Baamle ko Rej Dri Kristian, Komin Lor Joñok eo an Jisõs!

“Kraist e ar . . . likit joñok ñõn kom, bwe komin anõke jenkwon ne ko neen.”​—1 PIT. 2:​21.

1. (a) Ta kar jerbal eo an Nejin Anij ke kar kõmõnmõn men otemjej? (b) Ewi iñjake eo an Jisõs kin armij ro?

 KE ANIJ ear kõmõnmõn lõñ im lõl, manje eo Nejin ear ber iturin “einwõt juõn dri mejerik.” Nejin Anij ear bareinwõt jerbal iben Jemen ke Jeova ear kõmõnmõn elõñ kain menin mour ko rekajju wãweir im menin edrek ko ilo lõl in, im ke Ear kapoj Paredais eo bwe en jikin jokwe an ro Jeova ear kõmõnmõn ir ilo nememen im einwõt e. Nejin Anij, eo me tokelik kar naetan Jisõs, ear kanuij lap an yokwe armij. “[An] lõñliñ e ar iben ro nejin armij.”​—Ken. 8:​27-​31; Jen. 1:​26, 27.

2. (a) Ta eo Jeova ear letok ñõn jibõñ armij ro rejjab wãppen? (b) Ta juõn ian wãwen ko ilo mour me Baibel eo ej letok nan in tel ie?

² Elikin an kar armij ro ruo moktata jerawiwi, lomoren armij otemjej jen jerawiwi ear erom juõn mõtõn eaurõk ilo karõk eo an Anij. Jeova ear letok katok in binmour eo an Kraist ñõn kõmõn bwe armij ren maroñ bõk lomor. (Rom. 5:8) Bareinwõt, Jeova ear letok Nan eo an, Baibel eo, me ej letok nan in tel ko bwe armij ren kate ir ilo air kijenmij wõt meñe rej jolit jab wãppen. (Sam 119:105) Ilo Nan eo an, Jeova ej letok nan in jiroñ ko ñõn jibõñ armij ro ñõn kakajur im drebij mõnõnõ eo an baamle ko air. Ikijen mour in mare, buk in Jenesis ej kwalok bwe leo ej aikwij “edrep na iben lio belen im irro naj juõn wõt kõniek.”​—Jen. 2:​24.

3. (a) Ta eo Jisõs ear katakin armij kake kin mour in mare? (b) Ta eo jenaj etale ilo katak in?

³ Ke ear jerbal in kwalok nan ion lõl, Jisõs ear kalikar bwe kar karõk bwe dri belele ro ren berwõt iben dron ñõn in drio. Ear katakin armij kin nan in kakabilek ko me ñe baamle ko renaj kar jerbali enaj jibõñ ir ñõn bõprae lemnok im mwil ko me renaj kejorran mour in mare eo air ak mõnõnõ eo an baamle eo air. (Mat. 5:​27-​37; 7:​12) Katak in enaj konono kin wãwen katak ko an Jisõs im joñok eo ear likiti ke ear ber ion lõl remaroñ jibõñ leo dri belele, lio dri belele, ro jemen im jinen, kab ajiri ro  ñõn bõk juõn mour elemõnõnõ im ekajuburu.

Wãwen Leo Ej Dri Kristian Ej Koutiej Lio Belen

4. Ta eo ej einlok wõt juõn ikõtan jerbal eo an Jisõs im dri Kristian lõmaro?

⁴ Anij ear jitõñ leo bwe en bõran baamle eo, einwõt an Jisõs Bõran congregation eo. Dri jilik Paul ear ba: “Leo e bõran lio belen, einwõt Kraist e bõran eklisia, im E Dri Lomoren enbwin. Man ro, komin yokwe limaro belemi, einwõt Kraist e ar bareinwõt yokwe eklisia, im mõke lelok E kin e.” (Ep. 5:​23, 25) Emol, wãwen an kar Jisõs kõmõn ñõn dri kalor ro an ej juõn joñok kin wãwen dri Kristian lõmaro rej aikwij kõmõn ñõn limaro beleir. Jen etale jet ian wãwen ko me Jisõs ear kajerbale maroñ eo Anij ear lelok ñõn e.

