Kõtlok bwe Nan ko An Jisõs Ren Jelet Lemnok eo Am

“Bwe Eo Anij e ar jilkintok Ej konono nan ko an Anij.”​—JON 3:34.

1, 2. Jemaroñ keiri nan ko an Jisõs ion Tol eo ñõn ta, im etke jemaroñ ba bwe rej berber ion “nan ko an Anij”?

 JUÕN ian dreka taimon ko rekilep tata ranin me rej naetan Iju in Africa ej 530 karat kilepen (karat ej kein joñjoñ ñõn lale erro in taimon ko). Emol ej juõn dreka elukkun aurõk! Ak, men eo elaplok an aurõk ej nan ko an Jisõs jej loi ilo Katak eo an ion Tol eo. Jejjab bwilõñ kake men in kinke Jeova eo ej Unjen nan ko an Jisõs! Baibel eo ej ba ikijen Jisõs: “Eo Anij e ar jilkintok Ej konono nan ko an Anij.”​—Jon 3:34-36.

² Meñe emaroñ kar karulok jen jimõtõn auõ aitokin Katak eo an Jisõs ion Tol eo, ak ear eliji 21 ennan ko jen drualitõk ian buk ko kar jei ilo kajin Hibru. Alikar bwe ej lukkun berber ion “nan ko an Anij.” Jen lale kiõ ewi wãwen jemaroñ jerbali jet ian ennan kein rejej uair an Jisõs.

“Kwon Kainemõn Jeõm im Jãtõm Mokta”

3. Elikin an kar Jisõs kakkõl dri kalor ro kin tokjen ko renana kin drebij illu, ta nan in kakabilek eo ear lelok ñõn ir?

³ Einwõt dri Kristian ro, jej mõnõnõ im ainemõn kinke jitõb kwojarjar eo an Anij ej ber iber, im bareinwõt leen jitõb eo me ej kitibuj lõñliñ im ainemõn. (Gal. 5:22, 23) Jisõs ear jab kõnan bwe dri kalor ro an ren luji ainemõn im mõnõnõ eo air, inem ear kakkõl ir kin tokjen ko renana rej walok ñe eto  air drebij air illu, me emaroñ tellok ñõn air mij. (Riit Matu 5:21, 22.) Inem ear ba: “Inem elañe kwoj katok kin am jurtak i lokatok, im ijo kwoj kememej bwe eor am nana ñõn jeõm im jãtõm, Kwon likit am jurtak na iman lokatok, im ilok; kwon kainemõn jeõm im jãtõm mokta, inem item katok.”​—Mat. 5:23, 24.

4, 5. (a) Kar ta menin “jurtak” eo Jisõs ear konono kake ilo Matu 5:23, 24? (b) Ewi aurõkin ar kõmõn ainemõn iben ro jeer im jãter me jar lõkatipi ir?

⁴ Menin “jurtak” eo Jisõs ear konono kake kar jabrewõt menin katok ko me kar liloki ilo tempel eo ilo Jerusalem. Ñõn wanjoñok, katok eo kin menin mour ko ear aurõk kinke ear mõtõn wãwen kabuñ eo an armij ro ñõn Jeova. Bõtab, men eo eaurõklok Jisõs ear kalikar kake kar air kõmõn ainemõn iben ro jeir im jãtir mokta jen air lelok menin katok eo ñõn Anij.

⁵ Nan kein “kwon kainemõn” rej melelen ‘ñõn kakõmõnmõn kõtan eo am iben juõn.’ Inem, ta eo jemaroñ katak jen nan kein an Jisõs? Jej katak bwe kõtan eo ar iben ro jet ej jelet kõtan eo ar iben Jeova. (1 Jon 4:20) Emol, ilo ien ko etto elañe juõn ejjab jime an kõmõn ñõn ro mõtõn, inem menin katok eo ej lelok ñõn Anij enaj ejelok tokjen.​—Riit Micah 6:6-8.

Jej Aikwij Kwalok Etã Buru

6, 7. Etke jej aikwij kwalok etã buru ñe jej kõmõn ainemõn iben eo jar lõkatipe?

