Nan ko an Jisõs Rej Jelet Ke Wãwen Am Jar?

“Ke emwij an Jesus kwalok men kein, elab an jar ko bwilõñ kin wãwen an katakin ir.”​—MATU 7:28, UBS.

1, 2. Etke jar ko rar bwilõñ kin wãwen an Jisõs katakin?

 JEJ aikwij bõk ñõn buruer nan ko an Jisõs Kraist, eo ej mõke wõt Nejin Anij, im jerbali ilo mour ko ar. Ejelok jabrewõt ear emõn an katakin einwõt e. Eñin unin armij ro rar bwilõñ kin wãwen an konono ilo Katak eo an ion Tol eo.​—Riit Matu 7:28, 29, UBS.

² Nejin Jeova ear jab katakin einwõt Skraib ro, me nan ko air rar berber ion katak ko an armij ro rejjab wãppen. Kraist ear katakin “einwõt juõn eo eor maroñ ibben” kinke men ko ear konono kaki rar itok jen Anij. (Jon 12:50) Kiõ jen lale wãwen nan ko tok jet an Jisõs ilo Katak eo an ion Tol eo ej aikwij jelet jar ko ar.

Jen Jab Jar einwõt Ro dri Jela Mon

3. Kemelele ilo tukaru kin point eo eaurõk ej walok ilo Matu 6:5.

³ Jar ej juõn men eaurõk ilo kabuñ eo emol, inem jej aikwij jar ñõn Jeova ien otemjej. Bõtab, nan ko an Jisõs ion Tol eo rej aikwij jelet wãwen jar ko ar. Ear ba: “Ñe komij jar, komin jab einwõt ro dri jela mon: bwe re kõnan jutõk im jar iloan imõn kwelok ko im i kãbon in ial ko, bwe armij ren lo ir. Emol Ij ba ñõn kom, Emwij air bõk wõnair.”​—Matu 6:5.

4-6. (a) Etke dri Parisi ro rar kõnan “jutõk im jar iloan imõn kwelok ko im i kãbon in ial ko”? (b) Ewi wãwen rein rejela mon “emwij air bõk wõnair”?

⁴ Ke rar jar, kar rejañ dri kalor ro an Jisõs bwe ren jab anõk ro “dri jela mon” einwõt Parisi ro me iman mejen armij rar einwõt dri kabuñ ro remol ak ilo burueir rar etolok jen Anij. (Matu 23:13-32) Armij rein rejela mon rar mõnõnõ in “jutõk im jar iloan imõn kwelok ko im i kãbon in ial ko.” Etke? “Bwe armij ren lo ir.” Ear juõn mõnit iben dri Ju ro ilo ien ko an Jisõs ñõn jar einwõt juõn jarlepju elap ke rar lelok menin katok ko ilo tempel eo (ilo druatimjuõn auõ jiboñ im jilu auõ ilo raelip). Elõñ armij ro rar jokwe ilo Jerusalem rekin jar ilo ejja ien eo wõt jarlepju in dri kabuñ ro jet iloan worwor eo rar jar. Inabijin worwor in Jerusalem ekkã an dri Ju ro “jutõk im jar iloan imõn kwelok ko” ruo alen ilo juõn ran.​—Keiri Luk 18:11, 13.

⁵ Kinke enañin aolep armij ro rar jab ber iturin tempel eo im imõn kwelok eo ke rar jar ilo ien ko me kar kwalok kake ilo  pãrokõrããp eo itulõñ, rar jar ilo jabrewõt jikin rar ber ie ilo auõ kein. Jet rar kanuij lale bwe ilo ien jar rej aikwij ber “i kãbon in ial ko.” Rar kõnan bwe armij ro rej itoitak ilo ial ko “ren lo ir.” Rein rejela mon rar “kimji armij kin an aitok air jar” bwe armij ro ren nebar ir. (Luk 20:47) Jen jab kõmõn eindrein.

