Kajeoñwe Tiljek eo an Ittai

“O IROIJ, Anij ekajur otem kajur. Rewãnik im remol ial ko Am, Kweo kiñ in ailiñ ko. Wõn e jamin mijõk, O Iroij, im kaibujuij etõm, bwe kwe wõt kwo [tiljek, NW]?” Al in, “ro rar bõk anjo ion kiru eo im ion men in e ” eo an, rar al kake ilo lõñ ej kwalok kin tiljek eo an Anij. (Rev. 15:​2-4) Jeova ekõnan bwe dri kabuñ ro an ren kajeoñwe e ilo air kwalok karkar in ekanuij emõn.

Ijo turãjet, Setan Devil eo ej kamat an maroñ ñõn kijbil dri korijer ro an Anij ion lõl jen yokwe eo air ñõn Anij eo rej kabuñ ñõn e. Bõtab, elõñ rar drebij wõt air tiljek ñõn Anij meñe rej ber iomin wãwen ko rebin. Elap ar mõnõnõ bwe Jeova ej kaurõk kain tiljek rot in! Emol, Baibel ej kalimur ñõn kij bwe Jeova “ej kejbarok mour an armij ro dron retiljek.” (1 Sam. 2:9, UBS) Ñõn jibõñ kij bwe jen tiljek wõt, emwij an  kobaik ilo Nan eo an bwebwenato ko kin jerbal ko an elõñ ian armij ro rar tiljek. Juõn ian bwebwenato kein ej kin dri Gat eo etan Ittai.

‘Juõn Ruamaijet im Juõn ri Jobokwe’

Ittai emaroñ kar juõn armij ear itok jen ailiñ eo ebuñbuñ etan Pilistia ilo bukwon in Gat, ene eo enen dri inea eo Golaiat im dri kijirãt ro jet relej an dri Israel. Jinointata in ar roñ kin bwebwenato in Ittai, juõn eo me elap an iminene ilo tõrinae, ej ilo ien eo Absalom ear jumae Kiñ Devid. Ittai im lõmaro 600 jen Pilistia me rar lor e rar jokwe einwõt dri jebokwe ro ilo juõn jikin ebake Jerusalem.

Wãwen eo Ittai im lõmaro dron rar ber ie emaroñ kar kakememej Devid kin ien ko ear ko to ko tak ke e im 600 dri tõrinae ro jen Israel rar emmakit ñõn eneo enen dri Pilistia ro im jokwe ilo ailiñ eo an Ekish, kiñ eo an dri Gat. (1 Sam. 27:​2, 3) Ta eo Ittai im lõmaro dron renaj kõmõne ñe Devid enaj kar jelmaik kumi in dri jumae ro an Absalom? Renaj kar ke kobalok iben Absalom, ak iben Devid im lõmaro dron, ak jab kõmõn jabrewõt?

Pijaik ien eo ke Devid ej ko jen Jerusalem im ej bwijrõk ilo jikin eo etan Bet-merhak, melelen “Mweo Eliktata.” Emaroñ mweo eliktata ilo Jerusalem ilo ial eo lok ñõn tol Olivet mokta jen air dribloke wea Kidron. (2 Sam. 15:17) Ilo jikin in Devid ej lale an armij ro an ellãlok jen e. Lale mõk! Ejjab baj dri Israel ro wõt retiljek rej ber iben ak bareinwõt dri Kiret im dri Pilet otemjej. Bareinwõt, dri Gat otemjej einwõt Ittai im dri tõrinae ro an 600.​—2 Sam. 15:18.

Kin an obrõk kin tiriamo, Devid ej ba ñõn Ittai: “Etke kwoj kõnan itok ibbemtok? Kwon jeblak im bed ibben king eo ekãl [melelen Absalom]. Kwe kwoj juõn ruamaijet im kwoj ri jobokwe jen ailiñ eo am. Kwoj kab itok im jokwe ilo enin, innem ta unin aõ naj kõnan bwe kwon lolor iõ? Ña make ijjab jelã ia eo ij ilok ñõne. Kwon jeblak im ãñin armij ro drom ibbam im joij im lo an Iroij en ber ibbemi.”​—2 Sam. 15:​19, 20, UBS.