5. Ewi wãwen an kar Jisõs jerbale maroñ eo an ion dri kalor ro?

⁵ Jisõs ear ‘inemõn im etã buruen.’ (Mat. 11:29) Ear bareinwõt juõn eman ear jab ber bajjek. Ear jab jerwane erro ko an. (Mark 6:​34; Jon 2:​14-​17) Ear lelok nan in kakabilek ko ñõn dri kalor ro an ilo joij, im ñe ear menin aikwij ear bar eliji. (Mat. 20:21-​28; Mark 9:​33-​37; Luk 22:24-​27) Bõtab, Jisõs ear jab buroñ ak kajook ir, im ear jab kõmõn bwe ren lemnok ear jab yokwe ir ak bwe rar jab maroñ kõmõni men ko me ear katakin ir ñõn kõmõni. Jen an eindrein, ear nebar im rejañ dri kalor ro an. (Luk 10:17-​21) Eñin unin dri kalor ro an rar koutiej e kin an kar jerbal ibeir ilo joij im yokwe.

6. (a) Ta eo leo emaroñ katak jen wãwen Jisõs ear kõmõn ñõn dri kalor ro an? (b) Ta nan in kakabilek eo Piter ear lelok ñõn lõmaro?

⁶ Joñok eo an Jisõs ej katakin lõmaro bwe elañe rej kõnan kajeoñwe tel eo an, rejamin kar iroij ion limaro beleir ilo lej. Bõtab renaj kar koutiej ir im kwalok yokwe eo me ej karmijete kõnan ko an mõke. Dri jilik Piter ear kakabilek lõmaro ñõn kajeoñwe wãwen ko Jisõs ear kõmõni ilo yokwe ikijen air “jokwe” wõt iben limaro beleir, im ‘koutiej ir.’ (Riit 1 Piter 3:7.) Inem, ewi wãwen an leo maroñ jerbale maroñ eo an im ilo ejja ien eo wõt kõmõn ñõn lio belen einwõt juõn eo ej tellokin bõk koutiej?

7. Ilo wãwen it leo emaroñ koutiej lio belen? Kemelele.

⁷ Juõn wãwen leo emaroñ koutiej lio belen ej ikijen an lale ewi lemnok im iñjake ko an mokta jen an kõmõni bebe ko me rej jelet baamle eo. Bwelen rej aikwij kõmõn juõn bebe ikijen air emmakit ñõn bar juõn jikin ak ukot jerbal eo air. Ak bwelen ikijen men ko jet rej walok jen ran ñõn ran einwõt ia eo rej etal im kakije ie ak ewi wãwen rej kajerbal jããn ko an baamle eo bwe ren maroñ kijenmij kin an laplok wõnan mour. Kinke bebe eo enaj jelet baamle eo, eor tokjen im ej menin joij ñõn an leo bõk lemnok eo an lio. Men in emaroñ jibõñ e ñõn kõmõn juõn bebe ejokkin wõt juõn, ejjab lemnok kin e mõke, im enaj kõmõn bwe en birurulok an lio rejetake e. (Ken.  15:22) Lõmaro rej dri Kristian me rej koutiej limaro beleir rejjab baj bõk wõt yokwe im koutiej eo an limaro beleir ak men eo elaplok rej bõk buñburu eo an Jeova.​—Ep. 5:​28, 29.

Wãwen Lio Ej Lukkun Kwalok An Koutiej Leo Belen

8. Etke joñok eo an Iv ej joñok eo jej aikwij bõprae?

⁸ Jisõs ear likit juõn joñok emõn ñõn dri Kristian limaro ikijen kotaik ir ñõn maroñ ko. Elukkun oktõk wãwen an kar Jisõs watõk ro eor air maroñ jen wãwen lemnok eo kõra eo moktata ear kwaloke. Iv ear likjõp in likit juõn joñok emõn ñõn an limaro eor beleir anõke. Jeova ear karõk bwe en eor juõn bõran me ear lelok nan in tel ko ñõn e. Bõtab, Iv ear jab koutiej karõk in. Ear likjõp in roñjake nan in tel ko Adam ear kwalok ñõn e. (Jen. 2:​16, 17; 3:3; 1 Kor. 11:3) Emol bwe kar mone Iv, bõtab en kar aikwij konono iben leo belen elañe en tõmake ainiken eo me ear ba ñõn e kin men eo “Anij ejela.” Jen an eindrein, ear wãlok ilo an kar tel leo belen.​—Jen. 3:​5, 6; 1 Tim. 2:​14.