⁶ Jisõs ear kwalok bwe rein rejela mon “emwij air bõk wõnair.” Rar lukkun kõnan bwe dri Ju ro mõtair ren kile im koutiej ir im eñin wãwen eo rar bõk wõnair. Eñin ãjinkij eo air kinke Jeova eban kar uaki jar ko air retao. Ilo ijo turãjet, Anij enaj kar uaki jar ko an dri kalor ro remol an Kraist, einwõt an walok ilo nan ko tok jet Jisõs ear ba ikijen men in.

7. Ta melelen nan in kakabilek eo ñõn jar ilo “ijo etino”?

⁷ “A kwe, ñe kwoj jar, kwon dreloñ iloan jikõm etino im ñe emwij kil am aur, kwon jar ñõn Jemõm ej ber ijo etino; im Jemõm ej lo ijo etino, E naj nawõnãm.” (Matu 6:6) Nan in kakabilek eo an Jisõs ñõn jar iloan juõn rum elikin an kil aur eo ear jab melelen bwe juõn ejjab maroñ jutõk iman congregation eo im jar. Unin ear kwalok nan in kakabilek in ej bwe jen jab jar iman mejen armij kinke jekõnan bõk nebar jen ir. Jej aikwij kememej men in ñe jej bõk jerammõn eo ñõn jar ilo ien kwelok ko. Jen bareinwõt jerbale nan in kakabilek ko jet an Jisõs kin jar.

8. Ekkar ñõn Matu 6:7, ta mõnit eo enana kin jar jej aikwij bõprae?

⁸ “Ñe komij jar, komin jab elij bata einwõt ro dri pegan: bwe rej lemnok naj roñjake ir kin an lõñ air konono.” (Matu 6:7) Jisõs ear bar kwalok juõn mõnit enana kin wãwen jar, elijin men. Ear jab melelen bwe jejjab aikwij eliji nan in kamolol im akwelap ko ñe jej jar. Ilo jikin kallip eo etan Getsemane ilo boñin eo mokta jen an kar mij, elõñlok jen juõn alen Jisõs ear ba ejja “nan ko” wõt ke ear jar.​—Mark 14:32-39.

9, 10. Ilo wãwen it eo jen jab elijin men ñe jej jar?

⁹ Ej juõn men ebwir elañe jej anõk wãwen an “dri pegan” ro jar im elijin men. Elõñ alen rej eliji nan ko rar kili ekoba elõñ nan ko ejelok tokjeir. Ekar ejelok tokjen an dri kabuñ ro an Beal kir anij wan eo air “jen jiboñ ñõn raelip, im re ba, O Beal, kwon eoroñ kim.” (1 Kiñ. 18:26) Ak ranin elõñ million rej jar im lemnok bwe Anij enaj “roñjake ir” kin an aitok air konono. Ak Jisõs ej jibõñ kij ñõn kile bwe Jeova ejjab kaurõk jar ko raetok im rej elijin men “kin an lõñ air konono” ekkar ñõn nan kein an itulõl.

¹⁰ Jisõs ej wõnmanlok im ba: “Inem komin jab kajeoñwe ir; bwe Jememiuij e jela men ko komij aikwij mokta jen ami kajitõk iben.” (Matu 6:8) Elõñ dri tel in kabuñ an dri Ju rar einwõt armij ro jen Ailiñ ko jet kin an aitok air konono ñe rej jar. Jar jen buru me ekoba nebar, kamolol, im akwelap rej mõtõn men ko reaurõk ilo wãwen ar kabuñ ñõn Anij eo emol. (Pil. 4:6) Ak ej juõn men ebwir ñe jenaj elijin men kin aikwij ko ar ñõn e, kinke ar kõmõne men in enaj einwõt ñe jej lemnok bwe Anij emãlele. Ñe jej jar, jej aikwij kememej bwe jej konono ñõn Eo ‘e jela men ko jej aikwiji mokta jen ar kajitõk iben.’

