Ien Kabuñ an Baamle​—⁠Eaurõk ñõn Ellã Im Mour!

LEMNOK mõk kin joñõn an naj kamijõk “tõrinae in ran elap, ran in Anij ekajur otem kajur!” (Rev. 16:14) Ilo alikar dri kanan Maika ear je ilo nan in kõkkar: “Tol ko renaj õnlok einwõt kirij ñe jej likit ilo kijeek; Renaj torlõllok ilo komlõl ko einwõt an dren torlõllok ilo tol ko.” (Maik. 1:4, UBS) Ta jorran eo enana enaj walok ñõn ro rejjab korijer ñõn Jeova? Nan in Anij ej ba: “Ilo ran eo, enbwinnin ro Iroij ar mõn ir renaj ejjeblõklõk jen jabõn ñõn jabõn lõl.”​—Jer. 25:33, UBS.

Ilo air lemnok kin nan in kakkil kein, bõran baamle ko im bareinwõt ro jemen im jinen me rej mõke iair rej aikwij kajitõkin ir mõke kin ajiri ro nejiir me ebwe air ridto ñõn kõmõni bebe ko air moke, ‘Renaj ke ellã jen Armagedõn?’ Baibel eo ej letok nan in kainemõn ko bwe elañe ekajur kõtan eo air iben Jeova, renaj ellã im mour ekkar ñõn joñõn ridtair.​—Mat. 24:21.

Eaurõk ñõn Kõmõn Juõn Ien Kabuñ an Baamle Eo

Einwõt juõn jemen ak jinen, kwon kamaat am maroñ ñõn kakajiririik ajiri ro nejõm “ilo kaje im kowe an Iroij.” (Ep. 6:4) Katak Baibel iben ajiri ro nejõm ekanuij in lap an aurõk. Jekõnan bwe ajiri ro nejir ren einwõt dri Kristian ro ilo Pilippai me Paul ear nebar ir kin air kar mõnõnõ in bokake Jeova. Ear je: “Ro jitenburu, einwõt kom ar bokake ien otemjej, jab einwõt iman meja wõt, a kiõ elaplok ilo aõ joko, komin jerbale ami mour kin mijõk im wurirrir.”​—Pil. 2:​12.

Ajiri ro nejõm rej ke bokake kien ko an Jeova ñe kwoj joko? Ta kin ien eo rej ber ilo jikin jikuul? Ewi wãwen kwomaroñ jibõñ ajiri ro nejõm ñõn liki meletlet eo jen kien ko an Jeova ñõn tel ir meñe kwojjab ber ibeir?

Ien kabuñ an baamle emaroñ lap kwonan ñõn kalek tõmak eo an ajiri eo nejõm ikijen men in. Inem, jen etale jilu wãwen ko raurõk ñõn kõmõn bwe katak Baibel iben baamle eo am en or tõbrõk ie.

En Ekkeini

Baibel eo ej kwalok bwe Anij ear kir enjel ro nejin ñõn kobalok iman ilo ien eo emwij karõke. (Job 1:6) Kwon kõmõne ejja men in wõt iben ajiri ro nejõm. Kwon kãlet juõn ran im auõ ilo juõn jota im karõk bwe en Ien Kabuñ an Baamle eo, inem lore wõt. Bareinwõt kwon kajenolok bar juõn ran in katak ñe men ko rejidimkij rej walok ilo ien eo kar karõke.

Elikin an motlok jet aliñ, kwon jab bõk lemnok eo bwe ej emõn wõt ñe baamle eo ejjab keini ien air katak Baibel. Kememej bwe ajiri ro nejõm rej dri katak Baibel ro am raurõktata. Bõtab, Setan ekõnan kõmõn bwe ren kijen. (1 Pit. 5:8) Elañe kwoj kajerbal Ien Kabuñ an Baamle eo ilo jota ñõn aluij wõt TV ak kõmõni makõtkit ko jet edrik tokjeir, Setan enaj bõk anjo.​—Ep. 5:​15, 16; 6:​12; Pil. 1:​10.

