“Komin Ainemõn Iben Armij Otemjej”
“Komin Ainemõn Iben Armij Otemjej”
“Elañe e maroñwe, einwõt ej ber ibemi, komin ainemõn iben armij otemjej.”—ROM. 12:18.
1, 2. (a) Ta nan in kakkil eo Jisõs ear lelok ñõn dri kalor ro an? (b) Ia eo jemaroñ lo nan in kakabilek eo kin wãwen jej aikwij emakõt ñe jej iion jumae?
JISÕS ear kakkil dri kalor ro an bwe renaj iion jumae jen lõl in, im ilo joten eo mokta jen an kar Jisõs mij, ear kemelele etke. Ear ba ñõn dri jilik ro an: “Elañe kom an lõl, lõl e naj kar yokwe men eo an: a bwe kom jab an lõl, a I ar kãlet kom jen lõl, kin men in lõl ej kijirãte kom.”—Jon 15:19.
2 Dri jilik Paul ear lo an mol nan kein an Jisõs jen men eo ear iione. Ilo letter eo an ken karuo ñõn Timote, Paul ear je: “Kw’ar lorlok aõ katakin, kõmõnmõn, lemnok, tõmak, meanwõr, yokwe, kijenmij, matõrtõr ko, im iñtan ko.” Inem Paul ear wõnmanlok im je: “Aet, im ro otemjej re kõnan mour im kwojarjar ilo Kraist Jisõs, naj matõrtõre ir.” (2 Tim. 3:10-12) Letter eo an Paul ñõn dri Kristian ro ilo Rome ilo japter 12, ear lelok ñõn ir juõn nan in kakabilek ekeie kin wãwen rej aikwij emakõt ñe rej iion jumae. Nan kein an remaroñ tel kij ilo ien kein eliktata.
“Kõmmõni Men ko Remõn”
3, 4. Ewi wãwen jemaroñ jerbale nan in kakabilek eo ilo Dri Rom 12:17 (a) iben ro uan baamle eo ar me eoktõk tõmak ko air? (b) ilo kõmõn ko ar iben ro dri turid?
3 Riit Dri Rom 12:17, UBS. Paul ear kemelele bwe ñe jej iion jumae, jej aikwij jab ukot nana kin nana. Eaurõk ñõn bokake nan in kakabilek in an, elaptata iben ro uan baamle eo ar me eoktõk tõmak ko air. Elañe juõn ear ba ak kõmõn juõn men enana ñõn juõn dri Kristian, ej aikwij bõprae ijjibed eo ñõn ukot nana kin nana. Ejelok men emõn enaj itok jen ar ‘ukot nana kin nana,’ ak enaj kalaplok wõt abañ eo.
4 Paul ej kwalok juõn wãwen emõnlok: “Kajjeoñ kõmmõni men ko remõn ibben armij otemjej.” Ilo mweo imõn juõn baamle, ñe lio dri belele ej kwalok joij wõt ñõn leo belen meñe leo ej kananaik tõmak eo an, men in emaroñ bõprae an or akwail ikõtairro. (Ken. 31:12) Carlos, eo ej kiõ jerbal ilo Bethel, ej kwalok bwe wãwen an kar jinen anjo ion jumae ko jen jemen kar ilo an kwalok wõt joij im ilo an emõn an kajejite erro ko an ilo mweo. “Aolep ien jinõ ear rejañ kim ñõn kwalok koutiej ñõn e. Ear ba bwe in ikkure iben jema juõn ikkure etan boules (ikkure in bowling an ailiñ in France) meñe iar jab itoklimo kin ikkure in. Bõtab, men in ear kamõnõnõik jema.” Tokelik, ear jino katak Baibel eo im baptais. Ikijen air lelok “men ko remõn ibben armij otemjej,” ekkã an Dri Kennan ro an Jeova jibõñ ro dri turiir bwe ren jab kwalok kalijeklok ñe rej jibõñ ir ilo ien jorran.
Anjo ion Jumae kin “Melle Kijeek” Ko
5, 6. (a) Ewi wãwen jej ejoji “melle kijeek” na ion bõran juõn dri jumae? (b) Kwalok juõn bwebwenato me ej kwalok bwe ar jerbale nan in kakabilek eo ilo Dri Rom 12:20 emaroñ bõktok tokjen ko remõn.
