“Kom Ro Jera”
“Kom Ro Jera”
“Kom ro jera, elañe komij kõmõn men ko Ij jiroñ kom.”—JON 15:14.
1, 2. (a) Kain mour rot im jerbal ko ro jeran Jisõs rar kõmõni? (b) Etke eaurõk bwe jen ro jeran Jisõs?
EMAN ro rej jijõt iben Jisõs ilo bo eo rar armij ro me wãwen mour im jerbal ko air rar oktõk jen dron. Piter im leo jãtin, Andru, rar dri añwõr ro. Matu kar juõn dri teltel owõj, juõn jerbal me dri Ju ro rar drike. Jet, einwõt Jemes im Jon, rar jela kajen Jisõs jen ke rar drik. Im ro jet, einwõt Natanael, remaroñ kar jela kajen iomin jejjo wõt yiõ ko. (Jon 1:43-50) Bõtab, aolep ro rar ber ilo boñin Kwojkwoj in Kijone in eaurõk ilo Jerusalem rar lukkun tõmak bwe Jisõs kar Messaia eo kar kalimur kake, Nejin Anij eo emour. (Jon 6:68, 69) Emol air kar iñjake an yokwe ir ke ear ba ñõn ir: “I ar naetõmi ro jera; bwe men otemjej I ar roñ jen Jema I ar kwalok ñõn kom.”—Jon 15:15.
2 Nan kein an Jisõs ñõn dri jilik ro an retiljek rej jerbal ñõn aolep dri kabit ro ranin, im ilo juõn wãwen, ej bareinwõt jerbal ñõn ‘s̃ip ro jet’ mõtair. (Jon 10:16) Meñe eoktõk wãwen mour eo ar, jemaroñ bõk jerammõn eo ñõn erom ro jeran Jisõs. Ar jimjera iben elap an aurõk kinke ej kõmõn bwe jen bareinwõt ro jeran Jeova. Ilo mol, ejelok juõn emaroñ druaklok ñõn Jeova elañe ejjab mokta druaklok ñõn Kraist. (Riit Jon 14:6, 21.) Inem, ta eo jej aikwij kõmõne bwe jen erom im drebij wõt jimjera eo ar iben Jisõs? Mokta jen ar bwebwenato kin katak in eaurõk, jen etale joñok eo an Jisõs kin an kar juõn jeran emõn im lale ta eo jemaroñ katak jen wãwen an kar dri jilik ro emakõt kin tokjen jimjera eo an ibeir.
Joñok eo an Jisõs kin An Juõn Jeran Emõn
3. Ta eo Jisõs ear buñbuñ kake?
3 Dri meletlet eo Kiñ Solomon ear je: “Elõñ ro jeran eo dri mweie.” (Ken. 14:20) Eñin men eo ekkã an ro rejjab wãppen kõmõne, rej kõmõn bwe jimjera eo air en berber ion air maroñ bõk men ko im jab kin air maroñ lelok. Ear jab eindrein iben Jisõs. Ear jab kõtlok bwe mweiuk ak buñbuñ an juõn armij en jelet e. Emol, Jisõs ear yokwe juõn likao emweie im ear kirtok e bwe en juõn ian dri kalor ro an. Bõtab, Jisõs ear jiroñ likao eo ñõn wiakake men ko mweien im liloki ñõn ro rejeramel. (Mark 10:17-22; Luk 18:18, 23) Jisõs ear buñbuñ jab kin an jimjeraik ro remweie im buñbuñ, ak kin an jimjeraik ro retã im ro armij rej kejekron ir.—Mat. 11:19.
4. Etke jemaroñ ba bwe ro jeran Jisõs rar jab wãppen?
4 Ilo mol, ro jeran Jisõs rar armij ro rejjab wãppen. Juõn ien Piter ear likjõp in watõk men ko einwõt Anij ej watõki. (Mat. 16:21-23) Jemes im Jon rar lukkun kõnan bwe ren utiej ke rar kajitõk iben Jisõs bwe en lelok ñõn irro jea ko reutiej ilo Ailiñ eo. Men in rar kõmõne ear kanuij kaillu dri jilik ro jet, im elõñ alen aituerõk eo kin wõn eo elaptata iair ear tellok ir ñõn air akwail. Bõtab, ilo joij Jisõs ear kajeoñ in kajime lemnok ko an ro jeran im ear jab mõkõj an illu ibeir.—Mat. 20:20-28.
