Kabbeik Ro Jet—Etke im Ewi Wãwen?

EAR or juõn ear ajeji jerbal ko mokta jen kar kõmõnmõn lõl in. Jeova ear kõmõnmõn Nejin eo ej mõke wõt, inem ear kajerbal Nejin einwõt “juõn dri mejerik” ñõn kõmõnmõn men ko otemjej ilõñ im ilõl. (Ken. 8:​22, 23, 30; Jon 1:3) Ke Anij ear kõmõnmõn armij ro ruo moktata, ear jiroñ irro ñõn “kobrõk lõl, im kajur jen e.” (Jen. 1:​28) Dri Kõmõnmõn eo ear lelok ñõn armij ro jerbal eo ñõn kajededlok Paredais eo ilo jikin kallip in Iden bwe en kobrõk aolepen lõl. Aet, jen jinoin, kabbeik ro jet ear baj wãwen eo wõt rolul eo an Jeova ej jerbal.

Ta eo ej koba ilo ar kabbeik ro jet? Etke dri Kristian elder ro rej aikwij katak ñõn kabbeik ro jet kin jerbal ko ilo congregation eo im ewi wãwen remaroñ kõmõne men in?

Ta in Kabbeik?

Kabbeik ej melelen ñõn lelok ak ajeji jerbal im erro ko ñõn ro jet ak ñõn jitõñ juõn einwõt eo ej jutõk kin armij eo ear lelok jerbal ñõn e. Inem, kabbeik ej kitibuj aikwij eo ñõn kajerbal ro jet ñõn kõtõbrõk juõn men. Men in enaj kõmõn bwe ren lelok erro ko ñõn ro jet.

 Kar watõk ro kar lelok erro ko ñõn ir ilo congregation eo an dri Kristian ñõn kajejit jerbal eo air, kwalok wãwen jerbal eo ej wõnmanlok wõt, im enañin aolep ien konono iben eo ear ajeji jerbal ko. Bõtab, erro eo ej ber ion brother eo ear ajeji jerbal ko ñõn ro jet. Ej aikwij etale wãwen jerbal eo ej wõnmanlok im lelok nan in kakabilek ko elañe ej menin aikwij. Bõtab, jet remaroñ kajitõk, ‘Etke kwoj aikwij kabbeik ro jet elañe kwomaroñ mõke kõmõne jerbal eo?’

Etke Jej Kabbeik Ro Jet?

Lemnok kin an Jeova kõmõnmõn Nejin eo emõke wõt im lelok kwonan ilo jerbal in kõmõnmõn men ko jet. Aet, “kin E emwij kõmõn men ko otemjej, men ko i lõñ kab men ko ion lõl, ko jej loi im ko je jab loi.” (Kol. 1:​16) Dri Kõmõnmõn eo emaroñ kar mõke kõmõnmõn men ko otemjej, bõtab ear kõnan bwe Nejin en bareinwõt lõñliñ kin tõbrõk ko ear kõmõni. (Ken. 8:​31) Men in ear jibõñ Nejin ñõn kalaplok an jela kin karkar ko karkarin Anij. Ilo juõn wãwen, Jemen ear kajerbal ien in ñõn katakin Nejin eo ej mõke wõt.

Ke ear ber ion lõl, Jisõs Kraist ear anõke joñok eo an Jemen ilo an kabbeik ro jet kin erro ko. Jidrik kin jidrik, ear katakin dri kalor ro an. Ear jilkinlok dri jilik ro 12 im tokelik dri kalor ro jet 70 moktalok jen e ñõn tel jerbal in kwalok nan eo. (Luk 9:​1-6; 10:​1-7) Ke Jisõs ear tõbarlok jikin kein, emwij kõmõne juõn berber emõn ñõn e. Mokta jen an kar wõnliñlok ñõn lõñ, Jisõs ear kabbeik dri kalor ro an reiminene kin erro ko relaplok, ekoba jerbal in kwalok nan eo ibelakin lõl.​—Mat. 24:45-​47; Jerb. 1:8.

