Lõmaro dri Belele, Komin Kajeoñwe Yokwe eo an Kraist!

ILO boñin eo eliktata in an mour ion lõl, Jisõs ear jiroñ dri jilik ro an retiljek: “Kien ekãl Ij lewoj ñõn kom, Komin yokwe dron; einwõt I ar yokwe kom, komin bareinwõt yokwe dron. Ilo men in armij otemjej re naj jela bwe komij dri kalora, elañe komij yokwe dron.” (Jon 13:34, 35) Aet, dri Kristian ro remol rej aikwij yokwe dron.

Ilo an konono ñõn lõmaro rej Kristian me eor beleir, dri jilik Paul ear je: “Man ro, komin yokwe limaro belemi, einwõt Kraist e ar bareinwõt yokwe eklisia, im mõke lelok E kin e.” (Ep. 5:​25) Ewi wãwen leo emaroñ jerbale nan in kakabilek in jen Baibel ilo mour in mare eo an, elaptata elañe lio belen ej juõn eo emwij an wujleplok an mour ñõn Jeova?

Kraist Ear Kaurõke Congregation Eo

Baibel eo ej ba: “Emõn bwe lõmaro ren bareinwõt yokwe limaro beleir im einwõt enbwiniir. Leo eo ej yokwe lio belen ej mõke yokwe e; Bwe ejelok en e ar mõke kijirãte kõniekin; a ej kakajiririik e, im kaurõk e, einwõt an Kraist bareinwõt kõmõn ñõn eklisia.” (Ep. 5:​28, 29) Jisõs ear yokwe dri kalor ro an im rar jitenburu iben. Ear kaurõke ir. Meñe rar jab wãppen, ear inemõn im joij wõt ñõn ir. Kin an kõnan “bõk eklesia ñõn e make, ilo aoleben an aibuijuij,”ear kalimjeke wõt karkar ko remõn karkarin dri kalor ro an.​—Ep. 5:​27, UBS.

Einwõt an kar Kraist kwalok an yokwe congregation eo, leo ej aikwij kwalok an yokwe eo belen ilo nan im kõmõn. Juõn kõra me ekkã an bõk yokwe jen leo belen, ej mõnõnõ im ej kile an aurõk. Ijo turãjet, juõn kõra me elap an jokõne kin mweiuk ko emaroñ jab lukkun mõnõnõ elañe leo belen ej kejekron e.

Ewi wãwen an leo kwalok bwe ej kaurõk lio belen? Ñe rej ber ilobwilij ej kwalok kajen lio belen ñõn ro jet ilo juõn wãwen koutiej im nebar e kin an lap an jibõñ. Elañe lio belen ear jibõñ kõmõne juõn men eaurõk ilo baamle eo, ejjab ãliklik in konono kake ñõn ro jet. Ñe rej mõke iairro, lio ej kile bwe leo ej yokwe e. An jibwe pein, ettõñdikdik ñõn e, atbokwõj e, im nebar e remaroñ jet men ko redrik, bõtab elap air aurõk iben juõn kõra.

Ear “Jab Jok in Naetair Ro Jãtin”

Kraist Jisõs ear “jab jok in [naetan dri kabit ro dri kaloran] ro jãtin.” (Hib. 2:​11, 12, 17) Elañe kwoj juõn dri Kristian, kememej bwe lio beleõm ej bareinwõt juõn jeim im jãtim ilo tõmak. Eaurõklok wujleplok eo an ñõn Jeova jen kalimur eo an kin mare, jekron ñe ear baptais mokta ak elikin an mareik yuk. Ñe brother eo ej tel kwelok eo ilo congregation ej kir lio beleõm bwe en uak, ilo ekkar enaj kir e “Jein im jãten​—.” Lio ej bareinwõt jeim im jãtim, ejjab ilo Mõn Kwelok eo wõt ak bareinwõt ilo mweo. Ebar aurõk ñõn am kwalok joij im koutiej ñõn e ilo mweo einwõt ilo wãwen eo kwoj kõmõne ilo Mõn Kwelok eo.

