Kajitõk ko jen Ro Rej Riit

Ñãt eo kar jolõltak Setan jen lõñ?​—Rev. 12:​1-9.

Meñe buk in Reveles̃õn ejjab kwalok ien eo ejejit kar jolõltak Setan, ej kwalok lajrõk in men ko rar walok me remaroñ jibõñ kij ñõn antonelok ñãt eo kar jolõltak e jen lõñ. Men eo moktata ear walok ej jutõk eo an Ailiñ in Messaia eo. Elikin men in, “r’ar tõrinae ilo lõñ” im ilo jemlokõn kar bõk anjo ion Setan. Inem eliktata kar jolõltak e jen lõñ.

Jeje ko ilo Baibel eo rej jitõñlok ñõn 1914 einwõt yiõ eo me “ien ko an dri ailiñ ko” ear jemlok im ien eo Ailiñ eo ear jutõk. * (Luk 21:24) Elikin wõt an kar jutõk Ailiñ eo, ñãt eo tõrinae eo ilõñ ear walok im kar jolõltak Setan?

Reveles̃õn 12:4 ej ba: “Drakon eo [Setan] ej jutõk iman kõra eo e nañin keutak, bwe ñe emwij an keutak en kõñ nejin.” Men in ej kwalok bwe Setan ear kõnan mõkõj im kokkure Ailiñ eo ekãl ilo ien eo wõt ej jutõk, elañe emaroñ. Meñe Jeova ear bõprae an Setan lo tõbrõk ilo jibarbar ko an renana, Setan ear kate wõt im ear jab ebwer ilo jibarbar eo an ñõn kokkure Ailiñ eo ekãl ej kab jutõk. Inem, eñin unin emõkõj an kar “Maikeel im enjel ro an” emmakit ñõn jolõltak ‘drakon eo im enjel ro iben’ jen lõñ bwe en jab maroñ kokkure Ailiñ eo. Kin men in, jemaroñ ba bwe ien eo kar bõk anjo ion Setan im jolõltak e, ear walok elikin an kar jutõk Ailiñ eo ilo 1914.

Bar juõn men ñõn lemnok kake ej jerkakbiji eo an Kristian dri kabit ro me Baibel eo ej kamol bwe ear ijjino elikin wõt an jutõk Ailiñ eo. * (Rev. 20:6) Kinke ejelok juõn ian dri kabit ro jãtin Jisõs kar kwalok kake bwe ear ber iben Jisõs ilo ien tõrinae eo nae drakon eo im enjel ro an, tõrinae eo ilõñ im ien eo kar jolõltak Setan im dimõn ro an emaroñ kar rerelok ilo ien eo jerkakbiji eo an ro jãtin Kraist ear ijjino.

Kin men in, Baibel eo ejjab lukkun kwalok ñãt eo kar jolok Setan im enjel ro an jen lõñ. Meñe eindrein, ej alikar bwe men in ear walok elikin wõt ien eo Jisõs Kraist ear jijõt ion tron eo ilõñ ilo 1914.

[Kamelele ko itulal]