Kwon Kiblie im Beran Einwõt Kar Kraist

“Komin beran, bwe emwij aõ anjo ion lõl.”​—JON 16:33, UBS.

1. Ñõn ewi joñõn an kar Jisõs bokake Anij?

 IEN otemjej Jisõs Kraist ear kõmõnmõn ankil an Anij. Ejañin kar or juõn ien ear jab bokake Jemen ilõñ. (Jon 4:​34; Hib. 7:​26) Bõtab wãwen ko ear iioni ion lõl rar jab kõmõn bwe en biruru an bokake. Jen jinoin jerbal in kwalok nan eo an ion lõl, dri kijirãt ro an Jisõs, ekoba Setan, rar kajeoñ in kareel, jibed, ak mone Jisõs bwe en jab tiljek ñõn Anij. (Mat. 4:​1-​11; Luk 20:20-​25) Dri kijirãt rein rar kõmõn bwe Jisõs en lukkun iñtan ilo lemnok, iñjake, im enbwin. Eliktata, rar lo tõbrõk ilo air kar mõn e ñõn mij ion alal in iñtan eo. (Mat. 26:37, 38; Luk 22:44; Jon 19:​1, 17, 18) Meñe ear lukkun iñtan iomin aolep wãwen kein ear iioni, Jisõs ear “bokake ñõn mij.”​—Pil. 2:8.

2, 3. Ta eo jemaroñ katak jen an Jisõs bokake meñe ear iion iñtan?

² Ke Jisõs ear mour einwõt juõn armij ion lõl ear katak ñõn bokake iomin wãwen ko rebin me ejañin kar iioni mokta. (Hib. 5:8)  Jemaroñ lemnok bwe ererelok an kar Jisõs katak kin aolep wãwen ko ñõn korijer ñõn Jeova, kinke eto an kar ber iben Jeova im ear juõn “dri mejerik” an Anij ilo kar ien kõmõnmõn eo. (Ken. 8:​30) Bõtab, ke ear juõn armij im ear kijenmij wõt meñe ear iñtan, men in ear kamol bwe ear lukkun tiljek. Kõtan eo an Jisõs iben Jemen ear kajurlok. Ta eo jemaroñ katak jen men ko ear iioni?

³ Meñe ear juõn armij ewãppen, Jisõs ear jab atartar ion e mõke ñõn bokake Anij, ak ear jar im kajitõk jibõñ jen Anij. (Riit Dri Hibru 5:7.) Ñõn ar bokake wõt, kij bareinwõt jej aikwij kwalok etã buru, im keini ar jar im kajitõk jibõñ jen Anij. Kin men in, dri jilik Paul ear kakabilek dri Kristian ro: “Lemnok in en ber ilo kom, eo e ar bareinwõt ilo Kraist Jisõs,” eo “E ar mõke kõtãik E, im E ar bokake ñõn mij.” (Pil. 2:​5-8) Wãwen mour eo an Jisõs ear kamol bwe armij ro remaroñ bokake meñe rej ber ilo juõn jukjuk im ber enana. Emol bwe Jisõs ear wãppen, ak ta kin armij ro rejjab wãppen einwõt kij?

Jemaroñ Bokake Meñe Jejjab Wãppen

4. Ta melelen air kar kõmõnmõn kij einwõt ro eor maroñ in kãlet iber?

⁴ Anij ear kõmõnmõn Adam im Iv einwõt menin kõmõnmõn ko remeletlet im eor ibeir maroñ eo ñõn kãlet. Kinke jej ro nejiir, eor bareinwõt iber maroñ in ñõn kãlet. Ta melelen men in? Ej melelen bwe jemaroñ kãlet ñõn kõmõn emõn ak ñõn kõmõni men ko renana. Ilo bar juõn wãwen ba, Anij ear letok ñõn kij maroñ eo ñõn kãlet ñõn bokake e ak jab. Eor erro eo ej itok iben maroñ in. Emol, bebe ko kin men ko rejime ak bwir remaroñ tellok kij ñõn mour ak mij. Rej bareinwõt jelet armij ro ibelakir me jebake ir.