11. Ta eo jej aikwij in kememej ñe jej bõk jerammõn eo ñõn jar ibwiljin armij ro?

¹¹ Nan ko an Jisõs kin kain jar ko me rejjab emõn, ej aikwij kakememej kij bwe Anij ejjab buñburuen kin nan in nebar ko relã jen joñair im ejelok unir. Jej aikwij kememej bwe ñe jej jar ibwiljin armij ro ejjab juõn ien ñõn bõk nebar jen ro rej roñjake ak kõmõn air abnõnõ im kajitõk ibeir mõke im ba, ñãt eo jenaj ba “Amen.” Bareinwõt kwalok nan in kakememej ko ak koweik dri kwelok ro ilo jar ko ar ejjab ekkar  ñõn nan ko an Jisõs ilo Katak eo an ion Tol eo.

Jisõs ej Katakin Kij kin Wãwen Jar

12. Ewi wãwen kwonaj kar kemelele kin melelen nan kein “En kwojarjar Etõm”?

¹² Emol bwe Jisõs ear kakkõl dri kalor ro an bwe ren jab jar ilo wãwen eo ejjab jime, bõtab ear katakin ir kilen jar. (Riit Matu 6:9-13.) Jisõs ear jab kõnan bwe ren kili im eliji jar eo ear katakin ir kake. Ijellokin, jar eo an ear einwõt juõn joñok ñõn kij kin kilen jar. Ñõn wanjoñok, Jisõs ear likit Anij moktata ilo an kebellok jar eo an: “Jememuij i lõñ, En kwojarjar Etõm.” (Mat. 6:9) Ejime ar ãñiñin Jeova einwõt ‘Jemeruij’ kinke ej dri Kõmõnmõn eo ar ej jokwe “ilõñ,” ijo etolok jen lõl. (Dut. 32:6; 2 Kron. 6:21; Jerb. 17:24, 28) Nan in “Jememuij” ej kakememej kij bwe dri tõmak ro mõtar eor juõn air kõtan ebak iben Anij. “En kwojarjar Etõm” ej melelen bwe jej kajitõk iben Jeova bwe en kokwojarjar e mõke ikijen an karreoik etan jen aolep nan in riõp ko nae e jen ien eo armij ro rar jumae e ilo jikin kallip in Iden. Ilo an Jeova uake jar in, enaj jolok nana otemjej jen lõl im kokwojarjar ãt eo etan.​—Ezek. 36:23.

13. (a) Ewi wãwen nan kein “en itok am Ailiñ” enaj jejit kitieir? (b) Kõmõnmõn ankilan Anij ion lõl enaj kitibuj ta?

¹³ “En itok Am ailiñ. Ren kõmõnmõn ankil Am einwõt i lõñ, bareinwõt ion lõl.” (Mat. 6:10) Ikijen nan kein ilo jar eo an, jej aikwij kememej bwe “ailiñ” eo ej kien eo an Anij ilõñ me ej ber iomin iroij eo an Kraist im “armij ro dron” emwij kajerkakbijeik ir. (Dan. 7:13, 14, 18; Ais. 9:6, 7) Jar bwe en “itok” ej melelen jej kajitõk bwe Ailiñ in Anij en itok im kejebeblok aolep ro ion lõl me rej jumae kien eo an Anij. Mõtõn jidrik men in enaj walok, im naj keboj juõn ial bwe aolepen lõl en erom juõn paredais ewãnik, ainemõn, im jokõne. (Sam 72:1-15; Dan. 2:44; 2 Pit. 3:13) Anij ej wõnmanlok wõt ñõn kajejit ankilan ilõñ. Im ñe jej kajitõk bwe en kõmõnmõn ankilan ion lõl ej melelen bwe en kajijet kitien aolep karõk ko an kin lõl in. Men in ekoba jolok aolep dri jumae ro an ilo ran kein einwõt ear kõmõne ilo ien ko etto.​—Riit Sam 83:1, 2, 13-18.

