Ewi Wãwen Kwomaroñ Kijenmij ilo Jerbal in Kwalok Nan?

KWO nañin ke kar iñjake am lukkun mõk im ebwer im kõnan bwijrõk jen am bõk kwonam ilo jerbal in kwalok nan? Jumae ko relap, inebata ko ilo mour, nañinmij, ijjibed ko jen ro jet, ak jab lo tõbrõk remaroñ melejoñwe kijenmij eo ar. Bõtab, lemnok kin joñok eo an Jisõs. Ear kijenmij iomin melejoñ ko relap “kin lõñliñ eo ej bed iman.” (Hib. 12:2, UBS) Ear jela bwe an kijenmij enaj kamol bwe nan in kinaak ko nae Anij rejjab mol, im enaj kamõnõnõik buruen Jeova.​—Ken. 27:11.

Kwe bareinwõt kwomaroñ kamõnõnõik buruen Jeova ikijen am kijenmij ilo jerbal in kwalok nan. Bõtab, ta elañe eor jet abañ ko rej kamõjnoik yuk jen am kwalok nan? Juõn lilap etan Krystyna im ejjab emõn ejmour eo an, ear ba: “Ekkã aõ mõk im buromõj. Abañ ko rej walok kin aõ ridto einwõt nañinmij im inebata ko kin mour remaroñ jet ien kadriklok kijejeto eo aõ.” Ewi wãwen kwomaroñ kijenmij wõt ilo jerbal in kwalok nan meñe kwoj jelmae kain abañ rot kein?

Kajeoñwe Dri Kanan Ro

Ñõn kijenmij wõt ilo jerbal in kwalok nan, dri kwalok ro retiljek kin Ailiñ eo remaroñ kate ir ñõn bõk ejja lemnok eo wõt an kar dri kanan ro etto. Lemnok kin joñok eo an Jeremaia. Ke kar kalet e bwe en jerbal einwõt juõn dri kanan, ear jenliklik ilo jinoin. Bõtab, Jeremaia ear maroñ in kijenmij ilo jerbal eo an ebin iomin 40 yiõ ko kinke ear katak ñõn liki Anij kin aolepen buruen.​—Jerm. 1:6; 20:​7-11.

Henryk ear bõk rejañ jen joñok eo an Jeremaia. Ear ba: “Iomin elõñlok jen 70 yiõ ko ilo jerbal in kwalok nan, eor ien iar ebwer kin wãwen an armij ro emmakit, air jumae, im jab itoklimo. Ilo ien rot kein, ij kakememej ña mõke kin joñok eo an Jeremaia kin wãwen yokwe eo an ñõn Jeova im an kajur ilo jitõb ear kamaroñ e bwe en wõnmanlok wõt im kanan. (Jerm. 1:​17) Rafal bareinwõt ear bõk rejañ jen joñok eo an Jeremaia. Ej ba: “Jen an Jeremaia lemnok kin e mõke im eñjake ko an, ear atartar wõt ion Anij. Ear wõnmanlok wõt ilo beran meñe elõñ rar jumae e. Ij kajeoñ in kememej men in.”

Bar juõn dri kanan me joñok eo an ej jibõñ elõñ ñõn kijenmij ilo jerbal in kwalok nan ej Aiseia. Anij ear jiroñ e bwe armij ro jen ailiñ eo an rejamin roñjake e. Jeova ear ba: “Kwon kõmmõn bwe armij rein ren binawia, im jarroñroñ.” Melelen ke bwe Aiseia eban lo tõbrõk? Ear jab eindrein lemnok eo an Anij! Ke kar jitõñ Aiseia ñõn bõk jerbal in kanan, ear ba: “Ñae! Kwon jilkinlok iõ!” (Ais. 6:​8-​10, UBS) Aiseia ear wõnmanlok wõt im kõmõne jerbal eo an. Eindrein ke am emmakit ñõn kien eo kin jerbal in kwalok nan?

Ñõn kijenmij ilo jerbal in kwalok nan einwõt Aiseia meñe ejelok an armij ro itoklimo, jej aikwij in jab lemnok kin ien ko me armij ro rar kejekron ennan eo ar. Rafal ej bõk anjo ion ebwer ilo wãwen in: “Ij kajeoñ in jab lemnok kin nan ko rejjab joij an armij ro. Ro ilo jikin eo kimij kwalok nan ie eor air maroñ ñõn ba men eo rekõnan.” Anna ej kakobaba: “Ij kate wõt iõ bwe in jab lemnok kin jabrewõt men enana im ekabwerer. Men eo ear jibõñ iõ ñõn kõmõne men in ej ilo aõ jar im riiti buk in Liñõri Jeje ko Ran Otemjej mokta jen aõ etal im kwalok nan. Men in ej kõmõn bwe en mõkõj an lemnok ko renana joko.”