Kabbeik im katakin ro jet ear erom wãwen eo congregation eo an dri Kristian ej jerbal. Dri jilik Paul ear jiroñ Timote: “Men kein kwon likiti na iben armij retiljek, ro re naj bareinwõt maroñ in katakin ro jet.” (2 Tim. 2:2) Aet, ro eor air iminene ren katakin ro me renaj bareinwõt katakin ro jet.

Ikijen an kabbeik ro jet kin jerbal ko kar lelok ñõn e, elder eo ej kõtlok bwe ro jet ren bareinwõt lo lõñliñ ilo air katakin im lale bwij eo. Ilo air kile bwe eor joñõn maroñ ko an armij ro, elaplok an or unin an elder ro kajitõk iben ro jet ñõn jibõñ bõk erro ko ilo congregation eo. Baibel eo ej ba: “Jelãlokjen ej bed ibben ro ettã burueir.” (Ken. 11:2, UBS) Etã buru ej kitibuj ar kile joñõn maroñ ko ar mõke. Elañe kwoj mõke kajeoñ kõmõne men otemjej, kwonaj mõk im jolok ien ko me kwomaroñ kar kajerbali ñõn ber iben baamle eo am. Inem ej juõn menin meletlet ñõn ajeji erro ko ñõn ro jet. Ñõn wanjoñok, jen lemnok kin brother eo ej karõk jerbal ko an elder ro. Emaroñ kajitõk iben elder ro jet ñõn etale jããn eo an congregation eo. Ilo wãwen in, elder rein remaroñ jela kin joñõn jããn eo ilo congregation eo.

Ke kabbeik ro jet ej lelok ien ñõn an ro jet bõk kabel im kaminene ko me rej menin aikwij, ej bareinwõt kõtlok bwe eo ej kabbeik ro jet kin erro ko en lale joñõn maroñ ko an ro me ear lelok jerbal kein ñõn ir. Kin men in, ilo air kabbeik ro jet kin jerbal ko rekkar ilo congregation eo, elder ro remaroñ lale elañe rein remaroñ bõk jerbal in ministerial servant ilo air “melejoñ ir mokta.”​—1 Tim. 3:​10.

Eliktata, an elder ro kabbeik ro jet ej kwalok air liki ir. Paul ear katakin Timote ikijen an  jerbal iben ilo jerbal in mejinede eo. Juõn kõtan ebak ear edrek ikõtairro. Paul ear naetan Timote “nejiõ emol ilo tõmak.” (1 Tim. 1:2) Ilo ejja wãwen in lok wõt, juõn kõtan ebak ear edrek ikõtan Jeova im Jisõs ke rar jerbal iben dron ilo air kõmõnmõn men ko otemjelok. Ikijen air lelok jerbal ko ñõn ro jet, elder ro remaroñ kadrek juõn kõtan ebak ibeir.

Unin Jet Rej Jenliklik

Meñe rejela tokjen ko, jet elder ro rej lo bwe ebin ñõn ajeji erro ko ñõn ro jet, bwelen rej jenliklik kinke rej iñjake bwe enaj driklok maroñ ko ibeir. Remaroñ lemnok bwe ir mõke rej aikwij kõmõni aolep jerbal ko. Bõtab, kememej bwe mokta jen an kar Jisõs wõnliñlok ñõn lõñ, ear lelok maroñ ñõn dri kalor ro an bwe ren kõmõne juõn jerbal elap an aurõk, im ear jela bwe renaj kar kõmõni jerbal ko relaplok jen e!​—Mat. 28:19, 20; Jon 14:12.