5 Riit Dri Rom 12:20. Ilo an je nan ko ilo eon in, ejelok berre Paul ear lemnok kin nan kein ilo Jabõn Kennan 25:21, 22: “Elañe dri kijirãte yuk e kwuli, kwon lelok ñõn e ekõn: im elañe e maro, kwon lelok ñõn e dren in irak; Inem kwo naj ejoij melle in kijeek ion bõran, im Jeova e naj nawõnam.” Ilo nan in kakabilek eo an Paul ilo Dri Rom japter 12, nan in kõkkar in kin melle ear jab melelen ñõn kajeik ak kajok dri jumae eo. Jen men in, nan ko ilo jabõn kennan im nan ko an Paul ñõn dri Rom ro, rej jimor jitõñlok kin kilen kar kabiruruik mãl ko ilo ien ko etto. Ilo yiõ ko 1800, juõn dri meletlet etan Charles Bridges ear ba: “Ñe rej tile mãl ko rebin, rejjab likiti wõt ion melle eo ak rej bareinwõt ejoji melle kijeek na ion. Elañe jej kwalok elap yokwe im meanwõr ñõn armij ro ebin burueir, enañin aolepeir renaj oktõk.”
6 Einwõt “melle kijeek” ko, kõmõn ko rejoij remaroñ ukot mwil ko mwilin dri jumae ro im kabwijrõk ir jen air jumae dri korijer ro an Anij. Kwalok wõt joij enaj kamakõt armij ro ñõn kwalok air itoklimo kin ennan ko Dri Kennan ro an Jeova rej kwalok kaki jen Baibel eo. Dri jilik Piter ear je: “Im en ekar ami ber im kõmõn ilo bwiljin dri ailiñ ko; bwe, ilo men eo rej konono nae kom kake einwõt dri kõmõn nana, ren kaibujuij Anij ilo ran eo ran in joij, kin ami jerbal ko remõn rej loi.”—1 Pit. 2:12.
“Komin Ainemõn Iben Armij Otemjej”
7. Ta ainemõn eo Kraist ear likit iben dri kalor ro an, im ta eo ej aikwij kamakõt kij ñõn kõmõne?
7 Riit Dri Rom 12:18. Ilo boñin eo eliktata Jisõs ear ber iben dri kalor ro an, ear ba ñõn ir: “Ainemõn Ij likit na ibemi, Aõ ainemõn Ij lewoj ñõn kom.” (Jon 14:27) Ainemõn eo me Jisõs ear likit iben dri kalor ro an ej ainemõn eo iloa me rej iñjake kin air jela bwe Jeova im Nejin rej jimor yokwe ir im buñburuer kake ir. Ainemõn in iloa ej aikwij kamakõt kij ñõn mour ilo ainemõn iben ro jet. Dri Kristian ro remol rej mõnõnõ in ber ilo ainemõn im rej bukot wãwen ko ñõn kõmõn ainemõn iben ro jet.—Mat. 5:9, UBS.
8. Ewi wãwen jemaroñ kõmõn ainemõn ilo moko imõd im ilo congregation eo ar?
8 Juõn wãwen ñõn kõmõn ainemõn iben ro uan baamle eo ar ej ilo ar mõkõj in kamarmire abañ ko jen ar kõtlok bwe ren laplok. (Ken. 15:18; Ep. 4:26) Men in ej bareinwõt jerbal ilo Kristian congregation eo. Dri jilik Piter ear kwalok bwe kabukot ainemõn ej ekkejellok iben drebij loõd. (1 Pit. 3:10, 11) Jemes bareinwõt, elikin an lelok nan in kakabilek eo kin wãwen eo ekkar ñõn kajerbal loõd im aikwij eo ñõn bõprae junmar im akwail, ear je: “A meletlet jen lõñ ej erreo mokta, inem e ainemõn, joij, ebiruru an rel, eobrõk kin tiriamokake im leen ko remõn, im ejelok akwail ak jela mon iben. Ak leen wãnik emwij jeor ilo ainemõn ñõn ro rej kõmõn ainemõn.”—Jem. 3:17, 18.
9. Ñe jej kate kij ñõn kõmõn “ainemõn iben armij otemjej,” ta eo jej aikwij kememeje?
9 Ilo nan ko an ilo Dri Rom 12:18, Paul ear ba bwe jen jab kõmõn ainemõn wõt iben armij ro ilo moko imõd im congregation eo ar wõt. Ej ba bwe jej aikwij kõmõn “ainemõn iben armij otemjej.” Armij rein rej kitibuj ro dri turid, dri jerbal ro mõtar, dri jikuul ro mõtar, im armij ro jej iion ir ilo jerbal in kwalok nan eo ar. Bõtab, dri jilik Paul ej tibriki nan in kakabilek eo an, ke ej ba: “Elañe e maroñwe, einwõt ej ber ibemi.” Melelen bwe jej aikwij kate kij joñõn wõt ar maroñ ñõn kõmõn “ainemõn iben armij otemjej,” bõtab en jab ñõn joñõn eo me emaroñ nae kien ko rewãnik an Anij.
Irenwõne Ej An Jeova
10, 11. Ilo wãwen it eo jej “lelok jikin ñõn illu eo,” im etke men in ejime?
