Jen ke Kõmõni Men ko Jekõnan Jekron Ta eo Armij Rej Ba?

RUO ajiri rej ikkure iben dron. Ajiri eo juõn ej kanõke kein ikkure eo jen ajiri eo juõn im lamij im ba, “Aõ men ne!” Armij ro rejjab wãppen rej kwalok jitõbõn kibbon jen ke rej ajiri. (Jen. 8:21; Rom. 3:23) Bareinwõt, lõl in ej rejañ armij ñõn kowõnmanlok jitõbõn kibbon. Elañe jekõnan bõprae kij jen ar kwalok jitõb in, jej aikwij karmijete kõnan ko rekibbon. Ñe jejjab kõmõn eindrein, emaroñ biruru ar kalõkatip ro jet im kokkure kõtan eo ar iben Jeova.​—Rom. 7:21-23.

Dri jilik Paul ear rejañ kij bwe jen lemnok kin men ko jej kõmõni bwe remaroñ jelet armij ro jet, ke ear je: “Men otemjej remelim; a jab men otemjej rej kakajuror. Men otemjej remelim; a jab men otemjej rej kalek.” (1 Kor. 10:23, 32) Kin men in, ikijen men ko jekõnan kõmõni, ej juõn menin meletlet bwe jen kajitõkin kij mõke: ‘Ij mõnõnõ ke in karmijete kõnan ko aõ me remaroñ kokkure ainemõn eo ilo congregation eo? Ij pojõk ke in ukot lemnok ko aõ bwe in lori nan in kaiñi ko ilo Baibel meñe emaroñ bin?’

Ikijen Kãlet Jikin Jerbal

Enañin aolep armij rej lemnok bwe bebe eo air ñõn kãlet ia eo rej jerbal ie eban jelet ro jet. Ak lemnok kin bwebwenato eo an juõn  eman eor an business ilo juõn bukwon edrik ilo South Amerika. Ebuñbuñ kin an ikkure kin jããn im ekarekrek. Bõtab, tokjen an kar katak Baibel iben dri Kennan ro an Jeova, ear jerbali men ko ear katak kaki im kõmõn oktõk ko ilo mour eo an. (2 Kor. 7:1) Ke ear kwalok kõnan eo an ñõn erom juõn dri kwalok nan ilo congregation eo, juõn elder ear rejañ e ilo joij bwe en lemnok mokta kin jerbal eo an. Ebwe an to an armij ro ilo bukwon eo kebak lein kinke ear wiakake juõn kain drenin irak ak karek kõmõn jen drenin to. Meñe remaroñ kar kajerbal dren in ilo elõñ wãwen, bõtab ilo bukwon eo an ekkã an armij ro kõnan wiaiki ñõn karek.

Lein ear lemnok bwe ñe enaj kwalok nan im wõnmanlok im wiakake men kein, enaj katton etan congregation eo im kokkure kõtan eo an iben Anij. Meñe ear aikwij kabwe aikwij ko an baamle eo an elõñ uair, ear bwijrõk an wiakake drenin karek. Kiõ ej kabwe aikwij ko an baamle eo an ikijen an wiakake mweiuk ko. Lein im lio belen kab ruo ian ajiri ro nejiir lailim rar baptais. Rej kijejeto ilo air kwalok kin nuuj eo emõn kin juõn bõklikõt erreo.

Ikijen Ro Kwoj Kõmao Ibeir

Ñõn kõmao iben ro dri jab tõmak ej ar wõt bebe ke ak ej kitibuj nan in kaiñi ko ilo Baibel? Juõn jeer im jãter jiroñ ear kõnan etal ñõn juõn ien party iben juõn likao ejjab juõn dri Kristian. Meñe kar kakkõl e kin kauwatata ko, ear lemnok bwe ej an wõt bebe inem ear etal ñõn party eo. Ejjabto tokelik ke ear tõbarlok jikin party eo, rar lelok limen drenin karek emwij kãreiki kin uno in kakiki. Jejjo auõ ko tokelik ear ruj im lo bwe emwij an leo mõtõn kokkure.​—Keiri Jenesis 34:2.

Meñe jorran rot kein emaroñ jab walok ñe jej kõmao iben ro dri jab tõmak aolep ien, Baibel eo ej kakkõl: “Kwon etetal iben ro dri meletlet, inem kwo naj meletlet; a eo ej komao iben ro dri bwebwe, e naj jorran kake.” (Ken. 13:20) Ejelok berre bwe ñe jej kãlet ñõn kõmao iben ro dri jab tõmak jemaroñ ber ilo kauwatata! Jabõn Kennan Ko 22:3 ej ba: “Juõn dri meletlet ej lo nana eo, im tilekek; a ro dri bwebwe, rej etal wõt im jorran kake.” Kõmao ko remaroñ jelet kij im kõtan eo ar iben Anij.​—1 Kor. 15:33; Jem. 4:4.

