Kwon Kar Ber Ia ñe Ej Itok Jemlokõn?

ÑE JEOVA ej bõktok jemlokõn jukjuk im ber in enana ilo Armagedõn, ta eo enaj walok ñõn armij ro rewãnik? Jabõn Kennan Ko 2:​21, 22 ej uak: “Ro re jime re naj jokwe ilo lõl. Im ro re wãppen re naj berwõt ie. A ro re nana, naj kamõkit ir jen eneo, im ro re jela mon, naj totõk ir jen e.”

Ak, ewi wãwen an naj ro rewãnik berwõt ie? Enaj ke or juõn jikin kone ñõn ir? Ro rewãnik ren ber ia ñe ej itok jemlokõn? Eor emen bwebwenato ko ilo Baibel kin ro rar bõk lomor me rej kalikar men kein.

Ke Jikin eo Rar Ber Ie Ear Aurõk

Ikijen lomor eo kin Noa im Lot, 2 Piter 2:​5-7 ej ba: “Im [Anij] E ar jab tiriamokake lõl mokta, a E ar kejbãrok Noa, im bar jet jiljilimjuõn, e dri kwalok ekwojarjar, ke Ej bõktok lañ eo ion lõl an ro dri nana, im E ar kanuij tili jikin kwelok ko Sodõm im Gomorra, im liakelok ir ñõn kokkure, im likit ir joñok ñõn ro re naj kõmõn nana tokelik; im E ar lomoren Lot, armij ewãnik, ke elap an buromõj kin an ro dri nana kõmõn ilo ejej.”

Ewi wãwen Noa ear ellã im mour jen Ibijliplip eo? Anij ear jiroñ Noa: “Jemlokõn kõniek otemjej ej itok imaõ; bwe lõl e obrõk kin koaroñ kin ir; im lo, I naj kokkure ir iben lõl. Kwon kõmõnmõn juõn wa ñõn yuk jen wijki goper.” (Jen. 6:​13, 14) Inem Noa ear kalek wa eo einwõt an Jeova kar jiroñ e. Jiljilimjuõn ran ko mokta jen an ibijliplip eo itok, Jeova ear jiroñ Noa bwe en aini menin mour ko im kadreloñi na iloan wa eo im bareinwõt e im baamle eo an. Ilo ran eo kein kajiljilimjuõn, Anij ear kil kejem eo elikin wõt an kar Noa dreloñ iloan wa eo, “im ear wut mejiljil iumin eñoul ran im eñoul boñ.” (Jen. 7:​1-4, 11, 12, 16, UBS) Noa im baamle eo an rar ellã im ‘mour jen dren eo.’ (1 Pit. 3:​20, UBS) Rar aikwij ber iloan wa eo elañe rar kõnan mour. Ejelok bar juõn jikin ilo lõl emaroñ kar kejbãrok ir.​—Jen. 7:​19, 20.

Ikijen Lot, nan in jiroñ ko rar oktõk jidrik. Ruo enjel rar kennanek e kin ia eo en jab ber ie. Rar ba: “Jabdrewõt nukum eo ej jokwe ilo jikin kwelok in [Sodom], innem kwon ãñin ir jen ijin, kinke kimro ej iten kokkure jikin kwelok in.” Rar aikwij “ettõr ñõn tol ko.”​—Jen. 19:12, 13, 17, UBS.

Wãwen ko Noa im Lot rar iioni rej kamol bwe “Anij e jela kijkan an kõtlok ro remõn jen men in kabo, im drebij ro renana ilo joñõn kwotõn ñõn ran in ekajet.” (2 Pit. 2:9) Ilo wãwen kein ruo kin lomor, jikin eo rar ber ie ear aurõk. Noa ear aikwij ber iloan wa eo; ak Lot ear aikwij ko jen Sodom. Ak ej eindrein ke aolep ien? Jeova emaroñ ke kejbãrok ro rewãnik jekron ia eo rej ber ie, ilo air jab emmakit ñõn bar juõn jikin? Ñõn uake kajitõk in, jen etale bar ruo bwebwenato ko kin lomor.

Jikin eo Rej Ber Ie Eaurõk ke Ien Otemjej?

