Kajitõk ko jen Ro Rej Riit

Ta eo Jabõn Kennan Ko 24:27 ej katakin kij kake?

Dri jeje buk in Jabõn Kennan ear kakabileklek juõn likao ilo an ba: “Kwon kapojõk am jerbal inabij, im kapoje ñõn yuk ilo jikin kallip; inem tokelik kwon kalek mweo imõm.” Ta katak eo eaurõk eon in me ej kakõrmol in Anij ej kwalok kake? Bwe juõn eman ej aikwij kapoj e mõke mokta jen an mare im jino juõn baamle, ilo an kile erro ko rej walok ilo karõk in.

Ilo ien ko remotlok, jet ien kar kemelele bwe eon in ej melelen bwe leo dri belele im ej juõn jemen ej aikwij jerbal ñõn kabwe aikwij ko an baamle eo im bareinwõt jerbal ñõn kalek, ak kõkãtok baamle eo, bwelen ilo an katakin ir kin Anij im Baibel eo. Meñe kemelele in emol im ej errã iben Baibel eo, men in ejjab point eo elaptata ilo eon in. Etke? Jen etale ruo un ko.

Moktata, nan eo kalek ilo eon in ejjab jitõñlok ñõn rejañ, ak kõkãtok juõn baamle me ererelok an jutõk. Jen men in, nan in Hibru eo emaroñ melelen ‘kalek juõn im’ im emaroñ bareinwõt ilo nan in kõkkar, einwõt ñõn kalek ak ejaak juõn baamle, ikijen an mare im neje.

Ken karuo, eon in ej kwalok kin ar kõmõn men ko ekkar ñõn juõn lajrõk, einwõt ñõn ba: “Kwon kõmõne men in mokta; inem men eo juõn tokelik.” Inem, ej melelen ke bwe jabõn kennan in ej rejañ kij ñõn likit erro ko lor kõniek iman erro ko Anij ear litoki ñõn kij? Jaab!

Ilo ien ko ilo Baibel, elañe juõn eman ear kõnan ‘kalek mweo imõn,’ ak ejaak juõn baamle ilo an mare, ear aikwij kajitõkin e mõke, ‘Ij pojõk ke ñõn lale im kabwe aikwij ko an lio iba im ajiri ro nejimro?’ Mokta jen an ejaak juõn baamle, ear or jerbal ko ear aikwij kõmõni, einwõt lale melan ko an ak jikin kallip ko an. Kin men in, ilo juõn ian ukok in Baibel ko ilo kajin Majõl, ej ba: “Kwon jab kalek mweo imõm im kõmmõn am family mae ien eo jikin kallib eo am ej dredrelok, im kwo jelã ke kwo maroñ in mour jene.” Kien in ej ke jerbal ranin?

Aet. Eman eo me ekõnan mare ej aikwij lukkun pojõk ñõn bõk erro in. Elañe enbwinin ej kajur wõt, enaj aikwij in jerbal. Emol, jerbal eo an leo ñõn lale baamle eo an en jab wõt ñõn kabwe aikwij ko ilo kõniek. Nan in Anij ej kwalok bwe eman eo me ejjab kabwe aikwij ko an baamle eo an ilo kõniek, iñjake, im ilo jitõb enana lok jen juõn dri jab tõmak! (1 Tim. 5:8) Kin men in, ilo an kapoj e mõke mokta jen an mare im ejaak juõn baamle, likao eo ej aikwij kajitõkin e mõke kin kajitõk kein: ‘Ij lukkun pojõk ke ñõn kabwe aikwij ko an baamle eo aõ? Ij pojõk ke ñõn tel baamle eo aõ ikijen men ko an kabuñ? Inaj ke kajejit erro eo ñõn ekkeini aõ katak Baibel iben lio iba im ajiri ro nejimro?’ Nan in Anij ej lukkun kwalok kin erro kein raurõk.​—Dut. 6:​6-8; Ep. 6:4.

Inem, juõn likao me ej kabuk belen ej aikwij lukkun lemnok kin nan in kakabilek eo ilo Jabõn Kennan Ko 24:27. Ilo ejja wãwen in wõt, juõn jiroñ ej aikwij kajitõkin e mõke elañe epojõk ñõn lolorjaki erro ko an juõn kõra dri belele im ej juõn jinen. Juõn jiroñ im likao me rej lemnok in mare im ro me rej kab mare im rej lemnok in neje, remaroñ kajitõkin ir mõke kin ejja kajitõk kein wõt. (Luk 14:28) Ñe armij ro an Anij rej mour ekkar ñõn nan in tel in emwij kakõrmole, emaroñ jibõñ ir ñõn bõprae air jelmae buromõj im renaj bõk lõñliñ kin juõn mour in baamle elemõnõnõ.

[Naan ko ilo peij 12]

Ta kajitõk ko kin mour in mare juõn likao ej aikwij kajitõkin e mõke?