‘Jeova Ear Kõmõn bwe Turin Mejen En Romak Ioir’

ELÕÑLOK jen 30 majel ko ilo turin mejen juõn armij. Ej aikwij or 14 majel ko rej jerbal iben dron ñõn kõmõn bwe kwon ettõñdikdik! Baj lemnok mõk kin wãwen am naj bwebwenato elañe ejelok majel kein. Ej kaitoktoklimo ke? Jaab ñõn jidrik. Bõtab ñõn ro rejaroñroñ, majel ko ilo turin mejer ej laplok tokjeir jen air baj kõmõn wõt bwe bwebwenato ko ren kaitoktoklimo. Ñe men in im wãwen kamakõtkit enbwinir rej koba iben dron, rej juõn wãwen eaurõk ñõn kwalok lemnok im melele ko. Elõñ armij rej bwilõñ kin wãwen an ro rejaroñroñ konono kin peir im maroñ kwalok lemnok ko rekajjo wãweir im bareinwõt kemeleleik men ko ilo tibrikin.

Ilo ran kein, emwij an armij ro rejaroñroñ ibelakin lõl lo turin mejen eo me an kamakõt turin mejen ealikarlok im elaplok an kaitoktoklimo jen jabrewõt turin mejen armij. Ilo kõkkar, emwij air lo “mejen Jeova.” (Liãj. 2:​19, NW) Men in ear jab jidre im walok. Jen etto Jeova ear kwalok yokwe eo an elap ñõn ro rejaroñroñ. Ear kõmõne men in jen ien ko an dri Israel ro. (Liv. 19:14) Ilo ran kein, yokwe eo an ñõn ro rejaroñroñ ej bareinwõt lukkun alikar. “[Anij] e kõnan lomoren armij otemjej, im bwe ren item jela mol.” (1 Tim. 2:4) Elõñ ian ro rejaroñroñ rar einwõt ñe rar lo mejen Anij ikijen air kar bõk jelalokjen eo ejime kin mol eo kin Anij. Ewi wãwen men in ear walok ke rejjab maroñ roñlokjen? Mokta jen ar uake kajitõk in, jen etale etke wãwen konono kin pã eaurõk ñõn armij ro rejaroñroñ.

Lolokjen Ej Roñlokjen

Elõñ lemnok ko rebwir kin armij ro rejaroñroñ im wãwen air konono. Kõtlok bwe kimin jibõñ yuk ñõn melele men ko remol kin ro rejaroñroñ. Ro rejaroñroñ remaroñ kattõr wã. Air lale tien juõn armij im kajeoñ melele ta ko ej ba ej juõn men ekanuij bin ñõn ir. Wãwen an ro rejaroñroñ konono ej jab baj ñõn kamakõt wõt enbwin eo ñõn kaluij armij. Ejelok juõn wãwen konono kin pã me aolep ro rejaroñroñ ibelakin lõl rej kajerbale. Bareinwõt, armij ro rejaroñroñ eoktõk jidrik wãwen air konono kin peir jen dri jaroñroñ ro jet me rej jokwe ilo jikin ko jet ilo ailiñ eo air.

Armij ro rejaroñroñ remaroñ ke riit? Meñe jet emõn air riit, ilo mol, enañin aolep ro rejaroñroñ ebin air riit. Etke? Kinke nan ko rej walok ilo buk ko rej itok jen kajin eo an ro rej konono. Lemnok kin wãwen juõn ajiri me emaroñ roñlokjen ej katak juõn kajin. Jen ien eo ajiri eo ej lotak, ej ber iturin armij ro me rej konono kajin eo air. Ejjab etto, ej maroñ kakobaik nan ko iben dron im jino konono. Men in ej mõke walok jen wõt an roñjake an armij ro konono kajin eo air. Kin men in, ñe ajiri ro me remaroñ roñlokjen rej jino riit, renaj kile bwe jeje ko ilo buk ko rej einwõt nan ko emwij air roñ im jela kaki.

Kiõ pijaiki yuk mõke ilo bar juõn ailiñ im kwoj ber iloan juõn rum kõmõn jen kilaj me kwojjab maroñ roñ ainiken ko inabõj. Kwojañin kar roñ kajin eo an dri ailiñ eo. Kajjojo ran, armij ro rej itok ñõn ibam im kajeoñ konono  ñõn yuk jen nabõj in rum eo kõmõn jen kilaj. Kwojjab maroñ roñ ta eo rej ba. Kwoj lo wõt an tieir emakõtkit. Kin air lo bwe kwojjab melele ta eo rej ba, rej je ejja nan ko wõt ion juõn peba im kwalok ñõn yuk ta eo rar je. Rej lemnok bwe kwomaroñ melele. Ewi am lemnok, enaj ewi joñõn am melele? Kwonaj lo bwe kwojjab maroñ melele ñõn jidrik men eo rej kajeoñ in ba ñõn yuk ilo wãwen in. Etke? Kinke men ko rar jei rej itok jen juõn kajin me kwojañin kar roñ. Eñin wãwen eo ej walok iben ro rejaroñroñ.