Kõmõn bwe En Or Tokjen

Ien Kabuñ an Baamle eo ilo jota ej aikwij juõn ien elaplok jen ar baj bõk wõt katak ko. Kate yuk ñõn kõmõn bwe en or tokjen. Ewi wãwen? Jen ien ñõn ien, kwon kãlet katak ko rej ekkar ñõn wãwen ko ajiri eo nejõm enaj jelmaiki ilo ran ko ak wik ko rej ber iman. Ñõn wanjoñok, etke kwojjab kobaik ien kamelmel ko ñõn jerbal in kwalok nan einwõt mõtõn katak eo? Ajiri ro remõnõnõ in  kõmõni men ko rejela kõmõni. Am kamelmel ibeir kin wãwen kwalok nan im lemnok kin wãwen ko ñõn uake nan in jumae ko enaj jibõñ ir ñõn beran ñe rej bõk kwonair ilo wãwen ko reinjuõn jen dron ilo jerbal in kwalok nan kin Ailiñ eo.​—2 Tim. 2:​15.

Kwomaroñ bareinwõt bwebwenato im kamelmel iben ro nejõm kin wãwen ko me renaj jibõñ ir ñõn kejbãrok ir jen kõmao ko renana. Bareinwõt kwomaroñ aluije pija eo, Jodrikdrik Ro Rej Kajitõk—Ewi Wãwen Imaroñ Kõmõn Jimjera ko Remol? (Young People Ask—How Can I Make Real Friends?) im kajerbale kajitõk ko rej walok ilo Ar Jerbal Ñõn Ailiñ Eo an September 2006, peij 3. Bwijrõk jidrik elikin kajjojo mõtõn ko ilo pija eo, im bwebwenato iben dron im kwalok buruemi ilo ami etali kajitõk ko. Ñe kwoj kajerbal wãwen in einwõt berber in katak eo an baamle eo, emaroñ kõmõn bwe en biruru an baamle eo bwebwenato im kwalok burueir ñõn dron.

Ien Kabuñ an Baamle eo ej kebellok ien eo emõn ñõn an ro jemen im jinen kwalok ñõn ro nejiir tokjen kõmõn mejenkajik ko ilo jitõb. Ikijen men in, kwomaroñ aluije pija eo ibeir etan Jodrikdrik Ro Rej Kajitõk—Ta eo Inaj Kõmõne kin Mour eo Aõ? (Young People Ask—What Will I Do With My Life?) Inem komin etale iben dron kajitõk ko rej kwalok kin pija eo ilo Ar Jerbal Ñõn Ailiñ Eo an April 2007, peij 9. Ilo ien eo komij bwebwenato kin pija eo, jibõñ ajiri ro nejõm ñõn kile bwe an juõn kajerbal mour eo an ñõn korijer ñõn Jeova ej ial eo emõntata ñõn etal ie. Kadrek ilo buruen ajiri ro nejõm kõnan eo ñõn pioneer, jerbal ilo Bethel, etal ñõn Jikuul in Baibel eo ñõn Katakin Lõmaro rejañin mare kin Jerbal ko Rejej Uair (MTS), ak jibarek jerbal in full-time ko jet.

Juõn nan in kakkil: Joñõn an jet jemen im jinen lap air lemnok kin ta eo rekõnan bwe ajiri eo nejiir en erom, rej likjõp in kile ta eo ladrik ak ledrik eo nejiir ej kõmõne kiõ. Emol, ej juõn men emõn bwe kwoj rejañ ajiri ro nejõm ñõn kõmõni mejenkajik ko remõn einwõt jerbal ilo Bethel, im jerbal in mejinede. Bõtab, ñe kwoj kõmõne men in, kwon jab kaillu ajiri eo nejõm kin men ko elap am kõtõmene kaki im kõmõn menin an ebwer. (Kol. 3:​21) Ien otemjej kwon kememej bwe ladrik ak ledrik eo nejõm ej aikwij yokwe Jeova jen buruen mõke, im jab kinke eñin men eo kwokõnan. (Mat. 22:37) Inem kwon bukot wãwen ko ñõn nebar ajiri eo nejõm kin ta eo emõn an kõmõne, im bõprae am kõnan lemnok kin ta eo ejjab kõmõne. Kadrek juõn kamolol kin aolep men ko Jeova ear kõmõni. Inem kõtlok bwe buruen ajiri eo nejõm en uak ñõn emõn eo an Jeova.

Kõmõn Bwe En Kamõnõnõ

Wãwen eo ken kajilu im eaurõk ñõn lo tõbrõk ilo Ien Katak an Baamle eo ej ñõn kõmõn bwe en kamõnõnõ. Ewi wãwen kwomaroñ lo tõbrõk ilo men in? Bwelen ilo ien ko jet kwomaroñ aluije pija ko jet kõmõn in Dri Kennan ro an Jeova im bwebwenato kaki. Ak  kwomaroñ riit iben dron jet eon ko ilo Baibel eo, im kãlet kajjojo uan baamle eo ñõn riiti nan ko an armij ro ilo Baibel eo.

