Iar Lo Melele eo Emol kin Unin Mour

Ekkar ñõn Gaspar Martínez

Bwebwenato in ej bwebwenato kin ña ke iar juõn ladrik ejeramel ilo juõn bukwon edrik im tokelik iar erom juõn dri mweie ilo juõn bukwon elap. Bõtab kwonaj lo bwe mweiuk ko iar koorloki ejjab mweiuk ko iar kõtõmene kaki ilo jinoin.

I LO yiõ ko ilo 1930, iar ridtolok ilo juõn bukwon me ejeja an wũt im eiet armij rej jokwe ie ilo Rioja, itueañin Spein. Ke ear 10 aõ yiõ, iar aikwij bwijrõk jen aõ jikuul, bõtab ilo ien eo emwij aõ karere jela kilin riit im jeje. Ear or jiljino jeiõ im jãtiõ im kim ear lale s̃ip ko im kallip keinikkan ko ilo wãto jidrikdrik eo amim.

Kinke kimar jeramel, kimar lemnok bwe mõnni im mweiuk ko kar men ko raurõktata im kimar kõnan koorloki. Kimar jino junmare ro me ear lap air mweie jen kim. Bõtab, dri tel in kabuñ eo ear ba, “ian aolep bukwon ko ej iroij ie, kar bukwon eo wõt amim ear lap an kijejeto ilo kabuñ.” Ear jab kile bwe tokelik, elõñ renaj illok jen kabuñ in Catholic.

Bukot Juõn Men Emõnlok

Iar mareiki juõn ledrik jen ejja bukwon eo wõt iar jokwe ie, etan Mercedes. Ejjab to tokelik, ear or juõn nejimro ladrik. Ilo yiõ eo 1957, kimar emakõt ñõn juõn bukwon ebak, etan Logroño, im tokelik aolepen baamle ko aõ jet rar bareinwõt emakõttok. Kin aõ jab kabel ilo jerbal, ear jab lukkun lõñ jikin ko iar maroñ jerbal ie ñõn kabwe aikwij ko an baamle eo aõ. Iar lemnok ia eo imaroñ bõk jibõñ jene. Kin men in, iar jino kabuk jibõñ jen buk ko ilo laibrãre, bõtab iar jab lukkun jela ta eo ij bukote.

Tokelik, iar roñ kin juõn brokraam ilo radio me ear tilmake juõn katak kin Baibel ñõn jabrewõt eo ekõnan ikijen letter. Elikin aõ kamwij aõ katak Baibel ikijen letter, jet dri Protestant ro rar bukottok iõ. Elikin aõ kweloklok ibeir jet ien ilo imõn jar eo air, iar lo bwe ear or jitõb in jiaik dron iben dri utiej ro ilo kabuñ eo im ear or iakwailel ikõtair. Iar jab bar kobalok ibeir kinke iar lemnok bwe aolep kabuñ ko rej eindrein.

Ij Jino Kile Mol Eo

Ilo yiõ eo 1964, juõn likao etan Eugenio ear lotok iõ ñõn mweo imõ. Ear juõn ian Dri Kennan ro an Jeova, juõn kabuñ ij kab roñ kake. Ear lap aõ mõnõnõ in bwebwenato iben kin Baibel eo. Iar lemnok bwe ear lap aõ jela kin Jeje ko ilo Baibel eo. Ke iar bwebwenato iben, iar kajerbal jet ian katak ko ilo Baibel me iar katak kaki jen dri Protestant ro. Meñe iar kajeoñ jojomare katak ko air, ilo buruõ iar jab lukkun tõmak katak ko air.

 Elikin bwebwenato eo amro kein karuo iomin elõñ auõ ko, iar kile an Eugenio lukkun jela kobõn Baibel eo. Iar bwilõñ kin an mõkõj an eliklok ñõn eon ko im kemeleleiki, meñe ear jab to an ber ilo jikuul jen ña. Eugenio ear kwalok ñõn ña jen Baibel eo bwe jej mour ilo ran ko eliktata im bwe mõtõn jidrik Ailiñ eo an Anij enaj kõmõn bwe lõl in en einwõt juõn paredais. Iar lukkun itoklimo.​—Sam 37:11, 29; Ais. 9:​6, 7; Mat. 6:​9, 10.