14. Etke ekkar bwe jen kajitõk kin “kijim ranin”?

¹⁴ “Ranin Kwon letok ñõn kim kijim ranin.” (Matu 6:11; Luk 11:3) Ñe jej jar kin men in, jej kajitõk iben Anij bwe en letok kijed “ekar ñõn ran eo.” Men in ej kalikar bwe jej tõmak bwe Anij enaj kabwe aikwij ko ar kajuju ran. Ejjab melelen bwe jej aikwij jar kin aikwij ko ar le jen joñõn. Ñe jej jar bwe Anij en letok aikwij ko ar ñõn ranin wõt, ej  kakememej kij kin ien eo Anij ear kaiñi dri Israel ro bwe ren aini manna ko “ekar ñõn jabrewõt ran, ilo ran eo.”​—Ex. 16:4.

15. Ta jej aikwij kõmõne elañe jekõnan bwe Jeova en jeorlok bwir ko ar?

¹⁵ Kiõ ilo jar eo an ej kwalok kin juõn men jej aikwij kõmõne. Jisõs ear ba: “Im jolok amuij muri ibõm, einwõt kim ar jolok an armij muri ibem.” (Matu 6:12) Gospel eo an Luk ej kwalok bwe “muri” ko rej “jerawiwi” ko. (Luk 11:4) Jeova enaj jolok bwir ko ar wõt elañe jej jolok bwir ko an armij ro rar bwir nae kij. (Riit Matu 6:14, 15.) Jej aikwij mõnõnõ in jolok an ro jet bwir.​—Ep. 4:32; Kol. 3:13.

16. Ta melelen nan kein ikijen “jab kadreloñ kim ilo kabo” im “lomoren kim jen eo enana”?

¹⁶ “Jab kadreloñ kim ilo kabo, a lomoren kim jen eo enana.” (Mat. 6:13) Ta melelen kajitõk kein ruo ilo jar eo an Jisõs? Ej juõn men emol bwe Jeova ejjab kabo kij ñõn kõmõn jerawiwi. (Riit Jemes 1:13.) Setan, “eo enana” ej “dri kabo” eo. (Mat. 4:3) Inem nan kein “jab kadreloñ kim ilo kabo” ej juõn kajitõk bwe Jeova en jab kõtlok bwe jen bo ilo kabo ko im jumae e. Eliktata, nan kein “lomoren kim jen eo enana” ej juõn kajitõk bwe Jeova en jab kõtlok bwe Setan en bõk anjo iod. Inem jemaroñ liki bwe ‘Anij E jamin likit bwe ren kabo kij elap jen ar maroñ.’​—Riit 1 Dri Korint 10:13.

‘Kajitõk, Kabukot, Kalõllõl’

17, 18. Ta melelen ñõn ‘kajitõk, kabukot, im kalõllõl’?

¹⁷ Dri jilik Paul ear rejañ dri tõmak ro mõtõn: “Komin niknik ilo jar.” (Rom. 12:12) Jisõs ear kwalok kin ejja men in wõt ke ear ba: “Kajitõk im naj lewoj ñõn kom; kabukot im kom naj lo; kalõllõl, im naj kebellok ñõn kom: Bwe eo ej kajitõk ej bõk, im eo ej kabukot ej lo, im eo ej kalõllõl naj kebellok ñõn e.” (Mat. 7:7, 8) Ejime im ekkar bwe jen “kajitõk” kin jabrewõt men ej ekkar ñõn ankilan Anij. Ilo an errã iben nan ko an Jisõs, dri jilik Jon ear je: “Eñin beran eo iber ñõn E, bwe elañe jej kajitõk iben kin jabrewõt men eo ekar ñõn ankil An, Ej roñjake kij.”​—1 Jon 5:14.

¹⁸ Nan in kakabilek eo an Jisõs ñõn ‘kajitõk im kabukot’ ej melelen bwe jej aikwij niknik ilo jar im jab ebwer. Jej aikwij bareinwõt “kalõllõl” bwe jen bõk jerammõn, tokjen, im ãjinkij ko an Ailiñ eo. Ak jemaroñ ke liki bwe Anij enaj uaki jar ko ar? Aet jemaroñ elañe jej tiljek ñõn Jeova, kinke Kraist ear ba: “Eo ej kajitõk ej bõk, im eo ej kabukot ej lo, im eo ej kalõllõl naj kebellok ñõn e.” Elõñ bwebwenato ko kin dri korijer ro an Jeova rar kamol bwe Jeova ej ‘dri roñjake jar.’​—Sam 65:2.