5. Ta eo kij aolep jej iñtan kake, im ewi wãwen jemaroñ lo tõbrõk?

⁵ Kinke jar jolit jab wãppen, ejjab biktoker bwe jen bokake. Ejjab aolep ien ebiruru ñõn bokake kien ko an Anij. Paul ear aikwij kate ñõn bokake. Ear je: “Ij lo bar juõn kien ilo raõ, ej tõrinaek kien aõ lolãtãt, im kajibokweik iõ ñõn kien jerawiwi eo ej ber ilo raõ.” (Rom. 7:​23) Emol ñe jejjab aikwij karmijete kõnan ko ar, iñtan, ak iion men ko rebin, ebiruru ñõn ar bokake. Ak ewi wãwen jej emakõt ñe eor juõn aituerõk ikõtan kõnan eo ar ñõn bokake im ‘mõm an kõniek, im mõm an mej ko’? Kõnan kein renana rej walok kin jab wãppen eo ar im bareinwõt jen kilan ko an “jitõb õn lõl” me rej ber ibelakir, im emaroñ lap air jelet kij. (1 Jon 2:​16; 1 Kor. 2:​12) Ñõn ar jumae men kein, jej aikwij kõmõn bwe ‘buruer en jime’ mokta jen ar iion wãwen ko rebin ak menin kabo ko im jek ilo buruer bwe jenaj bokake Jeova jekron ta enaj walok. (Sam 78:8) Elõñ wanjoñok ko ilo Baibel eo kin ro rar lo tõbrõk kinke rar kapoj burueir bwe en jime.​—Ezra 7:​10; Dan. 1:​8, UBS.

6, 7. Kwalok juõn wanjoñok kin ewi wãwen katak iber mõke emaroñ jiboñ kij ñõn kõmõn bebe ko remeletlet.

⁶ Juõn wãwen ñõn kapoj buruer ej ilo ar niknik in katak Baibel im buk ko rej berber ion Baibel eo. Pijaik kwe mõke ilo ien eo kwoj katak ibõm mõke, im ej kab rerelok am jar im kajitõk bwe jitõb eo an Jeova en jibõñ yuk ñõn jerbali men ko kwar katak kaki jen Nan eo an. Emwij am kar karõk ñõn aluij juõn pija ilo joten eo juõn. Im kwar roñ an ro jet ba bwe elukkun emõn pija eo; ak kwojela bwe eor jidrik mour etton im lej ie.

⁷ Inem kwoj kememej nan in kakabilek eo an Paul ilo Epesõs 5:3: “A lũñ, im etton otemjej, ak ankwõnak, en jab walok etair ibemi, einwõt ekar iben ro remõn.” Bareinwõt kwoj kememej nan in rejañ in an Paul ilo Pilippai 4:​8. (Riit.) Ñe kwoj kalomõnlokjen kin nan in kakabilek in, kwoj kajitõkin yuk mõke, ‘Elañe ij kõtlok buruõ im lemnok  ko aõ ñõn kain pija rot kein, ij ke lor joñok eo an Jisõs ñõn bin wõt im bokake Anij? Ta eo kwonaj kõmõne? Kwonaj ke wõnmanlok wõt im aluije pija eo?

8. Etke jej aikwij drebij wõt kien ko reutiej kin mour erreo im tõmak eo ar?

⁸ Enaj juõn bwir elap ñõn ukot bebe eo ar ñõn bokake kien ko an Jeova ilo ar lemnok bwe ebwe ar kajur ñõn jumae tokjen ko renana rej walok jen kõmao ko renana, ekoba kõmao ko rej walok ilo menin kamõnõnõ ko relej im etton. Jen men in, jen kejbãrok kij mõke im ro nejir jen kilan ko renana an jukjuk im ber in an Setan. Einwõt an armij ro lukkun kejbãrok ir jen air bõk nañinmij ko rekabobo, ej aikwij eindrein ar kate kij ñõn kejbãrok kij mõke jen “etao ko” an Setan.​—Ep. 6:​11.