Ikijen Nuknuk Ko Ar im Baotokir

Jen ien ñõn ien ej oktõk wãwen air kõmõni joñok in nuknuk ko. Bõtab, nan in kaiñi ko ilo Baibel kin wãwen ar nuknuk im baotokir rejjab oktõk. Paul ear rejañ limaro rej Kristian bwe ren “kõnõk nuknuk ko re karbõp, im ren kõkõmõnmwin im jejairunoij” im nan in kaiñi in ej jerbal ñõn lõmaro bareinwõt.  (1 Tim. 2:9) Nan kein an Paul ijin ear jab melelen bwe ren jabde air nuknuk, bareinwõt ear jab ba bwe aolep dri Kristian ej aikwij juõn wõt wãwen air nuknuk. Ta kin kõkõmõnmwin ak kõnõk nuknuk ko rekkar? Juõn dictionary ej kemelele bwe ej melelen “kwalok etã buru im jab kalõkatip armij ilo wãwen ar nuknuk, konono ak mwiler.”

Jej aikwij kajitõk iber mõke: “Imaroñ ke ba bwe ij kwalok etã buru, elañe ij kõnõk nuknuk ko ikõnan jekron ta eo armij rej ba kinke ikõnan bwe ro jet ren kalimjek iõ? Wãwen aõ nuknuk ej ke kõmõn bwe armij ren bwilõñ kin kain armij rot ña ak kin mwil eo mwiliõ?’ Jemaroñ kejbãrok bwe jen “jab kõmõn men in buñ ilo jabrewõt” ikijen ar “jab lale men ko [ar] wõt, a bareinwõt men ko an ro jet.”​—2 Kor. 6:3; Pil. 2:4.

Ikijen Abañ ko Ikõtan Dron kin Jerbal

Ke abañ ko relap rar walok jen men ko rar kõmõni ilo jikin jerbal eo ikõtan ro ilo congregation in Korint, Paul ear je: “Etke e jab emõn ibemi bwe komin jorran? Etke e jab emõn ibemi bwe ren bõk men ko ami ilo mon?” Paul ear kakabilek dri Kristian ro bwe ren karmijete ta eo rar akwail kake im jab bõk ro jeir im jãtir ñõn imõn ekajet. (1 Kor. 6:1-7) Juõn jeer im jãter man ilo Amerika ear jerbale nan in kakabilek in. Ear or abañ ikõtairro booj eo an me ej juõn dri Kristian ilo jikin jerbal. Ear inebata kin wõnan eo booj eo an ejañin kõllãiki. Elõñ alen rar lor kien ko ilo Baibel bwe ren kwelok iben dron ñõn kamarmire abañ eo ak rar jab maroñ. Eliktata, rar kebak dri Kristian elder ro me rej jutõk ikijen “eklisia” eo kin abañ eo air.​—Mat. 18:15-17.

Bõtab, rar jab maroñ kamarmir abañ eo air. Elikin an leo jar elõñ alen kin abañ eo an, ear beek ñõn kejekron jããn ko booj eo ear jab kõllãik e. Etke? Ear ba tokelik, “Abañ eo ear kabwer iõ im bõk ien ko reaurõk imaroñ kar kajerbali ilo makõtkit ko an Kristian.” Elikin an kõmõne bebe eo an, man eo jeer im jãter ear bar mõnõnõ im lo an Jeova kejerammõn jerbal ko an.

Bareinwõt ilo Men ko Redrik

Jemaroñ bareinwõt bõk tokjen ilo men ko redrik ñe jejjab kõmõni men ko jekõnan meñe eor ar maroñ. Ilo ran eo jinointata ilo juõn kwelok elap, ruo dri belele rej pioneer rar mõkõjtok im kãlet jea ko rekõnan jijõt ie. Ke ear jino kwelok eo, juõn baamle elõñ nejiir ajiri rar rumijtok ñõn mõn kwelok eo eobrõk kin armij. Ke rar lo an baamle eo kabuk jikin air jijõt, dri belele ro rar lelok jea ko air ñõn ir. Men in ear kõmõn bwe aolepen baamle eo ren jijõt iben dron. Jejjo ran elikin kar kwelok elap eo, dri belele ro rar bõk juõn letter in kamolol jen baamle eo. Letter eo ear kwalok bwe rar lukkun buromõj ke rar rumijlok ñõn kwelok elap eo. Bõtab rar oktõk im mõnõnõ ke dri belele ro rar joij ñõn ir.

Ñe jej iion ien rot in, jen mõnõnõ in karmijete men ko jekõnan kõmõni bwe jen jibõñ ro jet. Ilo ar kwalok yokwe eo me “e jab kabukot men ko an,” jej kejbãrok ainemõn eo ilo congregation im iben ro dri turid. (1 Kor. 13:5) Elaptata jej kejbãrok jimjera eo ar iben Jeova.

[Pija eo ilo peij 20]

Kwoj mõnõnõ ke in karmijete men ko kwo kõnan ikijen wãwen am nuknuk?

[Pija eo ilo peij 20 21]

Kwoj mõnõnõ ke in lelok jea eo am ñõn ro jeim im jãtim bwe ren jijõt ie?