Baibel iben armij ro ej kõmõn bwe kwon juõn dri katak emõn kin Nan in Anij. Ij lo bwe ij aikwij kakajurlok tõmak eo aõ mokta jen aõ katakin bar juõn armij.”

²⁰ Elañe kwojjab katak iben juõn armij, ej ke melelen men in bwe jerbal eo am ejelok tokjen iben Anij? Jaab ñõn jidrik! Elap an Jeova kaurõk jibarbar ko ar ñõn nebar e. Aolep ro rej bõk kunair ilo jerbal in kwalok nan rej “dri jerbal iben Anij.” Bõtab, katak Baibel iben juõn ej bõktok elaplok lõñliñ ñe jej lo wãwen Anij ej kadreklok ine eo jar kalibwini. (1 Kor. 3:​6, 9) Juõn pioneer etan Emi ej ba: “Ñe kwoj lo an juõn dri katak Baibel wõnmanlok, kwoj lukkun kamolol Jeova kin an kar kajerbal yuk ñõn lelok ñõn armij eo menin lelok eo eaibujuij, ien eo emõn ñõn an jela kin Jeova im ñõn bõk mour in drio.

²¹ Ar kate kij joñõn wõt ar maroñ ñõn jino im katak Baibel iben armij ro enaj jibõñ kij ñõn lemnok wõt in korijer ñõn Anij kiõ im kakajurlok kejatrikrik eo ar ñõn elã im mour ilo lõl eo ekãl. Ikijen jibõñ eo jen Jeova, jemaroñ bareinwõt lomoren ro rej roñjake kij. (Riit 1 Timote 4:​16.) Men in enaj bõktok elap lõñliñ!

Kwoj Kememej Ke?

• Ta aituerõk ko remaroñ bõprae jet jen air katak Baibel iben armij ro?

• Ta eo jemaroñ kõmõne elañe elõñ armij ro rejjab itoklimo ilo jikin eo jej kwalok nan ie?

• Ta jerammõn ko jej bõk jen ar katak Baibel iben armij ro?

[Kajitõk Ko Ñan Katak]

[Pija ko ilo peij 9]

Kwoj ukot ke kilen am kwalok nan ñõn lo armij ro emol burueir?