Wãwen Dri Kristian Ro Rej Watõk Mõnit ko ilo Ien Mij Ko

KWOMAROÑ roñ ainiken an armij ro jõñ. Ro rej jõñ rej kõnõk nuknuk ko rekilmej im ebaje lõl kin air buromõj. Rej likit jããn im menin lelok ko iturin box in dri mij eo. Ien ta kein? Erkein jet ian mõnit ko elõñ buki armij ro rej kõmõni ñõn kajemlok iben armij eo emij.

Elõñ dri Kennan ro an Jeova rej jokwe ilo bukwon ko me elap an ro nukiir im dri turiir tõmak ilo kajitõbtõb im rej abwinmõke kin ro remij. Elõñ armij ro rej tõmak bwe ñe emij juõn armij ej erom juõn jitõb im eor an maroñ ñõn jibõñ ak kejorran ro remour. Tõmak in ej ekkeijaklok iben mõnit ko armij ro rej kõmõni ñe emij juõn armij. Emol bwe ejjab nana ñõn buromõj ñe juõn armij emij. Eor ien Jisõs im dri kalor ro an rar buromõj im jõñ kin ro rejitenburu ibeir rar mij. (Jon 11:33-35, 38; Jerb. 8:2; 9:39) Bõtab, rar jab kwalok air buromõj le jen joñõn me armij ro ilo ien ko air rekin kõmõne. (Luk 23:27, 28; 1 Tes. 4:13) Etke? Juõn un ej kinke rar jela mol eo kin ro remij.

Baibel eo ej ba ilo alikar: “Ro re mour re jela bwe re naj mij: a ro re mij ejelok air jela . . . Air yokwe, im bareinwõt air kijirãt im junmar, re joko eto; . . . bwe ejelok jerbal, ak men in kine, ak jela, ak meletlet, ilo Hedis [lũp eo lũpõn armij], ijo kwoj ilok ñõn e.” (Ekk. 9:5, 6, 10) Nan kein rej kalikar bwe ñe juõn armij emij ejelok an jela kin jabrewõt. Ejjab maroñ lemnok, eñjake jabrewõt men, konono, ak jela kin men ko rej walok. Ewi wãwen melele eo ar kin katak in emol ilo Baibel ej jelet wãwen an dri Kristian ro kõmõni ien mij ko?

“Jab Uñir Jabrewõt Men eo E Jab Erreo”

Jekron ta ailiñ eo air, dri Kennan ro an Jeova rej lukkun kejbãrok ir jen jabrewõt mõnit ko me rej rejetak tõmak eo bwe ro remij eor air jela im remaroñ jibõñ ak kokkure ro remour. Mõnit kein einwõt emmij, eoreak ak kajemlok, kab mõña iben dron ñõn kakememej ran in mij ko, bõk kolan bõran ak aki in pein im neen dri mij eo im kalibwini iturin lũp eo lũpõn tokelik, katok ñõn ro remij, im mõnit eo bwe limaro emij leo beleir ren kiki ilo juõn wõt rum iturin eo beleir emij im ilo ien eo emo air tutu im kwal peir mokta jen air mõña. Rej aolep mõnit ko Anij ejjab buñburuen kaki kinke rej ekkejellok ñõn katak ko an dimon ro bwe an armij eban mij. (Ezek. 18:4) Dri Kristian ro remol rejjab “maroñ in mõña jen tebel an Iroij, im jen tebel in dimon rõn.” Kin men in rejjab bõk kwonair ilo mõnit kein. (1 Kor. 10:21) Rej bokake kien eo ñõn “kamõkelok [iair], . . . im jab uñir jabrewõt men eo e jab erreo.” (2 Kor. 6:17) Bõtab ejjab aolep ien ebiruru ñõn kajenolok kij jen mõnit kein.