Elañe eor erro ko jet am ilo congregation eo, kwomaroñ lo bwe jet ien ebin ñõn jokkin wõt juõn kin erro ko ilo congregation eo im ilo baamle eo. An or burukuk ibwiljin elder ro im ministerial servant ro im air  katakin ro jet ñõn lolorjake erro ko jet ilo congregation eo enaj kõmõn bwe en laplok am ien iben eo jeim im jãtim me elaplok an aikwiji yuk, ej lio beleõm. Kememej bwe elõñ brother ro jet me ejelok berre remaroñ kõmõni jerbal ko ilo congregation eo me kar lewoj ñõn yuk, bõtab kwe wõt kar kobaik yuk iben lio beleõm ilo mour in mare.

Bareinwõt, kwoj bõran lio beleõm. Baibel eo ej ba: “Bõran jabrewõt man Kraist; im bõran kõra man.” (1 Kor. 11:3) Ilo wãwen it eo kwoj aikwij in jerbale maroñ eo am ñõn tel? Ejjab ilo am eliji eon in im jiroñ e bwe en koutiej yuk. Wãwen eo ñõn jerbale maroñ eo am ñõn tel ilo ekkar ej ñõn kajeoñwe Jisõs Kraist ilo wãwen eo kwoj kõmõn ñõn lio beleõm.​—1 Pit. 2:​21.

“Kom Ro Jera”

Jisõs ear naetan dri kalor ro an einwõt ro jeran. Ear jiroñ ir: “I jamin bar naetõmi dri korijer; bwe dri korijer e jaje men eo iroij eo an ej kõmõn; a I ar naetõmi ro jera; bwe men otemjej I ar roñ jen Jema I ar kwalok ñõn kom.” (Jon 15:14, 15) Jisõs im dri kalor ro an rar keini air konono iben dron. Rar bareinwõt kõmõni men ko iben dron. Kar kir “Jisõs im ro dri kaloran” ñõn kwojkwoj in belele eo ilo Kena. (Jon 2:2) Ear or jikin ko remõn ibeir einwõt jikin kallip in Getsemani. Baibel eo ej ba bwe ‘e makij an Jisõs ilok ñõn ijo iben ro dri kaloran.’​—Jon 18:2.

Lio ej aikwij iñjake bwe leo ej armij eo jeran ebaktata. Elap an aurõk bwe limaro im lõmaro ren kõmõni men ko rekamõnõnõ iben dron! Korijer ñõn Anij iben dron. Lo lõñliñ ilo air katak Baibel iben dron. Jolok elap ien iben dron einwõt etetal, bwebwenato, im mõña iben dron. Kwoj aikwij watõk eo beleõm einwõt juõn jeram ejitenburu im jab baj eo rejetam wõt.

Ear “Yokwe Ir ñõn Jemlokõn”

Jisõs ear “yokwe ir ñõn jemlokõn.” (Jon 13:1) Jet lõmaro rej likjõp in kajeoñwe Jisõs ilo wãwen in. Remaroñ bareinwõt jolok “lima ro rar belek ir ke rar likao,” bwelen ñõn bõk juõn eo edriklok jen ir.​—Mal. 2:​14, 15, UBS.

Ro jet einwõt Willi, rej kajeoñwe Kraist. Kin an lio belen Willi nañinmij, ear aikwij in lale e iomin elõñ yiõ ko. Ewi iñjake eo an kar Willi kin men in? Ear ba: “Aolep ien iar watõk lio beleiõ einwõt juõn menin letok jen Anij im iar lukkun kaurõk e. Bareinwõt, 60 yiõ ko remotlok iar kalimur bwe inaj kar kejbãrok e ilo ien emõn im nana. I jamin meloklok kalimur in.”

Lõmaro rej Kristian me eor beleir rej kajeoñwe yokwe eo an Kraist. Kwon kaurõk lio beleõm ej mijõk Anij me ej jeim im jãtõm im jeram.

[Pija eo ilo peij 20]

Lio beleõm ej ke eo jeram ebaktata?

[Pijja eo ilo peij 20]

‘Kwon yokwe lio beleõm’