Am Tiljek Ej Kamõnõnõik Buruen Jeova

“Nejiõ, kwon meletlet, im kamõnõnõik buruõ, bwe in uak ñõn eo ej kinak iõ.”​—KEN. 27:11.

1, 2. (a) Ta aituerõk eo Setan ear bõkmantak me buk in Job ej kwalok kake? (b) Ta eo ej kwalok bwe Setan ej wõnmanlok wõt im kinak Jeova elikin ran ko an Job?

 JEOVA ear kõtlok an Setan melejoñwe dri korijer eo an etiljek Job. Tokjen men in, Job ear luji menin mour ko an, ro nejin, im an ejmour. Bõtab ke Setan ear aituerõke tiljek eo an Job, ear lemnok kin ro jet ijellokin Job. Setan ear ba: “Kil wõt kil, aet, men otemjej iben juõn armij e naj lelok kin an mour.” Nan in kinak in ear bõkmantak juõn aituerõk me ej kitibuj ro jet im ej wõnmanlok wõt elikin an kar Job mij.​—Job 2:4.

² Enañin 600 yiõ ko elikin melejoñ ko an Job, kar kamakit Solomon ñõn je: “Nejiõ, kwon meletlet, im kamõnõnõik buruõ, bwe in uak ñõn eo ej kinak iõ.” (Ken. 27:11) Alikar, ilo ien eo Setan ear wõnmanlok wõt im jumae Jeova. Bareinwõt ilo vis̃õn eo kar lelok ñõn dri jilik Jon, ear lo an Setan kinaklok dri korijer ro an Anij elikin kar jolõltak e jen lõñ jejjo yiõ ko elikin an kar jutõk Ailiñ eo an Anij ilo 1914. Aet, bareinwõt ilo ran kein, ke jej ber ebak ñõn jemlokõn jukjuk im ber in enana, Setan ej kinaklok wõt dri korijer ro an Anij retiljek!​—Rev. 12:10.

3. Ta men ko raurõk jemaroñ katak jen buk in Job?

³ Jen etale kiõ men ko jilu raurõk jemaroñ katak jen buk in Job. Kein kajuõn, melejoñ ko  an Job rej kwalok kin wõn eo ej lukkun dri kijirãt eo an armij im unjen jumae ko rej walok nae ro dri korijeran Anij. Dri kijirãt in ej Setan Devil eo. Kein karuo, jekron ta melejoñ ko jemaroñ iioni, elañe eor juõn kõtan ebak iben Anij, men in enaj kamaroñ kij ñõn drebij wõt ar tiljek. Kein kajilu, ñe jej ber iomin melejoñ, Anij ej jibõñ kij ñõn kijenmij einwõt an kar kõmõn ñõn Job. Ranin, Jeova ej kõmõne men in ikijen Nan eo an, rolul eo an, im jitõb kwojarjar eo an.

Kememej Wõn eo Ej Lukkun Dri Kijirãt Eo

4. Wõn eo jen naruõn kin wãwen ko rej walok ilo lõl in?

⁴ Elõñ rejjab tõmak bwe Setan ej lukkun ber im mour. Kin men in, meñe rej inebata kin men ko rej walok ilo lõl in, rejjab kile bwe Setan Devil eo ej unjen abañ kein. Emol, enañin aolep iñtan ko armij ro rej iioni rej itok jen ir mõke. Ro jemer im jined moktata, Adam im Iv, rar kãlet bwe ren jenolok jen dri Kõmõnmõn eo air. Im jen ien eo, ebeben ko tokelik rar emmakit ilo juõn wãwen ejjab meletlet. Ak, jen kememej wõt bwe kar Devil eo ear mone Iv ñõn an jumae Anij. E eo ear kajutak ibwiljin armij ro rejjab wãppen im rej drien mij juõn jukjuk im ber me ej ber iomin kajur eo an. Kinke Setan ej “anij in lõl in,” jukjuk im ber eo an armij ej kwalok ejja karkar ko karkarin einwõt: utiej buru, iakwailel, ebanban, kibbon, riõp, im jumae. (2 Kor. 4:4; 1 Tim. 2:​14; 3:6; riit Jemes 3:​14, 15.) Karkar rot kein rar tellok ñõn kiojõljõl ko an kien im kabuñ, drike dron, jab mol, im bwok, me kar kalaplok an armij ro buromõj.