9. Ta joñok eo kin kotaik Jisõs ear likiti?

⁹ Ilo okõtõn, Jisõs ear likit juõn joñok emõn ikijen an kar kotaik e ñõn Bõr eo bõran. Lemnok eo an im wãwen mour eo an rej kwalok bwe ear “jab lemnak bwe en kejerbal kajur eo an im kõmmõn bwe en joñan wõt Anij. Ak jen kãlet eo an make, ear likiti mour eo an, bwe en mour kin biktokin juõn ri kamakoko.” (Pil. 2:​5-7, UBS) Ranin, einwõt Kiñ eo ej iroij, Jisõs ej drebij ejja lemnok in wõt. Ilo etã buru ej kotaik e ñõn Jemen ilo men ko otemjelok im ej rejetake tel eo An.​—Mat. 20:23; Jon 5:​30; 1 Kor. 15:28.

10. Ewi wãwen lio emaroñ rejetake tel eo an leo belen?

¹⁰ Lio dri belele ej aikwij kajeoñwe joñok eo an Jisõs ikijen an rejetak tel eo an leo belen. (Riit 1 Piter 2:​21; 3:​1, 2.) Lemnok kin juõn wãwen me lio emaroñ kõmõne men in. Ladrik eo nejin ej kajitõk an ilok im kobalok ilo juõn makõtkit me ej aikwij bok melim jen irro leo belen. Kinke rejañin kar bwebwenato iben dron kake men in moktalok, enaj ekkar bwe lio en ba, “Kwar ke kajitõk iben jemõm?” Elañe ladrik eo nejin ejañin kajitõk, lio ej aikwij konono kake men in iben leo belen mokta jen an kõmõn bebe. Bareinwõt, lio ej dri kristian ejjab aikwij in kabwir leo iben ak jumae lemnok eo an iman mejen ajiri ro nejiiro. Elañe ejjab errã iben leo belen kin juõn men, enaj kar konono iben kake ilo bar juõn jikin me irro wõt ie.​—Ep. 6:4.

Joñok eo an Jisõs ñõn ro Jemen im Jinen

11. Ta joñok eo Jisõs ear likiti ñõn ro jemen im jinen?

¹¹ Meñe Jisõs ear jab or belen ak nejin, ej juõn joñok ekanuij emõn ñõn ro jemen im jinen me rej dri Kristian. Ilo wãwen it? Ilo  yokwe im meanwõr, ear katakin dri kalor ro an ikijen nan im joñok. Ear kwalok wãwen rej aikwij kõmõne jerbale eo ear lelok ñõn ir. (Luk 8:1) Wãwen an kar Jisõs kõmõn ñõn dri kalor ro an ear katakin ir kin wãwen eo rej aikwij in kar kõmõn ñõn dron.​—Riit Jon 13:14-​17.

12, 13. Ta menin aikwij eo elañe ro jemen im jinen rekõnan kakajiririk ajiri ro nejiir ñõn erom ro rej mijõk Anij?

¹² Ekkã an ajiri ro kajeoñwe jemeir im jineir, meñe ilo men eo emõn ak enana. Inem, kom ro jemen in jinen komin kajitõkin kom mõke: ‘Ta eo jej katakin ajiri ro nejir ñe ej itok ñõn ien ko jej joloki ñõn aluij TV im men in kamõnõnõ ko elañe keiri iben ien ar katak Baibel im bõk kwonad ilo jerbal in kwalok nan? Ta men ko reaurõk iben baamle eo ar? Jej ke likit juõn joñok emõn ilo ar likit kabuñ eo emol bwe en men eo eaurõktata ilo mour eo ar?’ Kien Anij ej aikwij ber moktata ilo buruen ro jemen im jinen elañe rekõnan kakajiririk ajiri ro nejiir ñõn erom ro rej mijõk Anij.​—Dut. 6:6.