⁶ Kõmõn ainemõn iben eo jar lõkatipe ej melejoñwe ar etã buru. Ro etã burueir rejjab akwail iben dri tõmak ro mõtair ñõn kamol bwe ejime. Men in emaroñ kõmõn bwe en walok wãwen ko renana ikõtan armij ro ñõn dron, einlok wõt eo ear walok iben dri Kristian ro etto ilo Korint. Ikijen wãwen in, dri jilik Paul ear kwalok nan kein ñõn air lemnok kaki: “Inem ebwir otem bwir ibemi, bwe komij akwaile dron ilo kien. Etke e jab emõn ibemi bwe komin jorran? Etke e jab emõn ibemi bwe ren bõk men ko ami ilo mon?”​—1 Kor. 6:7.

⁷ Jisõs ear jab ba bwe unleplep in ar kennan iben eo jeer im jãter ej ñõn ar kamol ñõn e bwe ebwir. Ak mejenkajik eo ar en kar ñõn kõmõn ainemõn ikõtan dron. Ñõn kõmõne men in, jej aikwij mol ilo ar kwalok eñjake eo ar. Jej aikwij bareinwõt kile bwe armij eo juõn ej bar metõk. Im elañe jar bwir nae ir, ilo etã buru jej aikwij jolok ar bwir iben.

“Elañe Mejõm Anbijmaroñ ej Kejerawiwi Yuk”

8. Kwalok ilo tukaru kin ta eo Jisõs ear ba ilo Matu 5:29,30.

⁸ Ilo Katak eo an Jisõs ion Tol eo, ear letok nan in kakabilek eo emõn kin mour erreo. Ear jela bwe kin ar jab wãppen mõtõn ko ilo  enbwinir remaroñ jelet kij ilo juõn wãwen ekauwatata. Inem Jisõs ear ba: “Im elañe mejõm anbijmaroñ ej kejerawiwi yuk, kwon itike im joloke jen yuk; bwe emõn ñõn yuk, ñe ejoko juõn ian ra’m, im en jab jolok aolepen enbwinõm ilo Geena. Im elañe anbijmaroñõm ej kejerawiwi yuk, bukwe im joloke jen yuk: bwe emõn ñõn yuk ñe ejoko juõn ian ra’m, im en jab jolok aolepen enbwinõm ilo Geena.”​—Mat. 5:29, 30.

9. Ewi wãwen “mej” ko mejer im “pã” ko peir remaroñ kõmõn bwe jen “jerawiwi”?

⁹ “Mej” eo me Jisõs ear konono kake ej jutõk kin kajur ak maroñ eo ñõn kalimjek men ko, im “pã” eo ej jitõñlok ñõn men ko jej kõmõni. Elañe jejjab kejbãrok, mõtõn kein ilo enbwinir remaroñ kõmõn bwe jen “jerawiwi” im kabwijrõk ar “etetal iben Anij.” (Jen. 5:22; 6:9) Ñe jekõnan kõmõne juõn men me ej nae kien eo an Anij, jej aikwij kõmõn oktõk ko relap, einlok wõt ñe jej itiki mejer ak bukwe peir.

10, 11. Ta eo emaroñ jibõñ kij ñõn bõprae ar lũñ?

¹⁰ Ewi wãwen jemaroñ bõprae kij jen ar kalimjek men ko renana? Job, dri korijer eo an Anij ewãnik ear ba: “I ar kõmõn juõn bujen iben meja; inem ekijkan aõ maroñ in reilok ñõn juõn virjin?” (Job 31:1) Job ear or juõn belen im ear jab kõnan kokkure kien ko an Jeova kin mour erreo. En wãwen drein ar lemnok meñe jej juõn eo eor belen ak jab. Ñõn bõprae ar lũñ, jej aikwij bõk tel jen jitõb kwojarjar eo an Anij, me ej jibõñ ro rej yokwe Anij ñõn air kwalok jadõr.​—Gal. 5:22-25.