5. Ta eo jekõnan kõmõne kin jelalokjen eo eaurõk me eor iber?

⁵ Eor iben dri korijer ro an Jeova jelalokjen eo eaurõk! Aet, jejela wõn eo ñõn naruõn kin wãwen ko renana rej walok ilo lõl in. Inem men in ejjab ke kamakit kij ñõn bõk kwonad ilo jerbal in kwalok nan bwe jen maroñ jiroñ armij kin dri kijirãt in elap? Im jejjab ke mõnõnõ in jutõk kin Anij eo emol, Jeova, im ñõn kemeleleik ro jet kin wãwen eo enaj kokkure Setan im bõktok jemlokõn abañ ko an armij?

6, 7. (a) Wõn eo jen naruõn kin jumae ko rej walok nae dri korijer ro remol? (b) Ewi wãwen jemaroñ anõk joñok eo an Ilaihu?

⁶ Setan ej bõk erron elõñ ian abañ ko ilo lõl in im bareinwõt kin jumae eo armij ro an Anij rej iioni. Emwij an bebe bwe en melejoñwe kij. Jisõs Kraist ear jiroñ dri jilik Piter: “Saimõn, Saimõn, lo, Setan e ar kõnan bõk yuk bwe en liklik yuk einwõt wit:” (Luk 22:31.) Eindreinlok wõt, kij kajuju ñe jej lor buñten neen Jisõs jenaj iion melejoñ ko. Piter ear keiri  Devil eo ñõn juõn “laiõn e rorror, ej etetal wõt im bukot eo ej maroñ in kõñi.” Im Paul ear ba: “Ro otemjej re kõnan mour im kwojarjar ilo Kraist Jisõs, naj matõrtõre ir.”​—1 Pit. 5:8; 2 Tim. 3:​12.

⁷ Ewi wãwen jemaroñ kwalok bwe jejela wõn eo ej lukkun dri kijirãt eo ñe juõn jorran ej buñõt dri tõmak eo mõtar? Ijellokin ar katoanlok kij jen e, jen einwõt Ilaihu, eo me ear konono iben Job einwõt juõn jeran emol. Inem jen jurake eo jeer im jãter ilo tõrinae eo nae dri kijirãt eo ar, Setan. (Ken. 3:​27; 1 Tes. 5:​25) Mejenkajik eo ar ej ñõn jibõñ eo mõtar ñõn drebij wõt an tiljek, jekron ewi joñõn an naj bin ñõn e, im ilo wãwen in enaj kamõnõnõik buruen Jeova.

8. Etke Setan ear jab lo tõbrõk ke ear kajeoñ in kabwijrõk Job jen an nebar Jeova?

⁸ Men ko moktata mweien Job me Setan ear kõmõn bwe ren joko kar menin mour ko an. Ear watõki men kein einwõt mweiuk ko reaurõk, kinke rar kein an mour. Ak Job ear bareinwõt kajerbali ilo kabuñ eo an ñõn Jeova. Elikin an kar Job kokwojarjar ajiri ro nejin, ear “jerkak ke e jiboñ wõt, im katok kin katok kijeek ko ekar ñõn orair otemjej; bwe Job ej ba, Ñe ro nejiõ man rab bwir im karmijete Anij ilo burueir. Ein drein an Job kõmõn ien otemjej.” (Job 1:​4, 5) Kin men in, Job ear keini an katok kake menin mour ko ñõn Jeova. Ak ke ear jino an walok melejoñ ko, ear jab maroñ wõnmanlok im kõmõne men in. Ear ejelok iben Job ‘mweiuk’ ko raurõk ñõn an nebar Jeova. (Ken. 3:9) Ak ear maroñ in nebar Jeova kin tien!