Elõñ rej tõmak bwe elañe rejjab lor jet mõnit ko kin mij renaj kaillu armij eo emij im ro nukiir remij. Joñõn air kaillu jitõb rein remaroñ bõktok jorran im jerata ñõn aolep armij ro ilo bukwon eo. Elõñ armij ro rar notaik im kajirere kake ro dron Jeova im watõk ir einwõt armij nana  kinke rej makoko in bõk kwonair ilo mõnit ko rejjab ekkar ñõn Baibel eo. Jet rar kananaik ir im ba bwe rej drike armij im ejelok air koutiej ro remij. Jet ien, ro dri jab tõmak rej kajerbal kajur eo air mõke ñõn bõk erron kõmõni ien mij ko an dri Kristian ro remol. Inem, ewi wãwen jemaroñ uak ro me rej kõnan wõt edrep ñõn mõnit ko kin mij me Anij ejjab buñburuen kaki? Kajitõk eo elaplok an aurõk ej, ta eo jemaroñ kõmõne ñõn kajenolok kij jen mõnit ko retton me remaroñ kokkure kõtan eo ar iben Jeova?

Kõmõn bwe Jokãlet eo Am En Alikar

Ilo jet jikin ko ilo lõl in, ej juõn mõnit bwe ridto ro im ro nukin baamle eo an eo emij ren kõmõni bebe ko kin mij eo. Kin men in, juõn dri Kristian etiljek ej aikwij kalikar bwe dri kennan ro an Jeova renaj lolorjake im kõmõne ien mij eo air ekkar ñõn nan in kaiñi ko ilo Baibel eo. (2 Kor. 6:14-16) Men ko rej walok ilo ien mij eo an juõn dri Kristian rejjab aikwij kokkure bõklikõt ko an dri tõmak ro mõtar ak kalõkatip ro jet me rejela kin tõmak eo ar im men ko jej katakin kaki kin ro remij.

Ñe juõn jeer im jãter ej kajitõk bwe congregation eo en lolorjake ien mij eo an baamle eo an, elder ro remaroñ kwalok jet nan in kakabilek ko ñõn kemeleleik e bwe karõk ko renaj kõmõni kin mij eo renaj ekkar ñõn nan in kaiñi ko ilo Baibel. Elañe armij ro rejjab ber ilo tõmak rekõnan kobaiki mõnit ko rejakkar, elukkun aurõk bwe jen jutõk bin im ilo beran kemeleleik ir kin bebe eo ar einwõt juõn dri Kristian, bõtab en ilo joij im ilo koutiej. (1 Pit. 3:15) Ak ta elañe ro nukõm rejjab dri Kennan ro an Jeova me rej tel ien mij eo rekõnan wõnmanlok wot im kobaiki mõnit ko rejakkar? Inem baamle eo am rej ber ilo tõmak remaroñ beek ñõn etal jen ien in. (1 Kor. 10:20) Ñe wãwen in ej walok, remaroñ kõmõne katak in mij eo ilo Imõn Kwelok eo ak ilo juõn jikin ekkar, im lelok nan in kainemõn “jen Jeje ko” ñõn ro me relukkun buromõj kin eo ejitenburu ibeir ear mij. (Rom. 15:4) Meñe enbwinin eo emij ejjab ber ilo ien eo, karõk in enaj kwalok koutiej im ejime im jejit ekkar ñõn Baibel eo. (Dut. 34:5, 6, 8) Bwoktak ko jen ro dri jab tõmak emaroñ kainebata im kaburomõj baamle eo ilo ien in. Ak jemaroñ bõk kainemõn ilo ar jela bwe Jeova, eo ej letok “maroñ eo e kanuij lap,” ej lo ar kate kij ñõn kõmõne men eo ejime.​—2 Kor. 4:7.

Kwon Je ilo juõn Peba kin Tibrikin Men Ko Kwokõnan

Elañe juõn armij ej jeje ilo tibrikin kin ta eo ekõnan ikijen karõk ko kin mij eo an,  enaj birurulok ñõn an baamle eo an kemelele ñõn ro dri jab tõmak, kinke ekkã air koutiej bebe eo an eo emij. Men ko reaurõk rej aikwij jeje ilo tibrikin ej, wãwen air kajejit karõk ko kin ien mij eo, ia eo rej aikwij kõmõne, im wõn eo enaj bõk erron im lolorjake ien eo. (Jen. 50:5) Men eo aurõktata ej ñe eo ej kõmõne bebe eo im dri kamol ro an rej je eltan peir ilo peba eo. Ro me rej lemnok kin ilju im jeklaj ilo lolokjen im meletlet ekkar ñõn Baibel eo, rejela bwe rejjab aikwij kõtar mae ien rej bwijwõlã ak bõk juõn nañinmij elap mokta jen air kõmõne men in.​—Ken. 22:3; Ekk. 9:12.