9. Etke jej aikwij jek ilo buruer ñõn bokake Jeova aolep ran?

⁹ Enañin aolep ran, jej aikwij kãlet elañe jenaj kõmõni men ko ekkar ñõn ankil an Jeova ak jab. Bwe jen bõk lomor, jej aikwij bokake Jeova im mour ekkar ñõn kien ko an rewãnik. Ilo ar kajeoñwe joñok eo an Kraist kin kiblie meñe “ñõn mij,” jej kwalok bwe emol tõmak eo ar. Jeova enaj kejerammõn kij kin ar tiljek ñõn e. Jisõs ear kalimur: “Eo e naj kijinmij ñõn jemlokõn, e in e naj mour.” (Mat. 24:13) Alikar, men in ej kwalok bwe jej aikwij ejaak juõn beran ejime einwõt kar Jisõs.​—Sam 31:24.

Jisõs Ej Joñok eo Emõntata kin Beran

10. Kain ijjibed rot ko jemaroñ iioni, im en kar ewi wãwen ar emakõt?

¹⁰ Kinke lemnok ko im mõnit ko an lõl in rej walok ibelakir, jej aikwij beran ñõn bõpraik air katton kij. Dri Kristian ro rej jelmae ijjibed ko kin mour erreo, kin mõnni, im ijjibed ko jen armij ro, im kabuñ ko me remaroñ kõmõn bwe ren ilok jen ial ko rewãnik an Jeova. Elõñ rej jelmae jumae jen ro uan baamle ko air. Ilo jet ailiñ ko, elaplok an jikuul ko kowõnmanlok katak eo bwe armij ro rar walok jen menin mour, im elõñlok armij rej tõmak bwe ejelok Anij. Ñe jej jelmae ijjibed rot kein, jen jab baj kejekrone im ber bajjek, ak jej aikwij emakõt im bõk buñten ne ko ñõn jutõk bin nae ijjibed kein, im ilo wãwen in jej kejbãrok kij mõke. Joñok eo an Jisõs ear kwalok kin ewi wãwen jemaroñ lo tõbrõk.

11. Ilo ar kalomõnlokjen kin joñok eo an Jisõs, ewi wãwen ej kaberanlok kij?

¹¹ Jisõs ear jiroñ dri kalor ro an: “Lõl enaj kaiñtan kom, ak komin beran, bwe emwij aõ anjo ion lõl!” (Jon 16:33, UBS) Ien otemjej ear bõprae menin kabo ko an lõl. Im ear jab kõtlok bwe lõl in en kabwijrõk e jen an kajejit jerbal in kwalok nan eo an ak kõmõn bwe en ebbururu an lemnok kin kabuñ ilo mol im kin mwil emõn; im jen jab kõmõne bareinwõt. Ilo jar, Jisõs ear ba kin dri kalor ro an: “Re jab jen lõl, einwõt Ña I jab jen lõl.”  (Jon 17:16) Ar katak im kalomõnlokjen kin joñok eo an Kraist kin beran, emaroñ letok ñõn kij beran eo jej aikwiji ñõn kajenolok kij jen lõl in.

Katak Beran Jen Jisõs

12-14. Kwalok jet wanjoñok ko kin wãwen an kar Jisõs kwalok beran.

¹² Elap an kar Jisõs kwalok beran ilo jerbal in kwalok nan eo an. Ilo an kajerbal maroñ eo an einwõt Nejin Anij, ear jab mijõk in “dreloñ iloan tempel in Anij, im kadrioijlok ir otemjej ro rej wiakake im wiaik iloan tempel, im ukõji tebel ko an ro rej wia kin mõnni, im ken jijõt ko an ro rej wiakaki muli ko.” (Mat. 21:12) Ke dri tõrinae ro rar iten kalbuji Jisõs ilo boñin eo eliktata in an ber ion lõl, ilo beran ear walok imair ñõn kejbãrok dri kalor ro an, im ba: “Elañe komij bukot Iõ, kõtlok rein bwe ren ilok.” (Jon 18:8) Tokelik, ke Jisõs ear ba ñõn Piter bwe en karole jãji eo an ilo nien, men in ear kwalok bwe unjen liki eo an ear ilo Jeova im jab ilo kein tõrinae ko an lõl.​—Jon 18:11.