Jet elder ro remaroñ kar kabbeik ro jet ilo ien ko remotlok ak rar jab juburu kin tõbrõk ko. Remaroñ iñjake bwe enaj emõnlok im mõkõjlok elañe renaj mõke kõmõne jerbal eo. Bõtab, lemnok kin joñok eo an Paul. Ear jela aurõkin kabbeik ro jet, ak ear bareinwõt kile bwe armij ro rej kab bõk jerbal eo rejamin aolep ien kajejit erro ko air einwõt ilo wãwen eo ear kõtmene kake. Ilo jerbal in mejinede eo an mokta, Paul ear katakin likao eo ear itoitak iben etan Mark. Ear lap an Paul buromõj kin an kar Mark ilok jen jerbal eo an im rol ñõn kabijuknen. (Jerb. 13:13; 15:37, 38) Meñe eindrein, men in ear jab kabwijrõk Paul jen an katakin ro jet. Einwõt kar kwalok kake, ear kir dri Kristian likao eo etan Timote bwe en itoitak iben. Ke Timote ear pojõk ñõn bõk erro ko relaplok, Paul ear likit e ilo Epesõs, im kamaroñ e ñõn jitõñ brother ro bwe ren bõk jerbal in elder im ministerial servant ilo congregation eo.​—1 Tim. 1:3; 3:​1-​10, 12, 13; 5:​22.

Ilo ejja wãwen in lok wõt, elder ro ranin rejjab aikwij ebwer ilo air katakin brother ro kinke juõn iair ear kejekron erro eo an. Ej menin meletlet im aurõk ñõn katak ñõn liki ro jet im ñõn katakin ir. Bõtab, ta ko elder ro rej aikwij lemnok kaki ñe rej kabbeik ro jet?

Wãwen eo ñõn Kabbeik Ro Jet

Ñe kwoj kabbeik ro jet kin erro ko, lemnok kin maroñ ko an brother rein kwoj lemnok kake ir. Ke juõn aikwij ñõn lolorjake ajeji mõña ko ilo Jerusalem ear walok, dri jilik ro rar kãlet “jiljilimjuõn armij, e alikar air emõn, im r’obrõk kin Jitõb Kwojarjar im meletlet.” (Jerb. 6:3) Elañe kwoj kajitõk iben juõn eo ejjab tiljek an jerbal ñõn kõmõn juõn men, enaj likjõp in kõmõne. Inem, kwoj aikwij lelok jerbal ko redrik mokta. Ñe armij eo ej kamol an tiljek, bwelen enaj or an maroñ kõmõni erro ko relaplok.

Bõtab, ejjab bwe men in. Karkar ko karkariir im maroñ ko air reoktõk jen dron. Bareinwõt iminene ko an kajuju iair reoktõk jen dron. Juõn brother me ejoij im ej mõnõnõ in kõmao iben ro jet emaroñ emõn ñõn an jerbal einwõt dri lale kejam, im eo ejejit im kwon an jerbal emaroñ emõn ñõn jibõñ secretary eo an congregation eo. Remaroñ lelok ñõn juõn sister ekabel ilo kainõknõk jerbal eo ñõn kõmõn wut ilo Kwojkwoj in Kememej eo.

Ñe kwoj kabbeik juõn kin erro ko, kwon kwalok ilo alikar ta eo ej aikwij kõmõne. Mokta jen an kar Jon dri Baptais jilkinlok jet dri keañ ñõn Jisõs, ear kemeleleik ir kin ta eo ear kõnan jela im nan ko ren kajerbali ñõn kajitõk. (Luk 7:​18-​20) Ijo turãjet, ke Jisõs ear jiroñ dri  kalor ro an ñõn aini bween mõña ko me ear kwaloki ilo kabwilõñlõñ, ear kõtlok bwe ren mõke lemnok kin ta eo rej aikwij kõmõne. (Jon 6:​12, 13) Joñõn tõbrõk eo ej wawa ion wãwen jerbal eo im maroñ ko iben dri jibõñ eo. Eo ej kabbeik ro jet kin erro ko im eo kar lelok jerbal eo ñõn e, irro jimor rej aikwij melele kin ta eo rej aikwij kõtõbrake im joñõn an wõnmanlok jerbal eo. Bareinwõt irro jimor rej aikwij in jela bwe ej an armij eo ej komone jerbal eo bebe, kin joñõn eo ej aikwij kõmõne kin jerbal eo. Elañe jerbal eo ej aikwij rerelok ilo juõn ien emwij karõke, emaroñ emõn elañe kar konono im errã iben dron kin ran eo ej aikwij rerelok jen air baj ba ej aikwij rerelok.