Konono kin pã ej wãwen eo emõntata ñõn an ro rejaroñroñ konono iben dron. Juõn armij ej kamakõtkit pein ibelakin enbwinin ñõn ejaak lemnok ko. Wãwen an kamakõtkit pein, enbwinin, im turin mejen ej lor wõt wãwen eo ro rejaroñroñ rej karõk nan ko. Ilo wãwen in ej ejaak juõn kajin me remaroñ kajerbal mejeir ñõn melele.

Ilo mol, enañin aolep wãwen ko juõn armij ejaroñroñ ej kamakõtkit pein, enbwinin, im turin mejen eor meleleir. Wãwen an kamakõtkit turin mejen ejjab ñõn baj kabwilõñ wõt armij. Men in ej aurõk ilo wãwen ro rejaroñroñ rej karõk nan ko. Nan wanjoñok: Ñe juõn ej kajitõk ilo an leliñlok ãtin, men in emaroñ jitõñlok ñõn juõn kajitõk ej kõmõn an juõn lemnok ak ej kitibuj uak ko einwõt aet ak jaab. Elañe ej lelõllok ãtin, emaroñ kalikar kajitõk ko einwõt wõn, ta, ia, ñãt, etke, ak ewi wãwen. An kamakõtkit loñin ilo jet wãwen emaroñ kwalok kin joñõn juõn men ak kajur in men ko rar walok. Wãwen an juõn armij ejaroñroñ kamakõt bõran, leliñlok aieran, kamakõtkit jeben, im karomrom mejen rej kobaiki melele ko ilo tibrikin ñõn lemnok eo kar kwalok kake.

Wãwen kein rej jiboñ ro jet ñõn melele ennan ko ilo wãwen eo ekaitoktoklimo. Air kajerbal wãwen in eoktõk ñõn konono iben dron, armij ro rejaroñroñ me emõn wãwen air jela konono kin peir remaroñ kwalok jabrewõt kain lemnok einwõt jabõn kennan ko, kabel ko, yokwe eo ikõtan leo im lio, kõmõn kejak ko, im men ko jemaroñ im jejjab maroñ loi ak jibwi.

Elap Tokjen Pija in Aluij ko an Ro Rejaroñroñ

Ñe jelalokjen eo kin Jeova ej walok ilo air konono kin peir, ej einwõt ñe juõn dri jaroñroñ emaroñ roñ ennan eo im “tõmak” ilo Eo Ej Letok ennan eo. Kin men in, Dri Kennan ro an Jeova rar kate ir ilo air kwalok nan ñõn armij ro rejaroñroñ ibelakin lõl im lelok menin aikwij ko me remaroñ jibõñ ir. (Rom. 10:14) Kiõ, eor 58 kumi in dri ukok ro an dri jaroñroñ ro ibelakin lõl. Bareinwõt eor kiõ 40 pija in aluij ko an ro rejaroñroñ. Ear or ke tõbrõk ilo jerbal kein?

Jeremy, eo me jemen im jinen jimor rejaroñroñ ej ba: “Ij kememejtok an jema kin jolok elõñ auõ ko ilo rum eo an im liñõri jet ian pãrokõrããp ko ilo juõn katak ilo Imõniaroñroñ eo ñõn kajeoñ melele. Ilo jidimkij ej kãnabõjtak jen rum eo an im ej lukkun mõnõnõ ke ej  kamakit pein im ba: ‘Ij melele! Ij melele!’ Inem ej jino an kemelele kin katak eo ñõn ña. Kar 12 wõt aõ yiõ ilo ien eo. Iar baj riti pãrokõrããp ko ilo mõkõj im iar kamakõt peiõ im ba: ‘Baba, einwõt ejjab melele eo ne. Eñin . . .’ Ej kaju kabwijrõk iõ im jeblak ñõn rum eo an im mõke bukot melelen nan ko. Ijamin meloklok an kar lukkun mejen buromõj im aõ utiej buruõ kake e ke iar reilok im lale an jeblak ñõn rum eo. Bõtab, an or pija ko an ro rejaroñroñ ear kiõ kamaroñ e bwe en emõnlok an melele kin katak ko. Aõ loe an lukkun mejen mõnõnõ ñe ej kwalok iñjake ko an kin Jeova ej juõn men ijjab kajitokjen.”