Dri kanan Ezekiel ear jerbal ibwiljin dri Ju ro ebin burueir me rar jebokwe ilo Babilõn. (Ezek. 2:​6) Elañe dri kanan in ear drebij nan  ko an Anij jen armij ro, im jabrewõt eo enana ej mij ilo an jab roñ kin nan in kakkõl eo, enaj kar or ruõn Ezekiel. Jeova ear ba ñõn Ezekiel: “Inaj naruõm kin mij eo an.”​—Ezek. 3:​17, 18.

Henryk ej kajeoñ in bõk ejja lemnok eo wõt an kar Ezekiel: “Ikõnan bwe in erreo jen bõtõktõkin armij otemjej. Mour ko an armij rej ber ilo kauwatata.” (Jerb. 20:26, 27) Zbigniew ej bõk ejja lemnok in wõt: “Ezekiel ear aikwij wõnmanlok wõt jekron ta lemnok eo an armij. Men in ej jibõñ iõ ñõn bõk lemnok eo an Dri Kõmõnmõn eo kin jerbal in kwalok nan.”

Kwojjab Mõke Iam

Kwojjab mõke iam ñe kwoj bõk kwonam ilo jerbal in kwalok nan. Einwõt dri jilik Paul, jemaroñ ba: “Kim dri jerbal iben Anij.” (1 Kor. 3:9) Krystyna, eo ear kwalok mol bwe jet ien ej buromõj, ej ba: “Eñin unin ij akwelap bwe Jeova en kakajur iõ. Aolep ien ej uak iõ ñe ij kajitõk iben.” Aet, jej aikwiji jitõb eo an Anij ñõn jibõñ kij ilo jerbal in kwalok nan!​—Zech. 4:​6.

Ñe jej kwalok nan, jitõb kwojarjar ej bareinwõt jibõñ kij ñõn kwalok karkar ko me rej mõtõn “leen Jitõb.” (Gal. 5:​22, 23) Inem wãwen in ej jibõñ kij ñõn kijenmij ilo jerbal in kwalok nan jekron ta eo enaj walok. Henryk ej kile men in ilo an ba: “Kwalok nan ej jibõñ iõ ñõn kõkõmõnmõnlok karkar ko karkariõ. Ej jibõñ iõ ñõn kwalok meanwõr im joij im jab ebwer ilo mõkõj.” Kijenmij ilo jerbal in kwalok nan meñe kwoj iion abañ ko emaroñ jibõñ yuk ñõn kadrek karkar ko rej mõtõn leen jitõb ilo juõn wãwen emõnlok.

Jeova ej kajerbal enjel ro ñõn tel jerbal in ejej uan. (Rev. 14:6) Baibel eo ej kwalok bwe oran enjel rein ej “joñoul tausan alen joñoul tausan im tausan ko alen tausan ko.” (Rev. 5:​11) Iomin tel eo an Jisõs, enjel ro rej rejetak dri korijer ro an Anij ion lõl. Kwoj ke likit men in ilo lemnok eo am ñe kwoj kwalok nan?

Anna ej ba: “Aõ kalomõnlokjen kin an enjel ro ber iber ilo jerbal in kwalok nan, men in ej kakajur iõ. Ij kaurõk jibõñ eo rej letok iomin tel eo an Jeova im Jisõs.” Ej juõn jerammõn elap bwe jemaroñ jerbal iben enjel ro retiljek!

Ewi wãwen jerbal iben dri kwalok ro jet emaroñ jibõñ kij ñõn kijenmij? Ej juõn jerammõn bwe jemaroñ jela kajen juõn jar elap in dri kwalok ro retiljek. Ejelok berre bwe emwij am kamol jabõn kennan in ilo Baibel: “Mãl ej jeme mãl, ein drein juõn armij ej jeme turin mejen jeran.”​—Ken. 27:17.

Kwalok nan iben ro jet ej letok juõn ien emõn ñõn ar lale wãwen air katakin ilo bolemen im katak men ko rekãl jen ir. Elżbieta ej ba: “Jerbal iben dri kwalok ro kajuju ej kebellok juõn ien emõn ñõn aõ kwalok yokwe ñõn dri tõmak ro mõta im armij ro kimij iion ir.” Kwon kajeoñ in kwalok nan iben dri kwalok ro kajuju. Enaj kõmõn bwe jerbal in kwalok nan eo am en laplok an kaitoktoklimo.