Ejaak Juõn Kõtan Ebak Iben Jeova

9. Ta men eo eaurõktata ilo mour eo ar?

⁹ Jemaroñ ejaak juõn kõtan ebak iben Jeova meñe je mweie ak jeramel, drik ak ridto, nañinmij ak ejmour. Jekron kain melejoñ rot ko jej iioni, juõn kõtan ebak iben Anij enaj kamaroñ kij ñõn drebij wõt ar tiljek im kamõnõnõik buruen Jeova. Ekar or jet armij ro me rar jutõk bin im drebij wõt air tiljek, meñe ear jab lap jelalokjen ibeir kin Baibel eo.

10, 11. (a) Ewi wãwen an juõn jeer im jãter kõra emmakit ke kar melejoñwe tiljek eo an? (b) Ta uak eo ekanuij emõn ear lelok ñõn Setan?

¹⁰ Lemnok mõk kin wanjoñok eo kin Sister Valentina Garnovskaya, eo ej juõn ian elõñ dri Kennan ro ilo Russia me rar einwõt Job, ilo air drebij wõt air tiljek meñe rar iion melejoñ ko relap. Ilo yiõ eo 1945, ke ear 20 an yiõ, juõn brother ear kwalok nan ñõn e. Brother eo ear bar jeblak ruo alen ñõn konono iben kin Baibel eo, im jen ien eo Valentina ear jab bar loe. Meñe eindrein, Valentina ear jino kwalok nan ñõn ro dri turin. Tokjen men in, rar kalbuji e iomin drualitõk yiõ ilo juõn jikin kalbuj. Ilo 1953 kar kanemkwoj e jen kalbuj im ilo mõkõj ear bar jino an kwalok nan. Bar  juõn alen rar bõk e ñõn kalbuj, ak ilo ien in rar kalbuj e iomin joñoul yiõ. Elikin an kar ber ilo juõn jikin kalbuj iomin jet yiõ ko, kar kamakit lok e ñõn bar juõn jikin. Ear or jet sister ro ilo ijin me ear or ibeir Baibel eo. Juõn ran juõn sister ear kwalok Baibel eo ñõn Valentina. Ear juõn ien elap an kamõnõnõ! Baj lemnok mõk, Baibel eo wõt me Valentina ear loe jinointata kar iben brother eo me ear kwalok nan ñõn e ilo 1945!

¹¹ Ilo 1967, kar kanemkwoj Valentina, im kin men in ear maroñ kalikar bwe emwij an wujleplok mour eo an ñõn Jeova ilo an kar baptais iomin dren. Ilo kijejeto ear kajerbal anemkwoj eo an ñõn bõk kwonan ilo jerbal in kwalok nan mae yiõ eo 1969. Kinke ilo yiõ in, rar bar kalbuji e im kar bebe ñõn likit e ilo kalbuj iomin jilu yiõ. Ak, Valentina ear wõnmanlok wõt im kwalok nan. Mokta jen an kar mij ilo yiõ eo 2001, ear jibõñ 44 armij ro ñõn air lo mol eo. Ear ber ilo jikin kalbuj ko iomin 21 yiõ ko. Ear mõnõnõ in luji men ko otemjej an, ekitibuj anemkwoj eo an bwe en drebij wõt an tiljek. Ilo jemlokõn mour eo an, Valentina ear ba: “Ear ejelok imõ mõke. Aolep men ko mweiõ rar ber iloan juõn wõt kõbañ, ak iar mõnõnõ wõt im juburuõ ilo aõ korijer ñõn Jeova.” Ej juõn uak ekanuij emõn Valentina ear lelok ñõn Setan, eo ear ba bwe armij ro rejamin tiljek wõt ñõn Anij ñe renaj jelmae melejoñ ko! (Job 1:9-11) Jemaroñ liki bwe ear kamõnõnõik buruen Jeova im bwe Jeova ej reimanlok ñõn ien eo enaj kajerkakbiji Valentina im aolep ro jet rar tiljek ñõn mij.​—Job 14:15.