10 Riit Dri Rom 12:19. Meñe jej iion ro me rejjab kõnan roñjake ennan eo ar, ekoba ro me elap air lej ñõn kij, jej aikwij “meanwõr” wõt im jerbale “inemõn.” (2 Tim. 2:23-25) Paul ej rejañ dri Kristian ro ñõn jab irenwõne ñõn ir mõke ak ren “lelok jikin ñõn illu eo.” Illu eo an wõn Paul ej konono kake? Alikar ear jab konono kin illu eo ar ak ej jitõñlok ñõn illu eo an Anij. Einwõt dri Kristian ro, jejela bwe ejjab kwonad ñõn irenwõne. Dri jeje sam ear je: “En jokwõr am illu, im kwon illok jen e; im kwon jab aliñõrñõr in kõmõn nana wõt.” (Sam 37:8) Im Solomon ear kakabilek: “Kwon jab ba, Ña I naj nawõnan nana eo; kwon kõtare Jeova, im E naj lomorõm.”—Ken. 20:22.
11 Elañe dri jumae ro rej kejorran kij, ej menin meletlet ñõn kõtlok bwe Jeova en kajeik ir elañe ej tellokin air bõk kaje im ekkar ñõn ien eo an Jeova. Paul ear lemnok kin illu eo an Jeova, ke ear ba: “Emwij je, Kwonaõ irenwõne, I naj nawõnan, Iroij e ba.” (Keiri Duteronomi 32:35.) Elañe jej kajeoñ in irenwõne ñõn kij mõke, ej einwõt ñe jej wãlok, kinke jej kõmõne men eo me ej tellokin wõt Jeova. Bareinwõt, jenaj kwalok bwe jejjab liki ilo kalimur in an Jeova: “I naj nawõnan.”
12. Ñãt illu eo an Jeova enaj walok, im ewi wãwen?
12 Moktalok ilo letter eo an Paul ñõn dri Rom ro, ear ba: “Bwe illu an Anij e walok jen lõñ nae jerawiwi otemjej im nana an armij, ro rej drebij mol ilo nana.” (Rom. 1:18) Illu eo an Jeova enaj walok jen lõñ ikijen an naj kajerbal Nejin ilo ien “iñtan eo elap.” (Rev. 7:14) Men in enaj ‘kamol bwe ejimwe an Anij ekajet,’ einwõt an Paul kemelele ilo bar juõn ian letter ko an emwij kakõrmole: “Bwe Anij enaj kõmmõn men eo ejimwe: enaj kaiñtan ro rej kaiñtan kom, im enaj kõtlok kom jen ami iñtan, im bareinwõt kim. Enaj kõmmõne men in ilo ien en Iroij Jesus ej weaktok jen lõñ ibben enjel ro an rekajur, kin urur in kijeek, bwe en kajeik ro rejaje Anij kab ro rejjab bokake Nan eo Emmõn kin ad Iroij Jesus.”—2 Tes. 1:5-8, UBS.
Anjo jen Nana kin Emõn
13, 14. (a) Etke jejjab bwilõñ ñe jej iion jumae? (b) Ta eo jej aikwij kõmõne ñõn ro rej matõrtõre kij?
13 Riit Dri Rom 12:14, 21. Ilo ar liki bwe Jeova enaj kajejite karõk ko an, jemaroñ kate kij joñõn wõt ar maroñ ñõn kõmõne jerbal eo ear letok ñõn kij, ñõn “kwalok gospel in an ailiñ in lõñ i aolepen lõl.” (Mat. 24:14) Jejela bwe jerbal in an Kristian enaj kaillu dri kijirãt ro ar, kinke Jisõs ear kakkil kij: “Dri ailiñ otemjelok re naj kijirãte kom kin eta.” (Mat. 24:9) Kin men in, jejjab bwilõñ ak ebwer ñe jej iion jumae. Dri jilik Piter ear je: “Komeo, ro jitenburu, komin jab lemnok kin men in kijeek e naj itok bwe en melejoñ kom, einwõt elañe men eo ekãl ej walok ñõn kom: A komin lõñliñ kin ami bõk mõtõn iñtan ko an Kraist.”—1 Pit. 4:12, 13.
14 Ijellokin ar kwalok ar drike ro rej matõrtõre kij, jej kajeoñ wõt im katakin ir, kinke jet iair rejjab lukkun melele kin mol eo. (2 Kor. 4:4) Jej kate kij ñõn jerbale nan in kakabilek eo an Paul: “Komin jar kin ro rej matõrtõre kom; komin jar im jab kanõjnij.” (Rom. 12:14) Jisõs ear ba ilo Katak eo an ion Tol eo: “Komin yokwe ami dri kijirãt, kõmõnmõn emõn ñõn ro rej kijirãte kom, jar kin ro rej kõmatõre kom, im ro rej kõmõnmõn nana ñõn kom.” (Luk 6:27, 28) Dri jilik Paul ear jela bwe juõn dri jumae emaroñ erom juõn dri kalor etiljek an Kraist im juõn dri korijer ekijejeto an Jeova, kinke ear juõn iair. (Gal. 1:13-16, 23) Ilo bar juõn letter, Paul ear ba: “Ke rej kajirere kim, kimij jar; ke rej matõrtõre kim, kimij kijenmij; ke rej rurue kim, kim akwelap.”—1 Kor. 4:12, 13.