5, 6. (a) Etke Jisõs ear drebij jimjera eo an iben enañin aolep dri jilik ro an? (b) Etke Jisõs ear kabwijrõk jimjera eo an iben Judas?
5 Jisõs ear jab drebij jimjera eo an iben lõmarein rejjab wãppen kin an baj le jen joñõn an joij ak kin an likjõp in kile jab wãppen ko air. Jen an eindrein, ear kãlet ñõn an kalimjek wõt un ko remõn unin kõmõn ko air im karkar ko remõn karkariir. Ñõn wanjoñok, Piter, Jemes, im Jon rar kiki jen air rejañ Jisõs iomin ien eo ear kanuij bin ñõn e. Alikar bwe Jisõs ear buromõj kin men in ear walok. Ak meñe eindrein, ear lo bwe kõnan eo an burueir ear emõn, ke ear ba: “An e kõnan, a kõniek emõjino.”—Mat. 26:41.
6 Ilo okõtõn, Jisõs ear kabwijrõk jimjera eo an iben Judas Iskariõt. Jisõs ear jela bwe ear nana buruen Judas, meñe wãwen kõmõn ko an rar einwõt ñe ej juõn jeran emõn. Kinke Judas ear jeraik lõl, ear mõke kõmõn bwe en dri kijirãt eo an Anij. (Jem. 4:4) Kin men in, Jisõs ear kwalok jimjera eo an iben dri jilik ro 11 retiljek elikin an kar kadrioijlok Judas.—Jon 13:21-35.
7, 8. Ewi wãwen Jisõs ear kalikar yokwe eo an ñõn ro jeran?
7 Jisõs ear jab kalimjek likjõp ko an ro jeran retiljek ak ear kõmõni men ko ñõn tokjen eo air. Ñõn wanjoñok, ear jar ñõn Jemen im kajitõk bwe en kejbãrok ir iomin melejoñ ko air. (Riit Jon 17:11.) Jisõs ear kwalok an lemnok kin joñõn maroñ ko air. (Mark 6:30-32) Im ear jab itoklimo wõt in kwalok lemnok ko an ak ear bareinwõt kõnan roñjake im melele kin lemnok im iñjake ko air.—Mat. 16:13-16; 17:24-26.
8 Jisõs ear kajerbal mour eo an im an mij ñõn tokjen eo an ro jeran. Emol, ear jela bwe ej juõn menin aikwij ekkar ñõn kien Jemen kin ekajet jime, bwe en lelok an mour. (Mat. 26:27, 28; Hib. 9:22, 28) Ak Jisõs ear lelok mour eo an ñõn kalikar yokwe eo an. Ear ba: “Ejelok yokwe iben armij elap jen yokwe in, bwe armij en lelok an mour kin ro jeran.”—Jon 15:13.
Ewi Wãwen an Kar Dri Kalor ro Emakõt ñõn Jimjera eo an Jisõs?
9, 10. Ewi wãwen an kar armij ro emakõt kin an Jisõs kwalok an joij?
9 Jisõs ear mõnõnõ in lelok an ien, men ko mweien, im kwalok an yokwe ñõn ro jet. Tokjen men in, armij ro rar iñjake air ebake e im rar mõnõnõ in bar lelok menin lelok ko ñõn e. (Luk 8:1-3) Jen wãwen eo Jisõs ear iione, ear maroñ ba: “Komin lelok, im naj lewoj ñõn kom; joñok emõn, joni, kamõkitikiti, im jiõblok naj lewoj na ilo ubõmi. Bwe kin joñok eo komij joñok kake, naj bar joñok ñõn kom.”—Luk 6:38.
