Job Ear Nebar Ãt eo Etan Jeova

“Jen nebar wõt etan [Jeova].”​—JOB 1:​21, UBS.

1. Wõn eo emaroñ kar je buk in Job, im ñãt?

 KAR 40 an Moses yiõ ke ear ko jen Ijipt bwe Pero en jab mõn e im ear emmakit ñõn Midian. (Jerbal 7:​23) Ke ear ber ilo jikin in, emaroñ kar roñ kin melejoñ ko Job ear iioni, eo me ear jokwe ilo Uz, juõn jikin ebak ñõn Midian. Elõñ yiõ ko tokelik, Moses emaroñ kar roñ kin yiõ ko eliktata in an kar Job mour, ke e im dri Israel ro rar ebakelok Uz ilo jemlokõn ial eo air ilo ene jemaren. Ekkar ñõn tõmak eo an dri Ju ro, rej ba bwe Moses eo ear je buk in Job jet yiõ ko elikin an kar Job mij.

2. Ilo wãwen it ko buk in Job ej kakajurlok tõmak eo an dri korijer ro an Jeova ilo ran kein?

² Buk in Job ej kakajur tõmak eo an dri korijer ro an Anij ilo ran kein. Ilo wãwen it ko? Bwebwenato in ej jibõñ kij ñõn melele kin men ko elap air aurõk me rar walok ilo lõñ im ej kalikar kin aituerõk eo elap an aurõk kin iroij potata eo an Anij. Bwebwenato eo kin Job ej bareinwõt kamũlallok melele eo ar kin ta eo ej kitibuj ilo ar tiljek wõt, im ej jibõñ kij ñõn melele kin etke Jeova ej kõtlok bwe jet ien dri korijer ro an ren iñtan. Bareinwõt, buk in Job ej kwalok bwe Setan Devil eo ej dri kijirãt eo elaptata an Jeova im armij ro. Buk in ej bar kwalok bwe armij ro rejjab wãppen einwõt Job remaroñ tiljek wõt ñõn Jeova meñe rej ber iomin melejoñ ko relap. Jen etale jet ian men ko rar walok me buk in Job ej kwalok kaki.

Setan Ej Melejoñwe Job

3. Ta eo jejela kin Job, im etke Setan ear melejoñwe e?

³ Job ear juõn eman eo elukkun mweie im lap kilan, im juõn eo emõn an lolorjake baamle eo an. Alikar ear juõn dri kakabilek emõn me ear jibõñ ro rar ber ilo aikwij. Men eo eaurõktata ej bwe Job ear mijõk Anij. Kar kwalok kake Job einwõt juõn eo “e wãppen im wãnik, im e ar mijõk Anij, im jeorlok jen nana.” Tiljek eo an Job ñõn Anij ear kõmõn bwe Setan Devil eo en melejoñwe e, im jab kin an mweie.​—Job 1:​1; 29:​7-​16; 31:1.

4. Ta melelen tiljek?

⁴ Jinoin bwebwenato eo ilo buk in Job ej kwalok kin juõn ien ke enjel ro rar kweloklok iman Jeova. Setan ear bareinwõt ber ilo ien in im ear kinaak Job. (Riit Job 1:​6-​11.) Meñe Setan ear konono kin men ko mweien Job, ilo mol ear lemnok wõt ñõn aituerõke tiljek eo an. Nan in “tiljek” emaroñ bareinwõt melelen jime wõt, ejelok ruõn, im wãnik. Ñe ej walok ilo Baibel eo, tiljek eo an juõn armij ej melelen bwe ej korijer ñõn Jeova kin aolepen buruen.

5. Ta eo Setan ear ba kin Job?

⁵ Setan ear ba bwe unin an kar Job kabuñ ñõn Anij ej kin an kibbon im jab kin an tiljek. Ear ba bwe Job enaj kar tiljek wõt ñõn Anij elañe enaj wõnmanlok wõt im kejerammõn im kejbãrok e. Ñõn uake aituerõk in an Setan, Jeova ear kõtlok bwe Setan en melejoñwe lein etiljek. Tokjen men in, iomin juõn wõt ran, Job ear roñ bwe emwij kwoti ak kokkure menin mour ko an, kar mõn enañin aolep dri korijer ro an, im ear mij ajiri ro joñoul nejin. (Job 1:​13-​19) Melejoñ kein an Setan rar ke kabwer Job? Nan ko  rekakõrmol ilo Baibel eo rej kwalok kin wãwen an kar Job emmakit ñõn jorran ko ear iioni: “Iroij ear litoki im kiõ ej bar bõki. Jen nebar wõt etan [Jeova]!”​—Job 1:21, UBS.

6. (a) Ta eo ear walok ilo bar juõn ien kwelok ilõñ? (b) Wõn eo Setan ear lemnok kake ke ear aituerõke tiljek eo an Job?