Iar mõnõnõ in katak Baibel eo iben. Enañin aolep katak ko iar katak kaki jen e rar kãl, im rar tõbar buruõ. Ear bellok ñõn ña juõn kejatrikrik ekãl im ear or tokjen ñõn mour eo aõ. Iar lo men eo iar bukote. Kiõ jibarbar ko aõ ñõn mweie ilo kõniek im abañ eo aõ ñõn kabuk jerbal rar jab lukkun aurõk iba. Elañe Anij enaj jolok nañinmij im mij, alikar bwe enaj bareinwõt jolok aolep abañ ko jet.​—Ais. 33:24; 35:​5, 6; Rev. 21:4.

Ilo mõkõj iar jino bwebwenato iben ro nuku kin katak ko iar katak kaki im ilo kijejeto iar kemeleleik ir kin kalimur ko an Anij kin lõl in bwe enaj erom juõn paredais ijo me armij ro rewãnik renaj jokwe ie ñõn in drio.

Baamle eo Aõ Rej Mõnõnõ in Bõk Mol Eo

Ejjabto, elõñ ro uan baamle eo aõ, kimar bebe ñõn kwelok iben dron ilo mweo imõn leo jãtin jema aolep Jabõt ilo raelip ñõn etale kalimur ko an Anij ilo Baibel eo. Kimar katak Baibel aolep wik iomin ruo ak jilu auõ. Ke Eugenio ear lo bwe elõñ ro nuku rar itoklimo in katak Baibel eo, ear karõk ñõn katak iben kajjojo baamle.

Ear bar or ro nuku ilo Durango, juõn bukwon edrik im drualitõkñoul mail etolok, im ear ejelok Dri Kennan ro an Jeova ie. Inem jilu aliñ ko tokelik, iar kakije jet wõt ran jen jikin jerbal eo bwe in lolok ir im kemeleleik ir kin katak ko rekãl iar katak kaki jen Baibel eo. Kajjojo ran ilo jota, iar katak ibeir im enañin joñoul armij rar kwelok iben dron. Iar konono ibeir ñõn lukwõn boñ. Aolepeir rar lukkun mõnõnõ in roñjake. Ke ear jemlok ien lolok ko aõ ibeir, iar lelok ñõn ir jet Baibel ko im buk ko me rej wawa ion Baibel eo. Jen ien eo manlok, kimar jeje im konono iben dron.

Ke Dri Kennan ro an Jeova rar itok ñõn Durango, ijo ejelok ear kwalok nan ie kar mokta, rar lo 18 armij ro me rar kijorur in katak Baibel ibeir. Dri kwalok rein rar mõnõnõ in katak iben kajjojo baamle ko.

Tok ñõn ien in, Mercedes ear jab kõnan katak Baibel, ejjab kinke ear jab itoklimo ak ej kinke ear mijõk armij. Ilo ien in, rar kamoik an Dri Kennan ro an Jeova kwalok nan im kwelok iben dron ilo Spein, kin men in ear lemnok bwe dri utiej ro an kien remaroñ kar jolok ajiri ro nejimro jen jikuul im bwe armij ro ilo bukwon eo renaj kar kijirãte kim. Bõtab ke ear lo bwe aolepen baamle eo rar katak Baibel, ear bareinwõt kõnan katak.

Iloan wõt ruo yiõ, 40 armij jen baamle eo aõ rar erom Dri Kennan ro an Jeova ikijen air kar wujleplok mour eo air ñõn Anij im baptais. Aet, aolepen baamle eo aõ rar bõk ejja mejenkajik eo wõt aõ kin mour. Iar tõbar juõn mejenkajik elukkun or tokjen. Jeova ear lukkun kejerammõn kim kin am lukkun mweie ilo jitõb.

Ear Laplok Aõ Lo Mõnõnõ ilo Mour ke Iar Ridtolok

Jen ien eo manlok, iomin 20 yiõ, iar lale ladrik ro ruo nejimro im bareinwõt jibõñ congregation eo ijo. Ke kimro Mercedes ear emakõt ñõn Logroño, ear or 100,000 armij rar jokwe ilo jikin in ak 20 wõt dri kwalok ro rar ber ie. Ejjabto, ear lõñ erro ko aõ ilo congregation eo.