¹³ Ilo beran Jisõs ear jab mijõk in kajjerwawaik katak ko rebwir an dri kaki ro rewan im ejelok air yokwe ilo ran ko an. Ear ba ñõn ir: “Wo ñõn kom skraib im Parisi ro, dri jela mon! bwe komij kili ailiñ in lõñ jen armij. . . . Kom ar jolok men ko relap an kien, ekajet im tiriamo, im tõmak. . . . Komij karreo elikin kõp im jãbi, a iloan relõñ kin men in koaroñ im nana.” (Mat. 23:13, 23, 25) Dri kalor ro an Jisõs renaj kar aikwij kain beran rot in kinke dri tel ro an kabuñ ko rewan renaj bareinwõt matõrtõr ir im mõn jet iair.​—Mat. 23:34; 24:9.

¹⁴ Jisõs ear bareinwõt beran in jutõk nae dimon ro. Juõn ien, ear iion juõn eman me ear miok jitõb etton na iben me joñõn an kajur ejelok armij ear maroñ liabe kin tomere. Ilo an jab mijõk, Jisõs ear kajutõklok dimon ro jen leo. (Mark 5:​1-​13) Ranin, Anij ear jab kamaroñ dri Kristian ro ñõn air kõmõn menin bwilõñ ko. Ak, ilo ar jerbal in kwalok nan im katakin, kij bareinwõt jej aikwij tõrinaek Setan, eo ej “kabilo lemnok an ro re jab tõmak.” (2 Kor. 4:4) Einwõt kar iben Jisõs, kein tõrinae ko ar rejjab “jen kõniek, a re kajur ilo Anij ñõn jolõllok jikin ko re kajur,” melelen katak ko rebwir an kabuñ me elap air tõmak kaki. (2 Kor. 10:4) Ilo ar kajerbal kein tõrinae kein Anij ear litoki, jenaj maroñ lo wãwen eo Jisõs ear kajerbali inem kajeoñwe joñok eo an.

15. Beran eo an Jisõs ear berber ion ta?

¹⁵ Beran eo an Jisõs ear berber ion tõmak eo an. Ej aikwij eindrein iber bareinwõt. (Mark 4:40) Ewi wãwen jemaroñ bõk tõmak eo emol? Bar juõn alen, joñok eo an Jisõs ej tel kij. Ear kwalok an lukkun jela Jeje ko ilo Baibel im liki nan ko ie. Einwõt juõn kein tõrinae, ear kajerbal Nan eo an Anij einwõt jãji eo an, im jab juõn lukkun jãji. Elõñ alen ear kamoli katak ko an ilo an jitõñlok ñõn eon ko ilo Baibel. Ekkã an jino nan ko an ilo an ba: “Bwe ar jeje,” melelen, ilo Nan eo an Anij. *

16. Ewi wãwen jemaroñ kalaplok ar tõmak?

¹⁶ Ñõn ejaak juõn tõmak me emaroñ anjo ion melejoñ ko rej walok kin ar lor Kraist, jej aikwij riit im katak Baibel aolep ran im ber  ilo kwelok ko, im likit ilo lemnok ko ar katak ko remol me rej berberin tõmak. (Rom 10:17) Jej aikwij bareinwõt kalomõnlokjen kin ta eo jar katak kake, im likiti ilo buruer. Tõmak eo ej jerbal wõt emaroñ kamakõt kij ñõn kwalok beran. (Jem. 2:17) Im jej aikwij jar kin jitõb kwojarjar kinke tõmak ej mõtõn leen jitõb eo.​—Gal. 5:​22.

17, 18. Ewi wãwen juõn Kristian jodrikdrik ear kwalok an beran ilo jikuul?

