Class eo Ken Ka 125 Ear Kadrioijlok jen Gilead

Mijinede Ro Rar Bõk Rejañ bwe Ren Einwõt Jeremaia

JUÕN uan Governing Body eo etan Geoffrey Jackson ear ba, “Class in ilo jikuul in Gilead ej juõn class jejamin meloklok.” Ear konono iben 6,156 armij ro me rar ber ilo ien in rar kadrioijlok dri jikuul ro rar ber ilo class eo ken ka 125 an jikuul in Watchtower Bible School an Gilead ilo Jeptõmba 13, 2008. Jikuul in Gilead ear jilkinlok elõñlok jen 8,000 mejinede ro ekoba 56 dri jikuul ro jen class in ñõn ene ko “etolok tata i lõl.”​—Jerbal 1:8.

Dri tel eo an brokraam in kadrioijlok eo etan Brother Jackson ear kajitõk, “An armij liki yuk kin jerbal eo am enaj ke kakõmõnmõnlok jerbal eo am?” Ear kõlajrak emen men ko kwoj aikwij kõmõni bwe armij ren liki yuk: ej bõk juõn lemnok ejime, likit juõn joñok emõn, am katakin en berber ion Baibel eo, im kate wõt bwe kwon kwalok kin ãt eo etan Jeova.

Eo ej juõn uan Teaching Committee etan David Schafer ear kwalok katak eo “Kwonaj melele ke men otemjej?” Ear kalimur ñõn dri jikuul ro bwe renaj “melele men otemjej” rej aikwiji ñõn jerbal einwõt mejinede elañe rej bukot wõt Jeova im kõtãik ir ñõn “dri korijer e tiljek im meletlet.”​—Ken. 28:5; Mat. 24:45.

Bar juõn uan Governing Body John E. Barr ear kwalok katak eo, “Jab Kõtlok Bwe Jabrewõt Men En Kijbil Yuk Jen Yokwe An Anij.” Ilo yokwe ear kainemõn dri jikuul ro im ro jemeir jineir bwe ren jab inebata kin ta abañ ko mejinede rein rekãl renaj jelmae ilo ailiñ ko renaj etal ñõni. Ear kemelele bwe “yokwe eo an Jeova ej juõn jikin kone ilo mour eo ar.” Juõn wõt men emaroñ kijbil mejinede ro jen yokwe eo an Anij ej ñe renaj bebe in ellok jen Anij.

Sam Robertson eo ej jerbal ilo department eo ej lale Jikuul in Baibel ko ilo Patterson Bethel ear rejañ dri kwelok ro bwe ren kõnõk juõn “nuknuk ejej uan.” Ikijen air katak kin ta eo Jisõs ear kõmõne im jerbali ilo mour eo air, dri jikuul ro remaroñ “kõnõk Iroij Jisõs Kraist.” (Rom. 13:14) Bar juõn, William Samuelson, eo ej dri lale department in Jikuul in Baibel ko ilo Patterson Bethel, ear kalikar kin wãwen an juõn armij maroñ bõk koutiej, ej wawa ion lemnok eo an Anij im jab lemnok an armij.

Michael Burnett, juõn ian dri tel jikuul eo, ear kajitõkin dri jikuul ro kin ta tõbrõk ko rar loi jen air kar kwalok nan, ilo ien kar jikuul eo air. Meñe kar karõk dri jikuul ro ñõn kwalok nan ilo territory ko me ekkã an dri kwalok ro jen congregation ko jerbal ie ke rar ber ilo jikuul eo ilo Patterson, New York, ak rar lo wõt ro eor air itoklimo. Gerald Grizzle jen Department in karõk Kwelok ko relap, (Convention Office) ear kajitõkin jilu brother ro me rar ber ilo juõn jikuul me ej ñõn ro uan Branch Committee. Uak ko air rar lukkun jibõñ ñõn keboj dri kadrioijlok ro kin jerbal ko air rekãl.

Brother David Splane jen Governing Body me ear kadrioijlok jen class eo ken ka 42 jen jikuul in Gilead ear kwalok katak in “Einwõt Jeremaia.”  Meñe Jeremaia ear mijõk kin jerbal eo an, ak Jeova ear kaberan e. (Jerm. 1:7, 8) Enaj eindrein an Anij kõmõn bareinwõt ñõn mejinede rein rekãl. “Elañe kwoj inebata iben juõn armij,” Brother Splane ear ba, “kwon jijõt im je karkar ko joñoul remõn ibam kin armij eo kwoj inebata iben. Im elañe kwojjab maroñ bwine aolep karkar ko karkarin joñoul, inem melelen bwe kwojjab lukkun jela kajen.”

Ear or jitõbõn lelok iben Jeremaia. Ke ear kõnan bwijrõk jen jerbal eo an, ear jar, im Jeova ear ber iben. (Jerm. 20:11) Brother Splane ear ba, “Ñe kwoj eñjake am ebwer, kwon kwalok ñõn Jeova. Inem kwonaj bwilõñ kin wãwen an naj Jeova jibõñ yuk.”

Ilo jemlokõn kadrioijlok eo, dri tel program eo an kadrioijlok in ear kakememej ro rar ber ijo bwe dri jikuul ro rar katak elõñ wãwen ko ñõn an armij liki ir kin jerbal ko air. Ilo air wõnmanlok ilo jerbal in air, armij renaj liki ir im ennan eo rej kwalok kake ñõn armij enaj kakõmõnmõnlok jerbal eo air.​—Ais. 43:8-12.

[Bo̦o̦k eo ilo peij 22]

KEMELELE KO KIN CLASS EO

Oran ailiñ ko rar itok jeni: 6

Oran ailiñ ko kar jitõñ ir ñõni: 21

Oran aolep dri jikuul ro: 56

Joñõn ridtair: 32.9

Oran yiõ in air ber ilo mol eo: 17.4

Oran yiõ in air kwalok nan full time: 13

[Pija eo ilo peij 23]

125th Class in Kadrioijlok eo an Watchtower Bible School in Gilead

Ilo lajrõk eo itulal, rej bwini armij ro jen lain eo imantata ñõn tulik, im rar kõlajraki ãt ko jen tuanimiñ ñõn tuanbwijmaroñ in kajuju lain ko.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.