15. Ta wãwen eo emõntata jemaroñ anjo jen nana kin emõn?
15 Kin men in, juõn dri Kristian emol ej jerbale eon in ilo Dri Rom 12:21: “Nana en jab anjo jen yuk, a kwon anjo jen nana kin emõn.” Unjen nana otemjej ej Setan Devil eo. (Jon 8:44; 1 Jon 5:19) Ilo nan ko an Jisõs ñõn dri jilik Jon, ear kwalok bwe dri kabit ro jein im jãtin “r’ar bõk anjo ion [Setan] kin bõtõktõkin Lam, im kin nan in air kennan.” (Rev. 12:11) Men in ej kwalok bwe wãwen eo emõntata jemaroñ anjo jen Setan im kilan ko an renana rej walok ilo jukjuk im ber in an, ej ilo ar kwalok nan kin nuuj eo emõn kin Ailiñ eo.
Lõñliñ ilo Kejatrikrik Eo
16, 17. Ta eo Dri Rom japter 12 ear katakin kij ikijen (a) wãwen eo jen kajerbal mour eo ar? (b) wãwen eo jej aikwij jerbal iben ro ilo congregation eo? (c) wãwen jej kõmõn ñõn ro kijirãte kabuñ eo ar?
16 Ilo ar kar etale ilo tukaru japter 12 in letter eo an Paul ñõn dri Kristian ro ilo Rom, ear kakememej kij kin elõñ men. Jar katak bwe einwõt dri korijer ro me emwij wujleplok mour ko air ñõn Jeova, jej aikwij pojõk in lelok mour eo ar. Ñe jitõb eo an Anij ej kamakõt kij, jej mõnõnõ in kõmõne men in kinke jejela bwe Anij ekõnan bwe jen kõmõne. Jej bõplolid ilo jitõb im jej kijejeto in kajerbal menin letok ko ar reinjuõn jen dron. Jej jerbal ilo etã buru, im kate kij joñõn wõt ar maroñ ñõn drebij burukuk eo an congregation eo. Jej kwalok karuwainene im bõk iñjake ko an dron.
17 Dri Rom japter 12 ej bareinwõt letok elõñ nan in kakabilek ko kin wãwen eo jej aikwij emakõt ñe jej iion jumae. Ijellokin ar ukot nana kin nana, jej aikwij kwalok wõt joij. Jej aikwij kate kij ñõn mour ilo ainemõn iben armij otemjej im jab kokkure kien ko an Baibel. Jej aikwij jerbale men in iben baamle eo ar, ro ilo congregation eo, ro dri turid, dri jerbal ro mõtar, dri jikuul ro mõtar, im ro jej iion ir ilo jerbal in kwalok nan. Meñe jej iion elap matõrtõr, jej kate wõt kij ñõn anjo jen nana kin emõn, im kememej bwe irenwõne ej kwonan wõt Jeova.
18. Ta nan in rejañ ko jilu rej ber ilo Dri Rom 12:12?
18 Riit Dri Rom 12:12. Ñõn kakobaba iben aolep nan in kakabilek kein rekeie, Paul ej letok bar jilu nan in rejañ ko. Elañe ejjab kin jibõñ eo jen Jeova jejjab maroñ kõmõni aolep men kein. Kin men in, Paul ear rejañ kij ñõn “niknik ilo jar.” Men in enaj kamaroñ kij ñõn lor nan in kakabilek eo an ken karuo, “komin kijenmij” ilo iñtan. Eliktata, jej aikwij kememej wõt kin jerammõn ko rej ber iman me Jeova ej kalimuri kij kaki im “lõñliñ ilo kejatrikrik” eo kin mour in drio, meñe ilõñ ak ion lõl.
Ilo Elij
• Ta eo jej aikwij kõmõne ñe jej iion jumae?
• Ilo wãwen it ko jej kate kij ñõn kõmõn ainemõn, im ewi wãwen?
• Etke jejjab aikwij irenwõne ñõn kij mõke?
[Kajitõk ko ñan katak]
[Pija eo ilo peij 8]
Ñe jej jibõñ ro dri turid, ilo wãwen in jej jibõñ ir ñõn jab kwalok kalijeklok
Pija eo ilo peij 9]
Kwoj kate yuk ke ñõn kõmõn ainemõn iben ro ilo congregation eo?