⁶ Tokelik, ear bar or juõn ien kwelok ilõñ. Setan ear bar kinaklok Job, ilo an ba: “Kil wõt kil, aet, men otemjej iben juõn armij e naj lelok kin an mour. Kwon kõtellok peõm kiõ, im uñir drin im kõniekin, inem e naj karmijete Yuk iman mejõm.” Jej lo bwe Setan ear kitibuj ro jet ilo aituerõk eo an. Ilo an ba, “Men otemjej iben juõn armij e naj lelok kin an mour,” Devil eo ear jab aituerõke wõt tiljek eo an Job ak bareinwõt jabrewõt “armij” ro rej kabuñ ñõn Jeova. Kin men in, Anij ear kõtlok bwe Setan en melejoñwe Job ilo an lelok ñõn e juõn nañinmij ekanuij kõmetak. (Job 2:​1-8) Ak men in ear jab jemlokõn melejoñ ko an Job.

Ta eo Jemaroñ Katak jen Lemnok eo An Job

7. Ewi wãwen lio belen Job im dri lotok ro an rar melejoñwe e?

⁷ Ilo jinoin, jorran ko rar walok ñõn Job rar bareinwõt jelet lio belen. An kar mij ajiri ro nejiiro im joko men ko mweieir, men kein remaroñ kar kõmetak buruen. Emaroñ kar lukkun buromõj ke ear lo an leo iben iñtan kin nañinmij eo an. Ear jõñ im ba ñõn Job: “Kwoj kejbãrok wõt am wãnik ke? Kwon karmijete Anij im mij!” Inem, lõmaro jilu, Elipaz, Bildad, im Zopar rar itok ñõn air kainemõn Job. Jen air kõmõn eindrein, rar konono nan ko rejjab mol im rar erom “dri kainemõn re nana.” Ñõn wanjoñok, Bildad ear ba bwe kin an kar ro nejin Job kõmõni men ko renana ear tellokiir ñõn mij. Elipaz ear ba bwe unin an Job iñtan ej kin jerawiwi ko ear kõmõni mokta. Ear bareinwõt berre bwe ro rej tiljek wõt reaurõk iben Anij! (Job 2:​9, 11; 4:8; 8:4; 16:2; 22:​2, 3) Iomin ijjibed kein relap, Job ear drebij wõt an tiljek. Emol, ear bwir ke ear “mõke kowãnik e, im jab Anij.” (Job 32:2) Ak, ear drebij wõt an tiljek iomin wãwen kein aolep.

8. Joñok ta eo emõn Ilaihu ear likit ñõn dri kakabilek ro ranin?

⁸ Ak kiõ jen lale kin Ilaihu, eo ear bareinwõt lotok Job. Mokta, Ilaihu ear roñjake wõt nan ko an Job im lõmaro jilu mõtõn. Meñe edrik jen lõmarein, Ilaihu ear laplok an kwalok meletlet. Ear konono iben Job ilo koutiej. Ear nebar Job kin an tiljek wõt. Ak ear bareinwõt jiroñ Job bwe ear le jen joñõn an kowãnik e mõke. Inem Ilaihu ear kalimur ñõn Job bwe ñe jej korijer ñõn Anij ilo tiljek, ien otemjej enaj or tokjen. (Riit Job 36:​1, 11.) Ej juõn joñok elukkun emõn ñõn  ro rej aikwij lelok nan in kakabilek ilo ran kein! Ilaihu ear kwalok an meanwõr, ear kanuij roñjake, lelok nan in nebar ko ilo ien ekkar, im lelok nan in kakabilek ko rekõkãtõk.​—Job 32:6; 33:32.

9. Ewi wãwen an kar Jeova jibõñ Job?

⁹ Eliktata, Job ear iion juõn men elap an kabwilõñlõñ ke Jeova ear konono iben! Baibel eo ej ba: “Jeova e ar uak Job jen aire eo.” Ilo an kajerbal jet kajitõk ko, ilo joij Jeova ear jibõñ Job ñõn kajime lemnok eo an. Job ear mõnõnõ in bõk nan in kajime eo, ilo an ba: “Ña erik tokja . . . im ukwelok ilo bõñõlñõl in brij in ubaj.” Elikin an kar Jeova konono iben Job, Ear kwalok An illu iben lõmaro jilu mõtõn Job kin air jab konono kin “men eo e jime.” Job ear aikwij in jar kin ir. Inem “Jeova e ar ukot men in jebokwe an Job, ke e ar jar kin ro jeran: im Jeova e ar lelok ñõn Job ruo alen jen men ko an mokta.”​—Job 38:1; 40:4; 42:​6-​10.

Ewi Joñõn Ar Yokwe Jeova?