¹⁷ Juõn Kristian jodrikdrik etan Kitty ear iion juõn wãwen me ej kalikar bwe tõmak eo emol ej kaberan armij ro. Jen ke ear drik, ear jela bwe ejjab aikwij “jok kin gospel” eo ilo jikuul, im ear lukkun kõnan kwalok nan ñõn dri jikuul ro ilo kilaj eo an. (Rom. 1:​16) Kajjojo yiõ, ear beek ilo buruen ñõn kwalok iben ro jet kin nuuj eo emõn, ak ear jenliklik kin an jab beran. Jet yiõ ko tokelik ear emakõt ñõn bar juõn jikuul. Ear ba, “Kiõ, inaj kortokjen ien ko remõn rej bellok ñõn iõ me iar likjõp kaki mokta.” Kitty ear jar im kajitõk ñõn an bõk beran im lolokjen einwõt Kraist, im ien ko remõn rebellok ñõn e.

¹⁸ Ilo ran in jikuul eo jinointata, kar kajitõk iben dri jikuul ro kajjojo ñõn kwalok kajeir. Jet iair rar kwalok kin kabuñ ta eo rar drik im ridtolok ie, im rar ba bwe rar jab keini air bõk kwonair ilo makõtkit ko an kabuñ eo air. Kitty ear kile bwe eñin ien eo ebellok ñõn an kajejit men eo ear jar kake. Ke ear ien eo an, ilo beran ear ba, “Ij juõn ian Dri Kennan ro an Jeova, im ij kajerbal Baibel eo einwõt unjen tel eo aõ kin kabuñ im mwil emõn.” Ke ear wõnmanlok wõt, jet dri jikuul ro rar kõrraate e. Ak ro jet rar roñjake e im tokelik kwalok jet kajitõk ko air. Dri kaki eo ear kajerbal Kitty einwõt juõn joñok emõn kin juõn eo ear jojomare tõmak eo an. Kitty ear mõnõnõ bwe ear katak jen joñok eo an Jisõs kin beran.

Kwalok Tõmak im Beran Einwõt Kraist

19. (a) Ñõn ar bõk tõmak eo emol, ej kitibuj ta? (b) Ewi wãwen ar maroñ kalõñliñ Jeova?

¹⁹ Dri jilik ro rar bareinwõt kile bwe air jerbal ilo beran ej aikwij berber ion tõmak. Rar akwelap iben Jisõs: “Kwon kalaplok am tõmak.” (Riit Luk 17:​5, 6.) Tõmak eo emol elaplok melelen jen ar baj tõmak wõt bwe eor juõn Anij. Ej kitibuj ar ejaak juõn kõtan ebak iben Jeova, einwõt kõtan eo an juõn ajiri iben jemen eo ejoij im yokwe. Kar kakõrmol Solomon ñõn an je: “Nejiõ, elañe buruõm e meletlet, buruõ e naj mõnõnõ, aet buruõ: Aet, buruõ e naj mõnõnõ, ñe tiõm re naj konono men ko re jime.” (Ken. 23:15, 16) Ilo ejja wãwen in wõt, ar beran in jutõk kin kien ko rewãnik ej kalõñliñ Jeova, im ar jela kin men in ej kalaplok ar beran. Kin men in, jen wõnmanlok wõt im anõk joñok eo an Jisõs ien otemjej ilo ar jutõk ilo beran kin men ko wãnik!

[Kamelele ko itulal]

Kwomaroñ ke Kemelele?

• Ta eo enaj kamaroñ kij ñõn kiblie meñe jejjab wãppen?

• Tõmak eo emol ej berber ion ta, im ewi wãwen men in emaroñ jibõñ ñõn kaberan kij?

• Ta tokjen ko renaj walok jen ar kiblie im kwalok beran einwõt Kraist?

[Kajitõk ko ñan katak]

[Pija eo ilo peij 13]

Kwoj ke kapoj ak kõmõn bwe ‘buruõm en jime’ ñõn jumae menin kabo ko?

[Pija eo ilo peij 15]

Einwõt Jisõs, jemaroñ kwalok beran eo ej berber ion tõmak