¹³ Elañe ro jemen im jinen rej kate ñõn jerbale nan in kakabilek ko ilo Baibel ikijen men ko rej walok jen ran ñõn ran, ajiri ro nejiir renaj kile air kõmõne men in. Nan ko an ro jemem im jinen im katak ko air enaj lap an jelet ro nejiir. Bõtab, elañe ajiri ro rej lo bwe jemeir im jineir rejjab lore kakien ko rar likiti ñõn ajiri ro, remaroñ bõk lemnok eo bwe nan in kakabilek ko ilo Baibel rejjab lukkun aurõk ak keie. Kin men in, enaj biruru an ajiri ro mõjino ñe renaj jelmae ijjibed ko an lõl in.

14, 15. Ta men ko raurõk ro jemen im jinen rej aikwij katakin ajiri ro nejiir kaki, im ta juõn ian wãwen ko remaroñ kõmõne men in?

¹⁴ Ro jemen im jinen rej kile bwe kakajiririk juõn ajiri ej kitibuj elaplok jen baj kabwe aikwij ko air ilo kõniek. Kin men in, eban lukkun juõn menin meletlet ñõn katakin juõn ajiri ñõn jibarek mejenkajik ko ñõn kamweieik e kin mweiuk ko. (Ekk. 7:​12) Jisõs ear katakin dri kalor ro an ñõn kõmõn bwe jibarbar ko air im men ko raurõk ilo jitõb ren moktata. (Mat. 6:​33) Kin men in, ilo air kajeoñwe Jisõs, ro jemen im jinen rej aikwij bareinwõt kate ir ñõn kadrek juõn kõnan iben ro nejiir ñõn jibarek mejenkajik ko ilo jitõb.

¹⁵ Juõn wãwen ro jemen im jinen remaroñ kõmõne men in ej ilo air bukot ien ko remõn ñõn an ajiri ro nejiir kõmao iben ro rej ber ilo jerbal in full-time. Lemnok kin wãwen eo emaroñ kõkãtok jodrikdrik ro ñe rej jino jela kajen pioneer ro ak circuit overseer eo im lio belen. Mejinede ro, ro rej jerbal ilo Bethel, im ro rej ber ilo jerbal in ekkal eo ibelakin lõl me rej lowõj kom remaroñ mõnõnõ in kwalok kin lõñliñ eo rej loe ilo air jerbal ñõn Jeova. Ejelok berre bwe enaj or an rein rej lowõj kom bwebwenato ko rekaitoktoklimo ñõn kwalok kaki. Joñok eo air ikijen karmijeteik ir mõke emaroñ lukkun jibõñ ajiri ro ñõn kõmõne bebe ko remeletlet, kõmõn mejenkajik ko lor jitõb, im bõk jelalokjen eo ekkar ilo jikuul  bwe ren maroñ kabwe aikwij ko air ilo jerbal in pioneer.

Ajiri ro, Ta eo Enaj Jibõñ Kom ñõn Lor Joñok eo an Jisõs?

16. Ewi wãwen Jisõs ear koutiej ro jemen im jinen ion lõl im Jemen ilõñ?

¹⁶ Ajiri ro, Jisõs ej likit juõn joñok emõn ñõn kom bareinwõt. Kar lelok Jisõs ñõn Josep im Meri bwe ren lale im kejbãrok e, im ear bokake ir. (Riit Luk 2:​51.) Ear kile bwe, meñe rar jab wãppen, Anij ear lelok ñõn ir erro eo bwe ren lale e. Kin men in, Jisõs ear aikwij koutiej ir. (Dut. 5:​16; Mat. 15:4) Einwõt juõn ridto, ien otemjej Jisõs ear kõmõni men ko rej kabuñburuen Jemen ilõñ. Melelen bwe ear aikwij jumae menin kabo ko. (Mat. 4:​1-​10) Bwelen jet ien kom ajiri ro komij kõnan jab bokake jinemi im jememi. Inem, ta eo emaroñ jibõñ kom ñõn lor joñok eo an Jisõs?

17, 18. (a) Kain ijjibed rot eo ajiri ro rej jelmaiki ilo jikuul? (b) Ta eo enaj jibõñ jodrikdrik ro ñõn jumae menin kabo ko?