Mokta jen an kar Jeova kokkure Ijipt ikijen an bõktok menin kaiñtan eo ken kajoñoul ilo ran ko an Moses, Ear kakien dri Israel ro ñõn kabõtũktũk alal eo ilõñin kejem ko im jur ko ruo jurõn kejem ko ilo moko imweir kin bõtõktõkin menin mour eo rar kajerbale ilo ien Kwojkwoj in Kijone eo.  Etke? Kinke ñe ‘Jeova e naj driblok eneo bwe en mõn dri Ijipt ro im ñe Ej lo bõtõktõk eo ilo alal eo ilõñ, im ilo jur ko ruo, Jeova e naj kijon kejem eo, im E jamin likit bwe dri kokkure eo en dreloñ ilo moko imweir bwe en mõn ir.’ Im ilo boñen eo wõt, “Jeova e ar mõn manji otemjej ilo Ijipt, jen manjien Pero e ar jijõt ion tron eo an, ñõn manjien dri jebokwe e ar ber ilo prisõn; im manje otemjej manjien kau im jip.” Aolep manjei ro nejin dri Israel ro rar mour wõt meñe rar jab emmakit ñõn bar juõn jikin.​—Ex. 12:22, 23, 29.

Lemnok bareinwõt kin Rehab, juõn kõra ekijoñ me ear jokwe ilo jikin kwelok in Jeriko. Dri Israel ro rar pojõk in jino air tõrinaek ailiñ ko ilo Enen Kalimur eo. Ke Rehab ear kile bwe Jeriko enaj jorran, ear jiroñ dri iaroñroñ ro ruo bwe ro ilo jikin kwelok eo rar lelñoñ kin jarin tõrinae eo an dri Israel ro. Ear noj dri iaroñroñ ro im kajitõk ibeir ñõn kalimur bwe renaj kejbãrok e im baamle eo an ñe renaj itok in kokkure Jeriko. Dri iaroñroñ ro rar jiroñ Rehab ñõn kadreloñtok baamle eo an na iloan mweo imõn, me ear ber ion worwor in jikin kwelok eo. Elañe rar drioijlok jen mweo, inem renaj bareinwõt mij iben armij ro jet ilo jikin kwelok eo. (Josh. 2:​8-​13, 15, 18, 19) Bõtab tokelik, Jeova ear jiroñ Joshua bwe “worwor in jikin kwelok eo e naj eolok.” (Josh. 6:5) Kiõ jikin eo me dri iaroñroñ ro rar kalimur bwe enaj jikin kone eo an ear ber ilo kauwatata. Ewi wãwen Rehab im baamle eo an remaroñ bõk lomor?

Ke ear jejit ien eo ñõn kokkure Jeriko, dri Israel ro rar lamij im jino uk jilil ko air. Joshua 6:​20 ej ba: “Ke armij ro rar roñjake ainiken jilil, armij ro rar lamij kin ainiken e kanuij lap, im worwor eo e ar eolok.” Ke ear jino okjak worwor eo, ejelok juõn ear maroñ kabwijrõke. Ak ilo kabwilõñlõñ jorran eo ear jab jelet mweo imõn Rehab. Joshua ear jiroñ dri iaroñroñ ro ruo: “Komin dreloñwe mweo imõn kõra ekijoñ eo, im ãñintok jen ijo lio, im aolep iben, einwõt ami kanõjnij ñõn e.” (Josh. 6:​22) Aolep ro rar ber iloan mweo imõn Rehab rar mour.

Ta eo Ear Aurõktata?

Ta eo jemaroñ katak jen lomor eo an Noa, Lot, dri Israel ro ilo ien ko an Moses im Rehab? Ewi wãwen bwebwenato kein rej jibõñ kij ñõn beek tu ia eo jen ber ie ñe enaj itok jemlokõn jukjuk im ber in enana?

Emol, Noa ear bõk lomor ilo an kar ber ilo wa eo. Ak etke ear ber ie? Ejjab ke kin tokjen an kar jerbale tõmak eo an im kin an  bokake? Baibel eo ej ba: “Ein drein Noa e ar kõmõn; einwõt men otemjej Anij ej jiroñ e, ein drein e ar kõmõne.” (Jen. 6:​22; Hib. 11:7) Ak ta kin kij? Jej kõmõni ke men otemjej Anij ear kakien kij ñõn ar kõmõni? Noa ear bareinwõt juõn “dri kwalok ekwojarjar.” (2 Pit. 2:5) Jej einwõt ke e ilo ar kijejeto in kwalok nan, meñe armij ro rejjab mõnõnõ in roñjake?