12. Ewi ijo kwonan yokwe ilo kõtan eo ar iben Jeova?

¹² Jimjera eo ar iben Jeova ej wawa ion yokwe eo ar ñõn e. Jej kamolol kin karkar ko karkarin Anij im kate kij joñõn wõt ar maroñ ñõn mour ekar ñõn karõk ko an. Ijellokin ta eo Devil eo ear ba, jej yokwe Jeova kin ar kõnan im kin aolepen buruer. Yokwe in jen buruer ej kakajur kij ñõn drebij wõt ar tiljek iomin melejoñ ko. Im ijo kwonan Jeova, ej ñõn “kejbãrok ial an ro dron remõn.”​—Ken. 2:8; Sam 97:10.

13. Ewi wãwen an Jeova lemnok kin men ko jej kõmõni ñõn e?

¹³ Yokwe ej kamakit kij ñõn nebar ãt eo etan Jeova meñe jej lemnok bwe ejjab lap ar maroñ kõmõne. Ej lo un ko remõn unin jej kõmõni men ko im ejjab ekajete kij elañe jejjab maroñ kõmõn joñõn eo jekõnan. Men eo eaurõk ejjab kin ta eo jej kõmõne wõt ak bareinwõt kin unin ar kõmõne. Meñe Job ear lap an buromõj im ear kijenmij iomin elõñ melejoñ ko, ear konono ñõn dri kinak ro an kin an yokwe wãwen ko an Jeova. (Riit Job 10:12; 28:28.) Ilo japter eo eliktata ilo buk in Job, Anij ear kwalok an illu nae Elipaz, Bildad, im Zopar kin air jab konono mol. Ilo ejja ien eo wõt, Jeova ej kwalok an buñburuen kake Job ilo an ãñiñin e emen alen einwõt “dri korijera” im ilo an jiroñ e ñõn jar kin dri kainemõn ro reriõp. (Job 42:​7-9) Kij bareinwõt jen emmakit ilo juõn wãwen me Jeova enaj buñburuen kake kij.

Jeova Ej Jurake Dri Korijer Ro An Retiljek

14. Ewi wãwen an kar Jeova jibõñ Job ñõn kajime an lemnok?

¹⁴ Job ear drebij wõt an tiljek meñe ear jab wãppen. Jet ien, ke ear ber iomin ijjibed ko relap, ear jab lukkun jime lemnok eo an. Ñõn  wanjoñok, ear ba ñõn Jeova: “Ij lamij ñõn Kwe im kwo jab uak iõ . . . kin kajur in peõm Kwoj matõrtõr iõ.” Bareinwõt, ear lap an Job lemnok ñõn kowãnik e mõke ke ear ba: “I jab nana” im “ejelok kokkure ilo peiõ, im erreo jar eo aõ.” (Job 10:7; 16:17; 30:20, 21) Bõtab, ilo joij Jeova ear jibõñ Job. Ear bõkmantak elõñ kajitõk ko ñõn kõmõn bwe Job en jab lemnok kin emõke im rar bareinwõt kamaroñ e ñõn lo ilo alikar bwe Anij ej e eo eutiejtata im ejelok juõn ej joñõn wõt e. Job ear bõk nan in jiroñ eo im kajime an lemnok.​—Riit Job 40:8; 42:​2, 6.

15, 16. Ewi wãwen Jeova ej lelok jibõñ ñõn dri korijer ro an ranin?

¹⁵ Jeova ej bareinwõt lelok nan in kakabilek ko rejoij ñõn dri korijer ro an ranin, im emol ar bõk tokjen jeni. Ñõn wanjoñok, Jisõs Kraist ear lelok an mour einwõt katok in binmour eo im ilo wãwen in ear likit berber eo ñõn bõk jeorlok bwir kin jerawiwi ko ar. Ikijen katok eo, jemaroñ bõk juõn kõtan ebak iben Anij meñe jejjab wãppen. (Jem. 4:8; 1 Jon 2:1) Ñe jej iion melejoñ ko, jej aikwij jar bwe jitõb kwojarjar eo an Anij en jibõñ im kakajur kij. Bareinwõt, eor iber Baibel eo, im elañe jej riiti im kalomõnlokjen kake, jej keboj kij mõke ñõn ar maroñ tiljek ñe jenaj iion melejoñ ko. Im ilo ar katak ej jibõñ kij ñõn melele kin aituerõk ko kar bõkmantak kin iroij potata eo an Anij im tiljek eo an kajuju armij.