¹¹ Bwe jen bõprae mour etton, emõn bwe jen kajitõkin kij mõke, ‘Ij kõtlok ke bwe meja en kõmõn an walok kõnan ko renana ilo buruõ kin mõnit ko rejakkar me imaroñ loi ilo buk ko, TV, ak Internet’? Jen bareinwõt kememej nan kein an dri jilik Jemes: “A emwij kabo jabrewõt armij ñe mõm ko an rej karel buruen im kamej e. Inem ñe mõm eo e ar etta, ej keutak jerawiwi: im jerawiwi eo ñe e ridtolok, ej keutak mij.” (Jem. 1:14, 15) Emol, elañe juõn eo emwij an wujleplok mour eo an ñõn Anij im ej “kalimjek” juõn likao ak jiroñ kin an mijkaiye, ej aikwij mõkõj im kõmõn oktõk ko relap, einwõt ñe ej itiki mejen im joloke.​—Riit Matu 5:27, 28.

12. Ta nan in kakabilek eo an Paul emaroñ jibõñ kij ñõn tõrinaek mõm ko an kõniek?

¹² Kinke kajerbal peir ilo wãwen ko rejakkar remaroñ tel kij ñõn jerawiwi nae kien ko an Jeova kin mour erreo, jej aikwij beek ilo buruer ñõn drebij ar erreo. Kin men in, jej aikwij bokake nan in kakabilek in an Paul: “Inem komin kajeeklok ra ko rami rej ber ion lõl; lũñ, etton, kijoñ, mõm enana, im arõk mweiuk eo kabuñ ñõn ekjõp.” (Kol. 3:5) Nan in “kajeeklok” ej kalikar aikwij eo ñõn bõk buñten ne ko relap ñõn tõrinaek mõm ko an kõniek.

13, 14. Etke eaurõk bwe jen bõprae lemnok im kõmõn ko retton?

¹³ Ñõn kejbãrok mour eo an, armij eo ej aikwij mõnõnõ in mijmij im jolok mõtõn eo ilo enbwinin me ej kokkure e. Nan in kõkkar eo ñõn ‘joloke’ mejer im peir eaurõk ñõn ar bõprae an walok lemnok im kõmõn ko rejakkar me remaroñ kõmõn bwe jen luji buñburu eo an Jeova. Wãwen eo wõt jemaroñ ko jen joko in drio, me Geena ej kõkkar kake, ej ilo ar kejbãrok bwe jen erreo wõt ilo lemnok, mwil, im ilo jitõb.

¹⁴ Kinke jej jolit jerawiwi im jab wãppen, jej aikwij kate kij ñõn kejbãrok bwe en erreo mwilid. Paul ear ba: “A ij jekanunõk enbwiniõ, im kamakokoik e, bwe ilo jabrewõt, mõjen aõ kwalok gospel ñõn ro jet, ña in jab joko.” (1 Kor. 9:27) Kin men in jej aikwij beek ilo buruer ñõn jerbale nan in kakabilek eo an Jisõs kin mour erreo, im jab kõtlok bwe jen emmakit ilo jabrewõt wãwen me ej kwalok bwe ejelok ar kamolol kin katok in binmour eo an.​—Mat. 20:28; Hib. 6:4-6.

 “Komin Lelok”

15, 16. (a) Ewi wãwen Jisõs ear likit juõn joñok emõn kin mõnõnõ in lelok? (b) Ta melelen nan ko an Jisõs ilo Luk 6:38?

¹⁵ Nan ko an Jisõs im joñok eo an emõn rej kwalok juõn jitõb in mõnõnõ in lelok. Ear kwalok joij eo an elap ilo an kar itok ñõn lõl kin tokjen eo an armij ro rejjab wãppen. (Riit 2 Dri Korint 8:9.) Jisõs ear mõnõnõ in ilok jen eutiej eo an ilõñ ñõn an erom juõn armij im lelok mour eo an kin armij ro rejerawiwi, me jet iair renaj bõk jerammõn eo ñõn erom iroij ro mõtõn ilo Ailiñ eo. (Rom. 8:16, 17) Im Jisõs ear lukkun rejañ armij ro ñõn kwalok joij ke ear ba:

¹⁶ “Komin lelok, im naj lewoj ñõn kom; joñok emõn, joni, kamõkitikiti, im jiõblok naj lewoj na ilo ubõmi. Bwe kin joñok eo komij joñok kake, naj bar joñok ñõn kom.” (Luk 6:38) “Lewoj na ilo ubõmi” ej jitõñlok ñõn juõn mõnit an jet dri wiakake ro me rekin likit mweiuk ko na ilo nuknuk ko an dri wia ro me rar lukwoji ibiir bwe en einwõt juõn nien mweiuk. Ñe jej mõnõnõ in lelok, renaj mõnõnõ in jibõñ kij ñe jej ber ilo aikwij.​—Ekk. 11:2.

17. Ewi wãwen Jeova ear likit joñok eo emõntata kin mõnõnõ in lelok, im kain lelok rot emaroñ kalõñliñ kij?

¹⁷ Jeova ej yokwe im ej kejerammõn ro rej mõnõnõ in lelok. E mõke ear likit joñok eo emõntata kin mõnõnõ in lelok ikijen an kar letok eo ej mõke wõt Nejin “bwe jabrewõt eo ej liki E en jab joko, a en mour in drio.” (Jon 3:16) Paul ear je nan kein: “Eo ej jeor ine ko relõñ enaj lab an madmid. Innem kajjojo armij en lelok joñan eo ear bebe kake ilo buruen, jab kin kõlmadrok, jab kin kamakoko; bwe Anij ej yokwe eo ej lelok ilo mõnõnõ.” (2 Kor. 9:6, 7, UBS) Ñe jej lelok ien ko ar, kajur eo ar, im men ko mweier ñõn kowõnmanlok kabuñ eo emol enaj bõktok lõñliñ im jerammõn ko relap ñõn kij.​—Riit Jabõn Kennan Ko 19:17; Luk 16:9.

“Kwon Jab Jilil Imam”

18. Ta eo enaj kõmõn bwe en‘ejelok wõnãd’ iben Jemer ilõñ?

¹⁸ “Kejbãrok bwe komin jab kõmõnmõn ami kwojarjar iman mejen armij bwe ren lo kom; elañe jab einwõt, ejelok wõnãmi iben Jememiuij i lõñ.” (Mat. 6:1) Ikijen nan eo “kwojarjar,” Jisõs ear konono kin kõmõn ko me rej ekkar ñõn ankilan Anij. Ear jab melelen men in bwe jen jab kõmõn jerbal ko rekwojarjar ilobwilij, kinke ear jiroñ dri kalor ro an bwe “en romak [air] maram iman mejen armij.” (Mat. 5:14-16) Ak enaj ‘ejelok wõnãd’ iben Jemer ilõñ elañe jej kõmõni men  ko bwe ‘armij ren lo’ im nebar kij, einwõt ñe armij ro rej eb iman mejen ro jet. Elañe eñin ej unleplep in ar kõmõni men ko, jejamin lõñliñ kin juõn kõtan ebak iben Anij ak bõk jerammõn ko rej ñõn in drio iomin Ailiñ eo.

19, 20. (a) Ta melele eo an Jisõs ke ear ba bwe jen jab “jilil” ñe jej lelok “mweien tiriamo” ko? (b) Ewi wãwen ar jab kõtlok an anmiñ jela kin men eo anbijmaroñ ej kõmõne?