Lot ear ellã im mour jen jorran eo ilo an kar ko jen Sodom. Ear mour wõt kinke ear wãnik iman mejen Anij im ear lap an inebata kin kõmõn ko retton an armij ro rej kokkure kien ilo Sodom im Gomorra. Mõnit ko retton me rej jededlok ranin rej ke lukkun kainebataik kij? Ak jej ke iminene in loi im kiõ rejjab kabnõnõik kij? Jej ke kõmõn joñõn wõt ar maroñ bwe jen ‘ainemõn im ejelok ar mãr ak notar’?​—2 Pit. 3:​14.

Ikijen dri Israel ro ilo Ijipt im Rehab ilo Jeriko, bwe ren maroñ bõk lomor rar aikwij ber iloan moko imweir. Alikar rar aikwij kwalok air tõmak im bokake. (Hib. 11:28, 30, 31) Pijaik mõk kin wãwen an kar baamle ko kajuju an dri Israel ro lale manje ro nejiir ke “juõn limõ elap” ear walok iben aolep baamle ko an dri Ijipt. (Ex. 12:30) Lemnok kin wãwen an kar Rehab kuktok iben baamle eo an ke ear eñjake an okjak worwor eo ilo Jeriko. Ear aikwij tõmak ñõn an bokake im berwõt iloan mweo imõn.

Mõtõn jidrik jukjuk im ber eo enana an Setan enaj joko. Ak jejjab jela kin ewi wãwen Jeova enaj kejbãrok armij ro an ‘ilo ran in illu’ eo an. (Zep. 2:3, UBS) Ak, jekron ia eo jej ber ie ak ta wãwen eo jej jelmaiki ilo ien eo, jemaroñ liki bwe ar bõk lomor enaj wawa ion ar tõmak ilo Jeova im ilo ar bokake e. Mae ien eo, jej aikwij ejaak juõn lemnok ekkar kin ta eo kanan eo an Aiseia ear ba kin ‘rum ko ar.’

‘Komin Dreloñ na ilo Rum ko Ami’

Aiseia 26:20 ej ba: “Komin itok, ro Aõ dri ailiñ, komin dreloñ na ilo rum ko am, im kil aur ko iturõm: kwon tilekek jirik ien, mae ien illu eo e naj joko.” Ien eo moktata kanan in ear jejit kitien kar 539 yiõ ko mokta jen an kar Kraist itok ñõn lõl, ke dri Mede im dri Põrsia ro rar anjo ion Babilõn. Ke ear dreloñe Babilõn, dri Põrsia eo Sairõs, ear kakien armij ro bwe ren berwõt iloan moko imweir kinke kar jiroñ dri tõrinae ro an ñõn mõn jabrewõt armij ro rej ber inabij.

Ilo ran kein ar, “rum ko” ilo kanan in emaroñ ekkeijaklok ñõn elõñlok jen 100,000 congregation ko an dri Kennan ro An Jeova ibelakin lõl. Im elap kwonan congregation kein ilo mour ko ar im renaj wõnmanlok im jibõñ kij mae ien eo enaj jemlok “iñtan eo elap.” (Rev. 7:​14) Emwij kakien armij ro an Anij ñõn dreloñ ñõn iloan “rum ko” im tilekek “mae ien illu eo e naj joko.” Ej juõn men eaurõk bwe jen ejaak im drebij juõn lemnok emõn kin congregation eo im kate ñõn ber ebake rolul eo. Jen bõk ñõn buruer nan in rejañ in an Paul: “Im jen lale dron, im kõkãtõk dron ñõn yokwe im jerbal ko remõn; Im jen jab likit ar kwelok im jar, einwõt mõnit an jet, a jen kowe dron im kalaplok ar kõmõn men in, bwe jej lo an ran eo ebaktok.”​—Hib. 10:24, 25.

[Pija ko ilo peij 7]

Ta eo jemaroñ katak jen wãwen ko Anij ear lomoren armij ro an ilo ien ko mokta?

[Pija eo ilo peij 8]

“Rum ko” remaroñ jitõñlok ñõn ta ilo ran kein ar?