¹⁶ Bareinwõt, kin ar mõtõn rolul in jimjãn jimjãtin ibelakin lõl, elap ar bõk tokjen jen katak ko me Jeova ej litoki ikijen “dri korijer e tiljek im meletlet.” (Mat. 24:45-​47) Ilo enañin 100,000 congregation ko kajuju an Dri Kennan ro an Jeova, rej kõmõni kwelok ko me rej katakin im kakajur kij ñõn jelmae melejoñ ko kin tõmak eo ar. Men in ej alikar ilo wanjoñok eo me ej ber ilo paragraph eo tok juõn kin Sheila, juõn jodrikdrik me ej juõn ian Dri Kennan ro an Jeova im ej jokwe ilo Germany.

17. Ewi wãwen bwebwenato eo an juõn ledrik ear kwalok kin aurõkin ar ber ilo kwelok ko aolep ien?

¹⁷ Juõn ien ke ear ber ilo jikuul, ear joko dri kaki eo ilo class eo an Sheila iomin jidrik ien. Dri jikuul ro ilo class eo an rar bebe ñõn ikkure kin juõn kein ikkure me emaroñ kwalok kin ilju im jeklaj etan Ouija board. Ilo mõkõj Sheila ear drioij jen class eo an, im tokelik ke ear roñ kin men eo ear walok ear mõnõnõ kin men eo ear kõmõne. Ke dri jikuul ro rej ikkure kin Ouija board eo, jet ian dri jikuul ro rar eñjake an or dimon ro im rar lukkun mijõk im ko. Ak, ta eo ear jibõñ Sheila ñõn an kãlet bwe en drioij jen rum eo ilo mõkõj? Sheila ej kemelele im ba, “Moktalok jen an walok men in, kimar katak ilo juõn ien kwelok kin kauwatata ko rej walok jen an juõn kajerbal Ouija board. Inem iar jela ta eo ij aikwij kõmõne. Iar kõnan kamõnõnõik Jeova, einwõt an Baibel eo ba ilo Jabõn Kennan Ko 27:11.” Elukkun emõn bwe Sheila ear ber ilo kwelok eo im kanuij in roñjake katak ko!

18. Ta eo kwoj beek ñõn kõmõne?

¹⁸ Kij kajuju jen beek ñõn lor nan in tel ko jej bõki jen rolul eo an Anij. Ilo ar keini in ber ilo kwelok ko, riit Baibel, katak buk ko rej berber ion Baibel, jar, im kobalok iben ro jeer im jãter me reridto ilo tõmak, jej bõk nan in tel im jibõñ eo jej aikwiji. Jeova ekõnan bwe jen drebij wõt ar tiljek, im eor an liki bwe jenaj wõnmanlok wõt im kõmõn eindrein. Ej juõn jerammõn eor iber ñõn kaibujuij etan Jeova, ñõn drebij wõt ar tiljek, im ñõn kamõnõnõik buruen Jeova!

Kwoj Kememej Ke?

• Ta wãwen im melejoñ ko Setan ej bõktok ion armij ro?

• Ta men eo eaurõktata eor iber?

• Ta berberin jimjera eo ar iben Jeova?

• Ta jet ian wãwen ko me Jeova ej jibõñ kij ranin?

[Kajitõk ko ñan katak]

[Pija eo ilo peij 8]

Buruõm ej ke kamakit yuk ñõn kwalok kin jelalokjen eo eaurõk me eor ibõm?

[Pija eo ilo peij 9]

Jemaroñ jibõñ dri tõmak ro mõtar ñõn drebij wõt air tiljek

[Pija eo ilo peij 10]

Valentina ear mõnõnõ in karmijete aolep men ko an ñõn drebij wõt an tiljek