10 Emol, jet rar kajeoñ in ber iben Jisõs kin air lemnok kin men ko remaroñ bõk jen e. Armij rein me ear jab mol jimjera eo air iben Jisõs rar ilok jen e ke rar jab melele kin men ko ear ba. Ijellokin air liki Jisõs ke rar jab melele men ko ear ba, rar mõkõj in bõk lemnok eo ebwir im ilok jen e. Ilo okõtõn, dri jilik ro rar tiljek wõt ñõn e. Elõñ alen kar melejoñwe jimjera eo air iben Kraist, ak rar kate ir ñõn rejetake e iomin ien ko remõn im nana. (Riit Jon 6:26, 56, 60, 66-68.) Ilo boñin eo eliktata in an Jisõs ber ion lõl einwõt juõn armij, ear kwalok joñõn an yokwe ro jeran, ilo an ba: “Komeo, ro r’ar ber iba ilo men ko r’ar kabo Iõ kaki.”—Luk 22:28.
11, 12. Ewi wãwen an kar Jisõs rejañ dri kalor ro an, im ewi wãwen air kar emakõt?
11 Ejjabto elikin wõt an kar Jisõs nebar dri kalor ro an kin air tiljek, lõmarein rar karmijeteik e. Iomin jidrik wõt ien, rar kõtlok bwe air mijõk armij en anjo ion yokwe eo air ñõn Kraist. Bar juõn alen, Jisõs ear jeorlok air bwir. Elikin an mij im jerkakbiji, ear walok ñõn ir im kalikar jimjera eo an ibeir. Bareinwõt, ear lelok ñõn ir jerbal eo eaurõk ñõn kõmõn bwe “dri ailiñ ko otemjej” ren dri kaloran im bwe ren dri kennan ro an ñõn “eneo etolok tata i lõl.” (Mat. 28:19; Jerb. 1:8) Ewi wãwen dri kalor ro rar emakõt?
12 Dri kalor ro rar kõmõn joñõn wõt air maroñ ñõn kajededlok ennan eo kin Ailiñ eo. Jen jibõñ eo jen jitõb kwojarjar eo an Jeova, ejjabto rar kobrõk Jerusalem kin katak ko air. (Jerb. 5:27-29) Rar jab kõtlok bwe mij en kabwer ir jen air bokake kien eo an Jisõs ñõn kõmõn dri kalor ro. Kin men in, enañin 30 yiõ ko elikin air bõk kien in jen Jisõs, dri jilik Paul ear maroñ je bwe nuuj eo emõn kar kwalok kake ñõn “armij otemjej ilo lõl.” (Kol. 1:23, UBS) Emol, dri kalor rein rar kwalok joñõn air kar kaurõk jimjera eo air iben Jisõs!
13. Dri kalor ro an Jisõs rar kõtlok bwe katak ko an ren jelet ir ilo wãwen it ko?
13 Ro rar erom dri kaloran rar bareinwõt kõtlok bwe katak ko an Jisõs ren jelet mour ko air. Ñõn elõñ, men in ear melelen bwe ren kõmõn oktõk ko relap ilo air kakõmõnmõnlok mwiliir im karkar ko karkariir. Jet dri kalor ro rekãl rekin kõmõni mõnit ko retton einwõt kõra ñõn kõra ak eman ñõn eman rej babu iben dron, dri lũñ, dri karek, ak dri kwot. (1 Kor. 6:9-11) Jet rar aikwij ukot lemnok ko air kin ro me eoktõk unokan kil ko kiliir. (Jerb. 10:25-28) Meñe eindrein, rar bokake Jisõs ilo air wutik armij eo emor im kõnõk armij eo ekãl. (Ep. 4:20-24) Rar jino bõk ejja “lolãtãt an Kraist,” ilo air melele im anõk wãwen lemnok im kõmõn ko an.—1 Kor. 2:16.