Nan ko an Ittai rej kwalok bwe ear bin wõt ilo an tiljek. Ej uak: “Einwõt [Jeova] ej mour, ij kallimur bwe inaj mije yuk ijoko otemjej kwoj ilok ielok.” (2 Sam. 15:21, UBS) Men in emaroñ kar kakememej Devid kin ejja nan ko wõt an kar Rut, lio jibwin jemen. (Rut 1:​16, 17) Nan ko an Ittai rar lukkun jelet buruen Devid, kin men in ej ba ñõn e: “Eokwe, kwon iwõj” im elãlok jen wea Kidron. Ilo ien in, “Ittai im aoleben emman ro dron kab ro nukier rar ilok.”​—2 Sam. 15:⁠22, UBS.

“Ken Katakin Kij”

Dri Rom 15:4 ej ba: “Bwe jabrewõt men ko ar jeje mokta, ar jeje ken katakin kij.” Inem jej aikwij kajitõkin kij mõke, Ta ko jemaroñ katak jen joñok eo an Ittai? Lale ta eo emaroñ kar kamakit e ñõn tiljek wõt ñõn Devid. Meñe ear juõn drua maijet im juõn dri jebokwe jen Pilistia, Ittai ear kile Jeova einwõt juõn Anij emour im Devid einwõt eo Jeova ear kabiti. Ittai ear kalet bwe en jab kalijeklok meñe ear or kijirãt ikõtan dri Israel ro im dri Pilistia ro. Ear watõk Devid einwõt juõn eo elaplok jen baj eo ear mõn Golaiat, jur eo an dri Pilistia ro, im elõñ ian armij ro jen ailiñ eo an Ittai. (1 Sam. 18:​6, 7) Ittai ear lo bwe Devid ej juõn eman me ear yokwe Jeova im ejelok berre ear kile karkar ko remõn karkarin Devid. Kin men in, Devid ear kanuij koutiej Ittai. Devid ear kõmõn bwe juõn mõtõn jilu in dri tõrinae ro an ren ber “iomin pein Ittai dri Gat” eo ilo ien eo rar tõrinaek ro dron Absalom!​—2 Sam. 18:⁠2.

 Kij bareinwõt jej aikwij kate bwe jen jab kalijeklok im kijirãte ro jet kin an oktõk mõnit, kil, im ailiñ eo air, ak jen lale wõt karkar ko remõn karkarir. Jimjera eo ear ejaak ikõtan Devid im Ittai ej kwalok bwe ar jela im yokwe Jeova emaroñ jibõñ kij ñõn anjo ion abañ kein.

Ñe jej kalomõnlokjen kake joñok eo an Ittai, jemaroñ kajitõk iber mõke: ‘Ij kwalok ke aõ tiljek ilo ejja wãwen in wõt ñõn Devid eo Elaplok, Kraist Jisõs? Ij kwalok ke aõ tiljek ilo aõ kijejeto ilo jerbal in kwalok nan kin Ailiñ eo im kõmõn dri kalor eo?’ (Mat. 24:14; 28:19, 20) ‘Ewi joñõn aõ naj kate iõ ñõn kamol aõ tiljek?’

Ro bõran baamle ko rej bareinwõt bõk tokjen ikijen air kalomõnlokjen kake joñok eo an Ittai kin tiljek. An tiljek ñõn Devid im bebe eo an ñõn illok iben kiñ eo Anij ear kabiti ear jelet armij ro an Ittai. Eindrein, bebe ko ro bõran baamle ko rej kõmõni ilo air rejetake kabuñ eo emol ej jelet baamle ko air im emaroñ kõmõn bwe en walok abañ ko iomin jidrik ien. Bõtab, kar kalimuri kij: “[Jeova ej] tiljek ñõn ro retiljek.”​—Sam 18:25, UBS.

Elikin tõrinae eo an Devid iben Absalom, Baibel eo ejjab bar kwalok kin Ittai. Mekarta, bwebwenato eo ekaru kin e ilo Nan in Anij ej letok melele ko ralikar kin karkarin Ittai ilo ien eo ear bin ilo mour eo an Devid. An Baibel eo kwalok kin Ittai, men in ej kamol bwe Jeova ej kile im lelok jinekjij ñõn ro rej tiljek.​—Hib. 6:10.