Kajitõk ko jen Ro Rej Riit

Jisõs ear kwalok nan ibelakin enen Israel. Inem etke dri jilik Piter ear maroñ ba bwe dri Ju ro im dri tel ro air rar “kõmõn men in ilo [air] jaje” ke rar mõn Jisõs?​—Jerbal 3:​17.

Ke dri jilik Piter ear konono ñõn juõn kumi in dri Ju ro kin air kar bõk kwonair ñõn mõn Messaia eo, ear ba: “I jela bwe kom ar kõmõn men in ilo ami jaje, im bareinwõt iroij ro ami.” (Jerb. 3:​14-​17) Jet dri Ju ro rar kõmõne men in kinke remaroñ kar jab melele bwe Jisõs ej Messaia eo im rar jab melele kin katak ko an. Ak kin ro jet, unin air jaje ej kinke rar makoko in kabuñburuen Anij, rar kalijeklok, junmar, im kijirãt.

Kinke jet rar makoko in kabuñburuen Jeova, men in ear jelet lemnok ko air kin katak ko an Jisõs. Ekkã an kar Jisõs kwalok wanjoñok ko ilo katak ko an, me ear kemelele ñõn aolep ro im rej itoklimo in kalaplok air katak. Jet armij ro me rar roñjake Jisõs rar ilok jen e im rar jab kate ir ñõn bõk melele eo ejime. Juõn ien, jet ian dri kalor ro an rar lõkatip kin nan ko an Jisõs ear kwaloki. (Jon 6:​52-​66) Rar jab kile bwe Jisõs ear kajerbal wanjoñok ko an ñõn melejoñwe ir elañe rej pojõk ñõn ukot lemnok im kõmõn ko air. (Ais. 6:​9, 10; 44:18; Mat. 13:10-​15) Bareinwõt rar kejekron juõn nan in kanan kin wãwen Messaia eo ear kajerbal wanjoñok ko ilo katak ko an.​—Sam 78:2.

Jet rar kejekron katak ko an Jisõs kin air kalijeklok. Ke Jisõs ear katakin armij ro ilo imõn kwelok eo ilo bukwon eo an, Nazeret, armij ro rar lukkun “bwilõñ.” Kin air berre bwe Jisõs ej Messaia eo, rar kajitõk: “Ear bõk ia nan in katak kein? . . . Ta ejab kamtõ eo nejin Mary in ke, jein James, Joses, Judas, im Simon? Ta kõrã ro jatin rejjab jokwe ijin ke?” (Mark 6:​1-3, UBS) Ekkar ñõn lemnok ko an dri Nazeret ro, katak ko an Jisõs ear ejelok tokjeir kinke ear itok jen juõn baamle etã im jeramel.

Ak ta kin dri tel in kabuñ ko? Enañin aolepeir rar jab eoroñ katak ko an Jisõs kin ejja un kein wõt. (Jon 7:​47-​52) Rar karmijeteik katak ko an Jisõs kinke rar junmar e kin an buñbuñ iben armij ro. (Mark 15:10) Im ear lõñ armij ro reutiej rar kijirãte e ke ear kananaik ir kin air jela mon im riõp. (Mat. 23:13-​36) Kin men in, kin air kar kõnan kejekron katak ko an Jisõs, ear ba ñõn ir: “Wo ñõn kom dri kien! bwe kom ar bõklok ki an jelalokjen: kom jab mõke dreloñ [ñõn Ailiñ eo], im ro r’ar nañin dreloñ kom ar boprae ir.”​—Luk 11:37-​52.

Iomin jilu im jimõtõn yiõ ko, Jisõs ear kwalok kin nuuj eo emõn ilo ene eo. Ear bareinwõt katakin elõñ armij ro jet ñõn bõk kwonair ilo jerbal in. (Luk 9:​1, 2; 10:​1, 16, 17) Kin an Jisõs im dri kalor ro an keie ilo jerbal in, Parisi ro rar aol im ba: “Lo dri lõl otemjej rej ilok ilokõnlok.” (Jon 12:19) Inem ejjab melelen bwe aolep dri Ju ro rejjab jela men otemjej. Bõtab, rar kõnan wõt kejekron Jisõs einwõt Messaia eo. Remaroñ kar kalaplok air jelalokjen im yokwe kin Messaia eo, ak rar jab. Jet rar bõk kwonair ñõn mõn Jisõs. Kin men in, dri jilik Piter ear rejañ ir: “Komin ukwelok ibemi, im bar oktõk, bwe en jeorlok jerawiwi ko ami, im bwe en walok ien aimlolo ko jen iman mejen Iroij. Im bwe En jilkintok Dri Kraist, eo ar likit E ñõn kom mokta, aet, Jisõs.” (Jerb. 3:​19, 20) Elap an kaitoktoklimo bwe tausan dri Ju ro rar jino roñjake, ekoba “jaran pris ro.” Ear joko air bar kejekron Jisõs ak rar ukwelok im bõk buñburu eo an Jeova.​—Jerb. 2:​41; 4:4; 5:​14; 6:7.