Jimjera Iben Kraist Ranin
14. Ta eo Jisõs ear kalimur ñõn an kõmõne ilo ien “lokõn lõl”?
14 Elõñ ian Kristian ro mokta rar lukkun iion im jela kajen Jisõs ak rar lo e elikin an kar jerkakbiji. Alikar, ear jab or jerammõn in iber ñõn kebake Jisõs ke ear ber ion lõl. Inem, ewi wãwen jemaroñ erom ro jeran Kraist? Juõn wãwen ej ilo ar bokake nan in jiroñ ko ear litoki ikijen kumi in dri korijer etiljek im meletlet, me rej ejaakin bween dri kabit ro rej mour wõt ion lõl. Jisõs ear kalimur bwe ilo ien “lokõn lõl,” ak jemlokõn jukjuk im ber in, enaj lelok ñõn dri korijer in “men ko otemjelok an.” (Mat. 24:3, 45-47) Ranin, enañin aolep ro rekõnan jimjeraik Kraist rejjab uan dri kabit ro. Ewi wãwen air emakõt ñõn nan in tel ko rej bõki jen dri korijer eo etiljek im meletlet ej jelet jimjera eo air iben Kraist?
15. Ta eo ej kalikar elañe juõn armij enaj einwõt juõn s̃ip ak got?
15 Riit Matu 25:31- 40. Jisõs ear ãñiñin ro me renaj mõtõn dri kabit ro einwõt ro jãtin. Ilo wanjoñok eo kin kijbil s̃ip ko jen got ko, Jisõs ear kwalok ilo alikar bwe wãwen eo jej kõmõn ñõn ro jãtin ej einwõt ñe jej kõmõn ñõn e. Ilo mol, men eo me enaj kar kalikar elañe juõn armij ej juõn s̃ip ak got ej ikijen wãwen eo ej jerbal iben ‘juõn ian rein [jãten] eriktata.’ Kin men in, wãwen eo elaptata me ro rej kejatrikrik ñõn mour ion lõl rej kwalok air kõnan jimjera iben Kraist, ej ilo air rejetake dri korijer eo etiljek im meletlet.
16, 17. Ewi wãwen jemaroñ kalikar jimjera eo ar iben ro jãtin Kraist?
16 Elañe kejatrikrik eo am ej ñõn mour ion lõl iomin kien eo an Ailiñ in Anij, ewi wãwen kwomaroñ kalikar jimjera eo am iben ro jãtin Kraist? Jen etale jilu wãwen ko. Moktata, ej ilo ar bõk kwonad joñõn wõt ar maroñ ilo jerbal in kwalok nan. Kraist ear kakien ro jãtin ñõn kwalok kin nuuj eo emõn iaolepen lõl. (Mat. 24:14) Bõtab, emaroñ kar bin ñõn an ro jãtin Kraist ion lõl kajejit erro in elañe rar jab bõk jibõñ jen s̃ip ro jet mõtair. Aet, kajjojo ien ro uan s̃ip ro jet rej bõk kwonair ilo jerbal in kwalok nan, rej jibõñ ro jãtin Kraist ñõn kajejit jerbal eo air ekwojarjar. Kraist im kumi in dri korijer eo etiljek im meletlet rej kamolol kin wãwen in s̃ip ro jet rej kwalok jimjera eo air.
17 Wãwen eo ken karuo me s̃ip ro jet remaroñ jibõñ ro jãtin Kraist, ej ilo air jabawõt ñõn rejetake jerbal in kwalok nan. Jisõs ear rejañ dri kalor ro an ñõn kõmõn ro jerair ñõn ir kin “mweien lõl in.” (Luk 16:9) Ejjab melelen bwe jemaroñ wiaik buruen Jisõs ak Jeova ñõn erom ro jerar. Jen men in, ilo ar kajerbal men ko mweier ñõn jurake Ailiñ eo an Jeova im jerbal eo congregation eo ej kõmõne ion lõl, jej kamol jimjera im yokwe eo ar, jab ilo nan wõt, ak “ilo kõmõn im mol.” (1 Jon 3:16-18) Jej kõmõne men in ñe jej bõk kwonad ilo jerbal in kwalok nan, jabawõt ñõn kalek im kejbãrok jikin kwelok ko ar, im ñe jej lelok jabawõt ñõn jerbal in kwalok nan eo ibelakin lõl. Meñe joñõn eo jej jabawõt kake edrik ak elap, Jeova im Jisõs rej jimor kamolol kin ar mõnõnõ in lelok.—2 Kor. 9:7.