Bareinwõt lemnok kin bwebwenato eo an ruo dri belele me rar kennan iben Jessenia, juõn jiroñ ejaroñroñ ilo ailiñ in Chile. Elikin an kar jinen kõtlok bwe ren kwalok ñõn Jessenia pija eo an dri jaroñroñ ilo kajin Chile etan Aõ Buk in Bwebwenato ko jen Baibel, rej ba: “Ke Jessenia ear jino aluije bwebwenato eo, ear jino an ettõñ inem jõñ. Ke jinen ear kajitõk etke ear jõñ, ear uak im ba kinke emõn iben men eo ear aluije. Inem jinen ear kile bwe ear maroñ melele aolep men ko ilo pija eo.”

Juõn kõra ejaroñroñ ej jokwe ilo juõn jikin etolok ilo ailiñ in Venezuela ear or juõn nejin ajiri im ear bar bõroro kin ajiri eo kein karuo. E im leo belen rar lo bwe rejjab maroñ kabwe aikwij ko an bar juõn ajiri kin an lap abañ kin jããn, inem rar lemnok in mõn lojen kõra eo. Ilo air jab jela kin ta eo dri belele ro rar lemnoke, Dri Kennan ro an Jeova rar bwijrõk lok im kaluij ir kin katak 12 ilo pija eo an dri jaroñroñ ilo kajin Venezuela etan Ta Eo Anij Ekõnan bwe Jen Kõmmõne? Katak in ej kemelele kin wãwen Anij ej watõk mõn loje im uror. Tokelik, kõra eo ear ba ñõn Dri Kennan ro an Jeova bwe ej kamolol kin an kar lo katak eo. Ear ba bwe tokjen men in, erro kar beek ñõn jab mõn lojen. Kar lomoren mour an juõn niñniñ ikijen jibõñ eo jen pija eo an dri jaroñroñ!

Lorraine, eo im ej juõn ian Dri Kennan ro an Jeova me ejaroñroñ, ej ba: “Katak Baibel eo ear einwõt ñe kwoj kakobaik juõn puzzle elap. Iar jab maroñ melele aolepen pija eo kinke ear joko jet mõtõn ko ilo puzzle eo. Bõtab, ke ear laplok an walok mol ko ilo Baibel eo ilo wãwen eo ro rejaroñroñ rej konono, iar maroñ likit mõtõn ko rar joko ilo puzzle eo. George, juõn eo ejaroñroñ im ear juõn ian Dri Kennan ro an Jeova iomin 38 yiõ ko ej ba: “Ejelok kajitõk bwe maroñ eo ñõn am melele juõn men ej kõmõn bwe en or am liki yuk mõke. Ij kile bwe pija in aluij ko an dri jaroñroñ ear men eo elaptata an kar jelet iõ ñõn ridtolok ilo jitõb.”

“Juõn Kwelok ilo Wãwen eo Ij Konono!”

Kobalok iben pija ko an dri jaroñroñ, emwij an Dri Kennan ro an Jeova karõk congregation ko me rej kõmõni aolep kwelok ko ilo wãwen eo ro rejaroñroñ rej konono. Kiõ, elõñlok jen 1,100 congregation ko an ro rejaroñroñ ibelakin lõl in. Eo ej kwalok katak eo ej konono ñõn  dri kwelok ro rejaroñroñ ilo an kamakõt pein, im ej kwalok katak ko remol jen Baibel eo ilo wãwen eo me juõn armij ejaroñroñ ej lemnok. Katak ko rej walok ilo juõn wãwen me rej kwalok koutiej ñõn mõnit im men ko eo ejaroñroñ ej iioni ilo mour eo an.

Eor ke tokjen air kar kajutõk congregation ko an dri jaroñroñ? Lemnok kin bwebwenato eo an Cyril, eo ear baptais im erom juõn ian Dri Kennan ro an Jeova ilo 1955. Iomin elõñ yiõ ko lein ear katak kin buk ko joñõn wõt an maroñ im keini an ber ilo kwelok ko. Jet ien ro rej ukok ñõn ro rejaroñroñ rar joko im jet ien rar ber. Ilo ien eo me ejelok dri ukok, ear atartar wõt ion Dri Kennan ro an Jeova me ilo yokwe rar kajeoñ im jibõñ e ikijen air je katak eo ear walok ion juõn peba. Ear eindrein manlok wõt mae ien eo ear 34 yiõ in an juõn ian Dri Kennan ro an Jeova ilo yiõ eo 1989, ke ear jino jutõk congregation eo an dri jaroñroñ ilo New York City ilo ailiñ in Amerika. Einwõt juõn uan congregation in, kar ewi iñjake eo an Cyril? Ej ba: “Ear einwõt ñe iar waloktok jen bulen mar, ak jen juõn jikin emarok ñõn ijo emaram. Juõn kwelok ilo wãwen eo ij konono!”