10. Etke Jeova ear jab kejekron ak kokkure Setan?

¹⁰ Jeova ej dri Kõmõnmõn im Iroij Potata eo ion menin kõmõnmõn ko otemjej. Etke ear jab kejekron aituerõk eo an Devil eo? Anij ear jela bwe elañe ear kejekron nan in kinaak ko an Setan ak kokkure e, ejamin kar uak aituerõk eo kar bõkliñtak. Devil eo ear ba bwe Job ejamin kar tiljek wõt elañe ear joko men ko mweien. Job ear tiljek wõt meñe ear iion melejoñ in. Inem Setan ear ba bwe jabrewõt armij enaj kar karmijete Anij elañe ear iion iñtan. Job ear iñtan, ak ear tiljek wõt. Inem, armij in etiljek, meñe ear jab wãppen, ear maroñ kariõp Setan. Ta kin dri korijer ro jet an Anij?

11. Ewi wãwen an kar Jisõs kwalok ilo alikar bwe Setan ej juõn dri riõp?

¹¹ Inem, kajuju ian dri korijer ro an Anij me ej drebij wõt an tiljek jekron ta melejoñ ko Setan ej bõktok ion, ej mõke kwalok bwe aituerõk ko an dri kijirãt eo rejjab mol. Ke Jisõs ear itõk ñõn lõl, ear kwalok ilo alikar bwe Setan ej juõn dri riõp. Jisõs ear juõn armij ewãppen, einwõt kar eo jemer, Adam. An kar Jisõs tiljek ñõn mij ear kwalok bwe Setan ej juõn dri riõp im bwe nan in kinak ko an rejjab mol.​—Rev. 12:10.

12. Ta ien eo emõn im erro eo eor iben dri korijer ro kajuju an Jeova?

¹² Bõtab, Setan ejjab bwijrõk jen an melejoñwe dri korijer ro an Jeova. Eor iber kajuju juõn ien emõn im juõn erro ñõn kwalok ikijen tiljek eo ar bwe jej korijer ñõn Jeova kinke jej yokwe e, im ejjab kin un ko rekibbon. Ewi wãwen jej watõk erro in? Jej watõke einwõt juõn jerammõn ñõn ar tiljek wõt ñõn Jeova. Ej bareinwõt kainemõn kij ñõn jela bwe Jeova ej letok ñõn kij kajur eo ñõn kijenmij im Ej kõmõn bwe en jab lap jen joñõn melejoñ ko jej jelmaiki, einwõt an kar kõmõne ñõn Job.​—1 Kor. 10:13.

Setan Ej Juõn Dri Kijirãt im Dri Jumae Anij

13. Ta tibrikin melele ko buk in Job ej kwalok kin Setan?

¹³ Jeje ko ilo kajin Hibru rej letok tibrikin melele ko kin jerbal ko rekajookok an Setan ilo an jumae Jeova im kajebwãbweik armij ro. Ilo Jeje ko ilo kajin Grik, jej lo elõñlok melele ko kin an Setan jumae Jeova, einwõt ilo buk in Reveles̃õn, ijo jej katak bwe mõtõn jidrik naj kamol an jime iroij potata eo  an Jeova im naj kokkure Setan. Buk in Job ej kalaplok jelalokjen eo ar kin ial in jumae eo an Setan. Ke ear ber ilo kwelok ko rar walok ilõñ, ear jab ber ilo ien kein ñõn an kaibujuij Jeova. Ear or juõn lemnok elej iben Devil eo im juõn mejenkajik enana. Elikin an kar kinaak Job im bõk melim ñõn melejoñ e, “Setan e ar drioijlok jen iman mejen Jeova.”​—Job 1:​12; 2:7.

14. Ewi wãwen an kar Setan lemnok kin Job?

¹⁴ Kin un in, buk in Job ej kwalok bwe Setan ej dri kijirãt eo elej an armij. Ien eo ejjab lukkun alikar aitokin, me ear walok ikõtan kwelok ko ruo kar kwalok kaki ilo Job 1:6 im Job 2:1, eñin kar ien eo Setan ear melejoñwe Job. Kin an kar Job tiljek, Jeova ear maroñ ba ñõn Setan: “Ej kejbãrok wõt an wãnik, meñe kwar biuktõk Iõ nae e, bwe In kokkure e kin ejelok unin.” Ak Setan ear jab kõnan kwalok bwe nan in kinak ko an nae Job rar riõp. Jen men in, ear kajitõk bwe en bar melejoñwe Job. Im kin men in, Devil eo ear melejoñwe Job ilo ien ear mweie im jeramel jimor. Alikar, ejelok an Setan tiriamo ñõn ro rej ber ilo aikwij ak ro rejorrãn. Ej kijirãte armij ro rej tiljek. (Job 2:​3-5) Meñe eindrein, an Job tiljek ear kalikar bwe Setan ej juõn dri riõp.