¹⁷ Bwelen, enañin aolep ajiri ro ilo jikin jikuul eor jidrik ak ejelok air koutiej kien ko ilo Baibel eo. Remaroñ kajeoñ iun yuk ñõn bõk kwonam ilo makõtkit ko renana im kajirere kake yuk ñe kwoj makoko in kõmõni. Ajiri ro ilo jikuul rej ke kakitõtõik yuk kinke kwoj makoko in bõk kwonam ilo jet makõtkit ko ibeir? Elañe aet, ta eo kwoj kõmõne? Kwojela bwe elañe kwoj mijõk im bõk kwonam ibeir kwonaj kaburomõj jemõm im jinõm, im Jeova. Ta eo enaj walok ñõn kwe elañe kwoj bo iben ajiri ro ilo jikuul? Bwelen emwij am kõmõn jet mejenkajik ko ñõn yuk mõke, einwõt erom juõn pioneer ak minister servant, jerbal ilo jikin ko elap aikwij dri kwalok ro kin Ailiñ eo ie, ak erom juõn eo ej jerbal ilo Bethel. Am aetõl ajiri ro ilo jikuul enaj ke jibõñ yuk ñõn tõbar mejenkajik ko am?

¹⁸ Kom jodrikdrik ro ilo congregation eo, kom nañin ke iion jet wãwen ko me rej melejoñ tõmak eo am? Ewi wãwen kwoj emmakit? Kwon lemnok kin joñok eo an Jisõs. Ear jumae menin kabo ko im ear jutõk bin wõt kin men eo ear jela bwe ejime. Am kememej men in, enaj jibõñ yuk ñõn beran im kalikar ñõn ajiri ro ilo jikuul bwe kwojjab kõnan kobalok ibeir ñõn kõmõn juõn men me kwojela bwe ebwir. Einwõt Jisõs, reilok wõt ñõn jerammõn ko kin jerbal eo ekalõñliñ ñõn in drio im bokake wõt Jeova.​—Hib. 12:2.

Ki eo ñõn Mour in Baamle eo Elemõnõnõ

19. Ta wãwen mour eo ej bõktok mõnõnõ eo emol?

¹⁹ Jeova Anij im Jisõs Kraist rekõnan men eo emõntata ñõn armij otemjej. Meñe jejjab wãppen, jemaroñ lo wõt mõnõnõ. (Ais. 48:17, 18; Mat. 5:3) Jisõs ear kwalok kin katak ko remol me rej unjen mõnõnõ eo an armij bõtab ejjab men ko re kein ear kalikar ñõn dri kalor ro an. Jisõs ear bareinwõt katakin kin wãwen eo emõntata ñõn mour. Kobalok iben men in, ear likit juõn joñok emõn kin juõn lemnok im mour ejokkin wõt juõn. Jekron ta erro eo ar ilo baamle eo, kij aolep jemaroñ bõk tokjen jen ar anõk joñok eo an. Inem lõmaro im limaro dri belele, ro jemen im jinen, kab ajiri ro komin anõk joñok eo an Jisõs! Ar mõnõnõ in bõk katak ko an Jisõs ej ki eo ñõn lo juburu im mõnõnõ ilo juõn mour in baamle.

Ewi Wãwen Kwonaj Uak?

• Ewi wãwen lõmaro dri belele ren kar kajerbale maroñ eo air jen Anij?

• Ewi wãwen lio dri belele ej kajeoñwe joñok eo an Jisõs?

• Ta eo ro jemen im jinen remaroñ katak jen wãwen an kar Jisõs kõmõn ñõn dri kalor ro an?

• Ta eo ajiri ro remaroñ katak jen joñok eo an Jisõs?

[Kajitõk ko ñan katak]

[Pija eo ilo peij 8]

Mokta jen an kõmõne juõn bebe me ej jelet baamle eo, ta eo leo enaj kõmõne?

[Pija eo ilo peij 9]

Ta wãwen eo me ej lelok juõn ien emõn ñõn an lio rejetak tel eo an leo belen?

[Pija eo ilo peij 10]

Ajiri ro rej anõk mõnit ko remõn an jemeir im jineir