Eor katak ko ekkã air walok ilo buk in lelok eo an Imõniaroñroñ eo, me rej emõn ñõn an baamle eo bwebwenato kaki. Ñõn wanjoñok, kwomaroñ kajerbal katak eo naetan “Ki ko ñõn Kamõnõnõik Juõn Baamle” me ej kwalok jet bwebwenato ko remol kin abañ ko an baamle im kwalok bwe nan in kakabilek ko remaroñ jibõñ ñõn kamarmir abañ ko. Bareinwõt katak eo etan “Katakin Ajiri Ro Nejõm,” ej juõn katak emõn ñõn ro jemen im jinen bwe ren riit iben ajiri ro. Katak eo etan “Ñõn Jodrikdrik Ro Nejid” ej kwalok kin juõn lajrõk ñõn katak Baibel me ejejit ñõn jodrikdrik ro. Bar juõn katak etan “Kajeoñwe Tõmak eo Air” im enaj rejañ baamle ko ñõn anõk wanjoñok ko an armij ro ilo Baibel. Bõtab, kejbãrok bwe kwon jab ukote ien katak eo an baamle eo ñõn juõn ien ekajet. Drebij wõt juõn mejatoto in yokwe me ej kowõnmanlok bwebwenato iben dron im enaj kamakõt ajiri ro nejõm, elaptata jodrikdrik ro nejõm ñõn kwalok burueir kin men ko rej kainebataik ir.

Elañe kwoj kõmõn bwe Ien Kabuñ an Baamle eo en ekkeini, or tokjen, im kamõnõnõ, Jeova enaj kejerammõn jibarbar ko am. Ien in ejej uan an baamle eo enaj jibõñ ro rejitenburu ibõm ñõn kajur wõt ilo jitõb.

[Bo̦o̦k eo ilo peij 31]

En Bolemen

“Ñe kimro ej katak iben ledrik ro nejimro, kimro leo iba ej bwebwenato kin katak eo kimij kapoje ñõn kwelok ko ilo congregation eo, inem kõmõn bwe ledrik ro nejimro ren jiñaik juõn pija me ej kwalok kin katak eo ilo tukaru. Jet ien, kimij arin armij ro ilo bwebwenato ko ilo Baibel eo ak kamelmele men ko kim naj ba ilo jerbal in kwalok nan. Kimro kar kõmõn bwe ien katak eo en ekkar ñõn joñõn ridtair, kaitoktoklimo, emõn, im kamõnõnõ.”​—J.M., Amerika.

“Ñõn jibõñ ladrik eo nejin dri katak Baibel eo aõ melele kin ewi wãwen kar kajerbal juõn buk limlim ilo ien ko etto ilo Baibel, kimro kar printi buk in Aiseia im jolok japter im eon ko ie. Kimro kar kakobaik peij ko iben dron im kadrepe ruo men rewaitoktok im rolul ilo jabõn peba ko. Inem ladrik eo ear kajeoñ anõk men eo Jisõs ear kõmõne ilo imõn kwelok eo ilo Nazeret. Bwebwenato eo ilo Luk 4:​16-​21ej kwalok bwe Jisõs ear ‘erlokwe buk [in Aiseia], im Ej lo’ eon ko me ear kabukoti. (Ais. 61:​1, 2) Bõtab, ke ladrik eo ear kajeoñ kõmõne ilo ejja wãwen eo wõt, ear lo bwe ebin an lo Aiseia 61 ke ear kajerbal buk limlim eo eaitok im ejelok nõmba in japter im eon ko ie. Ilo an bwilõñ kin joñõn an kar Jisõs kabel ilo an kajerbal buk limlim eo, ladrik eo ear ba: “Jisõs elukkun kar kabwilõñlõñ!’”​—Y.T., Japan.

[Pija eo ilo peij 30]

Kamelmele wãwen ko me renaj jibõñ ro nejõm ñõn kejbãrok ir jen kõmao ko renana

[Pija eo ilo peij 31]

Kate yuk ñõn kõmõn bwe Ien Kabuñ an Baamle eo ilo jota en kamõnõnõ