Inem, ke ear 56 aõ yiõ, ilo idriñ ear kilik jikin jerbal eo aõ im ear ejelok aõ jerbal. Kinke ear or juõn kõnan iba ñõn bõk jerbal in kwalok nan full-time, kin men in iar kortokjen ien in ebellok ñõn pioneer. Ke ear jemlok aõ jerbal, joñõn jããn in kõllã ko ij bõki jen jikin kar jerbal eo aõ ear lukkun drik im ejabwe ñõn baamle eo aõ. Bõtab, Mercedes ear jibõñ ikijen an kar bõk jerbal in karreo. Ear bwe ñõn am kabwe aikwij ko. Ij pioneer wõt, im jen ien ñõn ien  Mercedes ej bõk kwonan ilo auxiliary pioneer im elukkun lap an lõñliñ kin jerbal in kwalok nan.

Jet yiõ ko remotlok, Mercedes ekin likit Imõniaroñroñ im Ruj! (ejelok ilo kajin Majõl) iben juõn kõra etan Merche, eo ear katak Baibel mokta ke ear drik. Ear itoklimo in riiti buk kein im Mercedes ear kile bwe Merche ear kaurõk wõt katak ko ilo Baibel. Tokelik Merche ear bar kõnan katak Baibel im ear emõn an wõnmanlok ilo an katak. Bõtab leo belen, Vicente, ear lap an ekarekrek im aolep ien ej luji jerbal ko an. Kin men in, ear jab maroñ kabwe aikwij ko an lio iben, im kin an kajur karek, mour in mare eo airro ear ber ilo kauwatata.

Lio iba ear rejañ Merche ñõn jiroñ Vicente bwe en kennan iba, im tokelik ear. Elikin jet ien aõ lolok e, ear kõnan katak Baibel eo. Vicente ear jino ukot mour eo an, jidrik kin jidrik ear bwijrõk jen an kadrek iomin jejjo wõt ran. Im tokelik ear bwijrõk iomin juõn wik ak aitoklok. Im eliktata, ear lukkun bwijrõk jen an irak. Ear alikar bwe mour eo an Vicente ear emõnlok im baamle eo an rar bar burukuk iben dron. Aolepen baamle eo an koba lio belen im ledrik eo nejin, elap air rejetake congregation eo edrik ilo juõn ian ene ko ej ber iturin ailiñ in Spein, etan Canary, ijo rej jokwe ie kiõ.

Kalomõnlokjen kin Aolep Tõbrõk ko ilo Mour eo Aõ

Meñe jet ian ro nuku me rar katak Baibel eo elõñ yiõ ko remotlok rar joko ilo mij, ak ro uan ro nuku rej lõñlok wõt, im Jeova ear lukkun kejerammõn kim. (Ken. 10:22) Elap an kamõnõnõ ñõn jela bwe enañin aolep ro im rar jino katak Baibel eo 40 yiõ ko remotlok, ekoba ajiri ro nejiir im ajiri ro jibwiir, rej wõnmanlok wõt im korijer ñõn Jeova ilo tiljek!

Kiõ elõñ ro nuku ilo kõniek rej Dri Kennan ro an Jeova, elõñ iair rej elder, ministerial servant, im pioneer. Leo eridtotata nejiõ im lio belen rej jerbal ilo ra eo an Dri Kennan ro an Jeova ilo Madrid, Spein. Ke iar erom juõn Dri Kennan ro an Jeova, ear or enañin 3,000 dri kwalok ro ilo Spein. Kiõ elõñlok jen 100,000 dri kwalok ro. Elap aõ mõnõnõ in bõk kwonaõ ilo jerbal in kwalok nan full-time, im ij lukkun kamolol Anij kin an kajerbal mour eo aõ ilo jerbal eo an. Jekron ñe iar jab kamwij aõ jikuul, ak jen ien ñõn ien ij bõk kwonaõ einwõt juõn circuit overseer.

Jet yiõ ko remotlok, iar roñ bwe bukwon eo iar ridtolok ie, enañin aolep armij ro rar emakõt jene. Kinke ebin mour ie, armij ro ijo rar emakõt jen moko imweir im jen wãto ko air ñõn bukot juõn mour emõnlok. Ekamõnõnõ bwe elõñ ro rar emakõt jen ijin, ekoba ña, kimar mweie ilo bar juõn wãwen, ej ikijen am korijer ñõn Jeova. Kimar lo melele eo emol kin unin mour im bwe korijer ñõn Jeova ej bõktok elap lõñliñ.

[Pija eo ilo peij 32]

Enañin aolep baamle eo an jeer im jãter Martinez me rej ber ilo mol eo