19, 20. Ewi wãwen nan ko an Jisõs ilo Matu 7:9-11, rej kwalok bwe Jeova ej einwõt juõn jemen ej yokwe eo nejin?

¹⁹ Jisõs ear keiri Anij ñõn juõn jemen eo ej yokwe nejin ilo an lelok men ko remõn ñõn eo nejin. Baj lemnok mõk elañe kwar ber ilo ien eo Jisõs ear kwalok Katak eo an ion Tol eo im roñ an Jisõs ba: “Ak wõn armij iami, elañe nejin eman ej kajitõk bred, e naj lelok ñõn e dreka? Ak elañe ej kajitõk iik, e naj lelok ñõn e serpent ke? Inem elañe kom, dri nana, kom jela lelok men ko remõn ñõn ro nejimi, ekijkan e jab laplok an Jememiuij i lõñ lelok  men ko remõn ñõn ro rej kajitõk iben ke?”​—Mat. 7:9-11.

²⁰ Meñe juõn jemen ej einwõt juõn “dri nana” kin an jolit jerawiwi, ej yokwe eo nejin. Eban mone ajiri eo nejin ak enaj lelok “men ko remõn” ñõn e. Eindrein Jemeruij ilõñ ej letok “men ko remõn” ñõn kij einwõt jitõb kwojarjar eo an kinke ej yokwe kij. (Luk 11:13) Jitõb kwojarjar eo an emaroñ kakajur kij ñõn kõmõni jerbal ko remõn ñõn Jeova, dri letok “men in letok emõn im wãppen otemjelok.”​—Jem. 1:17.

Wõnmanlok im Bõk Tokjen Jen Nan ko an Jisõs

21, 22. Etke katak eo ion Tol eo ej juõn katak ekabwilõñlõñ, im ewi am lemnok kin nan ko an Jisõs?

²¹ Katak eo ion Tol eo ear juõn katak elukkun buñbuñ im emõntata ion lõl. Ear juõn katak ekabwilõñlõñ kinke ej katakin kij kin Anij im melele ko relukkun alikar. Ikijen aolep kemelele ko relap jar bõk jen katak kein jilu ikijen katak eo an Jisõs ion Tol eo, alikar bwe jemaroñ bõk elap tokjen elañe jej jerbali nan in kakabilek ko kar kwalok kaki jen katak eo an. Nan kein an Jisõs remaroñ kakõmõnmõnlok mour eo ar kiõ im letok ñõn kij juõn kejatrikrik elemõnõnõ kin juõn ilju im jeklaj emõn.

²² Ilo katak kein jilu, jar etali jet ian nan ko elap tokjeir kin Anij ilo katak eo an Jisõs ion Tol eo. Ro rar roñjake katak eo an rar “bwilõñ kin wãwen an katakin ir.” (Mat. 7:28, UBS) Ejelok berre bwe enaj eindrein iber ñe jej kobrõk lemnok ko ar im buruer kin katak ko an im nan ko jet reaurõk an dri Kaki eo Elap, Jisõs Kraist.

Ta Uak ko Am?

• Ta eo Jisõs ear ba kin jar ko an ro dri jela mon?

• Etke jej aikwij jab elijin men ñe jej jar?

• Ta kajitõk ko rej ber ilo jar eo an Jisõs?

• Ewi wãwen jemaroñ wõnmanlok im ‘kajitõk, kabukot, im kalõllõl’?

[Kajitõk ko ñan Katak]

[Pija eo ilo peij 15]

Jisõs ear kananaik ro dri jela mon me rar kimji armij kin jar ko air

[Pija eo ilo peij 17]

Kwo jela ke etke ekkar bwe jen jar kin men ko kijed kajuju ran?