Kejbãrok Mour eo Am

Bwe jen kijejeto wõt ilo jerbal in kwalok nan, jej aikwij kõmõn juõn karõk ekwon, juõn lajrõk emõn ñõn katak iber mõke, im en bwe ien ar kakije. Ilo bar juõn wãwen, jej aikwij in kejbãrok kõtan eo ar iben Jeova im ejmour eo ar.

Baibel eo ej ba: “Lemnok ko an dri owõn, re men in jerammõn.” (Ken. 21:5) Zygmunt me kiõ 88 yiõ ridtõn, ej ba: “Kõmõne juõn lajrõk emõn ilo jerbal in kwalok nan ej jibõñ iõ ñõn kõtõbrõk mejenkajik eo aõ. Ij karõk ien ko aõ ilo jejit bwe en or ien aõ kwalok nan.”

Jelalokjen eo emulõl kin Baibel ej kakajur im keboj kij ñõn jerbal in kwalok nan. Einwõt ar aikwij bõk ekan ko ilo kõniek bwe jen mour wõt, jej aikwij bareinwõt bõk katak ko ilo Baibel ñõn wõnmanlok im bõk kwonad ilo jerbal in kwalok nan. Katak Nan in Anij ran otemjej im bok ekan ko “ilo ien emõn” emaroñ kakajur kij ñõn kwalok nan.​—Mat. 24:45-​47.

Elżbieta ear kõmõn oktõk ko relap ilo mour eo an bwe en maroñ kõkõmõnmõnlok jerbal in kwalok nan eo an. Ej ba: “Iar kadriklok ien  aõ aluij TV bwe in maroñ kalaplok ien aõ kapojõk lok iman ñõn jerbal in kwalok nan. Ñe ij riiti Baibel eo aolep jota, ij lemnok kin armij ro iar iion ir ilo jikin eo iar kwalok nan ie. Ij bukot eon ko im katak ko me remaroñ jibõñ ir.”

An bwe ien am kakije enaj kõmõn bwe kwon kajur im enaj kamaroñ yuk ñõn kalaplok ijo kwonam ilo jerbal in kwalok nan. Ilo ijo turãjet, ñe elap am jolok ien ñõn menin kamõnõnõ ko emaroñ jelet jerbal in kwalok nan eo am. Andrzej, juõn dri kwalok etiljek, ej kile ilo an ba: “Ñe ejabwe am kakije enaj kõmõn bwe en le jen joñõn am mõk, im ej juõn buñten ne edrik me enaj tellok ñõn am ebwer. Ij kate iõ bwe in maroñ bõprae an walok men in.”​—Ekk. 4:6.

Jekron ewi joñõn ar kate, eiet wõt armij rej mõnõnõ in roñjake nuuj eo emõn. Bõtab Jeova ejamin meloklok jerbal ko ar. (Hib. 6:​10) Meñe elõñ rejjab kõnan bwebwenato iber, remaroñ konono kin lolok eo ar elikin ar etal jen moko imweir. Tokjen eo emaroñ einlok wõt men eo jej riiti kin Ezekiel: Armij renaj “jelã ke juõn ri kanan ar bed ibwiljier.” (Ezek. 2:5) Emol, jerbal in kwalok nan ejjab biruru, bõtab jej bõk tokjen jene im bareinwõt ro rej roñjake.

Zygmunt ej kile ilo an ba: “Ar bõk kwonad ilo kwalok nan ej jibõñ kij ñõn kõnõk armij eo ekãl im kwalok bwe jej yokwe Anij im ro dri turid.” Andrzej ej kakobaba: “Ej juõn jerammõn ñõn bõk kwonad ilo jerbal in lomor eo. Jejamin bar kõmõne jerbal in ñõn joñõn in ak iomin ejja wãwen kein wõt rej walok ranin.” Kwe bareinwõt kwomaroñ jebar elõñ jerammõn ko kin am kijenmij ilo jerbal in kwalok nan ranin.​—2 Kor. 4:​1, 2.

[Pija ko ilo peij 31]

Kejbãrok kõtan eo ar iben Jeova im aikwij ko ar ilo kõniek ej jibõñ kij ñõn kijenmij ilo jerbal in kwalok nan