Jet rej ãliklik in je tibrikin men ko rekõnan bwe ren kõmõni ilo ien mij eo air. Bõtab, ar jei kõnan ko ar ej kamol bwe jej juõn dri Kristian eridto ilo jitõb im jej lemnok kin ro jet. (Pil. 2:4) Emõnlok ñe juõn ej mõke kõmõni karõk kein mokta jen an mij, jen an kõtlok bwe ro uan baamle eo ren inebata im iion ijjibed ko jen ro jet ñõn kobaik mõnit ko rejakkar me ejjab tõmak kaki im eban kar kõmõni.

Kõmõn bwe Ien Mij eo En Lamwan

Eor juõn mõnit ebuñbuñ bwe wãwen air kõmõne ien mij eo ej aikwij lap im kabwilõñlõñ bwe ren jab kaillu armij eo emij im jitõb ro nukiir. Ro jet rej kajerbal ien mij ko einwõt juõn ien emõn ñõn kimji armij bwe rej yokwe eo emij, im kwalok bwe remweie ak eor air jããn. (1 Jon 2:16) Rej jolok elap ien im jããn im men ko jet ñõn kõmõn bwe ien mij eo en lukkun emõn. Men in emaroñ kitibuj air kaitoklok ran ko ak wik ko bwe ren maroñ kabuk jããn ñõn wiaik aolep men ko rej aikwiji ilo ien mij eo, ekoba wõnan bõklok dri mij eo im baamle eo an ñõn ene ko eneir ñõn kalibwini ie. Ekkã air karõk mweo enbwin eo enaj babu ie im ijo armij ro renaj buromõj lok iben baamle eo ie. Rej najirik ro nukin im ro mõtõn eo emij me rej buromõj lok ibeir, im jet ien rein rej kiki iloan ak inabijin mõn mij eo. Ñe ran in kallip eo ej rumijlok, inem baamle eo enaj aikwij jolok elaplok jããn ñõn air kabwe men ko kõbwebweien mij eo, men in ekkã an bõktok abañ kin jããn ñõn baamle eo. Kajerbal ien im jããn ko ilo meletlet enaj bõprae bwe baamle  eo an eo emij en jab mad jen makõtkit ko ilo jitõb.​—Pil. 1:10.

Dri Kristian ro reridto ilo jitõb rej lo tokjen ilo air kejbãrok ir jen mõnit kein elã jen joñair me armij ro rejjab jela ak kea kin nan in kaiñi ko an Anij rej kõmõni. Jejela bwe mõnit ko elã jen joñair im ejelok berberir ilo Baibel ‘re jab an Anij a rej an lõl eo e jokolok.’ (1 Jon 2:15-17) Jej aikwij kejbãrok kij jen ar reel ilo mõnit kein rej kwalok jitõbõn kimjãje kin ar kõnan bwe ien mij eo ar en emõnlok jen eo an ro jet. (Gal. 5:26) Jejela bwe ñe mijõk ro remij ej men eo aurõktata ilo mõnit im mour ko an armij ro, ekkã an lap jerbal im bin ñõn lolorjake ien mij ko im biruru an or bwoktak ko. Le jen joñõn koutiej ro remij ak kabuñ ñõn ir emaroñ kamakit ro dri jab tõmak ñõn kõmõni mõnit ko rejakkar. Ilo ien mij ko, armij ro rej jõñ im ebaje lõl kin air buromõj, rej atbokwõj dri mij eo, rej konono ñõn e einwõt ñe emour, im rej likit jããn im menin lelok ko iturin enbwin eo. Elañe rej kõmõne men in ilo ien mij ko an dri Kristian ro enaj katton etan Jeova im armij ro an.​—1 Pit. 1:14-16.