¹⁹ Elañe ejime lemnok eo ar, jenaj bokake nan in kakabilek in an Jisõs: “Inem ñe kwoj kõmõn am mweien tiriamo, kwon jab jilil imam, einwõt an ro dri jela mon kõmõnmõn iloan imõn kwelok ko, im ilo ial ko, bwe armij ren nebar ir. Emol Ij ba ñõn kom, Emwij air bõk wõnair.” (Mat. 6:2) “Mweien tiriamo” ko kar jabawõt ko armij ro rar liloki ñõn jibõñ ro rej aikwij. (Riit Aiseia 58:6, 7.) Jisõs im dri kalor ro an rar bareinwõt jabawõt ñõn jibõñ ro rej aikwij. (Jon 12:5-8; 13:29) Kinke uk jilik ko ear jab juõn men rar kõmõne mokta jen air kar lelok jabawõt ko air ñõn ro rej aikwij, alikar bwe Jisõs ear kajerbale einwõt juõn wanjoñok ke ear ba bwe jen jab “jilil” mokta jen ar lelok “mweien tiriamo.” Nan kein an ej melelen bwe jen jab kwalok ar lelok iman mejen armij ro, einwõt an kar dri Parisi ro kõmõne. Jisõs ear naetair ro dri jela mon kinke rar kemjãje kin jabawõt ko air rar lilok “iloan imõn kwelok ko, im ilo ial ko.” Dri jela mon rein “emwij air bõk wõnair.” Kinke Jeova ejamin lelok jabrewõt men ñõn rein, jinekjij eo wõt renaj bõke ej nebar jen armij im air jijõt iman ilo imõn kwelok ko iben rabbai ro. (Mat. 23:6) Bõtab, en kar ewi wãwen an dri kalor ro emmakit? Jisõs ear jiroñ ir im kij bareinwõt:

²⁰ “A ñe kwoj kõmõn am mweien tiriamo, anmiñõm en jab jela men eo an anbijmaroñõm kõmõn; Bwe en etino am mweien tiriamo: im Jemõm eo Ej lo ilo etino, E naj nawõnãm.” (Mat. 6:3, 4) Ekkã an pã ko peir jerbal iben dron. Inem, ar jab kõtlok an anmiñ jela kin men eo anbijmaroñ ej kõmõne ej melelen bwe jen jab kemjãje kin menin lelok ko ar, meñe ñõn ro jej ebake ir.

21. Nawõnan jen ‘eo Ej lo kij ilo etino’ ej kitibuj ta?

²¹ Elañe jejjab kemjãje kin menin lelok ko ar ñõn ro jet, “mweien tiriamo” ko ar renaj ittino. Inem Jemeruij, “eo Ej lo ilo etino,” enaj nawõnãd. Kin an Jeova jokwe ilõñ im armij ro rejjab maroñ loe, ‘etino’ ñõn ir. (Jon 1:18) Ar bõk wõnãd jen “eo Ej lo ilo etino” ej kitibuj an Jeova jibõñ kij kõmõn juõn kõtan emõn iben, jeorlok jerawiwi ko ar, im letok ñõn kij mour in drio. (Ken. 3:32; Jon 17:3; Ep. 1:7) Men in ej emõnlok jen ar bõk nebar jen armij ro!

Nan ko Jej Aikwij Kaurõki

22, 23. Etke jej aikwij kaurõk nan ko an Jisõs?

²² Katak eo an Jisõs ion Tol eo emol bwe eobrõk kin nan ko reaurõk me rej einlok wõt dreka ko raurõk im aibujuij. Ejelok berre bwe nan kein remaroñ bõktok lõñliñ meñe jej mour ilo juõn lõl enana. Aet, jenaj mõnõnõ elañe jej kaurõk nan ko an Jisõs im kõtlok bwe ren jelet lemnok ko ar im wãwen ar mour.

²³ Ro otemjej rej “roñjaki” im “kõmõnmõni” men ko Jisõs ear katakin kaki renaj jerammõn. (Riit Matu 7:24, 25.) Inem jen kate kij ñõn bokake nan in kakabilek ko an Jisõs. Jenaj etale nan ko jet an ilo Katak eo an ion Tol eo ilo katak eo eliktata ian katak kein.

Ewi Wãwen Am Naj Uak?

• Etke ej aurõk ñõn kõmõn ainemõn iben juõn eo jar lõkatip e?

• Ewi wãwen ar maroñ bõprae bwe ‘mejer’ en jab kõmõn ar jerawiwi?

• En kar ewi lemnok eo ar kin lelok?

[Kajitõk ko ñõn Katak]

[Pija eo ilo peij 11]

Ekanuij emõn ñe jej ‘kõmõn ainemõn’ iben dri tõmak eo mõtar me jar lõkatip e!

[Pija ko ilo peij 12, 13]

Jeova ej kejerammõn ro rej mõnõnõ in lelok