18. Etke jej aikwij bokake nan in tel ko rej berber ion Baibel jen elder ro ilo congregation eo?
18 Wãwen eo ken kajilu jej kamol bwe kij aolep jej ro jeran Kraist ej ilo ar mõnõnõ in bokake nan in tel ko elder ro rej litoki ilo congregation eo. Kar kabit lõmarein kin jitõb kwojarjar iomin tel eo an Kraist. (Ep. 5:23) Dri jilik Paul ear je: “Komin bokake im kõtãik kom ñõn ro rej tel kom.” (Hib. 13:17) Jet ien, jemaroñ lo bwe ebin ñõn bokake nan in tel ko rej berber ion Baibel me elder ro ilo congregation eo ar rej litok ñõn kij. Kin ar lale likjõp ko air, men in emaroñ kõmõn bwe jen watõk nan in kakabilek ko air ilo juõn wãwen ebwir. Bõtab, Kraist, eo ej bõran congregation eo, ej mõnõnõ in kajerbal lõmarein rejjab wãppen. Kin men in, wãwen eo jej emakõt ñõn tel eo air, ej jelet jimjera eo ar iben Kraist. Ñe jejjab watõk likjõp ko an elder ro im jej mõnõnõ in lor tel eo air, jej kamol yokwe eo ar ñõn Kraist.
Jikin eo Jemaroñ Lo Ro Jerar Remol
19, 20. Ta eo jemaroñ lo iloan congregation eo, im ta eo jenaj etale ilo katak eo tok juõn?
19 Jisõs ej wõnmanlok im lale kij ikijen tel eo jen s̃eperd ro reyokwe im bareinwõt ilo an letok ñõn kij dri tõmak ro jiner im ro jeer im jãter man im kõra iloan congregation eo. (Riit Mark 10:29, 30.) Ewi wãwen an kar ro nukõm emakõt ke kwar jino kobalok iben rolul eo an Jeova? Kimij kejatrikrik bwe rar rejetake jibarbar ko am ñõn druaklok ñõn Anij im Kraist. Ak Jisõs ear kakkil bwe jet ien “ro an armij dri kijirãt re naj ro nukin.” (Mat. 10:36) Ej menin kainemõn ñõn jela bwe ilo congregation eo, jemaroñ lo ro renaj edrep wõt iber elaplok jen ro jeer im jãter ilo kõniek!—Ken. 18:24.
20 Einwõt an nan in yokyokwe eo an Paul ilo jemlokõn letter eo an ñõn congregation in Rom kwalok, ear lõñ ro jeran ear ebake ir. (Rom. 16:8-16) Dri jilik Jon ear kajemlok letter eo an ken kajilu ilo nan kein: “Kwon yokyokwe ro jerar kaju kin etair.” (3 Jon 14) Alikar, bwe e bareinwõt ear lõñ ro jeran. Ewi wãwen ar maroñ anõk joñok eo an Jisõs im dri kalor ro mokta ilo ar kõmõn im drebij jimjera eo ar iben ro jeer im jãter ilo congregation eo? Katak eo tok juõn enaj letok uak ko ñõn kajitõk in.
Ewi Wãwen Kwonaj Uak?
• Ta joñok eo Jisõs ear likit ilo an juõn jeran emõn?
• Ewi wãwen dri kalor ro rar emakõt ñõn jimjera eo an Jisõs?
• Ewi wãwen jemaroñ kamol bwe jej ro jeran Kraist?
[Kajitõk ko ñan katak]
[Pija eo ilo peij 14]
Jisõs ear itoklimo kin lemnok im wãwen iñjake ko an ro jeran
[Pija ko ilo peij 16]
Ewi wãwen jemaroñ kwalok kõnan eo ar ñõn erom ro jeran Kraist?