Ar jela kin mol eo kin wãwen ro remij, men in enaj kaberan kij bwe jen jab kobaiki mõntin dri lõl in ilo ien mij ko. (Ep. 4:17-19) Meñe Jisõs ear juõn armij ebuñbuñ im aurõktata, kar kalibwini ilo juõn wãwen elamwan im ear jab kalõkatip armij. (Jon 19:40-42) Ñõn ro im eor ibeir “lolãtãt an Kraist,” rejjab jook ñe enaj wãwen drein ien kallip eo air. (1 Kor. 2:16) Aet, ar kõmõn bwe ien mij ko ar ren lamwan im jab kalõkatip ej wãwen eo emõntata ñõn kejbãrok kij jen mõnit ko rejakkar im ej drebij mejatoto in ainemõn me ej kwalok koutiej im ejejit im ekkar ñõn ro rej yokwe Anij.

Elikin Ien Kallip

Elikin ien kallip eo, ekkã an armij ro wõnmanlok im kõmõni mõnit ko rejakkar kin mij. Ilo jet jikin ko, baamle ko rej mirik eo emij ikijen air jolok an dron bwir kin aolep abañ im drike dron ko rar walok ikõtair. Ñõn wanjoñok, ilo jet ene ko rej erõk lã ko remouj iturin lũp eo. Lã kein rej kakõlõn erreo im jolok bwir. Elõñ rej tõmak bwe elañe rejjab lore mõnit kein renaj kaillu jitõb ro remij.

Dri Kristian ro remol rejela kin ta eo ej walok ñõn ro remij, im rejjab abwinmõke kin ir. (Ekk. 9:5, 10) Kin men in, ñe dri Kristian ro rejela bwe mõnit ko rej kõmõni ilo ien mij ko rej kitibuj kajitõbtõb, enaj juõn men ejakkar bwe ren bõk kwonair ie. An juõn bõk kwonan ilo mõnit kein me rej jumae nan in kaiñi ko ilo Baibel enaj kwalok bwe ejelok an koutiej Anij im bõklikõt eo an dri korijer ro an Jeova.

Kõtlok bwe Ro Jet Ren Lo Oktõk Eo

Jej mõnõnõ bwe jej anemkwoj jen mijõk ro remij, men eo me ekkã an walok iben ro rejañin jela kin mol eo! (Jon 8:32) Einwõt “ro nejin maram,” jej kwalok ar buromõj ilo juõn wãwen ekõketak, elamwan, ar kwalok koutiej, im eor juõn kejatrikrik kin jerkakbiji. (Ep. 5:8; Jon 5:28, 29) Kejatrikrik in enaj bõprae an le jen joñõn ar buromõj me ekkã ar lo ibwiljin ro “ejjelok air kejatdrikdrik.” (1 Tes. 4:13, UBS) Enaj kaberan kij ñõn jutõk bin kin kabuñ eo emol, im jab ebwer kin ar mijõk armij.​—1 Pit. 3:13, 14.

Ar tiljek im bokake nan in kakabilek ko ilo Baibel rej kõmõn bwe armij ro ren lo oktõk eo ikõtan ‘ro rej jerbal ñõn Anij, im ro rejjab jerbal ñõn e.’ (Mal. 3:18, UBS) Juõn ran enaj ejelok bar mij. (Rev. 21:4) Mae ien eo jej lo an jejit kitien kalimur in, jej kejatrikrik bwe Jeova en watõk kij einwõt armij ro rejjab mãr, im ejelok notair im rej jenolok jen lõl in enana im mõnit ko ie rejjab koutiej Anij.​—2 Pit. 3:14.

[Pija eo ilo peij 30]

Ej juõn menin meletlet ñõn je tibrikin men ko jekõnan ikijen karõk ko kin mij eo ar

[Pija eo ilo peij 31]

Ien mij ko an dri Kristian ro rej aikwij lamwan im or koutiej ie