Congregation ko an ro rejaroñroñ me rej Dri Kennan ro an Jeova rej jikin ko me ro rejaroñroñ remaroñ kweloklok iben dron ien otemjej ñõn katak kin Anij im kabuñ ñõn e. Rej jikin ko me armij ro an Anij remaroñ kõmõn jimjera ko im bõk kõkãtok ie. Ilo lõl in me armij ro rejaroñroñ ejjab biruru air kõmao iben ro jet im ekkã air mõkelok iair, congregation kein rej jikin ko remaroñ konono im kõmao iben ro jet. Ilo congregation kein, armij ro rejaroñroñ remaroñ katak, edreklok, im kalaplok kwonair ilo jerbal eo an Jeova. Elõñ Dri Kennan ro an Jeova me rejaroñroñ rar maroñ jerbal einwõt full-time dri kwalok nan ro. Jet rar emakõtlok ñõn ailiñ ko jet ñõn jibõñ ro rejaroñroñ katak kin Jeova. Lõmaro rej Kristian me rejaroñroñ rej katak bwe ren erom dri katakin ro, dri lolorjake ro, im s̃eperd ro rebolemeir, im kin men in elõñ iair rej tellokir ñõn lale erro ko ilo congregation eo.

Ilo ailiñ in Amerika, elõñlok jen 100 congregation ko an ro rejaroñroñ im eor enañin 80 kumi ko. Ilo ailiñ in Brazil, eor joñõn in 300 congregation ko an ro rejaroñroñ im elõñlok jen 400 kumi ko. Ilo ailiñ in Mexico, eor ebakelok 300 congregation ko an ro rejaroñroñ. Im ilo ailiñ in Russia, eor elõñlok jen 30 congregation ko an ro rejaroñroñ im 113 kumi ko. Erkein ej jejjo wõt ian wanjoñok ko kin edreklok eo ej walok ibelakin lõl.

Dri Kennan ro an Jeova rej bareinwõt kõmõn kwelok ko relap ñõn ro rejaroñroñ. Yiõ eo lok, elõñlok jen 120 kwelok ko relap rar kõmõni ibelakin lõl in ilo elõñ kain kajin ko an ro rejaroñroñ. Ien kein relap rej kamaroñ Dri Kennan ro an Jeova me rejaroñroñ ñõn lo bwe rej mõtõn rolul in jimjãn jimjãtin eo an Kristian ibelakin lõl im rej bõk tokjen ekan ko lor jitõb ilo ien ejejit.

Leonard eo ejaroñroñ im ej juõn ian Dri Kennan ro an Jeova iomin elõñlok jen 25 yiõ ko. Ej ba: “Iar jela bwe Jeova ej Anij eo emol. Bõtab, iar jab lukkun melele etke ej kõtlok iñtan. Jet ien, men in ear kõmõn bwe in illu iben. Ak juõn ien ear walok juõn katak kin men in ilo kwelok elap eo ilo kajin eo an ro rejaroñroñ, kiõ iar maroñ melele etke ej kõtlok iñtan. Ke ear jemlok katak eo, lio iba ear wãkare katũ kin jimwin pein im ba, ‘Ejuburuõm ke kiõ?’ Iar maroñ kwalok mol im ba aet! Elikin 25 yiõ ko, ij kamolol bwe iar jab ilok jen Jeova. Iar yokwe Jeova ak iar jab lukkun melele kin e. Ranin ij lukkun melele!”

Kwalok Buruen Kamolol

Ta “men ko” ilo turin mejen Jeova armij ro rejaroñroñ rej loi ilo air katak kin e? Yokwe, tiriamokake, ekajet jime, tiljek, joij im ebar lõñ.

Ro rejaroñroñ ibelakin lõl me rej Dri Kennan ro an Jeova rej lo turin mejen Jeova im renaj wõnmanlok wõt im loe ilo wãwen eo elaplok an alikar. Kin an lukkun yokwe ro rejaroñroñ, ‘Jeova ej kõmõn bwe turin mejen en romak ioir.’ (Bwin. 6:​25) Elap an rein rejaroñroñ kamolol bwe rejela kin Jeova!

[Pija ko ilo peij 24, 25]

Elõñlok jen 1,100 congregation ko an ro rejaroñroñ ibelakin lõl

[Pija ko ilo peij 26]

Turin mejen Jeova ear romak ion jerbal in kwalok nan eo an ro rejaroñroñ