Eo kar kabbeik e kin jerbal eo ej aikwij in or iben jããn, kein jerbal ko, im jibõñ ñe ej aikwij. Emaroñ emõn ñõn kejelãik ro jet kin karõk eo. Ke Jisõs ear lelok ñõn Piter “ki ko ki in ailiñ in lõñ,” ear kõmõne men in ke dri kalor ro jet rar ber. (Mat. 16:13-​19) Ejja eindrein lok wõt, jet ien emaroñ emõn ñõn kejelãik congregation eo kin wõn eo ej bõk erron juõn jerbal.

Ej bareinwõt aurõk ñõn kejbãrok. Elañe kwoj kajeoñ wõt kõmõne jerbal eo me kwar kabbeik juõn ñõn kõmõne, ej einwõt ñe kwoj ba ñõn e, “Ijjab lukkun liki yuk.” Emol, jet ien tõbrõk eo emaroñ jab ekkar ñõn men eo kwar kõtmene kake. Bõtab, elañe brother eo kar lelok erro eo ñõn e kar kõtlok bwe en anemkwoj in beek ta eo en kõmõne, emaroñ or an liki e mõke im laplok an iminene. Ejjab melelen men in bwe kwojjab aikwij lale wãwen an kõmõne jerbal eo. Meñe ear lelok jerbal eo ñõn Nejin ñõn kõmõnmõn men otemjej, Jeova ear bar bõk kwonan ilo jerbal eo. Ear ba ñõn dri Mejerik eo: “Jen kõmõnmõn armij ilo wãwer.” (Jen. 1:​26) Inem ilo nan im kõmõn ko am, kwon rejetak jerbal eo emwij kõmõne, im nebar armij eo kin an kate. Etale tõbrõk eo ilo tukaru emaroñ jibõñ armij eo. Elañe ejjab lukkun jejit an kar kõmõne jerbal eo, jab ãliklik in lelok nan in rejañ ak jibõñ. Kememej bwe erro eo ej ber iom einwõt eo ej kabbeik ro jet.​—Luk 12:48.

Elõñ rar bõk tokjen ikijen an kar elder ro me rar lukkun kwalok air itoklimo kake ir kabbeik ir kin jerbal ko ilo congregation eo. Emol, aolep elder ro rej aikwij jela etke im ewi wãwen kabbeik ro jet ilo air kajeoñwe Jeova.

[Bo̦o̦k eo ilo peij 29]

KABBEIK RO JET EJ

• juõn wãwen kwoj kõtlok bwe ro jet ren bareinwõt lõñliñ kin tõbrõk eo

• juõn wãwen ñõn kõtõbrõk elõñ jerbal ko

• juõn wãwen ñõn kwalok meletlet im etta buru

• juõn wãwen katakin ro jet

• juõn wãwen ñõn kwalok am liki ro jet

[Bo̦o̦k eo ilo peij 30]

WÃWEN KABBEIK RO JET

• Kãlet armij ro rekkar ñõn jerbal eo

• Kemelele im konono ilo alikar

• Kalikar ta eo ej aikwij tõbrõk

• Lelok kein jibõñ ko rej menin aikwij

• Lale wãwen jerbal eo ej wõnmanlok, im kwalok am liki

• Mõnõnõ in bõk erro eo

[Pija ko ilo peij 31]

Kabbeik ej kitibuj lelok juõn jerbal im lale bwe en wõnmanlok