15. Ilo wãwen it dri jumae ro ranin rej einlok wõt Setan?

¹⁵ Setan ear menin kõmõnmõn eo moktata ear ilok jen tõmak im jumae Anij. Dri jumae ro ilo ran kein rej kwalok ejja karkar ko wõt karkarin Devil eo. Kin an or juõn jitõb in kõrraat ibeir nae ro ilo congregation eo, elder ro, ak Governing Body eo, men in emaroñ kokkure lemnok eo air. Jet dri jumae ro rej makoko in kajerbal ãt eo ekwojarjar, Jeova. Rejjab mõnõnõ in katak kin Jeova ak korijer ñõn e. Einwõt jemeir, Setan, dri jumae rein rej kajeoñ in kokkure tõmak eo an armij ro retiljek an Anij. (Jon 8:​44) Eñin unin dri korijer ro an Jeova rej bõprae air kobalok ibeir!​—2 Jon 10, 11.

Job Ear Nebar Ãt eo Etan Jeova

16. Kar ta lemnok eo an Job kin Jeova?

¹⁶ Job ear kajerbal im nebar etan Jeova. Meñe ilo ien eo ear lukkun buromõj ke ear roñ bwe ajiri ro nejin rar mij, ear jab naruõn Anij kin jabrewõt men ko rejakkar. Meñe ear bwir lemnok eo an Job bwe jorran ko ear iioni rar itok jen Anij, ear rejetak wõt etan Jeova. Ilo juõn ian ennan ko an Job, ear ba: “Lo, mijõk Anij, eñin meletlet; im illok jen nana, eñin jelalokjen.”​—Job 28:28.

17. Ta eo ear jibõñ Job ñõn drebij wõt an tiljek?

¹⁷ Ta eo ear jibõñ Job ñõn drebij wõt an tiljek? Alikar, mokta jen an iion jorran ko, emwij an kar ejaak juõn kõtan ebak iben Jeova. Meñe ejelok kein kamol iber bwe Job  ear jela bwe Setan ear aituerõke Jeova, Job ear beek ilo buruen bwe en drebij wõt an tiljek. Ear ba: “Ñõn ien aõ mij i jamin jolok aõ jime jen ña!” (Job 27:5) Ewi wãwen an kar Job ejaak kõtan in ebak iben Anij? Ejelok berre, ear kaurõk men ko ear roñ kin wãwen an kar Anij jerbal iben ro nukin, Ebream, Aisak, im Jekõb. Im ilo an kar kalimjek menin kõmõnmõn ko, Job ear maroñ kile elõñ ian karkar ko karkarin Jeova.​—Riit Job 12:​7-9, 13, 16.

18. (a) Ewi wãwen Job ear kwalok an tiljek ñõn Jeova? (b) Ilo wãwen it ko jej kajeoñwe joñok eo emõn an Job?

¹⁸ Men ko Job ear katak kaki rar kamakit buruen ñõn an kõnan kabuñburuen Jeova. Ien otemjej Job ear lelok menin katok ko kin an lemnok bwe ro uan baamle eo an remaroñ kar kõmõn juõn men me ear kaillu Anij ak “karmijete Anij ilo burueir.” (Job 1:5) Meñe ilo ien eo ear lap an iion melejoñ, Job ear kwalok wõt men ko remõn kin Jeova. (Job 10:12) Ej juõn joñok ekanuij in emõn! Kij bareinwõt jej aikwij keini in bõk jelalokjen eo ejime kin Jeova im karõk ko an. Eor iber mõnit ko remõn me rej kakajurlok kõtan eo ar iben Anij, einwõt keini ar katak, kwelok, jar, im kwalok kin nuuj eo emõn. Bareinwõt, jej kate kij joñõn wõt ar maroñ ñõn kwalok kin etan Jeova. Im einwõt an kar Jeova mõnõnõ kin tiljek eo an Job, enaj eindrein an dri korijer ro an ranin kamõnõnõik buruen elañe renaj tiljek wõt. Jenaj etale men in ilo katak eo tok juõn.

Kwoj Kememej Ke?

• Etke ear lap an Setan Devil eo kalomõnlokjen kin Job?

• Melejoñ rot ko Job ear kijenmij kaki, im ewi wãwen an kar emmakit?

• Ta eo enaj jibõñ kij ñõn ar drebij wõt ar tiljek, einwõt kar Job?

• Ta eo jej katak kake kin Setan ilo buk in Job?

[Kajitõk ko ñan katak]

[Pija eo ilo peij 4]

Bwebwenato eo an Job ej kwalok ñõn kij kin aituerõk eo elap kin iroij potata eo an Anij

[Pija eo ilo peij 6]

Ilo wãwen it ko tiljek eo ar emaroñ ber ilo melejoñ?